Jer 51 | XteSC | STEP | Allah Yahwehdi pepu. Ada nedi go karepnepa, ila yu jen talena nengdi, Babel tara kunge nesala tep poryankamenge. Ukupmantoda, ila puto kumanya weika di dokotepnepa, pung pepredi, akeca-keca yuma dakra tamamretopu, kupkamre. Ada, ayu jen talen nengdi, Babel tara mutu yangedi, amutu neitamai kunung nesala yuma cap, Kasdim tara yuma capda, adipapu yana popra sikke buktapkamenge.

Jeremiah 51

Sun Babel mutu neng tep, ‘Allahdi ikin keca dopra, sun deiki deipkamre,’ pepu upu

1 Allah Yahwehdi pepu. Ada nedi go karepnepa, ila yu jen talena nengdi, Babel ^{▼▼Babel – Amutu yuma cap, amutu kurami nesala capda, tenpu sipu perami. Ada, Babel mutu perami, tonda, Babel tara nesala perami. Tonda, amutuda, tenpu mutupu dinin, si butene ton perami ngeda, Kasdim mutu ton perami.} tara kunge nesala tep poryankamenge. Ukupmantoda, ila puto kumanya weika di dokotepnepa, pung pepredi, akeca-keca yuma dakra tamamretopu, kupkamre. Ada, ayu jen talen nengdi, Babel tara mutu yangedi, amutu neitamai kunung nesala yuma cap, Kasdim tara yuma capda, adipapu yana popra sikke buktapkamenge. 2 Ange kupkamne tarupu dinin, nedi yuk mutu nimi bo neng ton, denge weik wepra dokotepnepa, Babel mutu neitamai yangedi, poprapmengedi, pio sikke bukra tapkamenge. Ukupmantoda, gandum du lanmangedi, er bambama yuma lapra tapmangenge erepra dopmengepa, kumanya yare dingeda, pung peprepa gandum du bambama yuma dubaramretopu, nedi Babel tara nesala ton ukupkamne. Ada nedi, ‘Kange mun keca karepkamsene,’ tenemsi tumi konum damai kupre pangeda, upupnepa, yuk mutu dana-dana tara dakunge jen talen nesala yangedi, Babel mutu neitamai kunge nesala yumada, adipapu anesala yuma popmengedi, gum kupra deipkamenge. Tenpu ngebo peda, ton men tapkamenge.

3 Ange tep nengeda, sun Babel mutu nesala pona tep, dokotepkamne nengda, menmena dipapu yana popkamenga cadi, sun Babel tara jen talena nengdi, go pio gum tep, sun mar menmena men dopmanto kupkamenge. Tonda, sun jen talena nengdi, ‘Nun pona tep nengdi, mar dopmengepa, popsenung’ tenen, besi keca di keteneipipa, kenengmenge opkalda, menmena men kenekmanto kupkamenge. Tonda, sun Babel mutu neitamai kaber neng yumada, sun tep poryankameng yu nengdi, ponmanganen tapmengepa, tenpu ngebo peda, gam ton pio men kunkamenge. Atep, sun Babel mutu neitamai kunung jen talena neng yumada, adipapu popra sikke buktapkamenge. 4 Popmenge taruda, sun Babel mutu jen talena neng yumada, sun nong deikida, ila kange mun dilapu kupra deipnepa, susu jeramrepanen, sun mutu bisi-bisi kwangdana neitamai yuma, saka dourbena depkamenge. Tonda, Babel mutu jen neng yuma, amutu neitamai bisi-bisi embanungaipu, popmengepa, sakmengedi, depnapu kupkamenge.

5 Atep nengeda, sun gekepneso! Neda, Allah Yahweh, im deiki kunge jen talena malaikat yumada, sun deiyo ngebo kununa cadi, ila puto kunun ngebodi pepsene. Israel yala nesala cap, Yehuda yala nesala cap, sundi ne Allah tep, si eremnenung Allahdi pepsene. Ne Allahdi, ne nyapu sisa, sun Israel nesala cap, Yehuda yala nesala cap tep, men tapsi. Tonda, amenda taru peda, pio men tapkamsene. Tonda, Israel yala nesala yuma, sun talepra kunun Allahda, mali kun keca tenpunge peda, men kunerepa, Pio Lengna Telep Ngebo kunune. Tek sisi sun anesala yumadi, konum mali-mali weik kuramidi, sun mutu neitamai yumada, pio mali kun keca weik akurur dinino, akapmarya peda, Israel yala nesala pio tep men tapkamne. Sun mali kuraminge tep, menenga karepnedi, konum wenepra popnyopda, amenda taru, kange di ton cap pio telep kupra deipkamsene. 6 Ange tep nengeda, sun Israel yala nesala cap, Yehuda yala nesala capda, Babel mutu neitamai tupa kurum nesalada, adipapu Babel mutu tapra, sepdara bemumdi lyepdankamrume! Ukutaruda, amutu tapmumdi, adipapu sepra bendopkurume. Sun Babel yala nesala, amutu neitamai kunung nesalada, ne Allah tep mali-mali kupra deriramnei. Atep, nedi anesala ponkamne taru, sun Israel yala nesaladi, ‘Nun peda popserur’ tenen, sun adipapu sepra bendopkurume! Angeda tali men pepsene. Deiyoda ake. Ukutaru Babel yala nesalada, sun mali kuraminge pona tep tumi konum damai kupre. Tonda, ne Allahdi, sun wenemna tep, kwang dangkamne taru, konum damai kupmara cadi, sun pedi mali kuraminge utopu kunumna tep, Babel tara neng yuma popra gawal dakamne.

