Jer 7 | XteSC | STEP | Allah er si Yahweh yaudi, ne Yeremia tep, ‘Ukupkurume,’ pepneu upuda ake.

Jeremiah 7

Yeremiadi, ‘Sun Yehuda tara kurum nesala tep, Allahdi wenepkamsere,’ pepu upu

1 Allah er si Yahweh yaudi, ne Yeremia tep, ‘Ukupkurume,’ pepneu upuda ake.

2 Neda Allah Yahweh, ne si eremna cap, karena cap tep, deriryakanung ati buplan damai bena tekmemdi, ne peipmaken upu yuma, Yehuda yala nesala yuma tep pepkurume. Ada, ne si eremna ati buplan damai wengyakange taruda, upepkurume. “Sun Yehuda yala kurum nesala yumada, nun nai bo Allah, er si Yahwehdi pesere upuda, moupra gekepso. ‘Allah er si ereipkup’ tenen, akati buplan wengbarum nesala yuma gekepneso,” pepkurume.

3 Aupu pepra deipser ngeboda, nun Israel nesala tep, kalekra melimserur ngebo, sun nai bo Allah Yahweh, im deiki kunge jen talen malaikat yuma talepra, sun deiyo ngebo ^{▼▼deiyo ngebo – Ibrani upu deiki di, akayat neitamaida, Allah er si tep, ‘Yahweh Sebaot’ pepra seki. Aupu ‘Yahweh’ ngeda, ada Allah er pe si sisa tepa. Dinin, aupu ‘Sebaot’ deiyo ngeda, ‘Im deiki kunge jen talena malaikat yumada, Allahda sun deiki tara deiyo ngebo kurure’ tenena tep, aupu ‘Sebaot’ penunge. Atep, ‘Sun Ketengban nesala kael kemkamrum’ tenen, aupu ‘Sebaot’ penga deiyo ngepu, katuai di sekmepu. ‘Yahweh’ kael kemna tep Keluaran 3:14 dinkurume.} kurure. Erdi upepsere.

Sundi mali-mali weik kurumu keca yuma taprumudi, teleppu kumumnyopda, sun cap, ne cap akati antaptepedi, telep kupra kikiman kutepe. Gum dingeda, gume. 4 Tonda sundi, ‘Telep kangepu doupra teleppu kunkamep’ tenen, sun pedi sun pe tepapu pedarum upuda, ‘Akonuma,’ tenena gume. Sundi pedarum upuda ake. ‘Gume akatida, Allah Yahweh er si eremna ati kurura tep, nunda akati wengnupa cadi, mali keca ton, nun damai yana, ikin men kupkamsere,’ pedarum dinin, angeda mok upupu perume. Akati wengruma peda, malipu tupa kuprumnyopda, Allahdi wenepkamsera tep pepsene.

5 Tek sisi ngeda, sundi sun mali kurumu keca taprumudi, teleppu kumumyopda, ne Allahdi akati yanedi, sun cap, ne cap, kikiman telep kupra kunkamepe. Atep nengeda, ton ngebodi, er kabo yuk ngebo tep, dumsisi pel dopra, mawa pena pio gum dipapu, telep kupra kunkamrume. 6 Tonda, sun amutu kurumu nesaladi, nimi bo neng cap, yuk karen mutu di amutu yakankameng nesala cap, lyan nesala cap, solu nerapu cap, sun nong deiki ikin keca men derinkamrume. Anesala yuma tep, bicau teneprumudi, dumsisipu kunkamrume.

Tonda, mali kun keca men kupmangepapu, “Angeboda mali kupmare,” pepra, minina upu peptapmumdi, aneng men wenepra ponkamrume. Deiyo men kwapmarepapu, yuk nesala tep, tali portamna pio meme. Tonda, uboda isok cap, nimidi petupra deipmengedi, si eremnung keca cap, tali-tali keca yuma cap tep, “Nun deiyo keca akurura cadi, akeca si eremkamepe,” pepra, amutu neitamai kumumdi, tali keca tep si men eremkamrume. Akumumnya deiki di, sundi sun pe tepapu, mali kudidarume.

7 Sun mali-malipu kurum keca yuma taprumudi, dumsisi teleppu kumum pangeda, ne Allahdi sun apu yapu tep, ‘Atelep mutu neitamaida, tupa-tupa pio akunkameng’ tenen, kareramsisi mutu neitamaida, sun ataru kurum nesala cap, ne cap, kikiman kunkamepe. Ada pumun taru di, ne mawa Israel nesala, sun co puna neng tep kareramsipa, talepra kurami mutuda, ‘Sun peda akunkamrum’ tenen, pepsene.

