Jer 5 | XteSC | STEP | Allahdi ne nabi Yeremia tep upepneu. Yeremiao, kanda ila ati arum dopra, kurum mutu, Yerusalem mutu neitamai yumada, bisi orbenapna, atara yanapna kememdi, dipeteprap embenkurume! Tonda amutu neitamai yuma, kan asuru di dipetememdi, ‘Amutu nesalada, ukupra kununge’ tenen, kael kepkurume. Nimi bulupra wengmengai yumada, dipembememdi, tenpu ngebo ton, Allah tep, pio teka tenepra, dumsisi kuna cap, tek upu putana cap kuramre ngebo ton, ‘Tenpu peda akurur do, gum do?’ tenen, dipetepkurume. Amutu neitamai, dipetepra embamempa, ato ngebo ton tenpu akuramrepa, epmemnyopda, lape pepkamnerume. Dumsisi kuna cap, tek upu putana cap kure ngebo akapyopda, Yerusalem mutu kunge nesala yumadi, mali-mali weik kunge kecada, ne Allahdi men wenepkamsene. Sun mali kunange kaukepnedi, gum kupra deipkamne.

Jeremiah 5

Yerusalem mutu nesala yumadi mali weik kuramya tep, pepu upu

1 Allahdi ne nabi Yeremia tep upepneu.

Yeremiao, kanda ila ati arum dopra, kurum mutu, Yerusalem mutu neitamai yumada, bisi orbenapna, atara yanapna kememdi, dipeteprap embenkurume! Tonda amutu neitamai yuma, kan asuru di dipetememdi, ‘Amutu nesalada, ukupra kununge’ tenen, kael kepkurume. Nimi bulupra wengmengai yumada, dipembememdi, tenpu ngebo ton, Allah tep, pio teka tenepra, dumsisi kuna cap, tek upu putana cap kuramre ngebo ton, ‘Tenpu peda akurur do, gum do?’ tenen, dipetepkurume. Amutu neitamai, dipetepra embamempa, ato ngebo ton tenpu akuramrepa, epmemnyopda, lape pepkamnerume. Dumsisi kuna cap, tek upu putana cap kure ngebo akapyopda, Yerusalem mutu kunge nesala yumadi, mali-mali weik kunge kecada, ne Allahdi men wenepkamsene. Sun mali kunange kaukepnedi, gum kupra deipkamne.

2 Uda ne kaele. Sun Yerusalem mutu kunge nesaladi, upenunge. “Gume pio tek sisi pepmepe. Nun nai Allah Yahweh, tek sisi tupa gam kuramretopu, nundi tek sisi pepmepe. Erdi pesere upu moupra talepmepedi, dumsisipu kunkamepe,” pepra, tali sipyal deiki di pertamnung dinin, sundi tali upu dipapu penenunge. Ne kaele, sundi apenunga utopu, pio men kununga cadi, mok upupu penenunge. Allah Yahwehdi, nabi Yeremia tep pepu.

3 Upepneupa, ne Yeremiadi tamupra pepsi. “Uo, ne nai Allah Yahweh. Ne kaele, kandi, nimi tep, ‘Ware kunkameng do?’ tenen, putakerur ngeda, kan tep teka tenepra, pio tek upu pena cap, dumsisi kunange cap, angepu putakerure. Kanda Allahdi sun mali kunge nesala konum wenepra popsemum dinin, sunda, ‘Tek sisi Allahdi ukuserure,’ ikin kange doupra men tenepra kununge. Tonda, sun wenemna tep, ikin keca weik deipsemumdi popsemumpa, nimi weik konum deami dinin, ange peda sundi men kael kemnunge. Sunda, balila weik tupa kupseua deiki di, kandi, ‘Angeda kunkamrume, angeda pio men kunkamrume,’ pepsememnya peda, ange gekena gum dipapu, sun mali kunge kecada, men tamnunge. Ukupmantoda, sun urasinda, gat gel utopu kupra kununga cadi, kandi pesemem upu pio men gekenunge. Sun mali kunge keca tapra, amnyo karikra, kange di dumsisi kun bisi men banunge,” pepsi.

