Jer 50 | XteSC | STEP | Allah Yahwehdi ne Yeremia tep pepra deipneu upuda, Babel mutu cap, Babel mutu neitamai kunge nengdi, sun mali kuraminge cap tep, aupu pepra deipneu.

Jeremiah 50

Allahdi Babel mutu nesala yuma wenepra popkamra tep, pepu upu

1 Allah Yahwehdi ne Yeremia tep pepra deipneu upuda, Babel mutu cap, Babel ^{▼▼Babel – Amutu cap, amutu kurami nesala cap tep, si butene perami ngeda, ‘Kasdim mutu’, tonda. ‘Kasdim nesala’ perami. Dinino, anesala cap, amutu capda, tenpu pua.} mutu neitamai kunge nengdi, sun mali kuraminge cap tep, aupu pepra deipneu. 2 Ada, tuai mutu ban-ban yuma neitamai kunge nesalada, sun yala yuk-yuk nesala yumada, ‘Sun ton kael kepkameng’ tenen, ne pepkuken upu dopra, lap perbenkamrume! Tonda, Babel mutu neitamai akwapu keca yuma cap, amutu kunge nesala cap, Allahdi poptapra gawal dakamre,’ pepra, lap pena tep nengeda, men inimkamrume.

Ange gum dinin, aupu lap pena tep, petenkemna keca, er si spanduk sekra ereipmumdi, katuai di deipmumpa, dana-dana tara kunge nesala yuma epmengedi, kael kepkamenge. Ada, ‘Yuk mutu yu jen talena neng yangedi, Babel mutu yuma cap, Babel tara kunge nesala yuma cap, popsengopda, sun adipapu sakamrume. Sun isok ner, er sida Bel. “Bel, pepra, si eremnung isok peda, ali weik dangkamrure,” pepra perbenkurume!

Atep, angeda inimna gume! ‘Sun poryankamseng nengda, Babel nesaladi si eremenge isok ner, er si Merodak peda, sun pon tep nengdi, akeca popra sikke bukra tapkamenge. Tonda, aisok nerpu dinin, er si butene ngeda, dewa ^{▼▼dewa – Aupu deiyoda, ake. Dewa peramengada, isok si eremna keca tep penunge.} Bel, nimi urasin utopu kupra deiamidi, si eremnung patung-patung yumada, sun poryankameng nengdi, akeca oloktapmengepa, tali yuk-yuk kepkamre.

Atep nengeda, aisok ner Bel cap, er si eremna tep, patung-patung talenge nesala cap yumada, ali weik dangkamenge. Aisok tepapu, ‘Nun deiyo ner,’ pepra, si eremenge nesala yumada, kange mun kange doupra kungedi, ‘Uo, ware kupmaser do?’ tenen, tenimtonapu kunkamenge. Tek sisi aisok si eremna deiyonge keca-keca yumada, sikke buktapkamenge.

3 Ange yumada, tali tep men pepsene. Ne Allahdi upupne pangeda, udapu tara mutu di tenpu mutu yu neng ton yangedi, Babel mutu neitamai yuma warengyankamenge. Ukupmengedi, Babel mutu neitamai kwamu keca yumada, gum kupra deipmengopda, sun mutu tu peda, pio malipu kupkamre. Nedi sun mutu yuma mali kupra deipnyopda, atara neitamai yumada, nimi cap, tali gam kure keca yuma capda, sepra bendopkamenge. Tonda amutu neitamai yumada, ton pio men kunkamenge. Amutu yuma walangyopu kupkamre.

Allahdi, “Yuk mutu yu neng upupnepa, Babel mutu yangedi, amutu kwamu keca yumada, sikke buktapkamenge,” pepupa, ne Yeremiadi aupu sekra deipsi.

Allahdi Israel nesala loptapra lyepyopda, sundi Babel mutu tapra, sun pe mutu tamupra yakankamenga tep, pepu upu

4 Allah Yahwehdi Yeremia tep pepu.

Yuk mutu yu nengdi, Babel mutu nesala yuma popmengopda, ataru neitamaida, Israel yala nesala cap, Yehuda yala nesala cap, sun kikiman di, sun pe mutu sisa tamupra yangedi engepkamenge. Engepmengedi, ‘Uo, nun si eremnup Allah, ^{▼▼Allah – Ibrani upu deiki di, ‘Elohim’ seki. ‘Elohim’ upu pena deiyoda, ‘Allah’ tepa.} er si Yahwehda, ^{▼▼Yahwehda – Ibrani upu deiki di, ‘Yahweh’ seki. Ada Allah er pe si sisa tep, ‘Yahweh’ seki.} dan cei kurur do? Ware upu pepserepa, gekepra kunkamep do?’ tenen, sun pe mutu tamupra yangedi, ne sun nai bo Allah Yahweh tep, yana enkamnenge.