7 Ukupmanto upu ton pepkusene. Ada, pumun taruda, nimidi kunumna weik keca, er si emas dopropmengedi, gat mau er si cangkir ketenepra derinung me mau pumbon di, anggur me gwepra karepmengepa, yuk nengdi jeramengepanen, sun kange yawaramrure. Ange utopu sun Babel tara nesaladi kurami. Ada, gat me mau utopu ngeda, ada Babel mutu neng kurami. Kange yawaramre anggur me mokonda, ada Babel nesaladi, mali-mali weik kuraminge tep pepne. Sun mali-mali weik kuramya deiki di, yuk-yuk mutu nesala yala-yala yumadi, ange epra kael keamidi, mali kuramipa, pio mali kun kecapu talepra kurami. Mutu ban-ban yuma kunge nesaladi, yu me jepmengepa kange yawaramamre utopu kurami. Ukupmantoda, mutu ban-ban yuma neitamai kurami nesalada, Babel mutu me mau pumbon di yu anggur me gwepra jerami. Ukuramya cadi, sun anesala yumada, mutana nesala mali-mali weik kungetopu kurami. Dinino, akuraminge deiyoda, sun Babel tara nesala tepa. 8 Ukurami dinin ukutaru ukupmantoda, boun me mau siptapmangepa olongamra utopu kupkamenge. Ada yuk mutu yu nengdi, Babel mutu nesala yuma dato-dato di popmenge pangeda, Babel nesalada weika di depkamenge. Ukupmantoda, boun me mau sakapredi olokrepa donokamengtopu, Babel tara nesala yuma poptapkamenge. Ange tep nengeda, sun Babel tara nesala pio weik depkamenga tep, engenkamrume. Tonda, Babel tara nesala sun ila susu dila cap, engena cap sun susu dila kwetena tep, obat salep di kwetepetepkamrume. Ukupmumnyopda, ware ngebodi kael keptu do? Sun walwal dinin, ne Allahdi, sun Babel tara nesala tep, kwetepra telep kupra deipkamne do, gum do?

9 Yuk-yuk mutu nesaladi, Babel mutu neitamai kunge nesala tep, ‘Uo, sun Babel mutu nesala melimna tep, kwetepkupe’ tenen, piripetepmepu dinino, men kwetepmanto kupya cadi, nun konum tapmepu! Ange tep nengeda, pio telep ngeda, sun Babel mutu neng yumada, taprapmepedi nun pe mutupu tamupra yuk-yuk bendopkamepe. Deiyoda ake. Allahdi sun Babel mutu neng tep, ila puto di wenemrura cadi, sun yuma popra sikke bukra tapkamre. Angeda men gum kupmanto cadi, dakwapye.

10 Allah Yahwehdi, er nyapu sisa nun Israel yala nesala tep, konum jenek kupra lap pepmare. Ada erdi, “Gume, ne nyapu sisa, sun Israel yala nesalada, telep nengpu kununge. Sunda ne mawa nesala kununga tep, sun Babel tara nesaladi, sun nong deiki ila ikin keca deriraminge tep nengeda, ukutaru sun pe nong deiki deipkusene,” pepmare. Atep nengeda, nun Israel yala nesala yuma, bulupmepedi, ka tamupra Yerusalem ^{▼▼Yerusalem – Yuk Allah upu buku neitamaida, akota si tep ‘Sion mutu’ seki. Amutuda tenpu mutupu dinin, si butene penunge.} mutu neitamai bepe dingeda, nun si eremnup Allah, nun nai bo Allah Yahweh tep, er sipu eremkamepe. Ada, Allah Yahwehdi ila mambul pel dorur ngeda, nukra penkamepe. 11 Allah Yahwehdi yuk-yuk mutu neitamai kunge ila nimi deiyo-deiyo neng, Raja-Raja nengda, sun kange dipru neitamaida, pel konum dopka deiki di, sundi, ‘Uda, nun yuma bulupmepedi, Babel tara bena, sun Babel mutu kunge nesala yumada, popra sikke buktapkamepe! Ada, sun Media mutu kunge nesala talerur nimi deiyo ngebo, Media mutu yuma talepra kurur ngebo cap, er jen talena neng capdi, Babel mutu neng porbenkamre. Akupkamrenge deiyoda, Allah Yahwehdi, ‘Gume, sun Babel tara nesalada, pio mali kun keca weik kuramya cadi, sun wenemna tep, ukutaru anesala yuma popra sikke buktapkamne. Tonda, sun Babel tara nengdi, ne si eremna ati urupra daktapya cadi, wenepkamsene. Sun menenga tep, ila ikin keca sun nong deiki deipnedi, sun yuma poptapkamne,’ konum tenepke. Ange tep nengeda, sun yuk-yuk mutu kurum jen talena nengdi, ukutaru sun adipapu mar lupkamrume! Tonda nimi porban taru, sun taram damai lelimna tep derirumu gat keca, er sida perisai, ange ton ketenepkamrume! 12 Allah Yahwehdi konum tenepkada, ‘Babel mutu nesala popra gawal dakamne,’ tenepu. Ange tep nengeda, sun yuk-yuk mutu jen talena nengdi, Babel mutu nesala ila lyom gel di wiami gel beilya damai bena, bendera ikra deipkamrume. Ada, ‘Nundi Babel tara nesala tep poryakankamepe’ tenen, peten kemna tep keca, nimi pon taru ingamrum bendera ton kenekamrume. Tonda, sun jen talena nengda, ton cap tapakurume. Ukuprumudi, sun tep pepmumpa, Babel mutu dana-dana tara wiami gel beilya damai tekmengedi kalengkamenge. Tonda, ‘Babel mutu bura tara neitamaida, iniprumudi, ketenepkurume. Ada, ‘Babel mutu neng mankau kange doupra abisi embange taruda, dato-dato di, poptapkamepe’ tenen, ketenepkamrume. 13 Allah Yahwehdi, sun Babel tara kunge nesala tep, aupu ton konum pepmare. “Sunda, telep mutu neitamaida, ila isomka nesalapu kurume. Sun mutu damaida, ila me ton embarure. Dinino, ukutaruda, sun gam kuna tep taruda konum gawal dakamsene. Nedi, sun gam kuna deiyo keca dopropkamsene. Ukupne pangeda, sun yuma adipapu depnapu kupkamrume.

