Job 10

‘Tuai mutu neitamaida, ikin weik kuserurada, ware keca deiyo tep do?’ tenen, pepu upu

1Ayubdi pepu upuda ake.

Ne gam kunun taruda, pio dabalpu kuneredi, ‘Ne song,’ tenenune. Ange ukunerur ngeda, dim peprappu men kunkamne cadi, ne ila pu jenerepa, kange neitamai di, ila kange mun yu tenenun ngeda, ton tamna gum di, tali lupra penapu kunkamne. Ada, Allah tep, “Ange kupnetuma,” penkamne. 2Atep, ne nai bo Allah tep, “Uo, ne nai Allah, kandi ne tep, ‘Adipapu men wenepra poptapkamnerum’ tenen, moropkene. Tonda, kandi ne tep, wenemna upu cap, ikin keca karena cap, kunmanerum ngeda, ‘Lap pena upu deiki di, “Kanda mali kupmum ngeda ake,” pepra, lap pepnetum’ tenen, moropkene. Uo, ware keca deiyo tep, kandi ne upu tep men gekenerume. 3Tonda, asipetepkene. Kan pe buru di ne ketekepra deipnemuma cadi, kandi ne deiki ikin keca deipra darapdongopnerume. Tonda, kan pe buru deiki dipu talepra domem ngeboda, ‘Er nong deikida, pio ikin keca tupa derinkamne,’ tenerumdi, kange derirum do? Ange gum dingeda, sun mali kunung nengdi, ‘Mali kuna ngeda, ukupra kunkamepe,’ tenenung nge tep, kandi melipmempa, sundi amali kuna ngeda, tali lupra kupbankameng do? Ne damai mali kupra derinenunge.

4Ne nai bo Allah, kandi tenememdi dirum ngeda, tali tuai nimidi diramengtopu dirum do? Ne kangeda ange utopu pio men dirume. 5Ange utopu, kan gam tupa kunkamrem taru goda, nun tuai mutu neitamai kunup nesalada, yambul buma dipu kunkameptopu, kan peda utopu kukerur do? Tuai nengdi deiamsei nesalada, keteng tamun buma dipu gam kunkameptopu, kan peda utopu kurum do? Gume, ne kangeda, kanda pio lyoma di, pio tep gam kunkamreme.

6Kanda, nun tuai mutu nesala kurameptopu gum dinin, kanda pio yuk, teleppu kurume. Ange tep nengeda, ware keca deiyo tep, Allah kandi, ne mangkau di mali kupmasi keca tep, kalekra moupra dipetenerum do? Tonda, ware keca deiyo tep, ne mali kupmanenge yuma tep, pio lepra dinememdi embanerum do?

7Tek sisi kanda konum kael keamrume. Neda, bouna di kunedi, mali kunange ton pio men kunune. Mali kuna gum di, neda dumsisipu kununada, kan kaele. Dinino, kanda Allahdi, ‘Angebo talepnedi, wenepra popkamne,’ tenepmemnyopda, wareto ngebodi, upu sekeiptudi, ne tep melipra lyepnetu do? 8Teka ne nai bo Allah, kan pe buru deiki dipapu ketekepra deiamnemum dinino, ukutaruda, kan adipapu tamupra ne damai yamemdi, ne tep popra gawal dangkamnerume. 9Ange ton tenepetepkurume. Menop taruda, kandi kerah tu dopra, konum ketekeiamnemume. Dinino, ware keca deiyo tep, ataruda kandi ne tep, ‘Tamupra sikke but utopu kuptu,’ tenepnemumdi, wenepra popnememdi, gum kupra deipkamnerum do?

10Kandi ne nai bo konum kael keamumdi meliamumpa, er pel domnga deiki di, nanin mundu pumbon di ne nong ketekepra deiamnemume. Tonda, kandi nanin mundu pumbon neitamai di, ne nong kwamnere keca yuma ketekepra deipnemumdi, puto kepra deiamnemume. 11Ataru neitamaida, ne nong kekemna taruda, nanin mundu pumbon di, kandi ne yo cap, melmel cap, keteneiamumdi, ne nong kamo konum keteneiamnemume. Keteneipnemumopda, kandi ne galemna dongopnemumdi, adeikida ne bol di getepdongomnemume. 12Angepu gum dinin, nanin konum deipneu taru di dipra, ne gam kune taru yumada, ange yuma konum kupnemum dingeda, kandi neda gam kuna deiyo keca karemnemume. Tonda, kandi ne tep, “Bicau tenekenedi, pio tep telep kudinkamkene,” pepra, pedina upu deiki di kareamnemume. Ukuamnemumdi, kandi ne gam kuna tep nengeda, pio kalekra peiramneruma cadi, ne nong cap, ne sambala cap, puto kweipnemumya deiki di, tupa gam kunune.