5 Sun anesalada, ‘Nun pe mutu tamupra benkup’ tenen, bisi embangaidi, dakunkameng nesala tep, ‘Sion mutu bana tep bisida, dan cei kurur do? Sundi ton lap pepsetum do?’ pepra, asimkamenge. Asipmengepa, ‘Sion mutu bana tep bisida ake,’ pepra, lap pepmengopda, sun Israel yala nesala yumada, abisipu moupra epmengedi, dombankamenge. Ukupkameng taruda, sun anesaladi, ‘Allah Yahweh cap, nun cap kikiman pio kunkamepe’ tenen, ne dingeda, “Angeda kunkamrume, angeda pio men kunkamrume. Ne upu moupra gekepnemumnyopda, nedi pio telep kweipkamsene,” pepra, pedina upu deiki di konum pepnyopda, apepra deipkamne ngeda, sun anesaladi men lupronkamenge. Sundi, ‘Teka kandi pepmaserem ngeda, pio moupra talepedi, kunkamepe,’ pepra, pedina upu deiki pepkamnenge.

6 Ware kupra keteng tamun deiki di, ne nyapu sisada, ‘Telep bisida ake. Tek sisi kuna ngeda ake,’ men tenipmanto nesala konum kurami. Ukupmanto upu deiki di, domba bisam tali datapipanen, ‘Nun bisi ake,’ tenena gum di, konum wangapi. Ukuramya deiyoda, Israel yala nesala, sun deiyo-deiyo nengdi talerami taru neitamai yumada, ‘Telep kunada ake, mali kuna ngeda, ake,’ pena gum dipapu, sun amutara kurami nesala yumada, mali-malipu kurami. Ukupmantoda, domba bisam talepra peina deiyo nengdi, sun domba bisam konum tapmengepa, telep bisi wangaprepa, tali bura mutu neitamaida, mangkau kange douprapmengedi, kange wang-wang peprepa, tali-tali embanunge. Ada, amutu dup yanapna, ormutu dup benapna, kemengedi, yuk-yuk er banung utopu kurami. Ukupra kuramya tep, sun Israel nesaladi, ‘Nun wengna tep atida, aca’ tenen, pio moupra men kael kemamidi, lupronami. Ada, ne Allah damai ton men yakaramnei.

7 Ukuramipanen, sun pona tep, sun dana-dana tara kurami yuk mutu yu nengdi, Israel nesala tep, poryakarami. Tonda ikin keca weik sun nong deiki derirami. Ada, Israel yala nesala cap, kikiman antamami nesala yumadi, ikin keca dopra, sun nong deiki derirami. Ukuramidi, uperami. ‘Gume, Israel nesala damai yana, tali lupra ponmapada, walito ponmap adano! Deiyoda, sun nai bo Allah Yahweh tep, ‘Nun dabale,’ teneramidi, er upu yuma, yanirtamami. Allah erda, sun nai bo sisa kurure. Allah Yahweh dipapu, sun tep lyeptue! Tonda, sun apu yapu yuma, teka tenemidi, ‘Allah Yahweh, er dipapu lyepsetue. Yuk ngebodi gume’ tenen, er deikipu sun kange dipru deriramidi, er sipu eremami. Atep nengeda, nun mali guma. Deiyoda, sun Israel nesala yumadi, Allah Yahweh tep, konum tamamya tepa,’ perami.

8 Uo, ne nyapu sisa, sun Israel nesala deiyo kepra kurum nesalao, sunda adipapu Babel mutu tapra, sepdaro benkurume! Atep nengeda, sun dipapu nimi deiyo neng utopu kupra, menepmumdi sepra bamum pangeda, sun yuk Israel nesalada amenda tara domyakankamsenge. Ukupmantoda, ‘Ila jen kambing bisamdi menepra bangepa, sun yuk kambing bisam yumada, sun amnyo tara dombaramengtopu, kupkamruma’ tenena tep pepsene.

9 “Sunda sepdara bendopkurume!” pepmasenada, tali tep guma. Deiyoda, ne Allahdi “Porbeso!” pepra, upupnepa, mutu ban-ban yuma neitamai di dakunge ila puto-puto jen neng yumada, dapu tara (arah utara) di, puto kepropmengedi, Babel mutu neitamai poryakankamenge. Upepne pangeda, ayuk-yuk yala neng yumadi, yuk-yuk nepra ketenepmengedi, ‘Babel mutu kunge nesala yumada, antapra akikiman bepedi, sun tep poptapkamepe’ tenen, Babel mutu damai poryankamenge. Ada, amutu nesala cap, amutu kwamu keca cap, gum kupra derina tep benkamenge. Awepra deipkamne ila kael jen neng yumada, tenpu mar ton dopnepa, mentena gum di, adipapu porkotemnapu kunge neng wepra deipnepa, poryakankamenge.

10 Ukupmengedi, Babel mutu nesala yuma poptapmengopda, Babel mutu neitamai kwamu keca yumada, dalupra dopropkamenge. Ada, sundi dopropkameng kecada, sun dipru neitamai di, ‘Ange putapnera cadi, tali lupra doproptene,’ tenena keca, yala-yala yumada dopropkamenge. Konum kupmengopda, ‘E, akonuma, nun tenepmeputopu konum kupmap adano,’ tenepmengedi, kange deipkamenge. Ange yumada, neda, Allah Yahwehdi, akonum pepra deipmasena cadi, ange yuma tek sisi nong kupkamre ja!