14 Allah Yahweh im deiki kunge jen talena malaikat yumada, sun deiyo ngebo kurura cadi, erda ila puto weik kurure. Er pe si deiki di, sun tep pedina upu konum pepu. Ada, “Babel mutu nesala porbana tep, yuk mutu jen talena neng men nukmanto, denge pio weik dopra deipkamnada, sul po men nukmanto yakarameng utopu kupkamenge. Ajen neng dopra deipne pangeda, Babel mutu poryangedi, sun Babel mutu nesala yuma popra gawal dakmengopda, kange deipmengedi ila upu deiki di, ‘Konuma, Babel tara nesala konum popra sikke buktapmape,’ pepra penkamenge.

Allah Yahweh, er si eremna tep, gispal don mutpu penkamenga tep, pepu upu

15 Allah Yahweh er ila puto deiki di atuai mutu yuma ketekepra deipu. Allah er ila kael deiki di, atuai mutuda urasin telep kupra ketekepra deipupa, acapu akurure.
Tonda, er ila kael cap, akeca-keca yuma nong neitamai kael kemrura deiki dipu, im alau tara ton ketekeprapudi, ason getena tengepra tong deriramengtopu, pala kupra deipu.
16 Allah Yahwehdi, ‘Angeda ukupkure,’ pepre pangeda, im alau tara di, ila me ouramredi lelim peramretopu, ila lelim perure.
Allah er dipapu, tuai mutu sirik-sirik di, ‘Dua weleptue,’ tenepre taruda, dua welerure. Ukupyopda, Allah er dipapu peprepa, ila mo cemredi, pereng lang, pereng lang perure.
Tonda, Allahdi kumanya dopra deipkai di, ‘Kumanya embankure,’ tenepre taruda, dopra deiprepa, kumanya puto di embarure.
17 Nimi tuai kunge nesala yala-yala yumada walwal neng utopu kununge. Nunda, pio moupra tenena gum neng utopu kunupe.
Ton nengdi, gat kunumna weik keca, er si emas petupra derina kael nengdi, sun ali dakmengedi, sun urasinda inipronkamenge.
Deiyoda, sundi ketekemnung ngeda, ‘Angeda, nun nai bodi melimkamser’ tenen, tali keca er sida patung berhala, ^{▼▼berhala – Aupu deiyoda, ada, isok si eremna tep, patung petupra deiamidi, isok si eremami.} ketekemnung dinino, angeda nong pio gum ngepu ketekemnunge.
Akecada, isin cap, gam kuna cap, pio gum kecapu ketekemnunga cadi, atali kecadi, pio men melipkamenge.
18 Nimi buru di tali ketekemnung keca tep, “Nun deiyo ngebo ake,” pepra, isok si eremnung keca, patung yumada, nong pio men kupkamre.
Akeca yumada, moupra tenena gum di, kange douna gum, walwal nengdi ketenepra derinung keca cadi, Allahdi, ‘Ataru konuma, tenepkamre taruda, atali keca yuma gum kupra deipkamre.
Ukupyopda, sun atali keca si eremameng nesaladi, ‘Uo, akecada warya tep men melipseu do?’ tenen, malya pepra, ikin kange doupra kunkamenge. Allahdi akeca yumada, gum kupra deipkamre.
19 Dinino, nun Israel nesaladi si eremnup Allahda, atali keca utopu pio men kurure. Allah Yahwehda pio tek sisi ngebo kurura cadi, erdi akeca-keca yuma ketekepra deiamupa akurure.
Allahdi nun Israel nesala ^{▼▼Israel nesala – Ibrani upu deiki di, acada, nimi si Yakub seki. Dinino, Yakubda, Israel yala nesala yuma, sun apubo kuramnga cadi, sundi, ‘Yakub’ si epmengopda, sun pe yala nesala yuma tep tenenunge.} tep, “Ne nyapu sisa kunkamrume,” pepra, pedina upu deiki di peramseu. Erda, Allah Yahweh, im deiki kunge jen talena malaikat yuma, sun deiyo ngebo kurure.
Er dipapu, nun Israel yala nesala yuma tep, konum men di wepra deiamseu.

Allahdi domon upu deiki di, sun Babel mutu nesala tep, pepu upu

20 Allah Yahwehdi, sun Babel mutu kurami nesala tep aupu pepu.

Ada, “Sunda, Babel mutu neitamai kurum nesalada, ukupmantoda, gat besi keca paku pona tep keca, er si palu, utopunge konum kupra deipsisi. Tonda, nimi porbana tep, ne jen cap, ne mar cap utopu kupra, puto karepsisi. Ukupra pepmasena deiyoda, sunda yuk mutu ban-ban yuma kunge nesala tep, balena pona neng utopu kepra deipsisi. Tonda, ware mutu nesala do, sunda ila nimi deiyo-deiyo neng cap, Raja-Raja neng cap, sundi talenung nesala cap, sun pona tep neng kupra deipsisipa, sundi yuk-yuk mutu nesala yuma popra sikke bukra tamrume. 21 Ange utopu, nedi ne puto dopra sun deiki deipsisipa, adeiki di sun Babel mutu nengdi, yuk mutu nesala porbarumu. Sun yuk mutu jen talena neng cap, sun kuda bisam bali deiki bukra, porbanung kuda-kuda bisam yuma cap, akuda deiki bukra porbanung jen neng capda, sun Babel nengdi, aneng yuma popra, sikke bungtamna neng keipsisa cadi, sundi yuk-yuk mutu nesala weika di poprum deiki di, tek sisi nedi anesala wenepsidi, gum kupra deipsi. Ange utopu, nimi porbana tep, kuda bisam di gipra, tu deiki embaramre keca, er si kereta perang cap, akeca deiki tekra embanung jen neng yuma cap tep, go karepsisipa, sundi aneng popra, sikke buktamrume. Sunda ne puto deiki di ange yuma konum kuprume. 22 Angetopu, nedi sun Babel mutu neng tep, go karepsisipa, yuk mutu nimi cap, nerapu cap pona neng konum keipsisi. Tonda, wisi neng cap, kaber neng cap, metek nyapu cap, kanam nerapu cap yumada, pona tep neng konum keipsisipa, yuk mutu nesala weika di konum porume. 23 Ange utopu, nedi sun tep puto cap, go cap karepsisipa, sundi domba bisam peina deiyo neng cap, sundi peirami domba bisam cap, poprumdi gum kupra derina neng utopu keipsisi. Tonda, ne puto deiki di, sun Babel mutu nengdi, yuk mutu wa penung neng cap, sun wa pena tep, sun sapi bisam tapu gerekmengedi, tapu gidongepa, wa perur sapi bisam yuma cap, poprumdi, konum gum kupra deiprume. Tonda, nedi go karepsisipa, ila neng peda, nimi deiyo neng Gubernur neng cap, sun amutara deiyo kepra, pel melipra donung neng yuma capda, poprumdi, konum gum kupra deiprume. Ange-ange yumada, ne Allah Yahwehdi, ‘Amutu neng ton wenepra popnedi, sikke buktapkamne,’ tenemsa tep, nedi sun Babel mutu neng tep, ne puto deiki di go kareamsisipa, sundi amutu-amutu nesala yuma porbaramrume.

