Jer 9 | XteSC | STEP | Ne putapner ngeda ake. ‘Ne giso neitamaida, me weik deipra diniknetua deiki di, ne asi meda me durupna dipmengepa embaramretopu kupnetue’ tenen, putapnere. Ange utopu, ‘Ne asi meda, me bungna utopu kupnetupa, pio engeptenepa, ne asi meda pio saktue’ tenen, putapnere. Ukupnetuopda, lukunda taru pe, komuni taru pe yuma, mali kange doupra engenapu kutene. Ada tali tep men engenune. Dinin, nun pona tep neng, yuk mutu yu nengdi, ne mutu nesala denge weik konum popra gawal dangmenga tep engenune.

Jeremiah 9

Yeremiadi sun Israel nesala tep, bicau tenepudi, engepu upu

1 Ne putapner ngeda ake. ‘Ne giso neitamaida, me weik deipra diniknetua deiki di, ne asi meda me durupna dipmengepa embaramretopu kupnetue’ tenen, putapnere. Ange utopu, ‘Ne asi meda, me bungna utopu kupnetupa, pio engeptenepa, ne asi meda pio saktue’ tenen, putapnere. Ukupnetuopda, lukunda taru pe, komuni taru pe yuma, mali kange doupra engenapu kutene. Ada tali tep men engenune. Dinin, nun pona tep neng, yuk mutu yu nengdi, ne mutu nesala denge weik konum popra gawal dangmenga tep engenune. 2 Tonda, ukupra tenene ngeda ake. Neda, me pio gumai tep, nesala men kunungai, pio katuai mutu neitamaipu, bisi emban neng keana mana tep, yambul ati doptengepa, neda ato ati bena kutenyopda, telepe. Ne mutu nesala kunungai di tapra, nimi gumai, pio katuai mutu neitamai bena kutenedi, sun cap, ne cap kikiman antamna gum di, ‘Ne pe yuk kuptene’ tenen, putapnere. ‘Ne mutu nesala yumada tapra, pio karenai bendoptene’ tenen, pepne.

Deiyoda, tali upu pepra mali kuna yala nesala kungedi, sun deiyo-deiyo neng tep, ‘Sun upu men gekenkamepe,’ pepra, aneng tapmengedi, telep kupra kun nesala ton pio men kununga tep pepne. Ada, sun nai bo Allah tapmengedi, yuk mali bisipu embanunge. Sundi mali kun kecapu talepra kununga deiki di, ukupmantoda, sunda, nimidi sun konum domenge nerapu tapra, yuk nengdi domenge nerapu dalupra, upula nyangdarameng utopu neng kununga tep pepne.

3 Sun abulupra kunge nesaladi, tali mok upu pena cap, tali-tali kange doupra, mali-mali weik kuna cap, angepu talepra kungedi, tek sisi keca ton pio men kununge. Sundi ange kununga deiki di, ukupmantoda, nimidi ‘Yuk neng popkup’ tenen, jen talepra mar porbarameng utopu kununge. Amutu nesala yumada, telep kupra kun keca deiki di talepra men kununge. Sun mok upu penga deiki di, amutu neitamai ila puto nesala konum kununge. Sundi, dumsisi kun keca cap, tek sisi upu pena capda, pio men talepra men kunung dinin, mali kun kecapu talepra, mali-malipu pio kupbanunge. Tek sisi ngeda, sun amutu anesalada, ne Allah Yahweh cap, nedi kunun keca cap tep, moupra men kael kemnenunge.

4 Tonda, sundi sun kayapu neng cap, sun damai kunge nesala cap, anengdi kunmange keca tep, ‘Nun damai yaserur’ tenen, moupra kalengdamumdi kunkamrume. Aneng yuma tep, ‘Teka, sunda telep kununge’ pio men tenenkamrume. Deiyoda, sun kayapu sisa, tenpu mundu pumbon di deiamsenge ngebo kunung dinin, sundi pesenge upu yuma peda, ‘Teka’ tenen, pio men gekenkamrume. Sun kayapu neng sisadi, mok upupu tamurtongedi, pedanung neng kununga tep pepsene. Tonda, tek sisa kupmarepa men epmange dipapu, tali upu pena cap, tali mok pertamna cap, aupu pepdangedi, embanunge.

