Jer 8 | XteSC | STEP | Allahdi pepu. Sirya taruda, ila kange mun keca wenepra karepkamsene. Ne Allah Yahwehdi pepsene. Ataru konum yaryopda, menop taru Yehuda mutu talepra kurami Raja-Raja neng yuma cap, sun amutara, nimi deiyo kepra, pel doramidi, kurami neng cap, ne si eremna ati pumbon pel dorami neng, sun imam-imam neng cap, tonda Yerusalem mutu neitamai kuramipanen, konum deamipa, nimidi konum peiami nesala yuma capda, sun pona tep nesaladi, popsengedi mali kweipkamenge. Ada, menop taru konum deamipa, peiamrum nesala, sun apu yapudi peiamenge tu pum bon di, akonum deamai nesala, sun yo yuma lukra, ‘Aneng mali kudinkamep’ tenen, tu deiki katawai deiptapkamenge.

Jeremiah 8

Sirya taru kange mun keca kupkamrenge tep, pepu upu

1 Allahdi pepu.

Sirya taruda, ila kange mun keca wenepra karepkamsene. Ne Allah Yahwehdi pepsene. Ataru konum yaryopda, menop taru Yehuda mutu talepra kurami Raja-Raja neng yuma cap, sun amutara, nimi deiyo kepra, pel doramidi, kurami neng cap, ne si eremna ati pumbon pel dorami neng, sun imam-imam neng cap, tonda Yerusalem mutu neitamai kuramipanen, konum deamipa, nimidi konum peiami nesala yuma capda, sun pona tep nesaladi, popsengedi mali kweipkamenge. Ada, menop taru konum deamipa, peiamrum nesala, sun apu yapudi peiamenge tu pum bon di, akonum deamai nesala, sun yo yuma lukra, ‘Aneng mali kudinkamep’ tenen, tu deiki katawai deiptapkamenge.

2 Angeda, tek sisi pio mali, nimi pio men kuptenge keca dinin, ataruda sun pona tep yu nengdi, men di konum deamipa, tu pumbon peiami neng, sun yo bulupra, katawai deipkameng ngeda, tu pumbon di lukra, katawaipu deipkamenge. Ukupmengopda, kange di tamupra, tu pumbon men peipkamenge. Ada, nimidi sun dei lengtamameng utopu, tu deikipu deipkamenge. Acapu akapkamre. Nimidi, tali bam keca do, yuk mali keca do, tuai tali lupra dokoteptameng utopu, animi yo yumada, tali atu deiki, acapu katawai akapkamre.

Deiyoda, sun pona tep nengdi, ‘Amutu konum deamipa peiami nesala tep, pio mali kweipmepepa, sun yala neng, tupa gam kunge nengda, ali weik dakameng’ tenen, animi yo lukra, tu deiki tapkamenge. Ton deiyoda ake. Ada menop taru, sun amutu kurami nesaladi, ne Allah tep tapneidi, keteng cap, kuru cap, tonda war cap tep, ‘Nun nai,’ pepra, akeca tep, si eremamya tepa. Atep sirya taruda, sun konum deiami nesala yoda, tali lukra, jenekai tu deiki tapmengepa, katawaipu akapkamre.

Amutu nesalada, sundi tali-tali keca damai si eremrum keca cap, kange deiprumdi, akeca amutara pel dorumnge cap, tali keca tep, si erepra, pel melipra dorum keca cap, tonda, ‘Uo, nun kunkamep kecada, sun dipapu peterepserume,’ pepra, mororum keca cap, akurura cadi, konum deamipa, tu pumbon peiami neng, sun yo yuma lukra katawaipu tu deiki tapkamenge. Ada, sun pona tep nengdi, ‘Sun Yehuda mutu tupa gam kunge nesala yuma, ali weik dakra kunkameng’ tenen, konum ukupmengopda, ayo kange di tamupra, tu pumbon men peipkamenge.