Allahdi Babel mutu nesala, sun wenemna keca deipkamrenge tep, pepu upu

24 Allah Yahwehdi sun Israel nesala tep pepu.

“Ne Allahdi Babel mutu neitamai kunge nesala, sun mali weik kuramya cadi, sun tep wenepkamne. Ada, sundi mali weik kuramitopu menenga keca karepkamna deiki di, sun tep popkamne. Atep, sun pedipapu kael kepkamrume. Atep, sun Babel mutu nesala cap, tonda sun Kasdim mutu neitamai kurami neng cap, sun dipapu Yerusalem mutu neitamai kurami nesala tep, mali kupra deriramidi, popra sikke buktami. Sun Babel mutu nesaladi ukuramya tep nengda, sun tep wenepnedi popkamne. Ne Allah Yahwehdi konum pepmasena cadi, angeda tek sisi nong kupkamre ja! 25 Uo, sun Babel mutu nesalao, ukupmantoda, sunda mutu buma topsakredi mutu ban-ban yuma sikke bungtamamretopu kurume. Sundi, tuai mutu neitamai yuma, yuk-yuk mutu nesala weika di konum popra gawal dangamrume. Dinino, ukutaruda neda Allah Yahwehdi, sun deiki yanipkamsene. Ukupsenedi, sun adipapu gipropkamsene. Tonda, gamupra deipsenedi tapsenepa, uku di jepra sikke but utopu kupkamsere. Ukupmantoda, menop taru, sun Babel mutu nesalada, ila di bukamu mutu kuramrum dinin, amenda taruda, ila uku di mutu buma yuma jeproprepa, teno pakra sakredi, ban mutu kupra kuramretopu, ne ila puto deiki di, sun tep mali kweipsenedi, amutarapu deipkamsene. 26 Sun ila gel ati domrumnge konum uruptapmengopda, amenda taruda yuk nengdi agel dopra, kange di ton cap, yuk telep ati ton pio men dopkamenge. Ada, ‘Ati puto keprepa, pio akunkamre’ tenen, ati ayumna ingna amutara derin gel cap, ati dela pirman derin gel cap tep, sundi akati ayumna amutara deiami gel uruptapkameng gelda, nimidi men dopra deipkamenge. Amenda dorkunkamre taru neitamai yumada, sun mutu neitamaida, walangyopu kunkamre. Sun mutuda, katawai mutupu kuprepa, nimi men kunungaitopu kunkamre. Ada, ne Allah Yahwehdi, aupuda konum pepra deipmasena cadi, angeda nong tek sisi kupkamre ja?

27 Ange tep nengeda, sun dana-dana tara mutu neitamai kurum nesalao, sun yuk-yuk nesala yala-yala yumada, sundi nimi porbana tep keca, er si benderada, peten keipkamrume! Tonda, ukupmumdi, ‘Jen talena neng ketenepra yankameng’ tenen, lelim pen keca, er si terompet dopra, lelim pepmum pangeda, mutu ban-ban yuma kunge nesala gekepkamenge! Gekepmenge dingeda, mutu ban-ban yuma kunge nesaladi, Babel mutu neitamai kunge nesala tep, porbenkamenge! Sun udapu tara mutu neitamai talepra kunge nimi deiyo talepra, dakunge ila nimi deiyo-deiyo neng, ada Raja-Raja neng kongpepkamrum mutu deiyo nengda ake. Ada Ararat mutu cap, Mini mutu cap, Askenas mutu cap, mutu deiyo talepra kunung neng yuma cap pepmempa, Babel mutu nesala porbenkamenge. Atep Babel mutu neitamai nimi porbana tep, jen talena ila deiyo ngebo tenpu wepra deipkurume. Tonda, nimi porbana tep bali deiki bukra banung kuda-kuda bisamda, sul po pio weika di bulumameng utopu kupra, dokotepkamrume. 28 Dokotepmem pangeda mutu ban-ban yumadi, Babel mutu neitamai porbenkamenge. Tonda, ila pala mutu, Media mutu neitamai talepra kunung ila nimi deiyo neng kepra, kunge neng cap, sun amutara pel talepra donung deiyo-deiyo neng cap, Gubernur neng cap, Gubenur amutara melipra donung neng cap, tonda, adeiyo-deiyo nengdi talenung mutu-mutu yuma neitamai dakunge neng cap tep, kongpeprumupa, sun yuma bulupmengedi, Babel tara nesala tep poryankamenge. 29 Atara-atara yankameng nengdi dinikronkameng taruda, Babel mutu yuma lokredi du embendankamre. Ada ne Allahdi Babel mutu neitamai mali mutu kupra deipnepa, nimi yuma dim pepra kunkamenge. Atep nedi tenepsi taru konum kupyopda, Babel mutu neitamai yumada walangyopu kupkamre. Nimi pio kuna gumai, katawai mutu walangyopu kuramretopu kupkamre.

