Jer 49 | XteSC | STEP | Allah Yahwehdi sun Amon mutu neitamai kunge nesala tep, aupu pepra deipu. Aupuda ake. “Sun yuma moupra tenepetepso! Sun Israel yala nesalada, sundi deiprum nyapuda, gum kupka cadi, Gad yala nengdi talepra kunge mutu neitamai ton, sun Israel nyapu ton men kunung do? Sun Israel yala nesaladi, nyapu deiprumpa, dadeidanen yakaramidi deipi nyapu ton men kunung do? Gume akununga cadi, Gad yala nesala kunung mutu neitamaida, warya tep amutu ton bena men kunung do? Gume, sun Israel yala nesala weik tupa kurume. Ange tep nengeda, ware keca deiyo tep, isok si Milkom, er si eremnung nesaladi, Gad mutu yuma talepra kunung do? Ware keca deiyo tep, amutu neitamai domi ati arum yumada, Milkom isok si eremenge nesaladi, bouna di dim pepra kungedi, aisok sipu eremnung do?

Jeremiah 49

Allahdi Amon mutu neitamai kurami nesala wenepkamrenge tep, pepu upu

1 Allah Yahwehdi sun Amon mutu neitamai kunge nesala tep, aupu pepra deipu. Aupuda ake.

“Sun yuma moupra tenepetepso! Sun Israel yala nesalada, sundi deiprum nyapuda, gum kupka cadi, Gad yala nengdi talepra kunge mutu neitamai ton, sun Israel nyapu ton men kunung do? Sun Israel yala nesaladi, nyapu deiprumpa, dadeidanen yakaramidi deipi nyapu ton men kunung do? Gume akununga cadi, Gad yala nesala kunung mutu neitamaida, warya tep amutu ton bena men kunung do? Gume, sun Israel yala nesala weik tupa kurume. Ange tep nengeda, ware keca deiyo tep, isok si Milkom, er si eremnung nesaladi, Gad mutu yuma talepra kunung do? Ware keca deiyo tep, amutu neitamai domi ati arum yumada, Milkom isok si eremenge nesaladi, bouna di dim pepra kungedi, aisok sipu eremnung do?

2 Ange tep nengeda, ne Allah Yahwehdi aupu tek sisi pepsene. Ne tenemsi tumi konum yaryopda, ila upu di pepnepa, Amon mutu kunge nesala, sun pona tep yu neng, Amon yala nesala tep poryankamenge. Nedi go karepnepa, amutu neitamai, ‘Nun deiyo mutu ake,’ tenenung ila ati arum, amutu er si Raba mutuda, popra sikke buktapkamenge. Tonda, amutu neitamai, nimi ati yuma cap, nesala yuk-yuk kunung metek mutu yuma capda, ayu nengdi uku dongopmengepa, uku di akati yuma jepra gawal dakamre.

Ukupre pangeda, Amon yala nesala kunge mutu yumada, walangyopu kupkamre. Ukupmenga deiki di, pumun taru yuk mutu nengdi, Israel nesala taleami tu dalupra dopromitopu, amutu tu yumada, Israel nengdi kange di tamupra dopropkamenge. Ne Allah Yahwehdi konum pepmasena tep, ange yumada nong kupkamre ja!

3 Uo, Moab tara neitamai dinin, sun Hesybon mutu kurum nesalao, mali pepra engepkurume! Deiyoda, sun mutu damai kwamu mutu, Ai mutu peda, yu nengdi konum popra sikke buktapmanga tepa! Ange utopu, uo sun ila ati arum, sun Raba mutu neitamai kumum nerapu-nerapu yuma peda, ila upu di pepmumdi engenapu kumumdi, sun nong bol deikida, tema di sek-sekra tamdankamrume. Ukupmum dingeda, ‘Uo, nun tara neng konum poptapmang adano’ tenen, sun telep opkal kenengrum ngeda, kwiriptapra pio mali opkal, er si kain karungpu kenengkamrume.

