Jer 52 | XteSC | STEP | Yehuda yala nesala, sun mutu ila nimi deiyo ngebo kepra talepra kuramu ngebo, er sida Raja Sedekia kuramu. Sedekiadi, amutu talena tep gonga kepu taruda, er keteng tamunda, umur dua puluh satu tahun (21) kuramu. Ukuramudi, erdi, “Ukupkurume, ukupkurume,” pepra, upu peramudi Yerusalem mutu cap, amutu kurami nesala cap, taleamudi keteng tamun sebelas tahun (11) kupu. Ataru sebelas tahunda, Raja Sedekiadi Yehuda yala nesala taleamu. Nimi deiyo ngebo Sedekia, er deiamu ner, er nin sida, Hamutal kuramu. Ada, yuk ngebo er si Yeremiadi deipu ner mi, Hamutaldi Sedekia deipu. (Angebo Yeremiada, nabi Yeremia gume. Erda yuk ngebo. Sun si utopu dinin, sunda yuk-yuk kuramrei).

Jeremiah 52

Yerusalem mutu cap, amutu kurami nesala cap, Babel mutu nengdi bisbisa kapidi, Yerusalem mutu uruptapidi, gawal dakiya tep, pepu upu

1 Yehuda yala nesala, sun mutu ila nimi deiyo ngebo kepra talepra kuramu ngebo, er sida Raja Sedekia kuramu. Sedekiadi, amutu talena tep gonga kepu taruda, er keteng tamunda, umur dua puluh satu tahun (21) kuramu. Ukuramudi, erdi, “Ukupkurume, ukupkurume,” pepra, upu peramudi Yerusalem mutu cap, amutu kurami nesala cap, taleamudi keteng tamun sebelas tahun (11) kupu. Ataru sebelas tahunda, Raja Sedekiadi Yehuda yala nesala taleamu. Nimi deiyo ngebo Sedekia, er deiamu ner, er nin sida, Hamutal kuramu. Ada, yuk ngebo er si Yeremiadi deipu ner mi, Hamutaldi Sedekia deipu. (Angebo Yeremiada, nabi Yeremia gume. Erda yuk ngebo. Sun si utopu dinin, sunda yuk-yuk kuramrei).

2 Pumun taru Yehuda tara kurami nesala tep taleamu deiyo ngebo, er sida Raja Yoyakim, erdi Yehuda yala nesala, sun deiyo ngebo kuramudi pio malipu kuramutopu, er yo punupu ngebo, Raja Sedekia peda, nimi deiyo ngebo kepra, Yehuda yala nesala taleamu taru peda, pio mali weik kuramu. Ada, Allah er si Yahweh damai, Sedekiadi pio mali kecapu talepra kuramu.

3 Ukuramupane, Allah Yahwehdi Yerusalem mutu kurami nesala cap, tonda, Yehuda tara kurami nesala cap tep, yu kupupa, sun aneng tep weneprapudi, enepra dokotepudi, sun anesala tep bicau tenepra men makupu. Allahdi, anesala yuma tep, ‘Sunda pio mali weik kuruma tep, ne damai ton men yakankamrume,’ teneramu.

Ataruda, Yehuda tara taleamu deiyo ngebo Raja Sedekiadi, Babel mutu ila nimi deiyo ngebo Nebukadnezar, er upu men gekepudi, balila deipra kuramu. 4 Ukupua tep, Babel mutu nimi deiyo ngebo Nebukadnezar cap, er jen talena neng cap, sun tonpa, ‘Yerusalem mutu kunge nesala popkamep’ tenen, yana warengmai. Ada Sedekiadi, Yehuda tara nesala talepra kuramupa, keteng tamun denge toupnenge (9) konum kepu taruda, sun Babel mutu jen talena neng yumadi Yerusalem mutu yai. Keteng tamunda, 9 dinin, warda bulan sepuluh, tanggal sepuluh deiki di, Yerusalem yana warengmai.

Babel mutu ila ngebo Nebukadnezar cap, er nyapu jen talen neng yuma cap yaidi, ‘Yerusalem mutu kunung nesala benung’ tenen, ila lyom beilya yan wipra ongopdongoamidi, sun Babel nengda, abeilya bura tara ke dodin opkal ati, er si tenda-tenda deipra kurami. Ada, ‘Yerusalem mutu nesala bura tara gupsaka bendopnung’ tenen, pio kalengamya tep, Yerusalem nesala yumada, sun wa damai cap, bura tara cap, pio men embenmanto kuramipa, ikin weik kurami.