3 Tonda, sirya taru ila di wenepkamsen taruda, ne Allahdi, menop taru, ton tara nesala enepra, yuk karen mutu-mutu yuma konum donoksi nesala dinin, ataru tupa gam kunkameng nengda, ikin weik kunkamenge. Sun anesaladi, kange mun kange doupmengedi, ‘Uo, telep ngeda, nunda depnapu kuptepe,’ tenenkamenge. Ada, nun pio ikin weik kunupa cadi, gam kunada, nun songe,’ tenenkamenge. Neda Allah ^{▼▼Allah – Ibrani upu deiki di, akayat neitamaida, Allah er si tep, ‘Allah Sebaot’ pepra seki. Sun kael kemna tep, aupu ‘Sebaot’ deiyongepu katuai di sekmepu.} Yahweh, im deiki kunge jen talena malaikat yuma, sun deiyo ngebo kununa cadi, ila puto ngebo kunune. Atep, ne dipapu aupu konum pepmasena cadi, ange yuma nong kupkamre ja! Allahdi sun Israel nesala kupkamunge tep pepu.

Mali kuna cap, wenemna cap tep, pepu upu

4 Allah Yahwehdi, ne Yeremia tep, kandi ne nyapu Israel nesala, sun damai perbenkurum upuda ake. Ada, “Sun ton tenepetepso! Er nong lokra tuai sakre ngeboda, kange di tamupra men bungdongorur do, gum do? Tonda, banmankap, lerekra yuk bisi barepa, bisi wangamdarur ngeboda, konum tenepyopda, adipapu kange di tamupra, arup banmare telep bisipu yakarur do, gum do? Gume, tek sisi bunkrongedi, telep bisipu banunge. 5 Ange tep nengeda, sunda ne nyapu sisa, sun Israel nesalada, warya tep, ataru-ataru yuma, balila deiprumudi, mali kun kecapu, pio talepra kupbamumdi, ne damai tapra banerum dinin, kange di tamupra, ne damai pio men yakarum do? Sunda, tali keca tepapu dinin, ‘Angepu teka tenepra, pio talenkamep’ tenen, mok upupu tupa talenunge. Sunda, tali keca tepapu, nimi urasin utopu kupra, petupra deipmumdi, talepra si eremrume. Sunda, ne Allah damai, tamupra men yakanunge.

6 Sundi penerum upuda, ne konum moupra gekesenun dinino, sunda telep upu ton, men penerume. Sun kumumnya kankan di, tenpu ngebo peda, ‘Uo, ne mali kunun ngeda, dan do?’ tenen, men kael kemdarure. Neda, warya tep, angeda tupa kunun do? Ange yumada tapnedi, ne amnyo karikra, Allah damai tarapu tamupra benkune’ tenepra, men tamrure. Sun yumada, sun pe kange dipapu tenerum bisipu barume. Ukupmantoda, nimi podan taruda, sun kuda bisamdi, ‘Podanung nengdi popnenung,’ tenena gum dipapu, tali kange doupredi, sepdaro podanmange tarapu, tali lupra baramre utopu, sun peda, ‘Allahdi wenepra popserur’ tenena gum di, tupa mali kurume.

7 Uda, sun yuma tenepetepso! Bangau ma peda, er kange dipapu, ‘E, ataru konum kepyopda, ne mutu sisa tamupra yankamne’ tenen, kael kemrure. Tonda yal ma cap, moromnya ma capda, yuk-yuk yala ma capda, ‘Amutu kuramepyanen, telep taru konum kepyopda, adi gopra, nun pe mutu sisa tamupra benkamep’ tenen, konum kael kemnunge. Dinino, neda Allah, ne nyapu sisa yuma tep, nedi, “Angeda kunkamrume, angeda pio men kunkamrume,” pepra deipsisi upuda, sundi moupra men kael kemrume. 8 Sundi nedi pepra deipsi upu men kael kemruma tep, sunda ware deiyo tep, aupu peptum do? Sunda pio kange moupra, men tenepmum dipapu, uperume. “Gume, nunda Allahdi, ‘Angeda kunkamrume, angeda pio men kunkamrume,’ pepra, deipseu upuda, konum talepra kupedi, ‘Ila kael neng kunupe,’ perume! Uperum dinino, sun yumada moupra kael kepso! Allah upu sengna cap, peteremna cap tep, deiyo talepra pel donung nengda, sundi mok upu pena nengpu kununge.