Ada, ‘Nun tara neng tep bicaue’ tenen petenkemna tep, mali opkalpu kepkamrume. Ukupmum dingeda, kange mun kange douna cap, kange wang-wang pena cap, kupmumdi, sepra ortara benapna, atara yanapna kemtonkamrume. Ukupra kunkamruma deiyoda ake. Ada, sundi si eremrum isok, er si Milkom cap, er si eremna tep deiyo neng, sun isok si eremenge imam-imam neng cap, apel dona tep melimna neng cap, sun mutu popra sikke buktapkamseng nengdi, anesala yuma ateng koupmengedi, sun pe mutu tamupra dubenkamenga tep, sun yuma engenapu kunkamrume. Aneng douprapmengedi yuk mutu derirbengepa, dakunkamenge!

4 Uo, tek sisi sunda Allahdi pesere upu moupra gekena gum di, er tep yanitamnapu kurume. Ukupmantoda, tenpu ngebodi deiamre ner nyapu, sun nai bo tapmengedi, yuk mutu baramengtopu konum kurume. Ukuruma tep nengeda, sunda warya tep, aupu tupa perum do? Ada, ‘Gume, nun mutu tuda, pio telep sukun tu kurura cadi, teleppu kunkamepe. Nun putoda, weik kuserura cadi, teleppu kunkamepe,’ tenen, tupa peruma tep pepne. Tek sisi ngeda, sun puto konum gum kupbanmasera cadi, sun mutu tu yuma peda, mali kupkamsere.

Sunda bicaue! Menop taru dordi dipra, ataru neitamai yuma peda, sundi, ‘Gume, nunda isomka neng kunupa cadi, yuk mutu yu nengdi, balila kupmengedi, nun tara men poryankamsenge. Sunda warya tep, sukun tu cap, isomka keca talerum nge cap tepapu teka tenenmarum do? Tek sisi ngeda, ware peptum do? Tonda, nimi tenpu ngebo ila di ali dangna gum ngebodi poryasetu do?

5 Sunda, ‘Ware mutu nengdi balila kuptengedi, nun mutu poryasetenge do?’ tenen, salnong-nong upu peramrum dinin, ukutaruda, ne Allah Yahwehdi ^{▼▼Allah – Acada, Ibrani upu deiki di, Allah er si tep, ‘Yahweh’ cap, tonda, ‘Adonay’ cap, ‘Sebaot’ cap, pepra sekya cadi, sun kael kemna tep, nundi aupu weneri deiyo ngeda, konum jenek kupra sekmepu.} sun pona tep, sun dana-dana tara kunge neng dokotepsenepa, sun Amon tara nesala tep, mar poryankamsenge. Neda im deiki kunge jen talena malaikat yuma, sun deiyo ngebo kununa cadi, neda ila puto ngebodi pepsene. Neda akeca-keca yuma talepra, deiki tara erepra kununa cadi, ne tenene keca yumada, tek sisi angepu kunune.

Atep wenepsene taruda, ila kwar kuna keca, sun damai yana kunkamsere. Ukupserepa, sun kange dipru adipapu buluksakrepa, sepra benkamrume. Sun yuma yuk-yuk, ‘Ne dipapu lyepdatene’ tenen, pio pe deipra benkamrum dinino, amenda taruda, sun kange dipapu bulupra tenpai deipmanto deiyo nengda, men yana melimkamsenge.

6 Sun wenemna tep ikin keca karepkamsen dinino, amenda dorkunkamre taruda, ne Allahdi, sun Amon yala nesala tep, kange di ton cap telep kweipkamsene. Ada, menop taru teleppu kuramrumtopu, amenda taru peda telep kupra deipkamsene. Atep neda, Allah Yahwehdi, apu konum pepra deipmasena cadi, ange yumada tek sisi nong kupkamre ja!”