5 Sun anengda, mok upu doupra, sun meneng damai kunge nesala gekenai embandangedi penunge. Anesala yumada, mok upupu pedanunge. Sun kankan neitamaida, tenpu ngebo peda, tek upu pio men perure. Sunda, tali-tali upu pepembanunga cadi, sun sipyal deiki di penung upuda, pio tep, tali mok upupu penunga cadi, sun mali kunge kecada, pio kununga cadi, puto boun kupmengepa, mali kunange men tapmanto kununge. 6 Ange utopu, yuk neng tep, ikin keca sun nong deiki pio derinunge. Tonda, tali minina upu deiki di mok upupu pio penunge. Anesala yumadi, amali kunangepu tupa-tupa kupbanunga cadi, anesala yumadi, ne Allah Yahweh tep, ‘Erda, tek sisi nun nai bo Allah kurure,’ men pengedi, ne tep moupra men kael kemnenunge.

7 Ange tep nengeda, neda Allah Yahweh, im deiki jen talen malaikat yuma talepsidi, sun deiyo ngebo kununa cadi, neda ila puto weik ngebo kunune. Nedi aupuda tek sisi pepsene. Tek sisi nedi ne nyapu sisa, sun Israel nesala tep, ‘Telep kunkameng do, gum do?’ tenen, ikin keca karepkamsena deiki di, sun tep kupetepkamne. Ukupmantoda, nimidi gat besi keca uku dongopmangepane, uku di malinge yuma jepropredi, telepnge wertamamretopu, ne Allahdi ne nyapu sisa tep, kupetepkamne. Ukupne pangeda, sun malinge gum kupbarepa, telep kunangepu katuai kuprepa, dumsisipu kupkamenge. Sunda, pio mali kun kecapu talepra tupa kupbanunga cadi, nedi sun telep kudina tep, wareto keca ton, kuptene do? Gume, sun kange di telep kudina tep, ikin keca sun nong deiki deipnedi, wenepkamsena deiki di, sun kupetepkamne.

8 Sun anesaladi penung upuda, nimidi mar marapmengepa, yuk neng popra deramengtopu, upu pepra derinunge. Sun amali upu penung nesaladi penung upuda, pio mok upupu penunge. Sun anesaladi, sun kayapu neng cap, sun meneng damai kunge nesala cap tep, ‘Nun upu gekepmengedi, nun tep kange deipkamseng’ tenen, mawa di, gekena telep upu, telep kupra penunge. Dinino, tek sisi sun pe kange dipru neitamaida, ‘Inipmepedi, aneng poptapkamepe,’ tenenunge. Ukununga deiki di, sun mok upu penunga deiki di, pena pepra kalengdidanunge. 9 Anesalada, pio malipu kununga tep nengeda, ware deiyo tep, nedi amutu nesala, sun wenemna tep, sun nong deiki ikin keca men deiptene do? Gume, nedi sun mali kunange tep, sundi mali kuramengetopu, nedi tamupra kwang dakra wenepkamsene. Sun mali kunge keca tep, menenga keca karepkamsene. Ne Allah Yahwehdi konum pepmasena cadi, angeda tek sisi kupkamne.

Allahdi, ‘Yerusalem mutu cap, Yehuda tara yuma cap uruptapnepa, ati walangpu kupkamre,’ pepu upu

10 Allahdi, ne Yeremia tep aupu lap peipneupa, nedi pepsene.

“Ne upu gekenemum nesala yumada, engenapu kumumdi ngolongkamrume. Ada, sun kumumnyai buku ila mutu yuma cap, bura mutu cap, ban mutu neitamai paramre betei cap, mutmuta cap yuma tep teneprumudi, engenkamrume. Ada, Allahdi sun wenemna tep, amutu yuma mali kupra deipkamre. Ukupre pangeda, ware mutu nesala do yuma, sundi amutu-amutu neitamai ton men embankamenge. Tonda, amutu neitamai yumada, nimidi peirameng keca, sapi bisam upu ton penmarepa, men gekenkamenge. Tonda, amutu neitamai yumada, ma yala-yala yuma pe, bura tara kuramre gam keca yala-yala yuma peda, bura sakra pio yukai bendopmengepa, gum kupkamre. Atep sun yumadi, sun mutu tep teneprumudi, engenkamrume,” pepsene.