5 Sun Babel mutu nengdi, Yerusalem mutu kurami nesala tep, pio tumi-tumi yuma kalengnapu kurami. Keteng tamunda, (9) toupne ngedi dipdongopra mapbaramyane, keteng tamun kumnge (11) kepu. Ataru neitamai yumada, nimi deiyo ngebo Raja Sedekiadi, Yerusalem mutu tupa taleamu dinin, er pe, er taleamu nesala peda, jen keca kirbana tep, bura men benmanto kuramipa, ila ikin weik kurami. 6 Ukuramipa, sebelas tahun (11) neitamaipu dinin, bulan empat tanggal sembilanda, Yerusalem mutu neitamai mawa deiami jen keca yumada, gawal dakipa, ila jen putan li taru kepu. Ukupu taruda, sun Yehuda mutu kurami nesala yumada, jena pio gum kupudi, jen tapupa kange mun kupu.

7 Ukupka tep nengeda, sun Yerusalem mutu neitamai kurami jen talen nengdi, ‘Gume, amutu tapra bendopkamepe,’ tenepidi, ila lyom gel beilya wipra ongopdongoami ngeda, alukunda bon potokrapidi, bura tara sepdaro bendopi. Ada, sun Babel mutu nengdi, ‘Yerusalem mutu nesaladi, bura bengedi, jen keca kipnung’ tenen, ila lyom gel beilya wipra ongopdongoami ngeda, lukunda neitamai di, bon potokrapidi, tapra bendopi. Yehuda yala jen talena neng yuma bura sakra bei. Ataru peda, sun Babel mutu neng akalekmaipapu, Sedekia er jen neng yumada, bura tara, Yordan me duman tarapu bei. Abeilya daktapra beiaida, nimi deiyo ngebo, er kuramu ati dam bisi di dourbena bendopi. Ada lyom beilya dan-dana di wipra yan dipdongomya di gupsaka bei.

8 ‘Sepdaro benkup’ tenen, sepdara benterepi dinino, Babel mutu jen talen nengdi, amenda dombeidi, sepdara banmaipane, sun Yehuda tara jen talen neng epidi, kware kupupa, sun deiyo ngebo Raja Sedekia tep, tapidi sun yuk-yuk bura sakra, kurapra bendopipa, er yuk banmau. Banmaupane, Yeriko mutu damai, ila pala banai neitamai di, sun Babel mutu jen talen nengdi Sedekia damai bena tomopi. 9 Raja Sedekia konum tomopi dingeda, adipapu doupra, Babel mutu neng, sun deiyo ngebo Nebukadnezar, Hamat tara dinin, Ribla mutu kuramngai dubei. Dubeipa, Nebukadnezardi, Raja Sedekia tep, “Ukupra wenepkamkene,” pepra deipupa, er jen talen nengdi, sun deiyo ngebo peiputopu kupi. Ada, tali wenemna gume.

10 Babel mutu ila nimi deiyo ngebodi, ‘Ukupso,’ peipupa, er amutara jen talen nengdi, Sedekia erdi deiamu nyape yuma tomopra duyaipa, Sedekia dinmau tarupu, adipapu bena deipra poptapidi gawal daki. Tonda, Yehuda tara pel deiyo yuk-yuk talepra dorami neng, ila-ila neng yuma peda, “Poipneso,” peipupa, doupra beidi, sun deiyo ngebo Sedekia dinmauai bena deipra poptapidi, gawal daki. Aneng popi mutuda, Ribla mutu. 11 Ukupra, Sedekia er nyapu yuma konum popi dingeda, sun deiyo ngebo Raja Sedekia er asuru peda lukra tulup dongopi. Ukupi dingeda, er nonge ateng koupra, sun pe mutu, Babel mutu tamupra dubeidi, Babel neng sun nimi wenemna tep domi ati neitamaida, Sedekia derirbei. Abena deiami taru yumada, ati dam ton embandana pio gum di, tenpuaipu dimpepra bena bukamnganen, adipapu er dena taru konum kupu pangeda, acapu depu.