30 Nedi pepnepa, sun dana-dana tara jen nengdi, Babel mutu porbenkameng taruda, sun Babel mutu neitamai jen talena neng yumada, kware weik kuprepa, ton cap men poryankamenge. Sun dipru bulungsangrepa, ‘Nimi pona tep nengeda, dakwapye. Sundi nun popsenung’ tenen, ‘Acapu inipra kunkamepe,’ tenenkamenge. Ukupmenge dingeda, ila gel di domi gel ati, er sida benteng-benteng neitamaipu inipra kunkamenge. Ukunkameng taruda, sun ali dangna gum keca yumada, wangapronkamenge. Ukupmengepa, kange moupra tenenange yumada, gum kupkamre. Kware weik kuprepa, nerapu puto pio boun kuramengtopu, yuk jen talena nengdi men popmanto kupkamenge. Ukupkameng taruda, sun anesaladi domi ati, arum wengna bisi buplan damai di besi keca di ketenepra deipi buplan, er si pintu gerbang yuma, yuk nengdi urupkamenge. Tonda, sun ati-ati yumada, uku dongopra gawal dakamenge. 31 Ukupkamenga tep, ‘Uo’ tenen, kai upu pena neng ton wepra deipnepa, yankameng neng yumada, amenda tara di dukdongopra, sepdaro yangedi, Babel mutu neitamai talepra kurur nimi deiyo ngebo tep, yana pepkamenge. Ada, “Uo, naio, kan mutu neitamai yumada, sun pona tep nengdi konum dana-dana tara yuma di poryanmangedi, kan taleramum ati arum yumada, konum popra gawal dangmange,” pepra mali penkamenge. 32 “Tonda, ukupmangedi ila me goupra ortara bana tep bisi embanai yumada, sun pona tep yanmang nengdi, abisi yuma konum talenunga cadi, nun tara nengdi men benmanto kunmape. Ange utopu, nun mutu neitamai, ila me pirmanai yumada, lyom manmaneng kwamngai yuma, uku konum dongopmangpa, uku di jenmare. Atep, kan jen talena neng yumada, kware weik kuprepa, ‘Uo ware kuptepe do?’ tenen, tenimtonapu kunmange.” Sun kai upu pena nengdi penkamenge.

33 Allahdi aupu ton pepu.

Atep pio kuna gum dipapu, sun pona tep nengdi yanapmengedi sun Babel mutu neng yumada, adipapu popra gawal dakamange. Tonda, sun pona tep neng dipapu, yan yanipra sepembankamenge. Ukupmantoda, gandum du taingna tep, sapi bisamdi taingamrepa, bambama kecapu tuai sakrepa, tali dakuamretopu, Babel mutu neng yuma tep, popra gawal dangkamenge. Atep neda Allah Yahweh, im deiki kunge jen talena malaikat yuma, sun deiyo ngebo kunune. Sun Israel nesala tep melipra kunun Allahda, ne pua cadi, sundi ne si eremnenunge. Neda ila puto kunun ngebodi, aupu konum pepra deipmasene.

34 Amenda taruda, Yerusalem mutu neitamai yuma kunge nesaladi upenkamenge. “Uo, uo, sun Babel mutu nengdi, nun tep adipapu sikke buktapmasenge. Tonda Babel mutu talepra, nimi deiyo ngebo Raja Babelda, er dipapu jepra gawal dakmasere. Ukupmantoda, ila laut pumbon mekinadi, metek mekina jepra gawal dangamretopu, nun Yerusalem mutu nesala yuma, konum popra gawal dakmasere. Nun mutu neitamai telep kwamu keca yuma, dalupra dopropudi, gum kupra deipmasere. Ukupmanto nge ton, ila yu gam kecada, pio ila ngeda, yambul gam keca popra jedoramretopu, Yerusalem mutu yumada jepropmasere. Er mundu pumbon neitamai di amutu neitamai telep keca yumada kipropkamre dinin, erdi, ‘Ne songe, tenepre kecada, dukra tapmasere.” 35 Atep, sun Sion ^{▼▼Sion – Amutu sida Sion ton penunge. Tonda, Yerusalem mutu penunge. Amutuda er si butene dinin, amutuda tenpu mutu pua.} mutu neitamai kurum nesalada, adipapu pepkurume, “Sun Babel mutu neitamai kunung nengdi, nun Sion mutu nesala pio weika di poramseipa, nun yapida pio weik embeu. Atep nengeda, nundi Allah tep upepra moronupe. ‘Naio, nun nong cap, yapi cap tep, kandi sun Babel tara nesala tep, popmemdi kwangdakamrume,’ pepra moropkepe!”

Allah Yahwehdi, Israel nesala melipkamra tep, pepu upu

36 Ange tep nengeda Allah Yahwehdi sun Yerusalem mutu nesala tep pepu.

“Nedi pio pe deiprapsenedi, sun melipra kwangdana tep, sun Babel mutu nengdi, sun Yerusalem mutu nesala poryanamseiya tep, ukutaruda sun Babel tara nesala tep wenepra popkamne. Ukupkamne taruda, sun Babel mutu neitamai me jenung me bungna cap, embendau ila me yuma capda, adipapu cepra deipnepa gelal sepropkamre. 37 Ukupne dingeda, sun Babel mutu neitamaida, sikke bukra deipne pangeda, walangyopu kupkamre. Sun ila ati arum yuma urupra daktapnyopda, sun domi ati gel yumada, tu deiki tali-tali deiptapnepa pio akupkamre. Nedi, sun mutu ukupra mali deipnyopda, bura tara gam kuramre kam tep, er inimnai kepra deipkamne. Ukupra deipkamne taruda, sun Babel mutu neitamai kunkamre ngeda, yuk mutu nimidi epmengedi, ‘Uo, Allahdi anesala wenepra popkada, ila mambule’ tenena cap, kwar kuna cap kunkamenge. Tonda nesala tenpu ngebo peda ton, amutu neitamai pio men kunkamenge.

38 Sun Babel mutu nengdi, singa pus er jen keca putarepa, upu ila di peramre utopu kupra, mali penkamenge. Tonda singa pusdi er nyapu diprepa, dakuamrepanen, jen putapyopda, ila di engamengtopu kunkamenge. 39 Ataruda, sun pio jen putankamre. Atep nedi sun jepkamenga tep, ila kailya ton ketenepra deirbenkamne. Ukupkamnenge jepmenge dingeda, sun adipapu yu me jepmengepa, kange yawaramamretopu kupkamenge. Tonda sun giso yumada biri-biri pepra, duembaramrepa, manapu kunkamenge. Mapmenganen, amenda taru kange di ton men bungdongonkamenge. Ne Allah Yahwehdi aupu konum pepmasena cadi, nong tek sisi kupkamre ja! 40 Atep, nedi sun anesala tep kupkamne ngeda, jem domba bisam mi cap, jem domba bisam ilange cap, kambing bisam cap, popra yangedi mapra deriramengtopu kupra deipkamne. Allahdi pepu.

