Job 1

Ayubdi Allah tep teka teneramupa, isok yuma sun deiyo ngebo, er si Kain Jen Ngebodi Ayub tep, kurpeteramu upu

1 Nimi tenpu Us mutu kuramu ngebo, er sida Ayub perami ngeboda, Allah tep, ‘Erda ila mambul ngebo’ tenen, Allah er sipu eremamudi, Allah peiamu upupu talepra kuramudi, er tepapu moupra teneramudi, mali kun keca damai di tapra, pio dumsisipu kuramu. 2 Ukuramudi, Ayub er nyapuda, sal nyapu yoneitam bari cap, ner nyapu weneri cap deiamu.

3 Tonda er pel don neng peda, pio weik kurami. Ukuramidi, domba bisam denge tujuh ribu (7.000) cap, unta bisam denge tiga ribu (3.000) cap, tonda keledai bisam dengeda, lima ratus (500) cap, sapi bisam dengeda seribu (1.000) cap, ange yuma talepra peirami. Ukuramipa, sun keteng yakan tara kurami nesala kan-kan, yuk isomka neng ton akurami, dinin er Ayubda pio ila isomka cap, amutu neitamai pio telep kupra kuramu ngebo, er tenpu kuramu. Er utopu ngebo ton men kuramu.

4 Ukuramupa, ataru-ataru yuma, er nyapu yoneitam bari neng sun kurami ngeda, ton ngebo ati bena kalepra jepmana, ton tumida gopra, ton ngebo ati bena kalepra jerami. Ukurami taruda, sun mal nerapu, weneri yumada, ‘Yankurume,’ pepnepa, sun adipapu yanpa, sun tonpa bupra weknedi, jen cap, me cap tonpa jerami.

5 Konum kalepra jepropne pangeda, Ayub mapmana ipna di bukda pepra, er nyapu sun yuk-yuk tep nukra, domba bisam popnedi, Allah morona tep, keteneiamngai doupra uku sengbaramu. Ukuramudi, sun nai bo Ayubdi teneramu ngeda, ‘Ne nyapu sun mangkau di mali kupmang do? Tonda sun dipru neitamai di, ‘Allah tep mambul gume,’ tenepmang do?’ tenen, amali kupmanto keca ‘Ukupmang do?’ tenen, akeca pununa tep, yapi keca popra, Allah tep kareramu. Atep nengeda, ‘Nedi Allah moropnepa, sun Allah damai mali kunung keca yuma, gum kupra deipkamre’ tenen, kuramu.

Kain Jen Ngebodi Ayub tep, ue tenpu taru kurpetena tep, kupu upu

6 Ayub dumsisipu kuramupane, Allah er pel don neng malaikat diramidi, ‘Nun nai bo Allah damai kunkup’ tenen, bei taruda, isok sun deiyo ngebo Kain Jen Ngebo peda sun tonpa bei. 7 Sun tonpa konum bei pangeda, Allah Yahwehdi, isok sun deiyo ngebo Kain Jen Ngebo tep, “Kanda, dan mutu di tengyarem do?” pepra asipu. Upepra asipupane, Kain Jen Ngebodi Yahweh ^{▼▼Yahweh – Allah er si, tek sisi ngeda, ‘Yahweh’ kurure. Allahdi Musa tep, aupu katuai di lap pepu (Keluaran 3:14). Ibrani upu deiki di ahuruf ‘YHWH’ angepu sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH, angepu sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra ne tep gispal donkamnerume,” pepu. Ibrani nesaladi huruf YHWH sengnung dinin, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua. Tonda lap pena upu nomor 49 dirume.} tep tamupra pepu. “Neda tuai mutu ban-ban yuma embanedi, nesala ban-ban yuma kunung keca tep dipra embanune.” 8 Upepu pangeda, Allah er si Yahwehdi, tamupra Kain Jen Ngebo tep pepu. “Kanda ne amutara pel don ngebo Ayubda dirum do? Apepken ngeboda, tali tep men pepkene. Nimi ban-ban yuma kunung nengda, er Ayub utopu men kununge. Ne pel don ngebo Ayub dumsisi teleppu kure utopu ton men kununge. Erda ne sipu eremneredi, mali kun keca tenpunge peda pio men kurure,” Allahdi pepu.