9 Atep, nedi tek sisi pepsene. Sun amutu kurum nesaladi, sun mutu neitamai kunge pel dona deiyo neng tep, ‘Gume anengda, pio ila kael keami neng kununge,’ tenepra, aneng tep gispal dorum dinino, nedi pepsene. Nedi aneng yumada, amutara deipnepa, ali weik dangkamnunge. Nedi sun wenemna tep, go karepnepa, nimidi pena pepmangepa, youramretopu kupkamre. Ada, sun pona tep nengdi, aneng damai yana popmengedi, tomopra ateng koupra, sun pe mutu tamupra dubenkamenge. Dubena yuk karen mutu konum deipmengopda, amok upu penge nengdi, ‘Uo, ware kuptepe do?’ tenen, sun kange tenena peda, gum kuprepa, tenimtonapu kunkamenge. Deiyoda ake. Sun aneng yumada, ne Allahdi, ‘Ukupkamrume,’ pepra, deipsisi upu yumada, tamnenunga cadi, sunda wareto ila kael kemna neng kuptenge do? Gume, anengda ila kael keami neng, tek sisi men kununge.

10 Sun mutu neitamai kungepa, sundi, ‘Uo anengda, ila kael neng kununge,’ perum neng tep nengeda, wenepnyopda, nedi go karepnepa, yuk nengdi, sun konum domi nerapu yuma, nedi gupra, yuk neng tep karepnyopda, anengdi anerapu dalupra dopropkamenge. Ange utopu, sundi wa tu peami mutuda, ne Allahdi atu dopra, yuk wa tu talepra penung neng tep karepkamne ja! Ukupra wenepkamsena deiyoda, ake. Ada, sun amutu neitamai kurum nesala yumada, ila isomka neng pe, amutarapu yambul kunge neng peda, ‘Uo, akeca-keca yuma, nun ton weika di doproptepe’ tenen, pio putarepa, enapu kurume. Tonda, sundi, ‘Mawa dipapu pepmepepa, yuk neng keca, pio weika di dalupra doproptepedi, isomka kutepe’ tenen, mok upupu perume. Ada, tali dakunge nesalapu gum dinin, sun mutu neitamai, Allah si eremna ati pumbon pel donge neng, sun imam-imam neng pe, ne upu cap, amenda kupkamrenge cap tep, lap pena deiyo neng, sun nabi-nabi neng peda, mok upu deiki dipapu, pengedi, ‘Isomka neng kuptepe’ tenen, enunge.

11 Sun imam neng pe, nabi neng peda, ne nyapu sisa, sun Israel nesala yuma tep, ‘Yo, dakwapye, sundi mali kuramrum kecada, tenena gume. Angeda, ila mali kun keca gume,’ pepra, kaukemnunga deiki di, pio mali kununge. Ukupmantoda, kange mun susu jeramre dinin, anengdi, “Gume, nun asusu jeserur ngeda, ila mambul gume. Dakwapye. Asusuda, tali susu jeserura cadi, ange yumada, er pedi dim peprepa, teleppu kunkamepe,” tenepmengedi penunge. Upesenung dinin, ne Allahdi tek sisi pepsene. Sunda tali kange deipra, teleppu men kunkamrume. Ikin weik kupkamsera cadi, kange mun kange doupra kunkamrume.

12 Tonda, adeiyo-deiyo nengdi, ‘Uo, nunda mali kun keca talepra kunup dinin, nunda tek sisi kwar men kupsetue. Nun akunup keca yuma tep nengeda, ali men dangkamepe,” pepra, balila weik kununge. Ukununga tep nengeda, ne Allahdi tek sisi pepsene. Amutu nesala wenepkamsen taruda, sun mutu deiyo-deiyo neng peda, ila di wenepkamsene. Nedi go karepnepa, sun pona tep nengdi, mar poryankamseng taruda, adeiyo neng peda popmengepa, saka depkamenge. Sun amutu kurum nesala peda, popmengepa sakamrumtopu, sun adeiyo-deiyo neng peda, sakamengdi, amutarapu kunkamenge.

13 Ukupmantoda, nimidi, ‘E, nun anggur wa peamepunge neitamai di, akeca-keca yuma kin li yaryopda, anggur du cap, kwarang co du cap, yuk kin keca cap, ton dakra kinkamepe,’ tenenunge. Dinino, ‘Akeca kipkamep’ tenen, li taru kupyopda, akeca-keca yuma, du men mouramretopu, tonda aco yala-yala yuma, bo yuma peda, konum koluprapedi sangamretopu, kupnerume. Ada, ange nongda, ake. Ne Allahdi, ‘Ne nyapu sisa bupra, ne damai deipkamne’ tenen, pio putanerur dinin, nedi kareamsisi keca yuma gum kupmarpa, sun peda mali-malipu tupa kuruma tep, ne damai men bupra deipsetene.