Allahdi, Edom mutu nesala tep wenepkamrenge tep, pepu upu

7 Ne Allah Yahwehdi, im deiki jen talena malaikat yumada, sun deiyo ngebo kununa cadi, ila puto weik ngebo kunune. Nedi, sun Edom tara kurum nesala tep, aupu pepsene. Edom tara neitamai dinin, ila ati arum doramyai Teman mutu neitamai kunge nesaladi, moupra men tenepmengedi ila kael deiki di pepmanto upuda, konum gum kupupa, men penungada warya tep do? Tonda, ‘Moupra tenepmepedi, bouna dipu pel donkamepe’ tenen, telep kuna upupu penge deiyo nengda, sun mutu tupa men kunung do? Sun ila kael keamya deiki di perami upu yumada, konum gum kupmar do? 8 Uo, sun Edom tara neitamai dinin, iknapi dam tara (arah selatan) Dedan mutu neitamai kurum nesalada, sun adipapu tamuprapmumdi sepra benkurume! Sundi, ‘Uo, ila ikin keca nun damai yaserepa, kange mun kupserur’ tenen, sepra bemum dingeda, pio moupra inipkurume. Deiyoda ake. Ada, ne Allahdi, sun co puna ngebo Esaudi deipupa, dadeipdanen baramidi, ataru derisenung nesala yumada, poprapnedi sikke buktapkamsene. Deiyoda, nedi sun wenemna tep tumi konum damai kupmara tepa.

9 Uda ukupmanto upu ton pepkusene. Ada sun tenipetepso! Sun pel melimna nengdi, ‘Amutu neng, sun anggur tapu du dakra kipkupe’ tenen, yangedi pel dopmengopda, anggur tapu deiki, mangkau di men epidi tapi anggur tapu du ton, yambulanun tupa ton akapkamre. Tonda, upula don neng, lukunda neitamai yangedi, sun, ‘Akati kunge nesala, sun bung kecada, upula dopropkupe’ tenen, putaprepa, ange tenepmengedi, tek sisi epmenge kecapu, dalupra doronung dinin, sun mangkau di men epmenge kecada, ton tamnunge.

10 Dinino, ne Allahdi kupkamsen ngeda yuke. Ne dingeda, Esaudi deipupa, deipdanen banung nengdi talepra kunung keca yumada, gum kupra deipnedi tenpunge peda ton pio men kupkamre. Tonda, amutu nesaladi, ‘Uo, popserur’ tenen, sun inipmantoai ngeda, pio men kupkamenge. Nimi inipmantoai yumada, nedi katuai kupra deipkamne. Ukupne pangeda, sun pona tep nengdi, sun Edom tara kunge nesala yuma cap, sundi derirami nyapu cap, sun kayapu neng cap, tonda sun meneng damai ati neng cap yumada, popmengedi, gum kupra deipkamenge. Ukupmengopda, sun yala nengs yumada, tenpu ngebo peda, gam pio ton men kunkamenge. Yuma poptapnapu kupkamenge.

11 Uo, sun Edom mutu kurum nesalao! Sundi deiprum dinin, amenda lyan kunkameng nyapu yumada, ne damaipu tapkurume. Ukupmumpa, nedi sun alyan nyapu tep moupra peinkamne. Ange utopu, sun damai kunge solu nerapu peda, ne damaipu deipmumpa, nedi kalekra peinkamne. 12 Ange deiyoda, ne Allah Yahwehdi pepsene. Mali keca talepra, men kupmarepapu, er deiki aikin keca yana dopropkamre ngebo peda, ikin keca dopropnapu kupkamra cadi, sun yuk Edom mutu tara nesalada, tek sisi mali kun keca weik talepra kuramruma tep, sundi kange mun keca dopropmumdi, ikin men kunkamrum do? Gume, teka sun yumada, tek sisi ikin keca weika di doronapu kupmumnyopda, kange mun kange doupra kunkamrume!