Allah Yahweh, er si eremna tep domi ati, Babel mutu nengdi urupra tapi upu

12 Uda, Babel mutu ila nimi deiyo ngebo Nebukadnezardi, Babel mutu taleamnganen, keteng tamunda, tahun ke sembilan belas (19) neitamai dinin, pamu war neitamai tanggal sepuluh deikida, Babel mutu jen talena nengdi, Yerusalem mutu yana weki. Agonga kepupa yai ngeboda, Raja Nebukadnezar er melipra embaramu ngebo, er amutara pel talepra doramu ngebo er sida, Nebusaradandi Yerusalem mutu neitamai weku. Nebusaradanda, Babel mutu ila nimi deiyo ngebo Nebukadnezar tep, melipra kalengamu ngebo ake. Ada, ‘Yuk nengdi, nun deiyo ngebo popnung’ tenen, kalengamu. Atep, er deiyo ngebodi, “Ukupkurume,” peiputopu, Yerusalem mutu yana weku.

13 Babel mutu nimi deiyo ngebodi peiputopu, er tep kalengna deiyo ngebo Nebusaradandi Yerusalem mutu wekudi, er cap, er jen talen neng capdi, Allah er si eremna ati yan uruptapi. Ada, Yahudi yala nesala, sun Allah si eremna ati cap, tonda, Raja Sedekia er ila telep kuramu ati cap, tonda er amutara pel yuk-yuk deiyo kepra dorami neng kurami ati cap, amutu ila ati yuma cap, adipapu yana uruptapidi, uku dongopra gawal dakeipi.

14 Angepu gume. Babel mutu jen talen neng, sun deiyo ngebo Nebusaradan cap, er nyapu sun jen talen neng yuma capdi, Yehuda yala nesala, Yerusalem mutu bura tara ongopdongopra wiami ila lyom gel beilya yana urupra tapi. 15 Ange yuma konum kupi dingeda, Yerusalem mutu tupa akunmai neng, petumna pel dona ila kael neng cap, tali kankan kunge neng cap, tonda, ‘Nunda Babel mutu neng tara kepkamepe,’ perami neng cap, tonda, Yerusalem tupa gam kurami nesala cap yumada, Nebusaradan er amutara jen nengdi tomoprapidi, sun aneng peda doupra, Babel mutupu tamupra dubei. 16 Ukupi dinino, amutu kurami nesala neitamai di, pio kankan kunge neng ton bokra deipu. Ada, ila ngebo Nebusaradandi, “Sunda men tomopra dubenkusepe. Ada sun yumada, Yehuda yala neng kurami mutupu kumumdi, anggur tapu du wa cap, yuk koun keca yala-yala yuma kouami wa capda, wa peprapmumdi, tu palipra, awa pel yumada, pel donkamrume,” peipu.

17 Babel mutu nengdi, Yahudi yala neng Allah Yahweh ^{▼▼Yahweh – Allah er si, tek sisi ngeda, Yahweh kurure. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} er si eremna ati bura tara, pio urasin telep keca, er si perunggu, akeca di betapra ayomnya ikaminge cap, tonda akati pumbon dinin, perunggu di meja utopunge betaimaminge cap, tonda gat keca er sida perunggu di, me gwepra derina tep, pala kupra bukmau betapra deiaminge cap yuma, uruprapidi doupdara, sun pe mutu dubei. Akeca yumada, kunumna weik keca tep, sek-sekra dubei. 18 Tonda, sun aneng dipapu, pala bukmau cap, sikke lungdin keca cap, upna lana cap, tamdongona cap tep deiami keca cap, tonda gam keca popra yapi gwepra kidirami mau cap, siltong telep keca ongopra derirami mau cap, yuk yala-yala keca, kunumna weik keca er si perunggu di petupra deiami keca cap, ange yuma deiamidi, Allah si eremne taru pel dopra kurami keca yumada, doupra bei.

19 Tonda, Babel mutu jen talen neng, sun deiyo ngebo Nebusaradandi peipupa, kunumna weik keca, er si emas cap, perak cap deiki di betami keca yuma peda, upula dopropi. Ada yambul bukmau cap, yapi keca Allah karena tep popra yanpa, uku dongomami mau cap, yapi gwepra dekana mau cap, sikke lungdin keca cap, Allah karena tep anggur me gwedin metek mau cap, piring-piring yuma cap, upna derina tep deiami keca cap yumada, Nebusaradandi akeca yuma dalupra dopropupa, Babel mutu tamupra dubei.