4 Upepsi dingeda, ne Yeremiadi tenenun ngeda, pepsi. Ada, “Uo, ne nai Allah, sun amutu neitamai kunge nesalada, tek sisi tali kan-kan nesala kungedi, pio walwal nesalapu kununge. Sun kunge keca yumada, walwal deikipu kununga cadi, kan Allahdi, ‘Angepu kunkamrume. Telep kuna ngeda, ake,’ pepra pesemem upuda, sunda tek sisi, moupra men tenepmengedi, men kael kemnunge. Kanda, sun nai bo Allah kurum dinin, kandi moupra, ‘Dumsisi kuna bisida ake,’ pepra peterepsemum ngeda, kael kemna gum di, ‘Angeda tek sisa’ tenen, moupra talepmengedi, men kununge,” pepsi.

5 Upepsidi, ange ton tenepsi. ‘Ukutaruda, ila-ila neng, sun isomka neng damai benedi, sun cap, upu sisikamepe,’ tenepsi. Ne kangeda, ‘Tek sisi sun isomka nengda, sun si eremnung Allahdi, ‘Angeda ukunkamrume, angeda pio men kunkamrume,’ peipu upuda, sundi konum kael keamidi, angepu talepra kununge,’ tenepsi. Dinino, aneng damai besidi, upu sisikmepupa, konum kael kepsi. Ada, sun anesala peda utopu, kan Allahdi, ‘Ukunkamrume,’ peiamsemum upu yumada, sundi, ‘Angeda, nun songe. Allahdi peserur upuda nun dabale,’ tenepra, aupu yaninapu kununge. Aupuda, moupra talepra men kununge. Ukupmantoda, nimidi, ‘Tapu di nun sapi bisam gerekmepedi, telepai gipra dubenkamep’ tenen, tapu gerekmenge dinin, asapi bisamda, balila kupredi, yu kuprepa, atapu buluktapredi, er yuk tenepretopu, sepra baramretopu, sun anesala peda, sun kange tenenangepu, tali lupra kununge.

6 Uo, sunda bicaue! Balila kupmengedi, mali kecapu talepra kununga cadi, atep nengeda, kange mun keca sun damai yankamre ja! Ukupmantoda, bura tara gam kure keca, ila yu weik pus, er sida Singa Pus, utopu keca yaredi, sun nong yuma poprepa depkamenge. Tonda, me cap, nimi cap gumai, mutu katawai kure keca, er sida Serigala do, pio yu kam do, ange yaredi, amutu nesala yuma popra gawal dakamre.

Ukupmantonge ton, bura mutu yu weik kure keca, er sida, Macan Tutul amutu neitamai domi ati arum kunge nesala tep, ‘Popra jepkun’ tenen, yaredi, kalengkamre. Atep nengeda, ware ngebo do yuma, akati arum neitamai di, gupra bura mutu embangopda, ayu kecadi sun embankameng nesala ponkamra tep, moupra kalekamre ja! Ange ukupkamra deiyoda, sun dia. Ada, sundi, mali keca weik talepra kununge.

Tonda, sundi Allah tep, “Naio, kan tara nengpu kunkamepe. Kandi peserum upupu moupra talenkamepe,” perami dinino, ataru-ataru yuma, Allah tep, amnyo kepmengedi, Allahdi, ‘Angeda kunkamrume, angeda pio men kunkamrume,’ peiamseu upu yaninunga cadi, ikin keca weik sun damai yankamre ja! Ne Yeremiadi upepsi.

