Job 11

Zopardi Ayub tep, pepu upu

1– 2Uda, Naama mutu ngebo, er sida Zopardi aupu pepu.

“Ayub kanda tali upuda pio weika di peruma cadi, nimidi kan pemem upu yuma tep, tali gekepmengedi, dim peprapu kunkameng do? Anengda sundi tamupra men penkamkeng do? Tek sisi ngeda, kandi upu weik peruma tep, nundi kan pemem upu tep, adipapu teka tenenkamep do? Gume, telep ngeda, nimidi, “Gume, erdi penmaser upu deiyoda, ake,” pepra peptengopda, kandi peserem upu teka teneptepe. Tali lupra teka men tenepketepe, pepne,” pepu. Upepudi, aupu ton dukdongopra pepu.

3Ayub, kandi tenememnyada, nun tep pesemem upu yuma tep nengeda, ‘Yuk nengdi men lap peptenga tep, tali dim peprappu kunkamenge,’ uteneserum do? Tonda, kandi pemem upuda, nong gum upu peruma tep, nyek-nyek peruma tep, nunda tali dim pepra gekenapu kunkamkep do? Nundi tamupra kan tep, upu ton pepkepyopda, kanda ali men dangkamrum do? Utenena gume.

4Ange deiyoda ake. Ayub kandi tenememdi, pesemem upu neitamaida, “Neda teka tali upu ton pio men penune. Tonda, mali kunange ton, pio men kunune. Atep nengeda, neda pio mali kuna gum, pio dumsisipu kununa cadi, Allah er dinerur taruda, ‘Angeboda pio teleppu kurure,’ tenenerure,” pepra peserume.

5Kan dipu utenerum dinino, Allah er pe dipapu kan tep ange utopu men tenekerure. Nun kangeda, ‘Uo, Allahdi kan damai yana upu pepketuopda, telepe pua,’ tenenupe. Nunda, angeda pio telepe tenepmepe. 6Tonda, Allahda, ila kael ngebo cadi, nimi men tenepmanto keca tenerure. Akeca-keca yuma, nong neitamainge yumada, er konum kael keamnga cadi, konum kaele kurure. Atep kan kange moupra kunkamrume. Allah er ila kael keamu ngeda, yala-yala yuma akapmara cadi, nun tuai nimidi ange yuma moupra men kael keptepe. Atep kandi ange moupra tenepkurume. Kandi mali kuramumnge yuma kunumna tep, ila ikin keca weik dororamtum dinin, Allahdi kan menenga tep, wenemna keca yambulanunpu kareprepa, ikin keca yakerepa dororume.

7Allah er pe kange dipru neitamai tenerur inimnange yumada, kandi ange tenepra kael keptum do? Gume. Tonda, Allahda, akeca-keca talepra, Ila Puto Weik Deiyo Ngebo kurura cadi, er ila puto sirik inimruraida, akapmar do, gum do? Allahdi men kupmanto keca akurur do, gum do? Erdi, ‘Ange kupkamne dinin, angeda men kupkamne,’ tenerur ngeda, kandi men epra kael keptume. 8Allah erda, pio ila puto ngebo kurura cadi, erdi kuptu kecada, kandi epra men kael keptume. Ada Allah er putoda, im alau tara gang-gang deiki tara, pio erepra kapu utopu kurura tep, nun tuai nesaladi ange men teneptepe. Tonda, Allah er kael kemrurdi, ila puto di pel dorurnge yumada, kandi moupra men kael keptume. Ange yumada nimi depmengedi, kwerepra wengbanung pumbonaida, pio kaurye weik, inimnapu kurura cadi, nundi men eptepe. Dinin, ange peda yambulanunpu kurure. Allah er kael kemna ngeda, pio amu neitamai utopunge, men nukmanto kurure. Atep, tek sisi kandi Allah tenerur ngeda, tek sisi men kael keptume.

9Allah er kael kepu ngeda, ukupmanto, tuai mutu yuma do, ila laut mokon yuma do, akunup mutu go weik kupu ngeda, mutu sirik di, ortara im sirik damai kunupeteptepedi, ‘Er lyomda ake’ tenen, kael keptepyopda, angeda yambulpu kuptu dinin, er kael kemna ngeda pio weike, men nukmanto kurure.

10Allahdi tuai mutu yuma yaredi, nimi yuma tomopra, er upu bongdinai dubesetudi, dipetepra wenemna keca nun deiki deipsetue. Allahdi, ‘Ukupkamsene,’ tenepsetuopda, wareto ngebodi Allah tep, “Ange kunada gume, ange men kuptume,” pepra, Allah tep wenepra upu sektu do? Gume angeda, pio men kupmanto kurure. 11Angeda tali men pepkene. Deiyoda ake. Ada, Allahdi mok upupu penung neng cap, mali-malipu kunung neng cap, telep keca pio men kunung neng capda, Allah er konum kael keamu. Ange tep nengeda, Allah erdi autopu neng cap, sundi mali kunung keca cap yumada, epre dingeda, ‘Aneng tep wenemkamne,’ men tenerur do? Gume, er dinai yumada pio men lumdongorure.