20 Pumun taru kuramu ngebo, Israel nesala sun ila nimi deiyo ngebo Raja Salomodi, Allah Yahweh er si eremna ati dopkoua tep, urasin pio telep keca, er si perunggu di betapra deipudi, ayomnya ikamu ngeda, butene kupu. Tonda, me mokon gwepra derina pala buk mauda, tenpu petupra deiamupa akupu. Tonda, apala bukmau cap, meja deiaminge cap, iriamu tara ton ketenepra petueipu ngeda, amol dam di utara (12) sapi bisam urasin utopunge ton, perunggu di petupra dan-dana deiamupa akapu. Akeca yumada, perunggu di betapra deiamya cadi, pio ikin tep men erepropmanto keca deiami. Akeca-keca yumada, kunumna pio weike. Akeca yuma peda, Babel mutu nengdi dalupra dubei.

21 Ila ayomnya butene, perunggu di petupra ikamu ngeda, sun lyomda utoto pua. Ada delapan (8) meter kupu. Akouamnya co nong neitamaida, lima meter setengah ton kupu. Ukupidi akayumnya co nong neitamaida gopu tami. Ayumnya co nong bol utopu ngeda, er palada, delapan centimeter kupu. 22 Ayomnya co butene urupaida, dua setengah meter (2.3) kupu. Ayomnya co butene urupaida, ange epmengedi, ‘Kamo pio telepe, tenepkameng’ tenen, amutu co du er si delima perameng keca urasin utopu ngeda, petupra deiami. Ada, kunumna weik keca, er si perunggu perameng keca di, petupra deipra dana-dana tara yuma palepdongomi. Ayomnya co butene kuamu ngeda, urasin utotopu kuramu.

23 Ayomnya co butene urupaida, urasin telep keca, amutu co du er si delima di deipra, palepdongominge yuma dengeda, seratus dinin, ton tarada, sembilan puluh enampu (96) akwamupa utara di idirami. Akeca-keca yumada, kunumna weik keca di petupra deiamya tep, Babel mutu jen talen nengdi, ange yuma uruptapidi, upula doprapidi, sun pe mutu dubei.

Yehuda mutu kurami nesala yuma tomopra Babel mutu dubei upu

24 Babel mutu ila nimi deiyo ngebo kalengna tep, jen talen neng sun deiyo ngebo er si Nebusaradandi, Yahudi yala nesala tomoprapudi, ateng koupra dubeu nesalada, ake. Ada, sun Allah si eremna ati pumbon pel talepra pel doramu ngebo, imam Seraya cap, er amutara pel dona melimna ngebo, er si Zefanya cap, tonda akati buplan wengbanai kalengami neng, weneri neng cap yuma, Nebusaradandi tomopudi Babel mutu dubeu.

25 Tonda, Yerusalem mutu neitamai inipmai neng kan-kan di, Yudea tara jen talena deiyo ngebo tenpu cap, tonda Raja Sedekia er melimna tep, ‘Ukupkamrume, ukupkamrume,’ pepra, er cap upu sisikra melipra perami neng, yoneitam bari neng cap, jen talen neng sun deiyo ngebo, er amutara kuramudi, upu sengna deiyo ngebo Sekretarisdi, ‘Jen talen neng kunkamruma tep, yana bulupso,’ peramu deiyo ngebo cap, tonda amutu neitamai enam puluh neng (60), pel yuk-yuk talepra pel dorami neng yuma capda, tomopidi ateng koupra, Babel mutu tamupra dubei.

26 Ila ngebo Nebusaradandi, sun aneng yuma tomopra ateng kouprapudi, doupra Babel mutu tamupra dubeudi, Babel mutu ila nimi deiyo ngebo Nebukadnezar damai, er Ribla mutu kuramngaipu doupra beu. 27 Sun anesala yumada, Hamat mutu ortara nimi wenemna ati dourbena deipra wenemamnane, popra tamami. Atep nengeda, Yehuda mutu kurami nesala yuma doupra, Babel mutu dubena wenepidi, nimi weik tarada, adipapu poptapi. Yambul tara nesala, gam tupa kurami nesala, Babel mutu neitamai konum dubenmai nengda, ikin pel dimamipa, ikin weik kuramidi acapu kurami.

28 Yehudi tara kurami nesalada, denge weik poptapi dinin, yuk Israel nesalada, men poptapi dinin, ateng kouprapidi, sun pe mutu Babel mutu tamupra dubenami. Ada, ‘Nun amutara kungedi, nun ikin pel donkamseng’ tenen, dubenami. Anesala denge yumada, empat ribu enam ratus (4.600) nesala ateng koupra dubenami. Ada tenpu taru dipapu, doupra men popi dinin, aketeng tamun, aketeng tamun deiki di, denge yuk-yuk dopra, sun pe mutu tamupra dubenami. Nebukadnezardi yana tomopra ateng koupra baramu taruda ake. Babel mutu taleamu taru neitamai dinin, keteng tamunda, yoneitam baringe neitamai, nimi dengeda tiga ribu dua puluh tiga (3.023) nesala tomopra, ateng koupra dubaramu.