Ange tep nengeda, nedi, ‘Ne nyapu sisa tep, akeca-keca yuma karepnepa, sunda pio teleppu kunkamenge,’ tenemsinge yumada, ukutaru men karepsenepa, sunda ikin deikipu kunkamrume. Atep, nedi, sun yuk mutu nesala tep pepnepa yangedi, sunda ne nyapu kunung mutu tu yumada, yana arapropkamenge. Ne Allah Yahwehdi konum pepmasena cadi, ange yumada tek sisi nong kupkamre ja, pepsene!

14 Ukupra pepmasena cadi, sun amutu kurum nesaladi, ataruda ukupra pepkamnerume. “Uo, uo, nunda ila di kange mun kange doupra kunmapa cadi, warya tep, nunda acapu tali bungmap do? Sun dana-dana tara kurum nesala yumada, nun damai yakamumpa, nun yuma kikimanpu, yuk mutu ila ati arum dopra kungedi, ‘Nun pona tep nengdi tali lupra yana popsenung’ tenen, lyom gel beilya wipdongopi mutu betepedi, kuramepepane, amutu di depmepyopda, telepe pua.

Deiyoda ake. Nun nai bo Allah, men di melipra kalengamseu dinin, nun nai bo Allah er damai mali kuramepupanen, ukutaruda erdi nun tep, ukupmanto ngeda, nimi pon me, er si racun, karepseua utopu, erdi, “Sunda dadepropmengedi, gum kupkamenge,” konum peipseua tepa. Dinin, ange kupkamsernge deiyoda, nun pedipapua! Nundi nun nai Allah Yahwehdi, ‘Ange kupkamrume, angeda pio men kunkamrume,’ pepra deipseu upu yaniptapmepudi, malipu kunupa cadi, nun depkamep deiyoda, nun tepa.

15 Ukutaruda, nun amutu kunup nesaladi, ‘Uo, telep kupra deipsetupa, tali kange doupra teleppu kunkamtepe’ tenen, putaserur dinin, telep men kupra deipserepa, angeda nundi pio men dinupe. Ange utopu ton, nundi, ‘Uo, nun kange mun kuserur kecada, gum kupra deipsetupa, nun susu jeserur ngeda, kwetepsetupa, kaiksetudi, kange di ton cap teleppu kuptepe’ tenen, putaserur dinin, Allahdi kwetepseredi, men telep kupra deipserepa, ange peda men dinupe. Allahdi er yu nun deiki deipserepa, ikin kecapu, nun damai yana tupa kuserepa, ila kange mun kange doupra kunupe. Israel nesaladi upenkamenge.

16 Ataruda, aupu ton konum penunge. Ada, “Uo, Israel tara dinin, pio dapu tara (arah utara) di, Dan mutu ati arum neitamai kunung nesaladi, nun pona tep neng ketenepra yakanmanga deiki di, ila lelim gekepmepedi, ‘Uo, nun pona tep neng, sun kuda bisam, sun sipyal di penge lelimda gekenmepedi, amutu kunup nesala yumada, kwar weik kunmasere.

Tonda, sun mar pona tep yakankameng kuda bisamda, tu deiki puto di yanipmengopda, lelim weik pepyopda, nun ati arum Yerusalem mutu dopra kunupai cap, nun amutu neitamai kunup nesala yuma capda, kware weik kupserepa, moropsemnapu kunupe. Nun pona tep nengdi, nun damai yana popsengedi, amutu neitamai kure keca yuma cap, amutu nesala yuma capda, popsengedi sikke buktapkamsenge. Tonda, gum kupra deipkamasenge. Israel nesaladi upenkamenge.

17 Atep, ne Allahdi aupu ton pepsene. Sun yuma moupra dinkurume! Ukupmantoda, ne Allahdi, sun wenemna tep kupkamsen kecada ake. Ada, sun kumumnya neitamai, nimi pon bal dopra deipnepa, sun si topkamserenge cap, tonda, ayu bal tep nengeda, konum karepsenepa, sundi meri pepra enepeteptuma peda, men kupmanto kupkamrume. Sun wenemna tep, ne Allahdi nimi pon bal utopu keca dopra, doproipsenyopda, yu baldi nimi tep si toprepa, nimi deramengtopu, nedi karepsenepa, sunda ikin keca weika di dopropkamrume. Ne Allahdi aupu tek sisi pepsene. Allahdi Yeremia tep lap pepupa, gekepu.