11 Allah Yahwehdi, aupu ton upeipseu.

Sun moupra gekepneso! Nedi, sun wenemna tep, Yudea mutu neitamai yuma, nimidi ati arum domidi kurami mutu yumada, uruptapnepa, ati walangpu kupkamre. Nimi yuma wenepnedi popra, gawal dakamna tep, amutu neitamai ton pio men kunkamenge. Tonda ila ati arum dominge, Yerusalem mutu peda, uruptapnedi, sikke buktapnyopda, amutu ati-ati yumada uruptapnepa, tu deikida gelpu kupkamre. Tonda, amutu neitamai nesala yumada gum kupra deipnepa, nimi ton amutu neitamai men kungopda, bura tara kuramre yu kamdi, amutu neitamai yana pio kunkamenge,” Allahdi pepu.

12 Upepupa, ne Yeremiadi tamupra Allah tep asipetepsi. “Uo ne naio, amutu kunge nesala yuma tep wenepkamremnge cap, amutu-mutu yuma mali kupra deipkamremnge capda, ware nesaladi, ange betapra teneptengedi, kael keptenge do? Akupkamremnge yuma tep moupra kael kepmanto ngebo ton akunmar do?

Tonda, kanda Allah Yahwehdi, akupkamrem ngeda, men-men taru di, ware ngebo tep lap peramumpa, gekepudi, yana lap pepsetupa, kael keptepe do? Ware ngebodi, adeiyo keca tep, kan Allahdi, amutu-mutu yuma tu mali kupra deipsemempa, pio walangyopu kupkamre ngeda, lap pepra pepsetupa, kael keptepe do? Tu mali kupyopda, tu pumbon di paramre keca yuma gelal sepredi, koloupre pangeda, me pio gumai, katuai mutu utopu kupkamrenge cap, amutu neitamai nesala yuma ton men embankameng nge cap, ati walangpu kupkamrenge capda, Allah kandi ware ngebo tep konum lap peramumpa, nun tep yana lap pepsetu do? Gume, nimi dipapu ange yuma men lap pepsetenge.” Ne Yeremiadi, Allah tep upepra asipetepsipa, Allah Yahwehdi tamupra upepneu.

13 Ne Allah Yahwehdi pepsene. “Amutu nesala wenepnedi, amutu yuma mali kupra deipnepa, pio mali mutupu kupkamrenge deiyoda ake. Ada, ne nyapu Israel nesala yumadi, nedi, ‘Angeda, ukunkamrume, angeda pio men kunkamrume,’ pepra, deiamsisi mem upu yumada, sundi ange moupra men gekengedi, yanirtamnenunga tep, sun kunge mutu yuma, mali kupra deipkamne. Tonda ange utopu nedi, ‘Ukunada mali, ukupra kunada, telepe pua,’ pepra, lap peramsisi dinino, sundi ne upu gekepra, men talengedi, dumsisipu pio men kununga cadi, anesala wenepkamsene.

Nedi, ‘Telep kumumdi, abisipu bankamrume,’ peramsisi dinin, sun Israel nesala gekena gum di, aupu pemsitopu, moupra men talengedi, ne peramsi bisipu men dombanunge. Atep, sun kungai mutu-mutu yuma mali kupra deipkamne.

14 Tonda, sun Israel nesalada, balila di gel giso deipra kunung neng cadi, ne peramsi upu yumada, yaniptapra, sun pe kange dipru neitamaipu putaretopu kununge. Ukununga cadi, sun co puna nengdi, ‘Aisok er si eremkamepe,’ pepra mali weik kuramidi, ‘Sun ton ange utopu, kupkamrume,’ pepra peteremamipa, sun ukutaru neitamai kunge nesala peda, isok Bahal, er sipu eremengedi, atali kecapu talepra mali kupbanunge.