29 Tonda, Nebukadnezar erdi Babel mutu taleamu taru neitamaipu, keteng tamun delapan belasnge neitamaida, Yerusalem mutu nengda delapan ratus tiga puluh dua (832) nesala ton, tomopra ateng kouprapidi, Babel mutu tamupra dubenami. 30 Tonda, Babel mutu ila nimi deiyo ngebodi, amutu taleamu keteng tamun dua puluh tiga (23) deiki, er amutara jen talen neng, sun ila ngebo Nebukadnezardi, Yerusalem mutu nesala dengeda, tujuh ratus empat puluh lima nesala (745) ton tomopra, Babel mutu tamupra dubeu. Anesala yumada, Babel mutu nengdi, ikin pel dimamipa, pel talipu doramidi, Babel mutu neitamaipu kange mun kange doupra kurami.

Pumun taru Yehuda tara taleamu ngebo, Raja Yoyakin, Babel mutu nimi wenemna ati pumbon di loptapiya tep, pepu upu

31 Babel mutu nesaladi, Yehuda mutu kapul men popbisipi taruda, Yehuda mutu ila nimi deiyo talepra kuramu ngebo, er si Yoyakin kuramu. Dinino, Babel mutu jen talena nengdi, Yerusalem mutu yuma popbisipidi, Raja Yoyakin peda, ateng kouprapidi, Babel mutu dubena wenemna ati pumbon dongopi. Sun yuma dakuramipane, Yehuda yala neng kurami mutu taleamu deiyo ngebo Raja Yoyakinda, wenemna ati keteng tamun tiga puluh tujuh (37) neitamai dinin, warda amol di utara yuma (12), tanggal dua puluh lima (25) konum mapu pangeda, Babel mutu ila nimi deiyo ngebo depupa, yuk ngebodi gonga kepra, er yo punupudi, Babel mutu talepu. Babel mutu sun ukupu deiyo ngeboda, er si Raja Ewil-Merodakdi taleamu. Aketeng tamun deiki, angebodi, Yehuda mutu Raja Yoyakin tep pio bicau kupupa, ‘Erda wenemna ati tupa kuna gume,’ pepra lyepropu.

32 Babel Raja ngebo Ewil-Merodakdi, Yehuda mutu Raja Yoyakin tep, ‘Telepe, ne kabo,’ pepra, pio telep kupra deipu dingeda, er tep pel deiyo ton karepupa, ila nimi deiyo ngebo kupra deipu. Raja Ewil-Merodak, er amutara kurami ila-ila deiyo neng weik ton akurami. Animi deiyo neng peda, pumun taru di, sun Babel mutu jen nengdi, sun mutu yuma konum bisbisa kapya tep, ateng kouamidi, Babel mutu dubenamipa, dakurami. Anengda, men lyemdorami dinin, Raja Ewil-Merodakdi, Yehuda tara taleamu ngebo Raja Yoyakin erepra deipupa, sun yuk-yuk mutu yuma, sun ila-ila neng deiki taru kuramu. Yoyakinpuda, Ewil-Merodakdi pio telep kupra deipudi lyepramu.

33 Lyeproamnga tep, Yoyakinda, nimi wenemna ati pumbon kenengamu opkal kwiriptapudi, telep opkal keneku. Tonda, Babel mutu Raja ngebodi, Yoyakin tep upepu. “Kanda ne cap pio tonpa kunemedi, ne atipu jen keca jenkamneme,” pepu. Upepka tep, atumi di gonga kepra, adi dipdongopra orketeng tamun yumada, Yehuda mutu taleamu ngebo Yoyakin cap, Babel mutu Raja cap, kikiman jen jeramrei. 34 Tonda, Raja Babel ngebodi, Yoyakin tep, “Kan putakerur keca kunumna tep nengeda, nedi tumi-tumi yuma co bo karekenepa, kan putapkere keca kunupra kunkamrume,” pepu. Upepka tep, atumi di dipdongopra, aneitam taru yumada, co bo dororamudi, dakuramnganen, er gam kuramu taru konum gawal dakudi, depu.