Allahdi aupu peipupa, Yeremiadi seku.

Babel mutu sakamenge pepu upu

11 Allahdi aupu ton pepu.

Uo sun Babel mutu nesalao, sunda bicaue. Deiyoda, sunda ne nyapu sisa, ‘Ne mawa,’ tenemsi nesala, sun Israel yala nesala yumada, sun dipapu poprumdi, dalupra doproprum dingeda, ikin keca weik sun nong deiki deriramrume. Ukuprum taruda, sapi bisam midi, sepra depda-depda pepredi, kange deipra manmaneng batu damai bena jeramretopu kuramrume. Ange utopu, sunda jem kuda bisamdi, telep kange doupredi, orbenap, ayanap kemredi, tali sepra baramretopu kuramrume.

12 Ukutaru ukurumu dinino, amenda taruda, sun mutu nesala cap, yuk mutu nesala capdi, ‘Uo, sun Babel mutu nengda, pio mali weik kurami,’ tenepsengedi, mali upu pepsengopda, sun mutu sisa tupa kunkameng nesala yumadi, ali weik dangkamenge. Ada sun pe mutu nengpu dinin, ‘Uo, nun song,’ tenenkamsenge. Ukupmantoda, nerapudi, sun nyapu deipmengepa, amenda taru anyapu pio mali-mali weik kupmengopda, sun nenge yapudi, ‘Uo, warya tep do?’ tenengedi, ali dangamengtopu, amenda taru sun pe mutu nesaladi utopu tenedankamenge.

Nedi konum wenepsenyopda, sun Babel mutu nesalada, dopra, amutarapu pio deipkamsene. Sun mutuda, pio katawai mutupu kupkamre. Mo pio men cemkamserea cadi, amutu tu yuma gelal sepra deipsenyopda, nimi pio men kupmantoaipu, kweipsenepa, amutuda walang yo mutupu kupkamre. Ukupkamra deiyoda, ne Allah ja!

13 Sun Babel mutu nesaladi, mali-mali weik kuramruma tep, ne ila yu kunerure. Ange tep nengeda, neda pio ikin deiki di wenepsene pangeda, sun Babel mutu yumada, sikke bukratapnedi, amutu neitamaida walangyopu kupkamre. Nimi tenpu ngebo ton amutu men kunkamre. Ukunkamre taruda, ware mutu nesala do yuma, sun ton Babel mutu damai bisi bangedi, sun mutu dinkameng nengdi, ange epmenge dingeda, kware weik kuprepa, ‘Uo, uo’ tenen, lungdankamenge. Tonda, sun mutu pio mali kupkamrenge tep, mali upu penkamsenge.

14 Ne Allahdi Babel mutu yuma weneprapnedi, menenga keca karepkamna tep, sun mar dona pio ila kael nesalada, sunda Babel mutu nesala pona tep, nimi warengbenkamrume. Babel mutu ongopgenepra, pio moupra dumsisi kupmumdi, ketenepra tekurume. Ukupmum dingeda, Babel mutu warengberumudi, sun nimi pon mar yumada, ketenepra pepmamumnyadi, Babel mutu tarapu bena dopkamrume. ‘Ne marda tenpu ton mawa deipkamne’ pio tenena pio gume. Sun dopkamrum mar yumada, pepkamrume. Ukupkamruma deiyoda, Babel mutu nesala yumadi, ne Allah Yahweh cap, ne upu cap tep, konum pio mali kupra deipneidi, yaniramneiya tepa.

15 Tonda, Babel mutu neitamai ongopra domi ati arum neitamaida, akapkamre dinin, akati arum dana-dana tara yuma di, ila upu deiki di ngolokrumudi aupu penkamrume. Ada, “Uda sun yuma yana diso! Babel tara nesala yuma, sun pona tep yanmapudi, Babel mutu neitamai yumada, konum yana poryanmap adano! Ukupmap ngeda, sun Babel mutu tara nesala yumada, puto pio boun kuprepa, ‘Ware kuptepe do? Gume’ tenen, kware kupmarpa, konum tapmangpa, nundi sun mutu dalupra dopropmap adano! Sun mutu dana-dana yuma, ila lyom gat gel beilya deipra dominge yumada, adipapu konum dakra tapmapdi, sun ati arum yuma konum uruptapmape,” pepra ila upu deiki di penkamrume. Ukupmumdi, aupu penkamruma deiyoda ake. Ada, ne Allah Yahwehdi, ‘Gume, sun Babel mutu nesala yumadi, pumun taru yuk mutu nesala tep, yu di mali kwamitopu, ne peda sun menenga tep, ange utopu nedi sun tep konum kupmandi, kwang dakmane.

16 Yuk mutu nimi bo neng, Babel mutu nesaladi pomidi, ateng koupra sun pe mutu tamupra duyanamipa, Babel mutu neitamai yana, wa pepra, yal keca kouna pel don neng cap, wa pen keca nong kuprepa, akeca nong dopra, kina pel don nesala yuma capda, sundi Babel mutu popra sikke buktapkamrum nengdi, animi bo neng loptapkamrume. Loptapmumpa, sun adipapu tamupra, sun pe mutu yuk-yuk bendopkamenge. Yuk mutu jen talena nengdi, sun Babel tara kunge nesala pona tep, nimi pon parang ya doupra yakankameng neng tep, epmengedi pio ila di kware kupkamre.