7 Upepsipa, Allah er si Yahwehdi aupu pepu.

Sunda pio mali weik kuruma cadi, ne nyapu sisa, ware keca deiyo deiki di, sun mali kurumu keca tep, nedi menmena kaukeptenedi, gum kupra deiptene do? Sun amutu kurum nesala cap, sundi deiprumpa, dadeipdanen yakanung nesala yuma capdi, ne konum tapnerumdi, yuk tali keca tep, ‘Nun nai,’ pepra, isok si eremrume. Nedi, sun jen keca cap, sun putana keca cap, pio weika di kareamsisipa, jemumnya deiki di bouserur dinino, sunda pio mali-mali weik kurume. Ada, sundi konum domrum nerapu tapra, yuk nengdi domi nerapu tali nyangdaramrume. Tonda, amutu nimi weika di, nimi tali-tali nyangnung nerapu, sun kunungai ton dirbamumdi, anerapu damai bemumdi, anerapu cap nyangdarume. 8 Ukupmantoda, sun anesalada, jem kuda bisam, ila nong neramredi, ila galemna kuramre utopu kununge. Ukungedi kuda bisam, ner wal anakurya tep putaprepa, kereng darengedi, puto weik kuramre utopu kununge. Sun amutu nengdi tenenungada, ‘Ne kabodi domu ner, tonda yuk nengdi domi nerapu, upula dopropnedi, nepu dopra nyaktene,’ tenenapu kununge. 9 Sunda pio mali weik kuruma tep nengeda, sun ton tenepetepso! Ne Allahdi, sun mali keca weik kurumu nesala tep, adipapu men wenepra popsetene do? Tonda, sun amutu neitamai kunge nesaladi, mali-mali weik kunge keca tep, kwang dakra men wenepsetene do? Gume, angeda tek sisi wenepra kwang dakamne ja!

10 Atep nengeda, ne Allahdi, sun pona tep nesala, mar pena neng dopra deipnedi, aneng tep, upepkamne. “Amutu kunge nesala, sun anggur wa pepra koupya yumada, mali kupra deipkamrume. Dinino, anggur tapu yumada, kwepkurum dinin, ange yuma men gum kupra deipkamrume. Metekanunpu tapkamrume. Ada, sun amutu nesalada, ukupmanto anggur tapu utopu kununga cadi, atapu teru weik tara ngeda, tek sisi ne Allah Yahweh, ne mawange men kununga cadi, nenge guma tep, weik tara ngeda, sektapmumdi, yatupra tapkamrume.” Nedi, sun mar pena neng tep upepnepa, sun amutu neitamai kumum nesala kan-kan, nimi weika di, popra gawal dangkamenge. 11 Nedi aupu pepkamna deiyoda, sunda ne nyapu sisa, sun Israel yala nesala cap, Yehuda tara kurum nesala cap, sundi, ne tep teka tenepra, pio tep men dombanerume. Sundi ne tamneruma tep, tek sisi kange mun keca doproipnepa, sun damai yankamre ja!

Allah Yahwehdi, Israel nesala tapkamunge tep, pepu upu

12 Ne nyapu sisa, Israel nesaladi, ne Allah Yahweh tep, ne damai mok upu ton penunge. Sundi penenungada ake. Sundi, “Gume, nundi mali kupmepya peda, Allahdi nun damai ton, wenemna keca yala-yala yumada, men karepkamsere. Allahdi ware kupkamser do? Gume, nun damai, ila kange mun pu, nimi jerepa sakdanen nimi weika di denung pu cap, tonda jen keca putana cap, tonda mar pona tep nengdi yana popsenung nge cap, ange yuma men kupkamsere.

13 Tonda, Allah er upu lap pena cap, amenda kupkamrenge lap pena cap pel donge deiyo neng, sun nabi-nabi nengdi pesenung upuda, teka men tenenupe. Sundi, ‘Amenda taruda kange mun keca yankamsere, ukupkamsere,’ pepra, penge upu yumada, tali upupu kurure. Ukupmantoda, kumanya di pung pepra, embaramredi, dim peprepa gum kuramretopu, sun nabi neng peda, tali upupu pesenunga cadi, kumanya embaramre utopu, sundi pesenge upuda, nong gum kupkamre. Deiyoda, sundi pesenge upuda, Allah Yahwehdi sun damai men pepka tepa! Allah er upu ton, sun damai men pepra derirure,” sun Israel nesaladi upenunge. Allahdi sun Israel nesala tep pepu.