8 Dinino, sun yuk neng yumadi sun tep, mok upu peptapsengepa, ange adipapu gekepra teka tenerum ngeda, deiyo ton men kamrure. Amok upuda, tali tepapu teka tenerum dinin, adeiki di telep men kudinkamrume. Sun pedi, sun tepapu malipu kudinmarume, pepsene. 9 Uteneruma deiki di, sun tupa mali kurumu kecada ake. Sunda upula dona cap, nimi tali potamna cap, nerapu tali nyangdana cap, mok upu pena cap, minina upu pena cap deiki di, ‘Tek pepmape,’ pena cap, tonda isok si Bahal isok tep, yapi keca popra uku dongombana cap, tonda sun deiyo keca kael kemna gum dipapu, tali uboda keca tep, ‘Nun nai,’ pepra si eremna cap, kumumdi malipu tupa kurume.

10 Apepmasen keca yuma akunmamum dipapu, ne Allah si eremna ati pumbon, ne damai yamum dingeda, “Gume nun yumada, teleppu kunupa cadi, akati tupa yana wengmepyopda, ikin keca nun damai ton men yakankamsere. Nunda teleppu kunkamepe,” peryakarume.

Akatida, ne Allahdi, ne si dopra, akati deiki deipsi dinin, sundi pio mali keca kurumu ngeda, nedi, “Angeda ne pio song cadi, ukunada meme,” pepra, deipsisi keca dinin, mali kecapu tupa kurumupapu, ange tenena gum dipapu, ne si eremna ati tupa tali lupra yakarume. Akati wekmum dingeda, adipapu kange di tamupra, sun men di mali kuramrum kecapu, tamupra bena kurume. Ukupra kumum ngeda, pio mali kuruma tep, wenemna upu pepsene.

11 Ne Allahdi, ne si dopra, akati deiki deipsi dinin, sundi ne Allah si eremna ati tep nengeda, ‘Akatida, upula dona nesaladi, mali kecapu talepra kurameng ati utopu kurure,’ tenerumudi, akati dam peryakanerum do? Gume, sun tupa-tupa mali weik kunmarum keca yumada, ne Allah Yahwehdi konum disenune. Angeda, tek sisi konum kael keamrum dinin, kange di ton lumdongorumudi, betapra men tenerum do?

12 Sunda lumdongonapu kurum nesala tep nengeda, upepsene. Pumun taruda, ne Allahdi, Silo mutu tep, wepra keteneiamsi mutuda, ‘Ne mawa nesaladi, ne si eremkamneng’ tenen, ne Allahdi ne nyapu sisa, sun Israel nesala tep, wepra deiamsipa, sun si Israel nesala, sun apu yapudi, amutu neitamai kurami taruda, mali weik kurami. Mali weik kuramya tep, sun wenemna tep, ikin keca kareamsi ngeda, kange di ton cap tenenkamrume. Atep, sunda menmena tamupra, Silo mutu bemumdi, adipapu dipetepkurume.

13 Sundi tupa mali-malipu kuruma tep nengeda, ne Allah Yahwehdi pepsene. Nedi sun mali kurumunge tep, “Angeda, ukuna meme, tapso,” pepra, tupa-tupa aupu peramsisi dinin, sunda ne upu tupa men gekenerume. Nedi sun tep, “Mali kurum keca yumada taprumudi, ne damai tamupra yakarumudi, telep kunangepu talepra kunkamrume,” pepra upupsisidi, tupa pesenepapu, sun gekena gum di, tali kange doupra, ne damai tamupra men yakarumudi, ne upu men gekenerume.

14 Atep nengeda, ‘Ne Allah si eremkameng’ tenen, akati deiki ne si deiamsi atida, tapkamne. Ada, nedi, ‘Amutu talepra pio kunkameng’ tenen, sun co puna neng cap, sun ukutaru kurum nesala cap tep, kareramsisi mutu peda tapkamne. Tonda, ne si eremna ati tep, sundi, ‘Gume, akati tupa wekmepedi, Allah tep, telep keca tupa karepmepyopda, adeiki di ikin keca nun damai men yakankamsere. Tonda, Allahdi men wenepkamsere,’ tenerume.