Kware kuprepa, Babel mutu kunge nimi bo neng yumada, tenpu peda, amutu neitamai men kunkamenge. Wa pena cap, yal keca kouna cap, nong wisiprepa kina cap, pel dorami neng yumada, sun pe mutu tamupra sepdara bendopkamenge. Atep nengeda, ne mawa nesala, Israel yala nesala peda, sun pe mutupu tamupra bena kunkamenge. Allahdi pepu.

Allahdi, ‘Israel nesalada tamupra telep kupra deipkamne,’ pepra, pedina upu di pepu

17 Allahdi pepu. Ukupmantoda, sun Israel nesala yumada, domba bisam gung tenpu kurami dinin, bura tara kuramre yu kam, er si singa pusdi dopramseupa, dabena wangaramretopu kuamseupa, ukutaruda yuk-yuk mutu bendomya cadi, yuk-yuk mutu neitamai dakununge. Ange utopu, menop taruda, Asyur mutu taleamu nimi deiyo ngebo Rajadi, menmena gonga kepra, Israel nesala damai yana popra dombenamu. Ukuramupane, dortaru neitamaida, Babel mutu taleamu nimi deiyo ngebo, Raja Nebukadnezarda, erdi amenda taru, Israel nesala yuma pomudi, taleamu. Ukupmantoda, Nebukadnezarda, yu singa pusdi, yuk gam keca popredi, tu jepyopda, amenda taru akeca yoka yumada si toramretopu, kuramu.

18 Ange tep nengeda, ne Allah Yahweh, ^{▼▼Yahweh – Ibrani upu deiki di, ‘Yahweh Sebaot’ pepra seki. Ada, Allah er pe si sisa, ‘Yahweh’ cap, tonda ‘Sebaot’ cap seki. Asi ‘Sebaot’ penge nge, er upu deiyo neitamai ngeda, konum jenek kupra sekmepu. Ada, ‘Sunda, aupu deiyonge ton kael keptume’ tenen, sekmepu.} im deiki kunge jen talena malaikat yuma, sun deiyo ngebo kununa cadi, ne ila puto ngebo kununa cadi, sun Israel yala nesaladi, ne tep, ‘Nun nai Allah ^{▼▼Allah – Ibrani upu deiki di, ‘Allah Israel’ seki. Ada, sun Israel nesaladi, Allah er sipu eremnunge’ tenena tep ange seki. Nundi, ‘Angeda deiyonge kael keptum’ tenen, (artinya dalam) jenek kupra sekmepu.},’ pepra, ne sipu eremnenunge. Nedi aupu pepsene. Israel yala nesala, sun deiyo ngebo Allah, nedi, Babel mutu nimi deiyo ngebo Raja Nebukadnezar tep, puto di wenepra popkamne. Ada, pumun taru nimi deiyo kepra Asyur mutu taleramu ngebo tep, ila di wenepra, er nong deiki ikin keca deiamsitopu, Raja Babel tep nengeda, utopu kupkamne.

19 Ukupne dingeda, ne Allahdi, sun Israel yala nesala yumada, kange di tamupra, sun pe mutupu dopra deipnedi, telep kupra deipnepa, pio teleppu kunkamenge. Ukunkameng taru sun jen keca jenkamengada, mutu si Karmel mutu cap, Basan mutu cap dipapu, wa pepmengepa, nong kuprengepu kipra, jenkamenge. Ange utopu, tonda mutu bukamnga tara neitamaida, Efraim mutu cap, Gilead mutu cap dipapu, wa pepra koupmengepa, nong kupredi, wisipkamre ngepu, dopra jenkamenge. Sundi, ‘Uo angeda ukupra jetepe’ tenen, putapretopu, sun jen keca weika di jepmengepa, bounkamre ja!

20 Ukupkamne taruda, sun Israel yala nesala cap, Yehuda yala nesala cap yumada, adipapu sun mali kuraminge yumada, gum kupra deipnedi telep nesalapu kunkamenge. Mali keca talepra kunge nesala ton, amutu neitamai pio men kunkamenge. Deiyoda, Israel nesala, yala-yala weika di wenepra popkamne dinin, amenda sirya taruda, nedi, ‘Sun anesala denge ukuprap, lyepropkamne,’ tenemsitopu, loptapra lyepnepa, tupa gam kunkameng neng, sun denge yambulanunpu dinin, sun mali kunge keca yuma kaukepnedi, gum kupra deipkamna tepa. Atep neda, Allah Yahwehdi aupu konum pepmasene. Allahdi pepu.