13 Apepmasen upuda, tali men peptapmasene. Ange gum dinin, ne Allah Yahwehda, tek sisi ne pe si deiki di, pedina upu konum pepmasene. Ada, Edom mutu tara neitamai dinin, sun ila ati arum domrumdi, ‘Nun mutu ila deiyoda aca’ tenen, Bozra mutu ati arum neitamai kunge nesala peda, sun yumada gum kupra deipkamne ja. Ukupne pangeda, yuk mutu nengdi amutu ila ati arum domyai epmengopda, sundi, ‘Uo, uo, Allahdi anesala sun wenemna tep, popra sikke buktapu ngeda, ila ikine,” pepra, mali penkamenge.

Ton neng dingeda, sun amutu nesala tep, nyek-nyek pepra autupkamenge. Ton neng dingeda, sundi, ‘Nun songe,’ tenenge nesala tep, ‘Edom tara nesala tep, Allahdi wipdongopudi, poptaputopu, sun peda poptudi, tapsetu,’ pepra, sun deiki mali upu pepra wipdongopkamsenge. Ukupnepa, nimidi autunkamenge tonda sun anesala si deikida, widongona utopu kunkamenge. Edom tara mutu neitamai domi ati arum yumada, uruptapmengepa, walangyopu kupkamre ja. Tonda, amenda taru peda, akati arum yuma, kange di ton cap, lepsisikra pio men dopkamenge. Nedi sikke bukra tapkamnai yumada, pio tep gum kupkamre.” Allahdi sun Edom tara kurami nesala tep pepu.

14 Ne Yeremia tep, Allah Yahwehdi tenpu upu ton peipneupa, dopropmane. Allahdi peipu upuda ake. “Uo sun yuk-yuk mutu kunge nesala yala-yala yuma tep, ne upu lap pena deiyo neng wepra deipsipa, sun anesala yuk-yuk dinin, sun damai perbenmange. Sundi kai upu penkameng upuda ake. “Sun yuma gekepso! Sun mutu ban-ban yuma kurum nesaladi, sun jen talena neng wepra deipmumdi, Edom tara kunge nesala tep, mar porbenkamrume! Sika di guma! Adipapu ketenepmumdi, Edom tara nesala damai porbenkamrume,” pepra penkamenge.

15 Tonda, Allah Yahwehdi sun Edom tara kurum nesala tep, aupu ton peipseu. Ne Allahdi, sun Edom yala nesala tep, sun puto boun kupra derina keca karepsenepa, amutarapu deipkamsene. Ukupsene pangeda, yuk mutu nengdi, sun tep, ‘Gume, sun Edom tara nesala yuma tep, dabal kuserepa, nun song,’ tenenupe,” pepra mali upu penkamsenge.

16 Menop taruda, sun Edom tara nengdi, yuk-yuk mutu nesala tep, balila kupra, ‘Sunda mar poryankamsepe,’ pepra, yu upu peprumpa, sun yuk-yuk mutu nengdi, kwar weik kuramupa, nong yuma moropsemnapu kuramu. Tonda, sun Edom tara nesaladi, sun pe kange tenena deiki di, ‘Nunda pio telep neng kunupe,’ tenepdarumdi, sun kange dipru gememumdi, tali upupu pedaramrume. Ukupra salnong-nong kuramrum dinino, ukutaruda, sundi yuk neng tep, kwar tenenapu kunmarumdi, ‘Yuk mutu nengdi yana popsenung’ tenen, gel imir damaipu inimberume. Tonda, ‘Nunda amutu dup deiki tara kunmapa cadi, nun pona tep nengda, amutu deiki men welepra popsetenge,’ tenerum dinino, ne Allahdi sun dopra amutarapu deipkamsene.

Ukutaruda, sunda gel tekromya pumbon inipra kunmarume. Tonda, mutu deiki di gopda pepra karenai kunmarum dinino, pio amutarapu deipkamsene. Sundi ila mutu dup weleptumdi, seng-seng pena ma, er sida Raja wali, er ati pio lyom co duppu doramretopu kupra, doptuma peda, adomumpanen, ne Allah Yahwehdi dopra, sunda amutarapu dokotepkamsene. Ange yumada, ne Allah Yahwehdi pepmasena tep, tek sisi kupkamre ja!”