Allah Yahwehdi Israel nesalada tapkamra tep, pepu upu

14 Allahdi, ne Yeremia damai, aupu yana pepneu.

Israel nesaladi amali upu penenunga cadi, wenepkamsene. Ataruda, ne Allah Yahweh, ^{▼▼Yahweh – Allah er pe si, tek sisi ngeda, ‘Yahweh’ kurure (Keluaran 3:14). Dinino, Ibrani upu deiki di, akayat neitamaida, ‘Yahweh Sebaot’ pepra seki. Aupu ‘Sebaot’ penga deiyoda, ada ‘Im deiki jen talena malaikat yuma taleredi, sun deiyo ngebo kurura cadi, er putoda pio weik kurure’ tenena tep, asi seki. Atep nengeda, sun kael kemna tep, aupu deiyongepu katuai di sekmepu.} im deiki jen talena malaikat yuma, sun deiyo ngebo kununa cadi, neda ila puto ngebodi pepsene. Ukutaruda, ne upuda, uku jeramre utopunge dopra, Yeremia kan sipyal pumbon deipkamkene. Ila puto di upu penkamrume. Tonda, sun Israel nesalada, ati dongon co toupra deriramenga utopu nesala kepra deipkamsene. Atep ukupmantoda, uku bu di kouluamre co jepredi sikke buktamamretopu, kan Yeremiadi penkamrem upuda, sun anesala yuma jepra gawal dakamre. 15 Uo, sun Israel nesala bicaue! Ne Allah Yahwehdi, nimi yala yuk neng, ada karen mutu yu neng ton, dopra deipnepa, sun Yudea tara neitamai kurum nesala tep, ‘Anesalada, popra gawal dakamep’ tenen, sun damai yana warengyankamsenge. Akaren mutu yala nengda, pio pumun taru dordi akuramitopu, ukutaru peda, tupa pio puto dipapu kununge. Sun upu penungada, sun Israel nesaladi men kael kepruma tep, anengdi penkameng upuda, men gekepmanto kunkamrume. Sun putoda, ila puto weik neng kununge.

16 Sun amutu neng cap, sun jen talena neng capda, puto weik cap, mar dona ila kael cap kunung neng cadi, sunda kwar pio gum, pio balila neng kununge. Sundi nimi ponge taruda, mar pepmengedi, bicau pio men tenenung neng cadi, sun Israel yala nesala pio weika di ponkamsenge. 17 Tonda, sun akaren mutu neng, sun mutu neitamai yangedi, sun Israel nesaladi wa pepra, kouprum jen keca yala-yala yumada, dalupra dopropmengedi, akeca yuma jepra, gum kupra deipkamsenge. Ukupsenge dingeda, sundi derirum sal nyapu cap, ner nyapu cap yumada, popra gawal dakamsenge. Angepu gum dinin, sun Israel nesaladi peirum sapi bisam yuma cap, sun domba bisam yuma capda, popmengedi, atu keca yuma jepra gawal dangkamenge. Tonda, sun anggur tapu du cap, Arah co du cap yumada, kweptapmengedi, gum kupra deipkamenge. Tonda, sun Israel nesaladi, ila ati arum weik doprumdi, ‘E, akonuma, nun podan nengdi akati arum men wekra popsetenge’ tenen, kange deiprumdi, ila lyom gel beilya wipra ongopdongopra deiamrumai yumada, urupra tapmengedi, ange peda, urupmengedi, sikke bukra tapkamenge.

18 Ange-ange yumada, ne tenemsitopu, go karepnepa, ayu nengdi tek sisi ikin keca deipkamseng dinin, ataruda ange kupkamenga peda, ne Allah Yahwehdi, sunda ne nyapu sisa kuruma cadi, sun yuma tek sisi men gum kupra deipkamsene. Sun yala nesalada, yambulanun, gam tupa akunkamenge.

19 Tonda, amenda taru ange yuma doproipsenepa, sunda kange mun kange doupra kunkamrum taruda, sun kan-kan neitamai di, sun kayapu nengdi, kan Yeremia tep asipdankamkenge. Sundi, “Uo, ‘Nun nai bo,’ pepra, er si eremamepu Allahda, er si Yahweh kurure. Dinino, nun nai Allahdi, ware keca deiyo tep, akange mun keca yuma dopra, nun damai konum deipmaser do?” pepra engepmengedi, asipdenkamkenge taruda, kandi anesala tep, tamupra penkamrem upuda ake. “Gume, sun amutu kumumyai di, Allah tep, amnyo karikra tamumdi, amutu neitamai dipapu, tali keca si erepra, men di men kael keamrum isok talepra, sun amutara pel doramrumtopu, akumumya utopu, yuk karen mutu nengdi, popsengedi, ateng koupdongopra, sun pe mutu tamupra dubesenge taruda, amutu nengdi, ikin pel dipsengepa, sun pel melimna nengpu kepra kunkamrume. Akaren mutu neitamai di, sun anesala amutara kupra, ikin pelpu donkamrume.” Allahdi, sun Israel nesala tep pepu. Allahdi nabi Yeremia tep pepu.