Amenda taru, Babel mutu nesala kupkamenge tep, pepu upu

41 Allah Yahwehda, aupu ton dukdongopra pepu. “Ada mutu ban-ban yuma kunge nesaladi, Babel mutu tep, ‘Uo, amutuda pio telep mutu,’ pepra, si eremami ngeda, tamupra dopropnedi, bukra deipkamne! Ukupne pangeda, sun Babel mutuda, yuk mutu dana-dana yumadi, Babel mutu mali kweipkamnenge epmengedi, ‘Uo, Allahdi Babel nesala ila yu di wenepra popkada, ila mambule,’ tenena cap, kware pio kuna cap kunkamre. 42 Ange kunkamre taruda, sun Babel mutu neng, poryakankameng jen nengda, denge pio weika di yankamenge. Ukupmantoda, ila laut mokon me welepredi, ila puto kumanya pung peprepa, laut me kait welepredi, me pirman keca yuma singipdongoramretopu kupkamre. 43 Babel mutu neitamai yumada, menop taru ila ati arum domi dinin, akati-akati yuma urupra sikke buktapnyopda, yuk mutu nesala yala-yala yumada, epmengedi, pio ila kwar tenenapu kunkamenge. Amenda taruda, akatawai mutu utopu kupra deipkamne. Ukupra deipne pangeda, amutu neitamaida nimi kuna cap, bisi embana capda, pio ton men kunkamenge. Amutuda walangyopu kunkamre.

44 Atep ne Allah dipapu, sun Babel mutu neitamaida, isok er si Bel, si eremnunga tep wenepkamne. Atep sundi isok Bel er si eremamidi, yuk mutu nesala talerami keca yuma dalupra doprominge yumada, tamuprapnedi, sundi akeca dopra, yuk mutu nesala tep, kange di karenkamenge. Ange ukupnepa, sun mutu ban-ban yuma kunge nesaladi, ‘Bal si erepkamep’ tenen, Babel mutu yakaramitopu, kange di ton cap, men yakankamenge. Bel isok tep tapmengedi, er si pio men eremkamenge. Atep sun Babel mutu nengdi wiami ila lyom gel beilya yumada, nedi dakra, sikke bukra tapkamne. Neda, Allahdi, aupu konum pepra deipne.

45 Ange tep nengeda uo sunda, ne nyapu sisa Israel yala nesalao! Babel mutu neitamai tupa gam kurum nesaladi, amutu tapra, sepdara bendopkamrume! Neda, Allah Yahwehdi, sun Babel mutu nesala tep, ila yu kupmanera cadi, anesala tep, ila di wenepra popkamne. Atep, sun ne nyapu sisada, lyepdamumdi, sepdara bendopkamrume. Sun Babel mutu neng yumada ila di wenepkamna tepa. 46 Amutu yuma wenepkamna cadi, sunda kware pio men kupkamsere. Uda, ataru neitamaida, ton ati nesaladi, yuk ati nesala tep, ‘Uo, ikin keca yankamsere,’ pepra, bamur upu pedanapu kunkameng dinin, ne nyapu sisa, sundi aupu gekepmumnyopda, kware tenena gume. Ton keteng tamun neitamaida, yuk upu penkamenge. Ton keteng tamun neitamaida, yuk tali upu ton pepdankamenge. Ton taruda, ‘Uo, ton mutu ila nimi deiyo ngebodi, yuk mutu talerur deiyo ngebo tep porbenmare! Tonda, ton tara nengdi, yuk ortara mutu neng tep, porbenmange!” pepra, sun pe kange dipapu, tali upu penkameng dinin, sunda ne nyapu sisada, aupu moupra men gekenkamrume. Angeda kaukeptamnapu kunkamrume.

47 Dinino, pio tek sisi pepsene. Ne tenepne taru konum yaryopda, sun Babel mutu nesala cap, sundi tali keca isok-isok tep, si eremnung keca tep, ila di wenepra popnedi, gawal dakamne. Ikin keca konum sun deiki deipkamne taru damai konum kupmare. Ukupnepa amutu neitamai kunung nesala yumada ali dakamange. Tonda sun Babel mutu neitamai kurami jen talena neng yumada, konum popnepa, sun pe mutu bisi neitamai bisiai dapu sakmengedi, acapu depropkamenge. 48 Ange yuma konum kupnyopda, im deiki kapu keca yala-yala yuma cap, tuai mutu ban-ban yuma kapu keca yala-yala yuma capda, pio ila di kange deipmengedi, kange pingpinga deiki di, ila upu di, ‘Telepe,’ penkamenge. Ada, sun Babel mutu neitamai kunkameng nesala yuma pona tep yankameng nengda, sun udapu tara mutu nengdi poryakankamenge. Atep, nedi sun anesala adipapu dopra karepnepa, anengdi yana, sun Babel mutu nesala yuma popra gawal dakmengedi, sikke buktapkamenge.

49 Mutu ban-ban yuma kurami nesala kankan yuma neitamai di, sun Babel mutu nengda, pio weika di poramipa deami. Angepu gum dinin, Babel mutu jen talena nengdi, Israel yala nesala denge pio weik ton portamamipa, depra gawal dakmanto kupi. Ange tep nengeda, ne Allahdi sun Babel mutu nesala tep wenepra popkamne. Ada, udapu mutu tara di, yuk mutu jen talen nengdi yana, Babel mutu tara kunge nesala tep, popra gawal dakamenge. Neda Allah Yahwehdi akonum pepra deipne.