Babel mutu neng, sun deiki ikin keca deipkamrenge tep, pepu upu

21 Ne Allah Yahwehdi, upupnepa, Babel tara nesala porbenkameng nesala tep upepsene. Sundi, Babel tara neitamai dinin, mutu si Merataim mutu cap, Pekod mutu capda, sun pona tep bena warekmumdi, adipapu porbenkurume. Anesaladi, ‘Uo, sun popsenung’ tenen, bura saka sepdara bendopmenga peda, sunda tamna gum di, sun ton sepdara berumudi, amutu nesala yuma adipapu poptapkamrume. Sun yuma popra, gum kupra deipkamrume. Ada, ne Allahdi, ‘Sun Babel tara nesala porbenkurume,’ pepra, konum deipmasentopu, sundi angepu adipapu kupnapu kupkamrume. Neda, Allah Yahwehdi konum pepne.” 22 Sun Babel mutu neitamai bena, anesala ponkamrum taru yumada, nimi poryakana tep lelimda, ila di penmarumpanen, amutu nesaladi gekenkamenge. Sun mutu neitamai kwamre keca yumada, popra sikke buktapkamrume. Tenpunge peda, men tapkamrume.

23 Uda, men taru neitamaida, Babel tara kurami jen talena nengdi, yuk-yuk mutu yuma kurami nesala tep, tali lupra portamami. Ukupmantoda, nimidi paku pona tep keca, er sida paludi, paku poramengtopu, Babel mutu nengdi, yuk mutu nesala yuma pomidi, sikke bukra tamami. Dinino, pumun apomi palu utopu kurami nesalada, ukutaruda sun palu konum coptapmange! Atep nengeda, ukutaruda, mutu ban-ban kunge nesala yumadi, Babel mutu sun wenemna tep, Allahdi kupunge gekepmenge dingeda, kware weik kuprepa, lungdanapu kununge. Tonda, amenda dorkunkamre taru peda, kware kuprepa, tupa lungdanapu kunkamenge.

24 Uo, sun Babel tara kuramrum nesalao, Sunda bicaue! Ne Allahdi, “Uda, sun Babel mutu nengda, ne upu konum yaninenunga cadi, ukununga deiki di, sun menenga keca wenepra karepkamsene,’ tenemsi. Ukupmanto ngeda, nimidi sun pena pepmanga pumbon, jena mangkau wekrepa youramretopu, sun mangkau kange doupra, ban denkap, pena pepmanga pumbon wekrepa youramretopu, nedi sun tep tapu deiamsisi ngeda, konum wekra koupdongopdarume. Angeda, sundi pio moupra men tenepmarum dinin, nedi sun tep wenemna keca konum keteneipsisi ngeda, sun nong deiki konum yanmar adano!

25 Atep, ne Allahdi, ne jen cap, mar cap, parang ya cap, tema cap derina tep ketenepra domsi atida, buplan konum paktapmane. Ada ne pio ila yu deiki di akati pumbon neitamai deiamsi nimi pon keca yumada, adipapu dopra gupkotepkamane. Sun tep popra gawal dakamsene. Deiyoda, ne Allah Yahweh, ^{▼▼Yahweh – Ibrani upu deiki di, si weneri seki. Ada, ‘Yahweh Adonay Sebaot’ pepra seki. Ada, Allah er pe si sisa, ‘Yahweh’ cap, tonda ‘Adonay’ cap, tonda, ‘Sebaot’ cap pepra seki. Asi butene, ‘Adonay’ cap, ‘Sebaot’ cap tep nengeda, er upu deiyo neitamai ngeda, jenek kupra sekmepu. Ada, ‘Sun kael keptume’ tenen, sekmepu.} im deiki kunge jen talena malaikat yuma, sun deiyo ngebo kununa cadi, ne putoda pio weik kunerure. Tonda, akeca-keca talepra ila puto kununa tep, ne tenenetopu kunune. Nedi sun Babel tara neitamaida, mambul pel weika di donkamne. Ada, sun amutu neitamai yuma kurum nesala tep, wenepsenedi, menenga keca karenkamsena tep pepmasene.

26 Ange tep nengeda, nedi upupsenepa, Babel tara nesala poryakankamrum nesalada, moupra gekepneso! Sun Babel mutu nesala yuma pona tep, mutu dana-dana tara yuma di, poryakankamrume. Ukupmum dingeda, Babel tara neitamai kunge nesaladi, sun jen keca deiamenge ati pumbon yumada, buplan paktapkamrume! Apaktapmumdi, sundi deiami gandum do, yuk yal keca do, upula dalupra dopropmumdi, tenpaipu bulupra deipkamrume! Sun Babel tara neitamai domi ati-ati yuma cap, yuk akwamu keca yuma cap, popra sikke buktapkamrume. Ukupmantoda, sun gandum du dakra gawal dangamrumtopu, kupkamrume. Yambulanun gawal ton tenpu peda, pio men tamkamrume. Sun ati-ati yuma urupra tapmumnyopda, agel-agel yuma bulupra, tenpaipu deipkamrume. 27 Ukupmum dingeda, sun amutu jen talena neng yumada, adipapu popra gawal dakamrume! Menop taruda, ila jem sapi bisam puto weik kuramretopu kurami dinin, ukutaruda, ajen neng yuma popmumdi, anesala yumada gum kupra deipkamrume. Uda sun Babel mutu jen talena neng yumada, bicaue! Sun wenepra pona tep tumi konum damai kupmara cadi, sundi adipapu popmumdi, gum kupra deipnapu kupkamrume!