17 Ne Allahdi ange yuma konum kupnyopda, yuk mutu kunge nengdi Edom tara mutu epmengedi, ‘Uo, uo, Allahdi anesala sun wenemna tep, popra sikke buktapu ngeda, ila ikine,” pepra mali pepmengedi, kwar weik kunkamre. Ton neng dingeda, sun mutu nesala cap, sun mutu cap epsengopda, sun tep, nyek-nyek pepra, autupsengedi, ‘Uo, anengo, sunda pio mali kurami,’ pepra, mali penkamsenge. Edom mutu neitamai embankameng yuk-yuk nesala yumadi, ange kunmarepa epmengedi, ‘Uo, Edom mutu ila kange mun keca, sun damai yau ngeda, pio mambule’ tenena cap, kwar kuna cap, kunkamre.

18 Edom tara mutu yuma mali kupra deipnyopda, akupkamre ngeda pumun taru Sodom mutu cap, Gomora mutu cap, sun damai kurami nesala cap, popsidi, pio mali kweipsipa, amutu neitamai yuma gum kupra deiamsitopu, amenda taruda Edom mutu yuma tep, utopu mali kweipkamne. Amutuda walangyopu kupkamre. Ukupkamne taruda, amutu neitamaida, acada nimi tenpu ngebo ton, pio men kunkamre. Ange yumada, ne Allah Yahwehdi, akonum pepmasena cadi, ange yuma nong kupkamre ja, pepsene.

19 Tonda, Yordan me embeua pirman tara, bura tara di, ila yu singa pus gupra, domba bisam di sun betei batu jeramengai tengyaredi poramretopu, ne peda dato-dato di Edom mutu yankamne. Ukupra tengyanedi, sun Edom nesala tep, sun mutu neitamai kunkamengai di enepra dokotepnepa, sun sepdara bendopkamenge. Konum bendopmengopda, ne Allahdi, ‘Angebo wepra deipkamne,’ tenenetopu, amutu neitamai talepra kuredi, nimi deiyo kepra, upu penkamre ngebo tep, wepra deipkamne. Angeda tali tep men pepsene. Ne puto weik kunetopu, ware ngebo ton akurur do? Tonda, ware ngebo do kwar tenena gum, balila kupra ne ila di tenepne keca tep, ‘Gume angeda men kuptume,’ pepra upu seknetu do? Ange utopu wareto nimi deiyo ngebo ton, ne upu yanipnetudi, bisbisa kepnetu do? Gume, tenpunge peda, men kurure. Ne tenenetopu kunune.

20 Ange tep nengeda, sun moupra gekepkunerume. Ne Allahdi, ‘Ukupkamne,’ tenepra, sun Edom nesala wenemna tep, kupkamne keca cap, tonda sun Teman mutu neitamai kunung nesala wenemna tep, ‘Ukupkamne,’ tenepsidi kupkamne keca cap tep, sun moupra gekepneso. Go karepnepa, yuk mutu yu nengdi, anesala sun nyapu yumada tomopra dubenkamenge. Ukupmenge pangeda, sun Edom mutu nesala yumada, gum kupkamenge. Nedi sun tep gum kupra deipkamne ja! 21 Edom mutu neitamai kunung nesala yuma gum kupra deipkamne taruda, ila kange mun lelim penmangepa, pio karen mutu nengdi alelim gekepkamenge. Tonda, mutu ban-ban yuma lokamre. Aila di ngolokra engenkamenge nge yumada, ila laut mokon er si Laut Gelagah ^{▼▼Gelagah – Alaut er sida butene. Tonda, alautpu dinin, Laut Teberau ton penunge.} damai kunge nesala yumadi gekenkamenge.

22 Ukupmantoda Raja wali madi, ‘Yambul ma popra jepkun’ tenen, er pol di lakra sepdara yaramretopu kupra, sun yuk mutu yu jen nengdi, ‘Bozra mutu neng popkup’ tenen, menmena poryankamenge. Yu cap, puto capdi, poryankameng taruda, sun Edom mutu neitamai jen talena neng yumada, kwar weik kupredi, sun puto gum kupkamre. Ukupmantoda, nerapu mundu douamenganen, mi deipkunge taru, pu weik jerepa, sun puto gum kupredi boun kuramretopu kupkamenge.”

