Job 13

Ayubdi er kayapu neng tep, pepu upu

1Ayubdi ton cap dukdongopra, er kayapu neng tep aupu pepu.

“Angeda teka, arup pepmasen nge yumada, ne pe asuru di konum dinune. Tonda, sundi pepmanerum upu yuma peda, konum gekenune. Tonda ange yumada, tek sisi ne kaele.” 2Sun konum kael keamrum keca yala-yala yumada, ne peda konum kael keamsi. Sundi ne tep, ‘Angeboda nun utopu men kurure. Nunda mambul weik dinin, erda mambul ngebo pio men kurure,’ tenenerum dinin, ne ila kael kepsi utopu, sunda men kurume. 3Dinino, ne ila putapner ngeda, ‘Allah damai peptene’ tenen, putapnere. Allahda, akeca-keca talepra, Ila Puto Weik Deiyo Ngebo kurura tep, ‘Er damaida, “Ne ikin kunerur ngeda, warya tep ne damai yanmaner do?” pepra, ne upu peptenye,’ tenenune.

4Dinino, sun ne damai yanmarum neng yumada, sundi yuk neng tep, mok upu perumupa, sundi tek sisi ngeda moupra men kael kemnunge. Ukupmanto, sunda, kwetena neng kunung dinin, pu jena nesala men kwetepra deriramenge. Pio walwalpu kununge. Sunda ange utopu kurume. 5Sunda, upu ton pena gum di, dim pepra kutum teptoda, sundi, konum ila kael neng utopu kutume. 6Ange tep nengeda, ukutaru nedi tenenun keca cap, pepkusen upu capda, moupra gekepkunerume. Ne putapner ngeda, sundi ne pepsene upu moupra kael kepkurume.

7Dinino, sundi, ‘Nunda Allahdi tenerur keca lap pepkukepe,’ tenedarumdi tali upupu pepkunerum do? Tonda, sundi, ‘Allah er pelpu donupe’ tenedanmarumdi, gemena deiki di mok upu pepkunerum do? 8Tonda, Allahdi ne tep, ‘Er wenemna tep, ukupkamne,’ tenerur ngeda, sun ton angepu tenepra pepkamrum do? Sunda, “Allahdi kan tep, ikin keca dopra, kan deiki derikerur ngeda, walito, teleppu kurure,” pepra, ne tep yanina upupu pepkamrum do? Allahdi, ‘Ukupkamne,’ tenepneutopu, er tarapu gopra kepkurumdi, pepkunerum do? 9Ukupmum pangeda, amenda taru, Allahdi sun tep, ‘Telep kunung do, mali kunung do?’ tenen, moupra epseredi, dipetepseryopda, teleppu kunkamrum do? Ila di wenepkamser do? Tonda, sundi tali neng tep, mok upu perumtopu, Allah tep mok upu peptum do? Sun mali kurum ngeda, iniptum do? Sun inimpetetuma peda, Allahdi epnapu kupkamsere.

10Uda, sun moupra tenepkurume. Sundi dim pepra, inimna di, ‘Nun kange deipmepe neng tep, telep upu pepra bokeipkamep dinin, nun kange men deipmepe neng tep, mali upupu pepra bokeipkamepe,’ tenepmum pangeda, Allahdi kange men deipkamsere. Ange gum dinin, yuk neng tep dipru wilipra mali upu pepmum pangeda, tek sisi Allahdi sun tep, ila di wenepkamsere. 11Atep nengeda, ‘Ukupserur’ tenen, Allah tep, kwar men kupserur do? Allahda, er ila puto weik ngebo kurura cadi, er yu kuprepa, sun deiki ikin keca deipserepa, epkamrum taruda, sun ila kwar men kupkamser do? ‘Allahdi ila kange mun keca karepserur’ tenen, er tep sunda lukdana, kware kupserepa, dipruai men moropsepkamser do?