28 Sun dakunmarum nesala ban-ban yumadi gekepkurume! (Sun Babel mutu nengdi tomopra dubenami Israel yala nesalada, ataru di gonga kepra, Babel mutu tapra, sepdaro Yerusalem mutu neitamai tamupra yakankamenge. Sundi Yerusalem mutu yankameng nengdi penkameng ngeda, ake. Ada, “Nundi si eremnup Allah, nun nai bo Allah Yahwehdi, sun Babel mutu nesala tep nengeda, wenepra popkamre. Ada, sun mali kuraminge tep kwang dakamre ja! Tonda, sun Babel mutu nengdi menop taru, nun nai bo Allah Yahweh, er si eremna atida konum urupra sikke buktamya tep, kwang dangkamre,” pepra, ila upu di penkamenge!

29 Ange tep nengeda, ne Allahdi pepne. Ware jen talen nengdi do yuma, Babel mutu neng, ‘Sun popkamep’ tenen, mar dona tep neng ketenepmumdi, Babel mutu nesala tep, mar poryankamrume. Sun pona tep yamum dingeda, ukupra pepkurume. “Babel mutu nesala tenpu ngebo ton, pio men bura saka benkamrure. ‘Ukupnung’ tenen, adipapu Babel mutu yuma ongopdongopmumdi warengkamrume. Ada sun Babel mutu nesala yumadi, balila kupra, salnong-nong kamamidi, ne Allah tep, ‘Er perur upuda, pio men gekenkamepe. Er tep yanitamnapu kunkamepe,’ pepra, mali kupra derinenunga tepa. Babel mutu nengdi, mali-mali weik kuramitopu, nedi ikin keca dopra, sun damai wenepra deipkamsene. Aupuda, Israel nesala, sundi si eremnenung ngebo, sun nai bo Allah Yahweh kunune. Neda, mali kunange pio men kunedi, pio telep lengnapu kunun ngebodi pepsene. Israel yala nesala, sun nai bo Allah Yahwehdi pepsene.

30 Ange tep nengeda, ataru neitamaida, sun Babel mutu kaber nesala yumada, adipapu popmengepa, amutu bisi-bisi embanga neitamaipu depkamenge. Tonda amutu jen talena neng yumada popra sikke buktapnapu kupkamenge. 31 Tonda, sun Babel mutu kurumu nesala yumada, dipru eremnapu kurumudi, salnong-nong kamna nengpu kuruma cadi, neda Allah Yahwehdi, sun tep wenepra poptapkamsene. Atep ne Allahdi, sun tep wenepkamsen taruda, konum damai kupmasere. Neda Allah Yahweh ^{▼▼Yahweh – Akayat neitamaida, Ibrani upu deiki di, Allah er si weneri dukdongopra seki. Tenpu ngeda, ‘Yahweh’ pepra seki. Butene ngeda, ‘Adonay’ pepra seki. Weneri ngeda, ‘Sebaot’ pepra seki. Nun dingeda, aupu weneri deiyonge tep, jenek kupra sekmepu. Ada, ‘Sun Ketengban nesaladi, asi weneri, moupra kael kepkameng’ tenen, asi deiyonge katuai dipapu sekmepu.}, akeca-keca yuma talepra, deiki tara kunedi, ne tenene keca yumada, tek sisi kunune. Neda, im deiki kunge jen talena malaikat yuma, sun deiyo ngebo kununa cadi, neda ila puto weik ngebo kunedi pepmasena cadi, ange yumada, tek sisi nong kupkamre ja!

32 Kan mutu neitamai kunung nesala yumada, sun dipru eremna nengpu kununga cadi, nedi wenepkamsen taruda, sun yanda gel dukrepa, sakamrume. Ataruda nimi yuk nengdi ton, ‘Bicau’ tenen, melipsengedi, kange di tamupra, bukra men deipkamsenge. Sun tep wenepkamsen taruda, sun mutu-mutu neitamai yumada, sundi domrum ati-ati yuma, uku dongopnepa, ukudi jepropredi, sun mutu neitamai kwamu keca yuma, gawal dakamre. Ukupnedi, amutu neitamai akwapu keca yala-yala yuma cap, sun mutu nesala capda, adipapu gum kupra deipkamne.

33 Neda Allah Yahweh, im deiki kunge jen talena malaikat yuma, sun deiyo ngebo kununa cadi, neda ila puto weik ngebo kunedi pepsene. Ada, sun Israel nesala cap, sun Yehuda mutu neitamai kunge nesala cap yumada, Babel mutu nengdi darapdongopmengepa, ikin weik kununge. Sun Israel nesala cap, Yehuda mutu neng cap tep, Babel mutu nengdi popidi, ateng koupra sun pe mutu tamupra dubenamidi, tupa talepra kununge. Ila puto di kalengmenge nengda, “Gume, sun Israel yala nesalada, pio men loptapkamepe. Sunda, nun mutu tapra men benkamenge,” penunge.