Ukupra tenerum dinino, tupa malipu kurumnya tep nengeda, Silo mutu cap, Silo mutu kurami nesala yuma cap tep, wenepsidi, popra gawal dakamsitopu, sun ukutaru kurum nesala, sun mutu neitamai kwamre keca cap, ne si eremna ati konum dorumnge cap, sun wenemna tep, akeca-keca yuma gum kupra deipkamne. Ada, men taruda, ne si eremna ati, Silo mutu nesaladi domipa, gum kupra deiamsitopu kupra, sun amutunge peda, gum kupra deipkamsene.

15 Angepu gum dinin, tonda, sun ukutaru kurumudi, malipu kurum nesalada, ne damai di enepra dokotemkamsene. Sunda, ne tupa men dinkamsene. Ada, sun pumun taru kurami nesala, sun apu yapu nesalada, Efraimdi deipupa, dadeipdanen yakarami nesala, Israel yala nesalada, ne nyapu sisa kurami dinin, sundi ne damai mali kudiramneiya tep, ne damai di enepra dokotepsitopu, sun peda utopu enepra dopronkamsene. Tupa malipu kuneruma tep dopronkamsene. Allahdi Israel nesala tep pepu.

Allah er nyapu sisa utopu Israel nesalada, “Pio ila balila nesala kununge,” pepu upu

16 Allahdi ne Yeremia tep upepneu.

Kan Yeremiadi sun amutu neitamai kunung Israel nesala tep, ‘Naio, sun melipra lyeprume,’ pepra, ne Allah tep men moronkamnerume. Ukuna gume. Tonda kandi ne tep, “Sun Israel nesala mali kunmanga tep, kaukepmemdi melipo,” pepra morona gume. Ada, Yeremia kandi ne tep upepra moropnememya peda, ne dabal tep, kan upu pio men gekenkamkene.

17 Ada mesum tep men pepkene. Yeremia kan asuru di, Yehuda yala nesala ati arum dopra kunung mutu neitamai, sun mali-mali keca pio weik kunungada, men dirum do? Tonda, Yerusalem mutu neitamai embangedi, malipu kunung keca yuma capda, men dirum do? Ange dirum dinin, betapra men tenerum do?

18 Kan peda kael keprume. Sundi mali kunge kecada, lap pepkukene. Ada, sun nyapu dingeda, uku dongon co dopra buipmenge pangeda, sun nai yapudi dopra, uku dongonunge. Konum uku dongopmenge pangeda, sun nerapudi jen keca, er si roti ketenemdin keca di tapakmengedi, dapmengopda, sun uboda isok ner tep, “Nun deiyo ner ake. Erda im deiki deiyo ner kurura tep, er si ereipkupe,” pepra si eremnunge. Sun isok si eremnung keca tep, jen keca er si kue dapra, ketenemdinunge.

Tonda, anggur tapu du purupra ketenemdinung me dopra, uboda dakunung isok cap, nimidi petumdinung keca cap tep, “Nun nai bo,” pepra si eremnunge. Ukupra mali kununga deiki, nedi, ‘War keca deiyo tep, tali keca si eremnung do?’ tenen, ne dipru pu jeneredi, yu pio weik kunerure.

19 Tek sisi, isok si eremnunga deiki di, ne pio dabal kuneredi, yu weik kunerure. Dinino, tek sisi ngeda, ne Allah Yahweh, ne damai mali kupra men deipnetenge. Tek sisi ngeda, sun pedi, sun pe tepapu ila mali kudidanunge. Sun mali kunga deiki di, kange mun keca sun pe nong deikipu yankamre. Atep, sun pepu mali kudidanunga cadi, amenda ali dakamenge.

20 Sun Israel nesaladi, pio mali weik tupa kununga tep nengeda, ne sida Allah Yahwehdi pepsene. Neda, Allah ^{▼▼Allah – Akayat neitamaida, Ibrani upu deiki di, Allah er si tep, ‘Yahweh’ cap, tonda, ‘Adonai’ cap ton seki. Aupu ‘Adonai’ deiyoda, ada ‘Akeca-keca yuma taleredi, ila puto weik ngebo kurura cadi, er teneretopu kurure’ tenen, seki. Sun kael kemna tep, aupu deiyongepu katuai di sekmepu.} Yahweh, akeca-keca yuma talepra, ila eremna cap, puto weik cap deiyo ngebo kununa cadi, nedi, ‘Ukupkamne,’ tenenetopu kununa tep nengeda, ne ila di wenepkamsene. Neda sun tep, dabal kange doupra, yu weik cap kunerura cadi, amutu kunge nesala cap, amutu cap tep, ila puto deiki di wenemna keca weika di karenkamsene. Ila me mau di me gwepmengedi, tenpu taru dipapu ame yuma dingtamamengtopu, sun deiki wenemna keca weika di, anesala tep karenkamne. Ada, ne si eremna tep dopi atida, ila yu deiki di dakra tapkamne.