Damsyik mutu ikin keca deipkamra tep, pepu upu

23 Allah Yahwehdi Damsyik mutu neitamai kunge nesala tep, pepra deipu upuda ake. “Ada, Damasyik mutu damai dinin, Hamat mutu neitamai kunung neng cap, tonda Arpad mutu kunung neng capdi, bamur upu ton gekepmengopda, sundi, ‘Uo, angeda mambule,’ tenena cap, kwar kuna cap, kunkamenge. Ada, yuk nengdi, ‘Damasyik mutu nesala konum popmange,’ pepra, bamur upu ton pepmengepa, gekepmengedi mali kange doupra, tenimtonapu kunkamenge. Sun anesala dipru neitamaida, bouna di dim pepra men kunkamenge. ‘Uo, ware kupkamep do?’ tenen, kange mun kange douna cap, kware kuna cap, kange wang-wang pena cap kunkamenge. Ukupmantoda, kumanya puto di pung peprepa, ila laut mokon deiki me kait ila puto di weleramretopu kupkamenge.”

24 “Damsyik mutu neitamai kunge neng yumadi, ‘Uo, ware kuptepe do gume,’ tenepmengedi, ‘Yuk mutu sepdara bendopkamep’ tenen, piripetepkameng dinin, ange tapmengedi, sun pe mutupu dakunkamenge. Deiyoda, ataru di sun puto boun kuprepa, sun kwar pio weik kupkamra tep, adipapu sun dipru bulungsangrepa, kange mun kange doupra kunkamenge. Men sepdaro benmanto kupkamenge. Ukupmantoda, sun, nerapu mundu douamenganen, mi deipkunge taruda, mi deiyo pu jenmarepa, pu doramengtopu, sun Damsyik mutu kunge nesala yuma peda, ange utopu kupkamenge.

25 Ange ukupyopda, yuk nesala yumadi, “Uo, Damsyik mutu yumada, mutu-mutu yuma dakunge nesaladi, konum kael keamepu dinin, ukutaruda, Allahdi sun wenemna tep, er kange dipru neitamai dipapu, ‘Amutu nesala kaukeptapkun’ tenen, anesala konum tapmar adano,” pepra, mali penkamenge. Menop taruda, Damsyik mutu nesalada, teleppu kuramya cadi, sun pingping kange doupra kurami dinino, ukutaruda, sun yumada kange deipra men kununge. Ikin kangepu doupra kununge. 26 Ne Allahdi amutu nesala wenepkamne taru neitamaida, Damsyik mutu kunge kaber neng yumada, amutu neitamai ila bisi embanungaipu saka dourbena depkamenge. Tonda, amutu jen talena neng yumada, tenpu tumi deiki dipapu, yuk mutu yu nengdi, yana popmengedi, sikke buktapkamenge. Amutu jen neng yumada, gum kupra deipkamenge.”

27 “Ne Allah Yahweh, ^{▼▼Allah – Ibrani upu deiki di, akayat neitamaida, Allah er si tep, ‘Yahweh Sebaot’ pepra seki. Sun kael kemna tep, aupu ‘Sebaot’ pena deiyo ngeda, katuai di sekmepu.} im deiki kunge jen talena malaikat yumada, sun deiyo ngebo kununa cadi, ne puto pio weik ngebo kunune. Atep, ne dipapu, Damsyik mutu neitamai, ila uku dongopkamne. Auku bo di jenmaryanen, sun men taru di, ila gat gel dopra, beilya wipra deiami tembok-tembok yuma cap, tonda sun nimi deiyo ngebo Raja Benhadad, er ila telep ati, er si istana-istana yuma cap, uku jeprepa gum kupkamre. Neda, Allah Yahwehdi, aupu konum pepmasena cadi, tek sisi nong kupkamre ja!”