12Sundi ne tep penerumu wenemna upu yumada, nong men kupkamre, tali upupu kurure. Ukupmantoda, gat co dinin, nimidi aco dopra uku dongopmengepa, uku di aco yuma konum jeproprepa, sikkepu tamamretopu, nong men kupkamre upu perume. Tonda, sundi ne tep, “Kan ikin kukernge yumada, deiyo ake, ake,” pepra penerum upuda, puto upu pio gume. Tali-talipu penerume. Ukupmantoda, jen talena nengdi, ‘Yuk nengdi mar dopsengepa, bepra popserur’ tenen, kerah tu dopra, sun nong lelimna keca, er sida perisai, keteneptenge dinin, mar tenpunge pe akeca popyopda, adipapu paupra sangkamre. Akecada puto pio gum tep, ‘Mar popserur’ tenen, akeca di sun nong men lelipdatenge. Talipu kuptue.

13Atep nengeda, sunda upu ton cap tapakra pena gume. Sunda, dim pepnapu kupkurume. Ne dipapu upu ton penkamne! Upu konum pepnyopda, ne wenemna tep, wareto keca yana ne deiki kupkamner do? Ne walwal dinin, ange tep, ‘Dakwapye’ tenen, kware gum di, men tenimtonkamne. 14Wareto ikin keca do yumada, ne damai yanerya peda, ‘Konuma angepu doronkamne’ tenen, konum ketenepsi. Ne pepkamne upu deiki di, Allahdi wenepra popnetua peda, telepe pua. Ne kangeda, ‘Ne dena peda, dadepkamne’ tenen, konum ketenepsi. Ne denada dakwapye. 15Sun cap, ne cap kikimanpu epkamepe. Nedi kunun kecada, lap peptenepa, Allah gekepneryopda, Allah er yu kuprepa, ne tep adipapu popkamner do, gum do? Ne walwale dinin, ne kangeda erdi popkamner gum daca. Atep nengeda, ‘Erdi lyepnetue,’ tupa men tenenun dinin, popnerya peda, ‘Ne tenepne kecada, er damai lap peptene’ tenen, putapnere. Allah er damai, “Neda mali men kunune,” pepra, lap penkamne.

16Ne kangeda, ‘Allah damai tektenedi, ne kune keca yuma lap peptenyopda, Allahdi ikin keca ne deiki deipneu ngeda, ka tamupra dopropredi, gum kupra deipkamre’ tenepne. Ukupnya deiki di, neda lyemdodankamne. Tonda, sun pio mali kunung nengda, ‘Allahdi peserur upu pio men gekenkamep’ tenen, balila deipra, Allah tep yaninunga cadi, er damai tek sisi men yankamenge.

Ayubdi Allah tep, pepu upu

17Uo, ne nai bo Allah, kandi, ‘Ne pepkuken upuda, moupra gekepnetume’ tenen, moropkene. Tonda nedi, kan damai, “Ange-ange kununa cadi, mali men kunune,” pepra, lap pepkuken upuda, kan amul di moupra gekepmemdi, dipetepnetume’ tenen, moropkene. 18Ne pepkamaken upu yumada, ‘Ange pepkun do, ange pepkun do?’ tenen, moupra tenemsidi konum keteneipsi. Ne kangeda, ‘Ange yuma lap pepnyopda, Allahdi kange deipneredi, ka tamupra telep kudinkamnere,’ tenenune. Mali ton men kununa tep, Allahdi gekepneredi, “Erda mali kurure,” pepra, ‘Men wenepkamnere,’ tenenune.

19Ne nai Allah, ware ngebodi, ne damai yatudi, “Konum mali kupmume,” pepra wenepnetu do? Tek sisi, mali kupsi teptoda, upu bongdina deiyo ngebodi, “Kanda mali ngebo,” pepnetuopda, akonuma. Ukupra tek sisi pepnetuopda, ne upu pena gum, dim pepra kunedi, dan taru depkamne do?’ tenen, kaleka dinapu kutene. 20– 21Dinino, nedi Allah kan tep, ‘Abutene karepnetum’ tenen, kan tep moropkene. Ukupnetumtoda, neda kan damai men inipkamne. Abutene ngeda ake. “Kandi, ne nong deiki ila ikin keca derinerum ngeda, tapkunerume,” pepra, moropkene. Tonda, ‘Kan ila puto di ne wenepnememdi, adeiki di lukdana, kwar kunerur ngeda, tapkunerume,” pepra, moropkene.