34 Dinino, Israel yala nesala yumada, ne Allahda, sun melipra lyemna deiyo ngebo kunune. Ne Allahda, sun Lyemna Deiyo Ngeboda, pio ila puto ngebo kunune. Atep nengeda ne si butenenge ton, ‘Allah Yahweh im deiki jen talena malaikat yuma, sun deiyo ngebo kurura cadi, erda ila puto weik ngebo,’ pepra penenunge. Atep nengeda, ne Allah dipapu, sun lyemna tep, pio pe deipra melimkamsene. Tonda, Israel nesala loptapne pangeda, sundi sun mutu sisa tamupra bengedi, tali kange deipra teleppu kunkamenge. Podana gum dipapu, dim peprappu kunkamenge. Dinino, sun Babel mutu kunge nesala yuma tep nengeda, sun deikida, pangdana keca cap, kware tenedana keca cap, kange mun keca cap, sun deiki deipkamne. 35 Atep, ne Allah Yahwehdi, ‘Sunda Babel nesala tep, mar poryankurume,’ pepne pangeda, yuk-yuk mutu yu neng gekepmengedi, sun nimi pon parang ya dopra, Babel tara nesala tep poryakankamenge. Tonda, Babel mutu neitamai kunge Kasdim ^{▼▼Kasdim – Babel mutu yuma tep nengeda, si butene perami. Ton ngeda, ‘Babel,’ ton ngeda, ‘Kasdim’ perami, dinino, amutu cap, anesala capda, tenpua.} yala nesala cap, amutu talepra deiyo-deiyo neng kepra kungedi, upu pepra kunga deiyo neng cap, sun mutu ila di kael keami neng cap, sun yuma tep poryakankamenge!

36 Ange utopu, sun Babel mutu neitamai, tali upupu penung nabi-nabi utopu neng yuma tep, nedi pepnepa, yuk mutu yu nengdi, nimi pon parang ya dopra, poryakankamenge. Deiyoda sundi, ‘Allahdi peserur upu lap pesenupe,’ penung dinin, tek sisi ngeda, isokdi penge upu cap, tali upu cap deiki dipapu penunga cadi, ne Allahdi anesala yuma popnyopda, yuk neng yuma epmengedi, ‘E sun nabi utopu nengda, tek sisi walwal penge nengpu kununge,’ tenepmengedi, kael kepkamenga tepa! Ange utopu, nedi pepnepa, sun Babel mutu neitamai, ila kael jen talena neng yuma tep, yuk mutu yu nengdi, nimi pon parang ya dopra, poryakankamenge. Popmengopda, Babel mutu jen talena neng yuma, gum kupra deipkamenge.

37 Ange utopu, nedi pepnepa, yuk mutu yu neng, nimi pon parang ya dopra, sun Babel mutu jen talena neng tep, poryakankamenge. Ada, jen talen nengdi, nimi porban taru bukra embanung kuda bisam cap, tu deiki embaramre keca, er si kereta perang cap, tonda Babel mutu nengdi, ‘Sundi yana melipseso!’ pepra moropipa, sun dana-dana tara kunge jen talena neng ton, keana taru tep, yanami neng cap yumada, gum kupra deipkamne. Ada, nedi pepnepa, yuk mutu yu nengdi, nimi pon parang ya dopra, Babel mutu yana, aneng yuma popra, sikke bukra tapkamenge. Ange utopu, sun Babel mutu nengdi talepra isomka kunung keca cap yumada, gum kupra deipkamenge. Ada, sun Babel mutu nengdi isomka kemnung keca yumada, sun pona tep yankameng nengdi, nimi popnepa menenga dororameng utopu kupra, akeca yala-yala yumada dopropkamenge!

38 Tonda, sun wenemna tep, ne Allahdi pepnepa, amutu neitamai embendau me yumada, cepropredi gelalpu sepropkamre. Tonda sun wa penungai capda, kolupredi gelalpu sepkamre! Deiyoda, sun Babel mutu nesala yumadi, isok si eremna tep, nimi urasin utopu keca petupra deipmengedi, atali keca tep si eremnunge. Ange ukungedi, sun isok si eremnunga deiki di, sun kange dipruda, mutana neng utopu kepra deridanunge. 39 Babel nengdi talerami keca, yala-yala yuma cap, Babel mutu neng cap, konum popra gawal daknyopda, amenda taruda, sun Babel mutu neng kurami mutu neitamaida, tali bura tara gam kure keca sun mana cap, bura tara tali gam kure kam cap, tonda tali bura im alau tara lakra embaramre ma cap, sunpu amutu kunkamenge. Babel mutu nesala yuma gum kupra deipne pangeda, amutu neitamaida, nesala yumadi ton pio men kunkamenge. Atep, ataru di dipra, dorkunkamre taru neitamai yuma, sun mutuda, pio walangyopu kupkamre ja!

40 Uda, pumun taru nedi Sodom mutu cap, Gomora mutu cap, sun dana-dana tara kurami nesala cap, tonda sun amutu-amutu nesaladi taleami keca cap, amutu ati arum yuma capda, gum kupra deiamsitopu, Babel mutu neng peda utopu, gum kupra deipkamne. Ukupne pangeda, Babel tara mutu neitamai yumada, amenda taru yuk nesala ton yana, amutu neitamai pio men kunkamenge. Pio dimbulung pepnapu kupkamre. Atep neda, Allah Yahwehdi, akonum pepra deipmasena tep, ange yumada tek sisi nong kupkamre ja!