Tonda, amutu neitamai kunung nesala cap, amutu kunung gam keca yuma cap, bura tara paramre co yuma cap, tonda nimidi kounung keca yuma cap, nimidi peinung gam kure keca yala-yala yuma cap, gum kupra deipkamne. Ada ne yuda, ila uku jenmaredi, men tapmanto kuramretopu, ila uku dokotepnepa, amutu neitamai kure keca yuma uku jenkamre. Aukuda nimidi men tapkamenge. Pio jeramyane, akeca yuma jepropredi, gawal dakamre. Allahdi Yeremia tep lap pepu.

21 Upepudi Allah Yahwehdi Yeremia tep, aupu ton dukdongopra pepu.

Uo, sun ne nyapu Israel nesalao. Ne Allahdi, ‘Sunda ne mawa nesala’ tenen, pio melipra kalengsenepa, sundi ne si eremnerume. Ne Allah Yahweh ^{▼▼Yahweh – Allah er pe si, tek sisi ngeda, ‘Yahweh’ kurure (Keluaran 3:14). Dinino, Ibrani upu deiki di, akayat neitamaida, ‘Yahweh Sebaot’ pepra seki. Aupu ‘Sebaot’ penga deiyoda, ada ‘Im deiki jen talena malaikat yuma taleredi, sun deiyo ngebo kurura cadi, er putoda pio weik kurure’ tenena tep, asi seki. Atep nengeda, sun kael kemna tep, aupu deiyongepu katuai di sekmepu.} akeca-keca yuma cap, im deiki jen talen malaikat cap yuma talepra, ila deiyo ngebo kunune. Dinino, sundi pio mali kuruma tep, aupu pepsene. Ne gispal dona cap, ne si eremna cap tep karenerum keca yumada, keteneipkurume.

Tonda sundi, ‘Nun mali kun keca tep, Allahdi tali poptamsetu dinin, kaukeptudi, lyepsetu’ tenen, gam keca poprumudi, uku dongopra karenerumunge yumada, dopra keteneipkurume. Akeca yala-yala yuma, sun pedipapu jepra gawal dangkamrume. Ne tep tupa karena gume pepsene.

22 Angeda mesum tep men pepsene. Tek sisi sun co puna nengda, Mesir mutu neitamai ikin kange weik kuramipane, nedi anesala yuma loptapra lyepsidi, doupra amutu duyanamsi. Ukuamsi taruda, nedi sun apu yapu tep, aupu men pepsi. “Ne gispal dona tep, sundi ne si erepnerumdi, sun mali kun keca daemna tep, yapi keca popra, tu doropmumdi, ne karena tep uku dongoryakankamrume. Tonda, ne si eremna tep, yuk telep keca yala-yala yuma ne tep, kareryakankamnerume.” Aupu utopu ngeda, nedi sun apu yapu neng tep, Mesir mutu neitamai di lyeprapsidi, duyanamsi taruda, sun tep men pemsi.

23 Ataruda, nedi sun apu yapu melipra duyakaramsidi pepsi upuda ake.

Neda, sun nai bo Allah kununa cadi, nedi pesene upupu gekeprumudi, moupra talenkamreme. Nedi pesene upu talepra ukupnerumu pangeda, nedi sun tep pio melimkamsene. Adeiki di, ‘Sunda ne nyapu sisa kunkamrume,’ peramsi. Tonda, nedi sun tep, “Abisi benkamrume, abisi men benkamrume. Angepu kunkamrume, angeda men kunkamrume,” pepra karesene upu, tek sisi angepu kuprumyopda, ‘Sun kunkamrum keca yumada, teleppu kunkamsere,’ peramsi. Ne Allahdi sun apu yapu tep, aupupu peramsi. Ukupsipa, aupu gekepra yakarami taruda, pio teleppu kupyakarami.