15 Israel nesaladi amali kun keca yuma tupa-tupa kununga tep nengeda, ne Allah Yahweh, im deiki jen talena malaikat ^{▼▼malaikat – Aupuda, Ibrani upu deiki seki upu deiyo akuretopu sekmepu. Ada Allah er si tep, “Yahweh Sabaot” seki. Indonesia upu deiki di TUHAN yang Mahakuasa penunge. Ange telep dinin, nundi Ibrani upu deiyo neitamainge, ‘Sun kael kepkurum’ tenen, konum jenek kupra sekmepu. Aupu deiyoda ake. ‘Allah Yahweh akeca-keca yuma cap, im deiki jen talen malaikat cap yuma talepra, sun deiyo ngebo kurure,’ tenen seki. Atep erda ila puto ngebo kurure.”} yuma, sun deiyo ngebo kununa cadi, ne puto weik ngebo kunune. Tonda, nedi sun Israel nesala yuma melipra kalengamsipa, sundi ne tep, ‘Nun nai bo ake,’ pepra, ne sipu eremamnei. Ne dipapu aupu pepsene. Neda, Israel nesala, ne nyapu sisa, sun mali kunge keca tep nengeda, ila di wenepkamsene. Ukupmantoda, sun jen kecada, pio matang peramrengepu karenkamsene. Tonda, nimi dena tep, pio yu me, er si racun karepnepa, jepmengedi denkamenge. Akange mun keca yuma utopu ngeda, nedi karepsenepa, ikin weik kunkamenge.

16 Tek sisi sun Israel nesala tep, wenepkamsena ngeda ake. Nedi sun amutu kunung nesalada doprapnedi, sun pe, sun co puna neng pe, pio men kael keami mutu neng, yuk karen mutu neng deiki deipkamne. Ada, nedi yuk karen mutu nesala tep, go karepne pangeda, anesaladi, sun Israel nesala damai yana popmengedi, dopra ateng koupmengedi, sun pe yuk karen mutu tamupra dubenkamenge. Tonda podan taru neitamai di, ‘Uo, nun yuma popra sikke buktapseng’ tenen, kware weik kuprepa, bura saka bendopmengedi, bokra yuk-yuk mutu wengbana tep, sepdaro benkamenge.

Dinino, nedi jen talena neng ton, tupa dopra deipnepa, Israel nesala pera karen mutu yuk dabenkameng nesala yuma peda, nimi pon parang ya di, popra gawal dakamenge. Ada, jen neng doproipnepa, yana popkameng ngeda, sun pe puto deiki di men kunkamenge. Ada, Israel nesala sun wenemna tep, ne Allahdi puto weik karepnepa, adeiki yuk mutu jen talen nengdi yana popra gawal dakamenge. Allahdi pepu.

Allahdi Israel nesala yuma wenepkamra tep, ‘Sun yuma engenkamenge,’ pepu upu

17 Uda, Allahdi aupu ton pepu. Neda Allah Yahwehdi, im deiki jen talena malaikat ^{▼▼malaikat – Aupuda, Ibrani upu deiki seki upu, Allah er si tep, “Yahweh Sabaot” seki. Aupu deiyo akuretopu sekmepu. Tonda ayat 15 neitamai di dinkurume.} yuma, sun deiyo ngebo kununa cadi, neda ila puto kune ngebodi pepsene. Nedi ne nyapu sisa tep pepkusen upuda, gekepmumdi, moupra tenepso! Sun wenemna tep, nedi karepsenepa, amutu neitamai kunkamser keca yumada, ikin weik kunkamre cadi, sunda ila kange mun kange doupra kunkamrume. Atep, sundi, engena kael nerapu upupkamrume. Upupmumpa, sun anerapu yangedi, kange mun kuprepa, mali kange doupmengedi, mali pepra, mut pengedi, pio weika di engenkamenge.

18 Yehuda yala nerapu, engena kael nerapu pepmumpa, menmena yangedi, sun kange mun kuprepa, mali pepra, mut pena deiki, ila di engepmengepa, gekeprumudi, adeiki sun peda kange mun kuprepa, menmena asi me weik sangkamsere.