Kedar yala neng cap, Hazor mutu neng cap, sun damai ikin keca yankarenge tep, pepu upu

28 Uda, ne Allah Yahwehdi, Kedar yala neng cap, Hazor mutu neitamai kunge nesala cap tep, aupu ton pepsene.

Ada, nimi deiyo kepra, Hazor mutu kurami nesala cap, sun mutu cap, Raja ngebodi taleamunge tep aupu pepra deipsene. Hazor mutu yumada, Babel mutu talepra kuramu nimi deiyo ngebo, Raja Nebukadnezardi poramudi, dalupra dopromu. AHazor mutu tep nengeda, ne dingeda ukupkamne. Yuk mutu yu jen talena neng tep, “Sun menmena tekromumdi, ormutu, Kedar yala neng kunung mutu porbenkurume. Ada, keteng yakan tara mutu neitamai kunung nesala yuma tep porbemumdi, anesala yuma adipapu popmumdi, gum kupra deipkurume!

29 Ukupmum dingeda, sundi talepra peinung gam keca domba bisam cap, unta bisam ^{▼▼unta – Akeca gambar dina tep, Kejadian 12:16 dinkurume.} cap, sundi opkal bol di domi tenda ati-ati yuma cap, amutu nesaladi taleami bung keca yuma cap, dalupra dopropkurume. Ukupmum pangeda, sun atara kunge nesala yumadi, ila upu deiki di pepkamenge. ‘Uo, uo, ila kange mun keca nun damai konum yanmaser adano! Nunda ila kwar kupmasere!’ pepra, ngolokra engenkamenge.”

30 “Ange tep nengeda, ne Allah Yahwehdi, sun Hazor mutu kurum nesala tep upepsene. ‘Uo, uo, sun adipapu bura saka, yuk mutu sepdaro benkurume! Tonda, pio karen mutu bemumdi, yuk nengdi men epmantoai pio inimbenkurume. Kware kuprepa, inimbenkuruma deiyoda ake. Ada, Babel mutu taleamu nimi deiyo ngebo, Raja Nebukadnezardi, sun Hazor mutu kurum nesala tep, ‘Aneng porbenkamne’ tenen, ‘Ukupkamne, ukupkamne,’ pepra, upu konum sisikudi, ketenepmara tepa.”

31 “Dinino, nedi Raja Nebukadnezar tep upepne. ‘Gume, kanda, ‘Amenda taru,’ tenena gume. Adipapu sun Hazor mutu kunge nesala tep, menmena porbenkurume! Sun Hazor mutu nengda, sun bouna di tali kange deipra kununge. Tonda, sundi domi ila ati arumda, gel beilya ton men wipra deiamya cadi, kanam dipapu, sun mutu wekmemdi, poptume. Tonda, sun melipmanto nengda, damai men kununge. Sun Hazor mutuda, yukaipu kurure. Tonda, sun mutu wengbana tep bisi buplanda, gat keca besi di deipra men dopidi, pio men lelipya cadi, kanam dipapu porbetume.

32 Ukupra kununga cadi, sun anesaladi talepra peinung gam keca yala-yala yuma cap, unta bisam cap, sapi bisam cap, yuknge yuma capda, dalupra dopropkurume! Tonda, anesala cap, tonda amutu neitamai sun amol deiki tara potongda buma di toupi nesala yumada, nedi yuk mutu dana-dana enepra dokotepnedi, ikin keca weik karepkamne. Ada, ne Allah dipapu ila kange mun keca dopra, sun anesala damai deipkamna deiki di, sun kunungai dinin, dana-dana tara yuma di, yuk-yuk yala neng yuma peda, ikin kecada dopra, sun deiki deipkamenge.”