Allah Yahwehdi sun Israel nesala cap, Babel mutu neng cap tep, pepu upu

50 Allah Yahwehdi sun Israel nesala tep pepu.

Sun Israel nesala, Babel mutu neitamai tupa gam kurum nesala tep pepsene. Sun Babel mutu jen talena nengdi nimi pona tep parang ya dopra, sun Israel nesala denge pio weik konum porami dinin, sun tupa gam kunmarum nesalada adipapu sepdara bendopkurume! ‘Dakwapmarepanen, nunda amenda tarupu benkamepe,’ tenena pio gume. Ukutaru di, Babel mutu tapra, adipapu sepdaro benkurume. Sunda sun mutu sisa neitamai men kunmarum dinino, menop taru, sun pe mutu sisa neitamai kumumdi, ne Allah tepapu tenepnemumdi, ne sipu eremkamarume. Ada sun nai bo Allah Yahweh cap, Yerusalem mutu cap tepapu, moupra tenenkamarume. Allahdi pepu.

51 Upepu pangeda, sun Israel yala nesaladi tamupra pepi. “Uo, sun Babel mutu nesaladi, nun tep, ‘Anengda nun pio songe,’ pepra tenemseidi, nun tep mali upu weik peramseipa, ali dakmepu. Tonda, nun mutu sisa neng gum dinin, yuk karen mutu nimi bo nengdi, nun nai bo Allah Yahweh, er si eremna ati pumbon, akati neitamai pio telep lek ati yuma, tali lupra wekidi, mali kupra deipidi, akati yuma uruptapseipa, nun Israel tara nesala yumada, ali dakmepudi, engenapu kuramepu.” Sun Israel yala nengdi pepi. 52 Upepipa, Allah Yahwehdi tamupra pepu. “Ukutaruda, ne Allahdi pepkusen upuda, pio moupra tenepkurume. Ada, Babel mutu nengdi pio mali weik kuramya tep nengeda, sun menenga tep, amenda taruda nedi sun Babel mutu nengdi isok sipu eremna tep petupra deiami patung-patung keca yuma, urupra tapnedi, sikke buktapkamne. Babel mutu nesala wenemna tep tumi konum tenemsi ngeda, konum damai yankamra tep pepne. Atep, nedi kongpepnepa, yuk karen mutu yu nengdi yana, Babel mutu neitamai kunkameng nesala yumada, popmengopda, sun ila kange mun susu jeramrepa, sundi, ‘Uo, nun tep popmasengpa, nun nong deikida, ila susu pu weika di jenmasere,’ pepra engepmengedi, ngolongkamenge.

53 Uda, ne Allahdi tek sisi pepsene. Sun Babel mutu nesaladi ila puto weik kuptenga peda, nedi anesala popra gawal dakamne ja! Angetopu, sundi, sun ila ati arum dana-dana tara yuma, ila lyom gel di, gel beilya wipra deiptengepa, im deiki weleptua peda, ne Allahdi, yuk karen mutu nesala ton wepra dokotepnepa, sundi Babel mutu ati-ati yuma dangtamnapu kupmengedi, Babel tara nesala ponkamenge. Angeda, neda Allah Yahwehdi, akonum pepra deipmana cadi, angeda tek sisi nong kupkamre ja, pepsene! Allahdi pepu.

Allah Yahwehdi dukdongopra, Babel mutu sikke bukra tapkamrenge tep, pepu upu

54 Allah Yahwehdi aupu ton cap pepu.

“Sun yuma moupra gekepkurume! Sun Babel mutu neitamai kunung nesaladi, ila upu deiki di ngolongna cap, bicau kupmarpa engena cap kunmange. Deiyoda, sun pona tep neng yanmangdi sun mutu neitamai yuma popra sikke bungtamanga tep, ila lelim penmara tep, sun gekepkurume. 55 Alelim gekenmarumada, ne Allah Yahwehdi sun Babel mutu nesala yuma tep, wenepra popnedi, sikke bungtamna utopu kunman adano! Ukupmana deiki di, sun Babel mutu nesalada, upu pingpinga di penmainge yumada, dim pepkamre. Upu ton pio men penkamenge.

Nedi sun mutu neitamai yuma popra sikke buktapkamna deiki di, ila lelim pepyopda gekenkamrume. Ukupmantoda, ila puto kumanyada, puto di pung peprepa, laut mokon deiki ame kaitda, ila di weleramrepa, ila lelim peramretopu, Babel mutu neitamai di, ila lelim pepkamre. Ada, nedi go karepnepa, yuk mutu jen talena neng yumadi, Babel tara nesala poryakana tep, ila di upu ngolokra yangedi poryankamenge ngeda, gekepkamrume.

56 Alelim gekenkamrumada, tali tep guma! Deiyoda, ne Allahdi sun Babel tara nesala mali weik kuraminge wenemna tep, yu weik kupnerepa, sun tep wenepnedi poptapkamne. Ukupkamna cadi, nedi kongpepne pangeda, yuk karen mutu yu nengdi, sun Babel mutu nesala yumada, sun pedipapu kuramenga menenga di utopu karepkamne. Sun pona tep neng yangedi, Babel mutu neitamai yumada, uruptapkamenge. Ukupmengedi, Babel mutu jen talena neng, nimi pona tep ila kael neng yuma tomopkamenge. Sundi doupmange jen yumada, koloptapkamenge. Deiyoda, ne Allah Yahwehdi, sun mali-mali weik kuraminge menenga karena cap, kwangdangna cap tep, sun yuma tep wenepnedi, popra gawal dangkamne ja!

57 Ukupkamne taruda, sun Babel mutu neitamaida, nimi deiyo-deiyo neng talepra kunung neng cap, ila kael kemna keca talepra kunung neng cap, sun mutu talena tep, nimi deiyo kepra, Gubenur neng yuma cap, sun amutara pel melipra donge deiyo-deiyo neng cap, sun mutu jen talena neng yuma cap tep, konum popnyopda, kange di ton cap men bukronkamenge. Depnapu kupkamenge.