9 Upepupane, Kain Jen Ngebodi tamupra pepu. “Ayub tenere ngeda, ‘Allahdi pio telep kupra makunkamner’ tenen, kan upu gekepra kukerura. 10 Tonda, kan pel don ngebo Ayub, er kurur ngeda, tali tep gume. Er talerur keca yuma cap, tonda er pel dorenge yuma capda, kandi moupra kalengmemdi, akeca-keca yuma yamupra karemempa talerure. Tonda, er peirur keca weika di karemempa, er kure mutu yuma dinirure. 11 Dinino, ukupmantoda, kandi karemem keca yuma popra gawal dakmem pangeda, er ton cap kan si men erepketue. Tamupra kan damai mali upu yan pepketu,” Kain Jen Ngebodi Allah tep pepu.

12 Aupu yuma konum pepu pangeda, Allah er si Yahwehdi, aisok deiyo ngebo Kain Jen Ngebo tep pepu. “Ne damai di tamupra Ayub damai bememdi, er talepu keca yumada, kan deiki deipkenepa, kan tenepmaremtopu, gum kupra deipkurume. Dinino, Ayub er nong deiki puda, ikin keca ton men deipkurume,” Allahdi pepu. Upepu pangeda, Kain Jen Ngebo adipapu Yahweh er damai tapra, Ayub kundam beu.

13 Bena kunmaudi dinmaupane, tenpu tumi ton, Ayub er sal nyapu cap, er ner nyapu cap yuma bupra, sun du bo er atipu wekmaidi, jen cap, anggur me cap tonpa jenmai. Ayub er yuk kunmau. 14 Ataruda, tenpu ngebo ton Ayub damai yaudi pepu. “Naio kan wa pena tep, kan pel don nengdi, sapi bisam tapu gerekra gia embanmangpa, sapidi tu palipbanmange taruda, kan keledai bisamda mutmuta ortara bena kunmangdi jenmange. 15 Aben kunmang taruda, Syeba mutu neng yanmangdi, kan bisam pein neng yuma parang ya di yan popra tapmangdi, apeinmang keca yuma dopra benmange. Dinino, ne tenpu bura saka yandi pepkene,” pepu.

16 Menmena kai upu peryanmau ngebo, tupa yana upu penmaupapu, yuk ngebo ton yaudi pepu. “Nai Ayubo, kan domba bisam pein neng cap, kan domba bisam cap yumada, Allah im deiki di uku bu dokoteprepa sakredi, popra gawal dakmaue. Dinino, ne tenpu tapnerpa yandi pepkene,” pepu.

17 Butene ngebo peda upu pepra men gawal dakupapu, ton weneri ngebo yaudi, “Ne nai bo Ayubo, Kasdim mutu neng denge weneri yangdi, kan unta bisam peina tep pel don neng cap, kan unta bisam cap yuma popropmengdi, ne tenpu tapmanengpa, ne nai kan tep peryakene,” pepu. 18 Dumbari ngeboda, tupa yana sisingmaupapu, ton ngebo ton, amenda yaudi, pepu. “Naio kan nyapu cap, ner nyapu cap yumada, sun du bo atipu bupra wekmangdi kwaneng cap, anggur me cap tonpa jenmange.

19 Ukunmangpa, dato-dato di, me gum tep nimi men kunge mutu, katuai mutu tara di, ila mungna ton yanmaudi, akati dana-dana yuma yana kweipmarpa urupmaudi, kan sal nyapu cap, ner nyapu cap yuma, taikra popra gawal dakmaue. Ukupmaudi, ne tenpu tapmanerpa, ne nai kan tep peryakene,” pepu.

20 Ange yuma konum pepipa, Ayub gekepu dingeda, er adipapu tekroudi, ila kange mun kange doupmaua tep, er lyom opkal kenekmaunge kwiripra gweleptapu. Tonda, er giso potong touptapu. Ange deiyoda, ‘Ware keca deiyo tep, akange mun keca kupmaner do?’ tenepudi kupu. Ukupu dingeda, ‘Allah moropkun’ tenen, Ayub adipapu genepra gutam tu dipdongopra, Allah er si erepudi upu pepu.

21 Genepdongopra buku dingeda, aupu pepu. “Nanindi deipkotepneu taruda, opkal keneksidi bung keca ton doupra men yanamsi. Utopu depnedi, im deiki benkamne taru peda, opkal kenekra bung keca ton men dubenkamne. Atep nengeda, Allah Yahweh dipapu akeca-keca yuma kareramneutopu, er Yahweh dipapu tamupra doropmanere. Atep, ne nai Allah Yahweh tep telepe pepkene. Tonda, ‘Nimi ban-ban yuma Yahweh kan si eremkamkenge’ tenen, telepe pepkene.” Ayubdi Allah tep pepu.

22 Ayub ila ikin keca er deiki yakaramu taru yumada, “Allahdi mali kudinerure,” pepra, Ayub mali men kuramu. Tonda, Allah tep mali upu ton men peramu.