Allahdi er nyapu sisa tep, ‘Kael kepkamneng’ tenen, pepu upu

20 Allah Yahwehdi, ne Yeremia tep, aupu yana peipneu.

“Ada sun co puna ngebo, Yakubdi ^{▼▼Yakub – Angebo Yakubda, Israel nesala sun co puna ngebo kuramu. Allahdi, angebo tep, ukupu si ton kareamupa, er si tep, ‘Israel’ si siperami. Ton Allah upu buku neitamaida, ‘Yakub’ sengnunge, ton ayat neitamaida, ‘Israel’ sengnunge. Dinino, angeboda, er tenpua.} deipupa, deipdanen banung neng, Yehuda mutu neitamai kunung neng tep, aupu gekepmemdi, ‘Nimi yuma gekepkameng’ tenen, katuai dipapu, ila upu deiki di lap perbenkamrume. Kandi penkamrum upuda, ake,” pepu. 21 Israel nesalao! Sun yumada, moupra gekepneso! Amutu neitamai kurumu nesalada, walwal neng, sunda, men kael kepmanto neng kurume. Sunda ila mambul keca tep, ‘Deiyo neitamai ngeda ake,’ tenepra, men kael kemrume. Sun asuru akapseu dinino, moupra men dirume. Tonda, sun amul akapseu dinino, telep kupra men gekerume.

22 Sun yuma moupra tenepso! Neda, Allah Yahweh kununa cadi, ware keca deiyo tep, sunda ne tep, kwar men kuserur do? Tek sisi ngeda, sundi ne damai yamumdi, ne tep kwar kupsetupa, ‘Uo, adipapu nun wenepra popsetue’ tenen, sun nong yuma moropsemamsetue! Kange di ton cap moupra tenepso! Ne ila puto deiki dipapu, ila laut mokon derinai ketenepra deipsidi, ‘Amokonda tali emberur’ tenen, amokon wilimdona tep, laut mokon pirman dou tarada, me wenenga er si pasir, konum ketenepra deipsi. Aketenepra deipsaida, laut mokon di deipredi, pio tep, men bisipmanto kunkamre. Atep nengeda, laut mokon me ila di deipredi, mokon puto me kait, ombak tekra welepkamre dinin, pasir pirmanai, men bisipmanto kurure. Tonda, ‘Laut mokon deipredi, bena baripkamre’ tenen, wilipropsaida, men deipra bisipkamre. Acapu pio akunkamre.

23 Dinino, sun Israel nesalada, balila kange deipra bisbisakamrume. Ukupmumdi, sunda giso gat gel utopu nesala kurume. Sun kange dipru neitamaida, ‘Gume, Allahdi pesere upu pio men gekenkamepe,’ tenemumdi, balila weik kurume. Tonda, ne Allahdi, ‘Angeda kunkamrume, angeda, pio men kunkamrume,’ pepra derisenun upuda, men gekemumdi, aupu yumada, yaniptapra kurume. Ange kumumnya deiki di, pio mali kurumdi, tamnerume. 24 Sun akurum nesaladi, sun kange dipru boun kupsetupa, sundi, ‘Uo, nun nai bo Allah tep, tek sisi kware kunkamepe. Er upupu gekepmepedi, angepu talepra kunkamepe,’ pepnetum dinin, ange men tenepra penerume. Tonda, sundi, ‘Uo, nun nai bo Allah dipapu, mo li taruda, mo kareserepa, mo cemrure. Tonda, aketeng tamun, aketeng tamun yuma, mo li cap, wa pepra koun keca gonga kemne taru cap, mo li gawal dakyopda, wa koun keca kinup taru capda, Allah tenepredi, er dipapu ataru-ataru yuma telep kupra kareserure. Allahdi, ‘Ukupkamenge’ tenen, konum ketenepra deiamutopu, tupa kareserure,’ tenen, ne Allah tep, gispal dopnetum dinin, ange peda, pio men tenerume.