Ukupmantoda, nimidi kange yawaramre yu me karepmengepa, yuk neng jepmengedi kange yuma yawaramrepa, mapnapu kuramengtopu. Babel mutu neng peda ukupkamenge. Yu me jepmengepa, anesalada mapmangaida, pio bungdongona gum di, mapnapu kuramengtopu, sun Babel mutu nesala yuma poptapnyopda, depnapu kupkamenge. Ange yumada, ne Allahdi, tuai mutu yuma talepra, ila nimi deiyo ngebo Raja kunune. Tonda, neda Allah Yahwehdi, im deiki kunge jen talena malaikat yumada, sun deiyo ngebo kununa cadi, neda ila puto weik ngebo kunedi, aupu konum pepmasene. Atep ange yumada, tek sisi nong kupkamre ja, pepsene.” Allahdi pepu.

58 Upepu dingeda, Allah Yahwehdi, im deiki kunge malaikat ^{▼▼malaikat – Ibrani upu deiki di, akayat neitamaida, Allah er si tep, ‘Yahweh Sebaot’ pepra seki. Sun kael kemna tep, aupu ‘Sebaot’ deiyongepu, katuai di sekmepu.} yuma, sun deiyo ngebo kuredi, aupu ton dukdongopra pepu.

“Sun Babel mutu neng, ila puto di dopi lyom gel beilya, er si tembok-tembok yumada, ne Allahdi urupra daktapnedi, sikke buktapkamne. Agel beilya yumada, pio urupra daktapnedi, tu deikipu deiptapkamne. Ange utopu, sun ila ati arum wengna bisi, lyom buplan, gat keca besi di deipra dopipa, ila di welepunge, er si pintu gerbang yuma peda, uku dongopra gawal dakamne. Ukupkamne taruda, yuk mutu nesaladi, ‘Babel tara kwamu keca yuma gum kuprur tep, nundi melipkamep’ tenen, piripetepmengedi, ila ikin pel donkamnung dinin, ange yumada tali pua.

Deiyoda, ne Allah dipapu apel donung keca yuma cap, sun mutu kwamu keca yuma capda, uku dongopnepa uku di akeca-keca yuma jeproprepa, gawal dakamra tepa. Atep neda, Allah Yahweh, im deiki jen talena malaikat yuma, sun deiyo ngebo kununa cadi, neda ila puto ngebodi aupu konum pepra deipmasena tep, nong tek sisi kupkamre ja!”

Aupu yumada, Allah Yahwehdi pepupa, nabi Yeremiadi aupu gekepudi sekra deipu.

Yeremiadi Babel mutu neng tep lap pepra deipu upu

59 Yehuda tara taleamu nimi deiyo ngebo Raja Zedekiada, Yehuda mutu taleamupanen, keteng tamun dumbari konum kupu taruda, er cap, yuk ngebo cap, sun butenedi Babel mutu berei. Babel mutu benkou taruda, nimi si Seraya, er nai boda, er si Neria kuramu. Tonda Neria, er nai boda, Mahseia kuramu. Serayada, Babel mutu ila nimi deiyo ngebo Raja tep, er amutara pel melimna ngebo kuramu. Atep nengeda, ataruda Seraya cap, Raja Yudea Zedekia cap, kikiman melipupa Babel mutu berei. Ukuprei taruda, ne nabi Yeremiadi er Seraya tep, nedi sekra deipsi upu karepsidi, “Aupuda, Raja Babel damai karerbenkurume,” pepra deipsi.

60 Ada ne Yeremia tep, Allahdi, ‘Ukupkamne,’ pepra, peipneu upu, ada sun Babel mutu neitamai ila kange mun keca yankamunge tep lap peipneupa, surat deiki sekra deipsi ngeda, Seraya tep karepsi. ‘Babel mutu ikin keca yankamre,’ pepra, surat sengna keca deiki di sekeipsinge yumada, abuku getena pumbonpu lap pepra sekeipsinge dopra, Seraya tep karepsi. 61 Karepsi dingeda, ne Yeremiadi Seraya tep pepsi. “Ada, kan Babel mutu konum bememnyopda, pio piriprapmemdi, abuku neitamai sekeipsinge yumada, tamna pio gum dipapu, sun Babel mutu neitamai kunung nesala yumada, sun gekenai di aupu yuma nungkamrume.

62 Ange yuma konum nukra seng pepmemnyopda, nimi gekenkamengai aupu ton ila upu di pepkamrume. “Ada, Allah Yahweh, kanda Babel mutu neitamai kunung nesala yuma tep, aupu konum peipsemume. ‘Sun Babel mutu damai yumada, sun wenemna tep, popnedi sikke bukra tapkamsene. Ukupne pangeda, nesala yuma cap, sundi talepra peinung gam keca yuma capda, pio gum kupra deipnepa, pio tenpu peda amutu neitamai ton pio men kunkamre. Tonda amutu neitamai kwamre keca yumada, gum kupra deipnepa, walangyopu kunkamre. Sun Babel mutu ban-ban yumada, katawai nimi men kupmantoai kupra deipkamne.’ Allahdi konum upepra deipseue,” pepra lap penkamrume.

63 Atep, aupu konum pepmemnyopda, kan Serayadi asekra deipsi buku neitamaida, sun amutu nesala gekenmangai di konum nukra seng pepmemnyopda, abuku deikida, gel dongopra getepkurume. Ukupmem dingeda, abukuda adipapu ila me er si Efrat me embeua neitamaipu dopkurume. Dopmemnyopda, amedi abuku jepropkamre. 64 Ukupmem dingeda upepkurume, ‘Ada, sun yuma moupra epmumdi, kael kepkurume. Abukdopmanpa, ame pumbon wekmarepa, aila me di jepropmartopu, sun Babel mutu nesala yuma peda, gum kupkamrume. Atep amutu neitamai kurumu nesalada, Allah Yahwehdi gum kupra deipkamsere. Tonda ukupkamser taruda, pio men lukra deipkamsere. Deiyoda, Allah Yahweh er yu dopra, ila kange mun keca sun deiki deipkamsera cadi, amenda taru peda, kange di ton cap, pio men lyepra deipkamsere.’ Kanda Serayadi, sun Babel mutu nesala gekenai di, aupu jenek kupra lap pepkamrume.” Nabi Yeremiadi Seraya tep pepu.

Uda, nabi Yeremiadi sekra deipu upuda, sirik akonum sekra deipu. Akonuma.