19 Ila di engenkamrumada, tali tep gum dinin, ukutaruda, Sion mutu neitamai di, konum gonga kepra engepmengepa, gekerume. Sun Sion mutu kunge nesaladi, kange mun kange doupmengedi, mali pepra, engepmengedi, penkameng upuda ake. ‘Uo, nun yuma gum kupra deipserepa, nun ati walangyopu kupsera tep, nun yumada, ali dakamepe. Deiyoda, nun pona tep neng, sun karen mutu nesaladi yana popmasengdi, nun ati yuma urupra, sikke buktapmasenge. Nun ati arum domepunge yumada, konum uruptapra, gum kupra deipsengedi, gawal dakmasenga tep, nun ali dakmepe. Nun kunup mutu neitamai yumada, adipapu tapra bendopkamepe.’ Sun Sion mutu kunge nesaladi upepra penmangpa, gekenmarume,” Allahdi pepu. Upepudi, aupu ton pepu.

20 Uo, sun Israel yala nerapu, engena kael nerapu yumada, ne Allah Yahwehdi pepkusen upu gekepneso. Sun nerapu yuma tep pepsene. Ne Allah Yahwehdi pepra deipkusen upupu gekepmumdi, kange mun kupserepa engena deiki, mut perum ngeda, sundi derirum ner nyapu cap, ton sun kayapu yuk nerapu cap, kange mun kange doupra perum mutda, peteremkamrume. Ukupmumpa, anerapu yumadi dukdongopra, amut pepdanen bankamenge. Ada, sun kange mun kupsere taru amutpu penkamenga tep, peteremdankamrume.

21 Sun kange mun kupserepa, engepra mut penkamruma deiyoda, ake. Ada, dena deiyo kecada, nun ati dela bon bisi cap, ati dela neitamai jendela potokeipmupu bisi bon cap, abisi bon yumadi wekra, nimi kun damai yakarure. Ayakarur ngeda, tali kankan kunge nesala, sun ati cap, ila nimi deiyo neng kunge ati, urasin pio telep ati, istana perameng ati cap, konum wengyakanmasere. Nimi denge weik konum denunga cadi, sun nyapu bisiai di esu pepra kunmange nge cap, tonda sun kaber nengdi, kunumna tep jen keca deipmengepa, nimidi bulupra, jen keca kunumnungai cap, tupa men yakanunge.

22 Ange yumada, ne Allah Yahwehdi pepmasena tep, sun gekeprumudi, lap penkamrume. Ada, sun yuk karen mutu yu neng, go karepnepa yangedi, sun tep yana popra gawal dangkamsenge. Yuk karen mutu nengdi, yana poptapmengepa, depkameng nengda, mutmuta paramrai ton tu deiki sakamenge. Depmengedi, sakmengopda, yuk nengdi, sun galemna dopra, nimi pein damai men peirbankamenge. Nimi pio weika di yana poptapkamenga tep, tali bam keca tali mutu donongbaramengtopu kupkamenge. Ada, sun tep yu tenepra pona tep nengdi poptapkameng neng, sun nongda, meneng acapu, tu deiki tapkamenge. Yuk nengdi yana, adepmange neng nong men dopra peirbenkamenge.

Ukupmantoda, bongopra er bam lanung keca, er si gandum, du doropmengedi, er yo cap, bam capda, menenga yatupra tali tapmengedi, kange di tamupra men dororamengtopu, kunkamenge. Nimi popmengepa, depkameng nesala sun nongda, tali katuaipu tapkamenge. Men peirbenkamenga tep pepsene. Angeda, sun yuk mutu yu jen talen nengdi, Israel nesala pio weika di poptapsengepa, kupkamrenge tep, lap pepsene. Atep, sundi sun kayapu nesala tep, adipapu sun damai lap perbenkamrume. Allahdi pepu.

23 Allahdi aupu pepu dingeda, aupu ton dukdongopra pepu. Neda Allah Yahwehdi pepsene. Sun ila kael keami nesaladi, ‘E, nunda ila kael kepmupka tep, nunda ila mambul neng,’ tenena gume. Ukupra tenepmengedi, sun dipru peda erepra gemena gume. Tonda ange utopu, sun ila puto nengda, “E, nunda puto weik neng kunupa, cadi, nunda ila mambule,” pepra, salnong-nong kamna gume. Ange utopu, sun ila isomka nesala peda, ‘E, nunda akeca-keca yala-yala yuma talenupe. Tonda, ila isomka neng kunupe. Tonda, nunda ila mambul nesala kunupe,’ tenepra, salnong-nong kamna cap, gemena cap, pio meme.