25 Ne Allahdi tek sisi pepsene. Sun mali keca weik talepra kumumnya deiki cap, ne upu yanirumnya deiki di cap, aketenepra deipsisi telep keca yumada, yawarapra deipmumdi, telepnge ton men dopra jerume. Tonda teleppu men kurume. 26 Uo, ne nyapuo, sun kumumnya neitamaida, pio mali kuna neng ton weik akununge. Anengdi ukununge. Nedi, ‘Ange kunkamrume, angeda pio men kunkamrume,’ pepra deiamsisi upu pio yaninapu kununge. Tonda, yuk neng sun bung kecada, upula doronunge. Ukupmengedi, ukupmanto, ma youna tep, pena pemengedi, ‘Ware taru youpkamser do?’ tenen, dirbaramengtopu, anengdi yuk neng tep, ‘Aneng tep mali kweipkupe,’ tenenapu kununge. Ange kuramengtopu, nimi pona tep, pena pepra deipmengedi kalengnunge.

27 Ukupmanto ton, ma domna kael nengdi, ma tomopra, ati domenga neitamai ati pumbonpu, ma pio weik kidongomamengtopu kununge. Ada, ange utopu, sun anengdi, minina upu cap, tali pertamna upu cap, mok upu cap, nimi pon upu cap peptapmengedi, ‘Amutu nesala, sun bung keca yuma upula dopropkamepe,’ tenenapu kununge. Sun ati pumbonpu, mali kun keca di pio dekpepra kurure. Amali keca ukunga deiki di, amutu yuma, sundi talepra kungedi, konum isomka weik neng kununge. 28 Sun amali kunge nengda, teleppu kupra kungedi, sun nong galemnada, weik nenge di nong telep kununge. Sun urasin peda, pio telep kununge. Dinino, sun anengdi, mali kunung ngeda, pio men tenipmantonge kungedi, pio men tapmanto kununge.

Pio mali-malinge akaptua peda, sun tenengetopu tali lupra kununge. Sun anengdi, tali lyan nyapu tep nengeda, ‘Amendada, anyapu telep kupra kunkameng’ tenen, dumsisi kupra, telep kunange di sun damai men melipra kununge. Anyapu tep, upu bongmenge taruda, dumsisi kupra men penunge. Tonda, ange utopu, tali kan-kanpu kunung nesala, akeca-keca men talenung nesala tep, yu nengdi mali kupkunge taruda, anengdi, ‘Sun yapso, akankan nesala tep, mali kudina gume,’ pepra, upu men sengnunge. ‘Sunda, dakwapye,’ tenepmengedi, upu men melipra sisingnunge.

29 Uda, sun anesalada ukunga tep nengeda, ne Allah Yahwehdi, sun anengdi akunge keca yuma tep, men weneptene do? Tonda, amutu neitamai kunge nesala, sun pio mali weik kunge keca yuma tep nengeda, nedi wenepra men kwang dakamne do? Gume, tek sisi anesalada, wenepra kwang dakamne ja! Sun menenga tep, kange mun keca karepkamsene. 30 Tek sisi amutu neitamai kure ngeda, ila kange mun ngepu kurure. Tonda, pio ila malingepu, amutu neitamai konum kurure. Akecada, telep kunge nesala yumadi pio men tenepra kuptenge. Tonda ne kangeda, ‘Uo, akecada ne pio songe, ne dabale weik kunerure,’ tenenune.

31 Ada, ne penun upu lap pena pel deiyo neng, sun nabi-nabi neng pedi penung upuda, mok upu deiki dipapu penunge. Nedi men peipsi upu dinin, sundi, ‘Allahdi aupuda, peipseupa, pesenupa,’ pepra tali upupu penunge. Angepu gum dinin, sun mok upu penge nabi-nabi neng, sun pe kange dipapu, ‘Ukupkamrume, ukupkamrume,’ penga deiki di, ne si eremna ati pumbon pel dona deiyo neng, sun imam-imam nengdi, pel dongedi, ne nyapu Israel nesala talepmengedi, sun nong deiki ikin keca weik derinunge. Ange-ange yumada, tek sisi malipu kurung dinin, ne nyapu sun Israel nesaladi, akunangnge tep, kange deipra kurume. Ukurum dinino, sun yuma kange moupso! Amenda sirya gawal dangne taru konum damai kupyopda, sunda ware kupkamrum do?