41 Sun ban-ban yuma dakurumu nesala yumadi, moupra dinkurume. Nedi, ‘Babel mutu nesala tep, poryakankamrume,’ konum pepmasipa, ataruda, dapu tara di, (arah utara di), tenpu mutu ton, ila puto nengpu kunung mutuda, pera karen mutu di konum ketenepmanga cadi, Babel tara tep poryankamenge. Sunda, pio karen mutu, im sirik mutu sirik tara dadi, pio karen mutu-mutu di, nesala talepra, nimi deiyo-deiyo kepra kunge neng, sun Raja-Raja nengda, pio weika di ketenepra yangedi, Babel tara nesala tep, poryakankamsenge.

42 Sun ayankameng nesaladi doupra yankamengada, nimi pon jen cap, mar cap, tonda co di takke lurameng keca, er si tombak cap, doupra yangedi poryakankamsenge. Aporyakankamseng taruda, sun anengdi ton, ‘Ortara mutu kunge nengda, pio bicau tenena gum dipapu, yu weik kuprepa, tali lupra poryakankamsenge. Babel mutu pona tep, yakankameng taruda, tu deiki yanipra yakange taruda, ila lelim pepkamra cadi, ukupmantoda, laut me mokon di, me kait ila di weleramretopu, sun pona tep yankameng keca, er si kuda bisam, sun yan lelimda ila di pepra yankamenge. Ada, sun Babel mutu kurumu nesala yuma, sun popra gawal dangna tep, nepra tekmengedi, sepra yangedi, poryakankamsenge.

Allahdi aupu peipupa, nabi Yeremiadi aupu gekepra doprapudi, Babel mutu nimi deiyo ngebo, er si Nebukadnezar tep, lap pepupa, gekepu.

43 Ne Yeremiadi, aupu yuma konum lap pepsipa, Babel mutu taleramu ngebo Nebukadnezardi konum gekepu dingeda, animi deiyo ngebo Rajada, ‘Uo, ware kuptene do?’ tenen, pio kange men doupudi, er puto boun kupu. Ukupu taruda, er urasin yumada, nerapu mi mundu douamenganen mi deiyo jenmarepa, pu doramengtopu kupu. Ukupudi, kange mun kange doupra kunmau.

44 Uda, ne Allah Yahwehdi pepsene. Ukupmanto ngeda, tali bura tara dagam kuramre singa pus utopu, ila Yordan me pirman tara mutu bura di gupra, tengyaredi, domba bisam betei batu jeramyaipu yana, popredi jeramretopu kupkamne ja. Ada, ange utopu neda, Allah Yahwehdi, amenda taru dato-dato di sepdaro yankamne. Ukupnepa, sun Babel mutu neng, kware kuprepa, sun pe mutu tapra, yuk-yuk mutu dabendopkamenge. Ukupkamne taruda, sun amutu neitamai upu talepra kunkameng nimi deiyo nengda, ne dipapu yuknge wepra deipkamne. Sun nimi deiyo neng wepra deipkamnada, tenipetepso! Ware mutu ngebo do, ne kunetopu ngebo ton kurur do? Gume, nimi deiyo neng wepra deipmanto ngeboda, ne pua. Tonda, wareto ngebodi, ne tep, ‘Kanda adipapu yankurume,’ pepnetupa, yankamne do? Tonda, wareto ngebo do, akeca-keca yuma kware tenena gum di, ne kunetopu kuptu do? Ware ngebodi, ne tep yanipnetudi, popra bisbisa kapnetu do? Gume nimidi ange yumada, pio men kuptenge.

45 Ange tep nengeda, Sun Babel mutu neitamai kurumu nesala tep, ‘Ukupkamne,’ tenemsi upuda, ne Allah Yahwehdi pepkusen upu pepnepa moupra gekepkurume. Tonda sun amutu kurum nesala, sun Kasdim yala nesala tep, ‘Ukupkamne,’ tenemsi ngeda, sun adipapu moupra gekepkunerume. Uo, sunda bicaue! Sun Babel mutu nesala tep wenepra popkamsen taruda, yuk mutu yu nengdi, sun Babel tara kunge metek nyapu yuma peda, puto di dopra, yukai dubengedi, dokotepkamenge. Ukupne pangeda, sun amutu dam neitamai kunkameng nesala yuma capda, ange yuma epmengedi, ‘Uo’ tenen, pio ila di kware weik kuprepa, kange mun kange doupra kunkamenge.

46 Ange konum kupkamne taruda, sun Babel mutu neng yumada, ila upu di ngolokra engengkameng ngeda, yuk mutu dakunge nesala yumadi gekenkamenge. Babel mutu neng sakmenge dingeda, sun upu ila di pedankameng nge lelim deiki di, mutu ban-ban yuma lokamre. Tonda, ila upu deiki di ngolokra mali penkameng ngeda, alelimda yuk mutu ban-ban yuma dakunkameng nesaladi, alelim gekenkamenge. Allahdi aupu yumada pepra deipupa, nabi Yeremiadi seku.