24 Ange gum dinino, ware nesala do yuma, sundi, ‘E, ila mambul keca ake, ila mambul ngeboda ake,’ tenenkameng taruda, sundi apepkusen kecapu tenenkamenge. Tonda, tuai mutu tali dakure keca yuma tepapu, ‘Angeda, mambule’ pio men tenenkamrume. Ange yuma gum dinin, sundi ne Allah Yahweh tep, teka tenepnerumdi, ne cap, ne kune keca cap, moupra kael kemnerum nesalada, sun dipapu, ‘E, ila mambul ngeda, Allah Yahweh er tepa,’ teneprumudi, ange deiki dipapu kange pio derinkamrume. Ada, sundi ne Allah tep, “E, Allahdi bicau teneseredi, erdi, ‘Angeda kunkamrume, ukupmumnyopda, nedi pio melimsenedi, pio telep kupra derinkamsene,’ pepra pedina upu deiki di peipseua deiki di telep kupra melimserure. Erdi kure keca yumada, dumsisi kuna cap, telep kuna cap, deiki dipapu, nimi upu bongdiseredi, tupa-tupa melimserure,” peptengedi, ne si erepnetenge.

Neda Allah Yahwehdi, sun tep pio bicau tenesenedi, pio men tamsenune. Nedi, sun tuai nesala ban-ban yuma neitamai kurum nesala tep, melipra kusene keca yumada, bicau tenena cap, tek sisi upu pena cap, mali kun keca pio gum dipapu dumsisi kuna cap deiki di melimsenune. Tonda, ne Allahdi dipapu, atelep kunange yuma tep nengeda, ‘Dumsisi kunange yumada, telepe pua’ tenen, ne kange telep kupra derinune. Angeda, ne si Allah Yahwehdi aupu pepsene, pepu.

25 Upepu dingeda, aupu ton dukdongopra pepu. Neda Allah Yahwehdi pepsene. “Ne tek sisi pepsene. Amenda taruda, sun tupa malipu kunge nesala yuma tep, ila di wenepkamsene. Sunda, yuk nengdi, nun tep, ‘Allah er mawa nesala kununge, tenenkamseng’ tenen, men di peramsisitopu, sun nimi den bam bol sirik tarange sengtamrum dinin, sun dipru neitamaida, mali kun keca akwamserepapu kurume. Ange utopu kurum nesala tep nengeda, amenda taru sun menenga keca dopra karepkamsene.

26 Tonda, nedi, ‘Ukuna gume,’ pepra deipsisi dinin, sun amul damai giso potong konum touptapidi, Mesir mutu cap, Yudea mutu cap, Edom mutu cap, Amon mutu yala nesala cap, Moab mutu neitamai kurumu nesala cap tep pepsene. Tonda, sun me gum tep, nimi men kunge mutu, ila pala katuai mutu neitamai kurum nesaladi, ‘Nun isok-isokdi, kange deipsetenge’ tenen, sun amul deiki tara, giso potong touprum neng pe, sun Israel nesala yala-yala yuma, amutu-amutu neitamai kurumu nesala peda, sun yuma tep ila di wenepkamsene.

Deiyoda, sundi, ‘Yuk nengdi nun tep, ‘Allah er nyapu sisa kununge,’ tenenkamseng’ tenen, sun nyapu den bam bol deiki tara siriknge sengtamrum dinino, tek sisi sun dipru neitamaida, mali kun keca pio tupa kupseua tep pepsene. Ange utopu, sun Israel yala nesala yuma peda, sun nyapu den bam bol deiki tara siriknge sengtamrum dinino, tek sisi sun dipru neitamaida, mali kun keca pio tupa akapseua dipapu kurume. Sun yuma tep wenepkamsen ja, pepsene.” Allahdi pepu.