24 Dinino, sun apu yapu nengdi, ne peramsi upu gekepra men dombarami. Nedi peipsitopu men kurami. Nedi peramsi upu talepra yakaramtenge teptoda, pio teleppu kupyakaramtenge dinin, sundi sun pe kange tenepnetopu kupyakarami. Sunda pio kika deipra, gel giso derin neng kuramidi, mali-malipu kupyakarami. ‘Sun anengda, teleppu kunkamenga,’ teneramsipane, kange di tamupra mali kun kecapu teneramidi, mali kun kecapu talepra kupyakarami. Amenda telep kupkamrengepu tenemtenge dinin, menop taru mali kun kecapu kupyakarami. Ukupra kuramya tep, amenda tarupu, “Ange kunkamrume, angeda men kunkamrume,” pepra, mem upu ton tapakra sun deiki deiamsi.

25 Pumun dordi, sun apu yapu Mesir mutu kuramipa, dopra duyanamsi taru di, dipdongopra sun akunmarum tumi peda, ne Allahdi ne upu peipnepa, lap pena deiyo neng, nabi-nabi wepra deipyakaramsanen, tupa wepra derinune. Anabi neng yumada, sun Israel nesala tep, “Ange ukunkamrume, angeda men kunkamrume,” pepra, ‘Allahdi wenepserur’ tenen, malinge tapra telep ngepu kunkamrume, peryakarami.

26 Dinino, sun Israel nesaladi, anabi perami upu ton men gekeramrume. Sun apu yapudi, sun nabi perami upu men gekeramitopu, sun ataru kurumu nesala peda, tupa men gekerume. Sun nabidi, ne upu sun damai pediramipa, sun co puna nengdi balila kuramidi, gel giso deipra kuramitopu, sun ukutaru kurum nesala peda, pio ila di balila kupra, gel giso deipra kurameng kange doupra kurume. Sun pumun taru kurami nesalada, mali kurami dinin, sun ukutaru kurum Israel nesalada, pio weika di tapakra mali-mali kurume. Sun co puna nengdi mali kurami ngeda, yambula pua. Sun ukutaru kurumu nesala mali kurum ngeda pio weike, pepu. Ada, Allahdi sun Israel nesala tep, wenepudi pepu.

27 Allahdi upepu dingeda, ne Yeremia tep upepneu. Israel nesalada, mali weik tupa kununga tep nengeda, Yeremiao, kandi ne nyapu Israel nesala damai, ne upu lap perbenkurume. Aupu yuma bena lap pepkamrem dinin, apenmamem upu yuma, sundi men gekenkamkenge. Kandi sun tep, ‘Uo Israel nesalao, gekeryarume,’ pepra upupkamrem dinin, sundi men gekepmengedi, ‘Nunda ayana gekeryankamepe,’ men penkamkenge. 28 Atep nengeda, kan Yeremiadi, sun Israel nesala tep, lap penkamrem upuda ake.

Allahdi upepmasere. Uo, sun Yerusalem mutu kumum nesalao, sunda, sun nai bo Allah, er si Yahwehdi pesere upuda, pio men gekerumdi, aupu talepra men kurume. Tonda, ne Allahdi wenemna keca cap, ikin keca cap kareramsisi taruda, sundi, ‘Uo, nunda mali kunup nesala’ tenen, mali pepra men ngolongamrume. Tonda, sun mali kurum keca men tamrume. Atep nengeda, tek sisi pen upuda, tupa men perume. Sun kan-kan di, tenpu ngebo peda, dumsisi upu tupa men perure. Sun yumada, mok upupu perume.

29 Ange tep nengeda, ne Allah Yahwehdi pepsene. Sun Yerusalem mutu nesaladi, ‘Uo, nun mali kunupe,’ teneprumudi, kunkamrume. Tenpu ngeda, sundi, ‘Nun mali kunupe’ tenen, sun giso potong yuma toupra donokurume. Ukupmumdi, ila-ila mutu dupai tekmumdi, ngolokra mali pemumdi, kange mun kange doupra, engena deiki mut penkamrume. Ada mesum tep gume.

Deiyoda, sun nai bo Allah, er si Yahwehdi, sun ataru kurumu nesala yuma tep, konum tapkusere. Sunda, mali weik kuruma deiki di, Allah er ila yu kuprepa, dabal tep, sun konum tapkusere. Sun tep tupa melipra men dinkamsere. Sun tep konum tapra kaukepkusere.