12Ukupmantonge ton pepkukene. Ada, ila kael kemna gum, walwalpu kuramtu ngeboda, ila kael kecada tek sisi pio men kael keptue. Atep, ukupmanto ton, bura sakamtu keledai ner bisamdi, er dipapu nimi mi deiptuopda, adeiki di teneptepe. Ato taru dipu, kael men kepmanto mali kuramtu ngebodi, ila inimna keca kael keptue. Dinino, keledai bisamdi, nimi mi pio men deipmanto cadi, utopu, pio walwalpu kure ngebodi, ila kael kemna keca, tek sisi men kael kepmanto kurure.

13Uo, Ayubo, kan kange dipru neitamai di tenememnge yumada, ‘Mali kuna pio gum, tek sisi dumsisi bisipu kunkamne,’ teneptum dingeda, Allah tep, ‘Telep keca karepnetu’ tenen, kan pe buru erepmemdi, Allah tep moronkamrume. 14Dinino nun kap Ayubo, kan kange dipru neitamai di tenemem ngeda, pio mali kuna cap, tenena cap tupa akapkeryopda, menmena di ange yuma tapkamrume! Tonda, kan kayapu neng cap, kan nyapsilip cap, kan tara neng cap, kan cap kikiman kunge nesala cap, sun kan-kan di, ton nengda, mali-mali keca tupa kunge nesala akapyopda, adipapu anesala wenepmumdi tapkurume. Tonda yuk neng tep mali kupra derinung nengda, kan cap tonpa tenpu ati kuna gume.

15Kandi ange yuma konum telep kupra kupmemyopda, kan urasin erepmemdi ali men dangkamreme. Ada kan dipru neitamai cap, kan damai capda, mali kun keca ton pio men kupkamkera cadi, ataruda kan pe buru erepra, Allah tep moronkamrume. Ataruda, kandi, ‘Uo, wareto ikin keca ne damai yakankamner do?’ tenen, kware pio men kunkamrume. Ataruda, kanda puto di tekra, tali lupra embanapu kunkamreme.

16Tonda, mali kunange yuma konum tapmemnyopda, ataru kan ikin keca doromemdi, kange mun kange doupra kukerurnge yumada, ton cap pio men tenenkamrume. Aikin keca yuma tenena gum di, lupronkamreme. Ukupmantoda, me onmarepa nimidi epmepe dinin, konum cepropmaredi, gelal sepyopda, ortaru ton kange di ton cap men tenenkamrume. Pio lumdongonapu kunkamrume.

17Tonda ataru neitamai peda, kan gam kunkamrem taruda, keteng komuni di, keteng er ila dirin kuramretopu, kan gam kuna peda, pio telep kupkerepa, kan deikida, pio dirin weik kunkamkere. Kan kange dipru neitamaida, yambul ikin keca tupa akaprepa, kunungnapu kukerenge yumada, ange peda, ila dirine utopu kupkamkere. Kange deiprapu kunkamreme. Ukupmantoda, ipmaredi kunukmaryanen, berekredi ipna keteng donokrepa, dirine weik kuramretopu, kupkamkere.

18Tonda ataruda, kanda dim pepra telepepu kumemdi, ‘Amenda taruda, telep kecapu ne damai yakankamnere. Ange ton, ange ton kupkamne ja,’ tenenapu kunkamrema cadi, tenimtonapu pio men kunkamrume. Allahdi melipkerepa, er amutarapu kunkamrema cadi, kware pio men kunkamrume. Ukumemdi, telep dipapu dakra mapkamreme.

19Ataruda, kan dim pepra mapmemnyopda, kan mar pena tep, yuk-yuk keca yuma tep, ton kwar pio men kupkamkere. Ukupmempanen, yuk neng yuma, yangedi, “Naio, melipseo!” pepra, kan damai yana moronkamkenge. Tonda, kan tep gispal donkamkenge.

20Dinino, sun mali kun kecapu talepra, tupa malipu kunung nesalada, sun deiki ikin keca yarya peda, sundi, ‘Uo, ware keca deiyo tep, aikin kecada, yanmaser do?’ tenen, moupra pio men kael keptenge. Atep sun anesalada, ware ngebodi meliptu do? Pio gume. Tonda, sun anesala ikin keca doropmengopda, ange tapra, pio men benmanto kunkamenge. Sun anengdi tenenkameng ngeda, ‘Uo, nunda isine tenpu ton welepsetupa, adininda adipapu menmena dadeptepe,’ tenenapu kunkamenge.