13Ukuramnemum dinino, ukutaruda ne konum tenepmane. Kan pe kange neitamaida, ne tep adipapu inipra, ‘Ikin keca deipnepa, Ayubdi doropkamre ja,’ teneramnemume. Menop taruda, ange yuma iniramum dinin, ukutaruda, kandi ne tep, ‘Angebo tep ukupkamne-ukupkamne,’ tenemnemum ngeda, konum kael kepmane.

14Kandi ne tep, ‘Mali kuprur’ tenen, moupra epra kalengamnemumdi, pio dinapu tupa kunerume. Tonda, kandi ne mali kupnenge tep nengeda, ‘Lyepra tapnedi, kaukepkune,’ men tenenerume. 15Nedi konum mali kupnyopda, ikin keca ne deiki yanerepa, doronkamna cadi, neda bicaue! Dinino, ne men mali kupnya peda, balila di giso erepra men diprepketene. Ange gum dinin, ‘Uo’ tenen, giso genedongonuna deiyoda, ikin keca weik ne deikipu yarepa doronedi, ali weik kunerura tepa.

16Dinino, ukutarada, ne konum mali kupnepa nong kupneryopda, kandi, ‘Angebo konum mali kunmar do?’ tenen, ware kuprap taru do yuma, kandi pio ne tep epra domembaramnerume. Ukupmantoda, bura tara ila yu kuramre pus, er si singadi, kware gum dipapu, ‘Ware keca popra jepkun’ tenen, mali kange deipra domembaramre utopu kunerume. Tonda, ukunemem dingeda, ‘Angebo tep, ikin keca er nong deiki deipkamne’ tenen, kan ila puto deiki di, mambul keca ne damai derinemumya deiki di wenepra ponerume.

17Allah kandi, ne balila ila mali kune keca yuma tep, ikin keca ton tapakra karepmempa, ne nong deiki yana kunerure. Tonda kandi ne tep, yu weikanun ton cap tapakra tenenememdi, ila wenemna keca pio weika di ton cap, ne deikipu derinerume. Ukupmantoda, kan dipapu jen talen neng tep, ‘Ton cap tapakra yarume,’ pepmemdi, dopra deipmempa, sunda ne damaipu yangedi, yana ponenunge.

18Uo ne nai Allah, ware keca deiyo tep kandi kaukeptapmumpa, nanindi neda atuai mutu deiamneu do? Telep ngeda, nesala yuma kapul men epmanei taru di, neda dadeamtene ja! 19Ange yumada ukuamtenya di, ne ukutaru kunetopu men kuramtenye. Tonda, nanin mundu douamneua pumbon dipapu, depra saktenepa, doprapnetengedi, tu palipra peirbenamnetenge. Ange kuramtu teptoda, telepepu tenepne. 20Atep uo, ne gam kunkamnada, go yambulanunpu, ton cap kunkamane. Ukunmanyanen, keteng tamun weikanun gam men kunkamne dinin, menmena dipu depkaman ja. Atep, go yambulanun akunkaman taruda, ‘Kandi ne pe yuk tapnetumpa kunedi, kange deipra telep dipapu kutene’ tenena tep moropkene.

21Sika di pio men kunkamane. Ada, nimi depmengedi, konum deami neng bena kunung mutu damaida, pio kunungnapu kururai, ne peda menmena benkaman ja. Amutu neitamai benyopda, konuma. Tamupra amutu men yankamne. Pio atep benkamne. Acada, mali mutu dimbulung pepkai, cadi pio kunungrure. Ada bicaue. Atep, ‘Amutu kapul men benkaman taruda, kandi kaukepra tenepnetumtoda, telepe pua,’ tenepne.

22Ange utopu, amutu neitamaida, dirin ton pio gume. Kunuknapu kupu mutu neitamai di, amutu neitamaida, balila kange doupra, podana cap, pangdana cap, mali-mali kuna cap mutu kurure. Dan cei do, amutu neitamai yumada dirine kururaida gum kunukmeteng pepkaipu benkamne.

Aupu yumada, Ayubdi pepu.