Yeremiadi, sun Israel tara nesala tep, tenepetepudi, bicau kupupa, engepka tep. seku upu

18 Uda, Allahdi aupu yuma lap pepneupa, gekepsidi, ne dipru neitamai di, pio pu jenere ngeda, men gum kupnetue. Atep, ne kange derinerur kecada, tek sisi konum gum kupneu. Ila kange mun kange doupra kununa cadi, ne kange dipru neitamaida, pu weik jenerure. Ukupmantoda, nimi depmengepa, ange tep tenepra, ati bungamenga utopu, ne dipruai di, tupa tenenenge cap, ne dipru pu jenerurnge capda, men kwetepmanto kunerure. 19 Sun amutu neitamai kurum nesala yumada, moupra gekepso! Amutu neitamai yumada, damai di do, karenai di do, dana-dana tara di, ne mutu nesaladi, mali pepra ngolongmengedi, engepkamenga deiki di, sun pepu asi me demnunge. Sun ila di engenmangada, nun yuma gekenupe. Atep, sundi, “Uo, uo, Yerusalem ^{▼▼Yerusalem – Pumun taru Ibrani upu deiki di, amutu si tep, ‘Sion’ pepra seki. ‘Sion’ perami ngeda, ada amutu pumun taru perami si tepa. Dinino, amutuda Yerusalem tep, asipu sekmepu.} mutu neitamaida, nun nai bo Allah Yahweh konum bendopseudi, aca tupa men kurur do? Ukutaru amutuda, nimi deiyo ngebo Raja kepra talepseu ngebo Allahda, konum tapra bendopseu do, gum do?” pepra asimnunge. Upengepa, ila nimi deiyo ngebo Allahdi tamupra pepsere. “Uo, ware keca deiyo tep, ne mawa nesala, sun Israel nesaladi, tali keca, pio nong gum keca tep, nimi urasin utopu petupra deiamidi, isok sipu eremamitopu, tupa eremnung do? Ware keca deiyo tep, yuk karen nimi bo nengdi, tali keca tep, si eremenge keca dopra, yana deipipa, ne mawa nesaladi aisok-isok tep, ‘Nun nai,’ pepra, si eremamitopu, ukutaru tupa eremnung do? Ukununga tep nengeda, ne yu weik kunerepa, ne dipru pio pu jenerure,” Allahdi pepu.

20 Upepu pangeda, sun Israel tara neitamai kurami nesaladi upenmai. “Uo, uo, jen keca kina li cap, dou mana tara li cap, konum bisipke. Nundi, ‘Ataru neitamaida, nun nai Allahdi yana lyepropkamser,’ tenepmepu dinino nunda, kapul men lyepropseupa, tupa ikin deikipu kunupe,” pepra, ngolokra mali pepi. 21 Upepi pangeda, nabi Yeremiadi pepu. Ne dipru neitamaida, pio mali kunerure. Ada, ne mutu nesala, sun dipru pu weik jerura tep, ne peda kange mun kange doupra, dipru pu jenerure. Ukupmantoda, nimi depmengepa, sun kayapu nengdi opkal galuprapmengedi, ati bukmengedi, ila di engeramengtopu, ne peda pio kange mun kange doupra kunune. Ukunerepa, ne dipru bulungsangnerepa, ‘Uda ware kupkamser do?’ tenena tep, ne kange tenena deiki di, pio men tenipmanto kunune.

22 Atep, ne peda asipetepne. Ware deiyo di kupupa, ne mutu nesala, ataru peda, sun pu tupa jerur ngeda, kapul men kwetepmanto kurur do? Tonda, ‘Gilead mutu neitamaida, nimi kwetena kael ngebo, tenpu ngebo peda, men kuredi, suse kwetepmanto keca ton men palepra deipsetu do? Tonda, ware deiyo tep, ne tara nesala, ikin weik kunga neitamaida, Allahdi kapul men lyepseudi, kange di tamupra telep men kupra deipseu do?’ tenen, penune. Nabi Yeremiadi pepu.