22Uda, kandi ikin weik kunerur keca konum gum kupra deipnemem dingeda, kandi ne tep, “Kanda mali kupmem ngeda, ake-ake,” pepra, menmena lap pepnemem pangeda, ataruda, nedi kan tep tamupra lap penkamakene. Agum dingeda, nedi kan tep, menmena lap pen upu pepne pangeda, kandi ne damai tamupra penkamnereme. Angeda kan kange ja. 23Dinino ne nai Allah, ne konum mali kupsi ngeda, kandi ne tep, “Mali kupmum ngeda, ake-ake. Mali ngeda adano!” pepra, lap pepkunerume. Tonda, ware kuprap mali keca kupsa deiki di, kandi ne tep yu tenepmanerem do? Kandi, ‘Ange kunkamrume, angeda pio men kunkamrume,’ pepra, deipsemum upu, yaniptapsidi, mali kupsi ngeda, ware kupra do? Kandi ne damai tep katawai lap pepnemempa, gekepkune naio. 24Uo, ne naio. Kanda ware keca deiyo tep, ne inimemdi, ne damai yana pio men melimnerum do? Tonda, ware keca deiyo tep, kandi ne tep, ‘Angeboda, song tenenerurdi, malipu kurura cadi, er tep ila di wenepra poptapkamne,’ tenenerum do?

25Ukupmantoda, co bo kolupmarya tep, ekmarepa, kumanya puto yaredi, pung peprepa, aco bo dakra dubaramrepa, kanda ware deiyo tep atali kolupu co bo tep, kware weik keca karenkamrem do? Angetopu, gandum du taikmengepa, bambam keca sakrepa, kumanya di pung peprepa, abambam keca dubaramrepa, ware keca deiyo tep, kandi atali bambam keca tep, ‘Tomopkun’ tenen, dombenkamrum do? Ange utopu, ne peda mambul pio gum ngebo dinin, ware keca deiyo tep, kandi tupa dombeneremdi, wenemnerum do? Tonda, ware keca deiyo tep, kandi ne damai kupnemempa, lukdana kware daknedi, ‘Uo yukai sepdara benedi iniptene’ tenen, kunun do?

26Angeda tali tep men pepkene. Deiyoda ake. Allah kandi ne tep, “Angebodi mali kurur ngeda, ake-ake,” pepra, minina upu weika di pepnerumdi, ukupmantoda, upu bongdina deiyo neng, sundi epra kael kemna tep, sekra karerume. Ukupnemempa, ‘Ikin kupredi, kange mun kange doupra kunkamre’ tenena ngeda, konum keteneiamnemume. Tonda, pumun taru, ne kaber taru mali kuramsi ngeda, ukutaru kandi ange tupa tenepmemdi, ne wenemna tep, menenga keca, ikin ngeda, karenerume. Angeda warya tep do naio?

27Ukupmantoda, kandi ne tomopra, wenemna ati pumbon konum dongopnemumdi, ne yanda gat tapu er si rantai di koupdongopnemuma cadi, ne men embenmanto kunune. Tonda, kandi ne tep, ‘Mali kupkamar do, gum do?’ tenen, ne kunun keca yuma cap, ne embanunai cap yumada, moupra dinerume. Tonda, ne yan yanipra embaramsai cap, ukutaru embanunai capda, mutu-mutu yumada, kandi epra, konum kael keamnemume. 28Neda, pu weik jenerya deiki di, pio ikin weik kununa cadi, bol mali kepbanune. Ukupmantoda, jen sirik dopra, bura tara donokmepyopda, lyuramretopu, ne peda pio puto bounpu kepbanune. Tonda, opkal deiptapmepepa, sinedi jerepa bon weik kuramretopu, ne peda, bol mali kepbanune.

Ayubdi Allah tep aupu yuma pepu.