Hinom mutu di, mali kecapu talepra kuramipa pepu upu

30 Allah er si Yahwehdi, aupu ton pepu.

Yehuda tara kurum nesalada, pio ila mali konum kurume. Sun mali kurum kecada, ne tupa disenune. Ada sundi, ‘Nun nai bo,’ pepra isok si eremengepa, ne Allah Yahwehdi, ‘Sunda pio mali kunmange,’ tenesenune. ‘Akecada ne pio songe,’ tenenun keca dinin, sun Israel nengdi konum doprapmangdi, ne Allah si eremna ati neitamai yan deipmange. Akatida, ne si dopra, akati deiki deipsidi, ‘Akati neitamaida, ne sipu eremkamnenge,’ teneramsi dinin, sundi pio mali keca cap, isok si eremna tep talerum keca cap dopra, ne ati neitamai deipmaruma deiki di, ne ati konum mali kudinmanerume. Ukuda, ne si eremna atida, konum sundi mali kupdongopmanerume.

31 Tonda, uboda isok er si eremna tep, tu keca cap, yuk jen keca cap, karerbanai ketenepra deipyai, amutu sida Tofet mutu penungaida, bengedi isok si tupa eremnunge. Ada, nimi si Hinomdi deipu mi taleamu mutu bengedi, isok si Tofet, er si eremnunge. Amutu bengedi, aisok si eremna cap, karena cap tep, sun pe nyapupu popra, uku dongombanunge. Akunung ngeda, ne Allahdi, ‘Angeda kunkamenge,’ men peiamsi dinin, sun dipu kununge. Tonda, ‘Sundi ne gispal dona tep, ange kupnetenge’ tenen, pio men teneramsi. Tonda, ‘Sun dakupso,’ pepra men deiamsi. Gume, sun pedipapu tenepra kununge.

32 Sundi amutu embangedi, pio mali weik kununga tep, ukutaruda amutu tep, Tofet mutu, tonda amutu si tep, ‘Hinom er midi taleamu mutu banai,’ pepra, si sipenung dinin, Tofet pepra keteneipyada, ne tenepsi taru konum kupre pangeda, amutu tep yuk si penkamenge. Ton cap, ‘Hinom mutu cap, Tofet mutu capda, tupa akapu,’ pepra men penkamenge. Amutu si tep nengeda, amenda taru, ‘Nimi weik poptami mutu,’ pepra, amutu tep si sipenkamenge.

Deiyoda ake. Ne Allahdi Tofet mutu kunge nesala cap, amutu banung nesala cap, pio weika di, poptapkamne. Nimi weik poptapnepa, depkameng nesala, yuk nengdi sun nong dopra, tu palipra peinkameng dinin, depkameng nesala men nukmanto cadi, tu palipra nimi peipmantoaida, go gum kupkamre. Go gum kuprepa, tenpunge ngebo pe ton, men peipmanto kupkamenge.

33 Ne Allahdi, sun mali kunge nesala weika di poptapnepa, sun anesala depmengepa, nongda tu palipra peipmantoai go gum kupre pangeda, katuaipu deiptapmengepa, tali lakra embaramre ma cap, bura tara kuramre gam keca capdi, yana jepropkamenge. Ajepkameng taruda, nimi yuma gawal dakamenga tep, sun gam kunge nengdi, ‘Uo depmange nesala, sun nong ton ajenmange’ tenen, sun men lukdankamenge. Ma cap, bura kure keca capdi, anesala nong tali lupra jepropkamenge.

34 Angepu men kupkamne. Tonda, sun Israel nesala wenemna tep kupkamne ngeda, ake. Ada, sun kunge mutu yuma neitamaida, nesaladi kange deipmengedi, mut semengedi lelim pengenge cap, kange deipra autungenge cap, pingping kange doupra lelim pengenge yuma capda, ka di ton cap pengepa, men gekenkamenge. Ila kange mun keca karepkamsena tep pepsene.

Tonda, Yerusalem mutu neitamai cap, Yehuda yala nesala talepra kunge mutu neitamai cap yumada, tu pio mali kupra deipkamne. Ukupnepa, akeca-keca yuma kolupredi, akeca yuma gum kupkamre. Amutuda, ila kange mun keca doproipkamna cadi, amutu neitamai yumada, nimi cap nerapu cap, pio men dodankamenge. Nimi cap, nerapu cap dopdange taru, kange deipmengedi, lelim peramengtopu, ataruda lelim pengepa, pio men gekenkamenge. Dimpepnapu kunkamenge. Nedi karepnepa, amutu yuma malipu kunkamra tep, pepsene. Ne Allahdi pepne.