33 “Ukupne pangeda, Hazor mutu neitamai yumada, amutu nesala popnepa, gum kupmengopda, sun mutuda, pio tep gopu kupredi, walangyopu kupkamre. Ukupre pangeda, amutu neitamai yumada, bura tara gam kure kam, inimbana mutupu kepkamre. Ukupkamne mutu neitamaida, nesala tenpu ngebo peda, ton pio men kunkamre. Amutu tu peda, pio mali kupra deipkamne. Neda, Allah Yahwehdi, akonum pepra deipmana cadi, angeda nong kupkamre ja!” Allahdi pepu.

Allahdi, “Elam mutu nesala yuma tep, ikin keca dopra deipkamne,” pepu upu

34 Uda, Yehuda mutu yuma talena tep, Zedekiadi nimi deiyo ngebo, Raja kepra deipu, ukupudi gonga kepu taru, Allah Yahwehdi ne nabi Yeremia damai yana upu ton peipneu. Ada, Elam mutu neitamai kunge nesala, sun wenemna tep upu, yana pepra deipneu upuda ake. 35 Neda, Allah Yahweh, im deiki kunge jen talena malaikat yuma, sun deiyo ngebo kununa cadi, ne puto weik ngebodi pepkune. Ada, sun Elam mutu neitamai kungedi, nimi pona tep keca, mar cap, jen capda, nimi pon keca yumada, ila di kael keamya cadi, sunda ila puto neng kununge. Dinino, ne Allahdi, ajen talena neng yumada popra gawal dakamne.

36 Ukupkamne taruda, ne Allahdi, ‘Elam mutu neitamai kunge nesala yuma, enepra dokotenepa, dana-dana tara yuma, sepdaro bengedi, gum kupkamenge’ tenen, nedi im deiki kure kumanya, ila putonge dopra deipnepa, dana-dana tara yuma dokotepkamne. Ada, nedi upupnepa, Elam mutu dana-dana tara di, yuk mutu yu nengdi, yana popkamenge. Ukupmengopda, Elam mutu neitamai kunung nesala yumada, kware kuprepa, dana-dana tara mutu yuma neitamai, sepdaro bendopkamenge. Ukupne pangeda, sun pe mutu tapmengedi, amutu dana-dana tara kure mutu yumada, sundi bena kunkamenge. Tenpu mutu peda, ‘Amutu bena men kunkamepe,’ tenen, men kaukepkamenge.

37 Tonda, Elam mutu neng pona tep, nedi dokotepkamne yu neng, ‘Elam mutu nesala popra, gawal dakupe’ tenen, sun damai yangopda, Elam mutu nesala yuma epmengedi, kwar weik kunkamenge. Angeda, ne ila yu kunerenge tep, sunda pio ikin keca karepkamna deiki di wenepkamsene. Atep, nedi upupnya deiki di, yuk mutu yu neng, sun nimi pon parang ya doupmengedi, sun Elam mutu nesala tep, porbenkamenge. Deiyoda, nedi sun tep wenepnedi, popra sikke buktapkamna tepa. Atep nedi peipnepa, sun jen talena nengdi, sun Elam nesala tep aporamenganen, anesala yuma konum gum kupra deipmengepa, sun mutu neitamaida, pio tenpu ngebo peda, ton gam men kunkamre. Ne Allah Yahwehdi aupu konum pepmasena tep, tek sisi nong kupkamre ja!

38 Ukupne dingeda, sun mutu nimi deiyo-deiyo talepra kunge neng, Raja-Raja cap, aneng amutara pel dopra, deiyo talena neng cap, sun aneng yuma konum poprapnedi, sikke buktapkamne. Ukupnedi, nimi upu bongdina cap, atara mutu yuma talena cap tep, Elam mutu neitamai, ne nimi deiyo ngebo bungna tep telep keca, er si tahkta, dopra deipkamne.

39 Ange yumada, tek sisi, apepmasentopu kupkamne. Dinino, amenda dorkunkamre taruda, Elam mutu tamupra telep kweipnepa, sun menop taru pio teleppu kuramitopu, kange di ton cap telep kupra deipnepa, anesaladi telep kange doupra, teleppu kunkamenge. Aupu yumada, ne Allah Yahwehdi, akonum pepra deipne. Allahdi pepu.