Job 14

“Konum depmepe dingeda, ‘Akeca ton tamupra kuptene,’ tenen, men putaserure,” pepra, Ayubdi pepu upu

1Ayubdi, Allah tep pepra moropu upuda ake.

Nun nin yapudi, deipsenge taru di dipra dortaru peda, puto men kuserure. Tonda, go yambulanunpu kunmape taruda, kange ikin weik keca kunmaserepapu, menmena denupe. Keteng tamun pio weika di men kunupe. Tonda, gam kunup taru neitamai yumada, ikin kecapu yakaserure. 2Tonda, co kaite popmarya, ue tenpu kamsangamre utopu, nimi sambalada, keteng doprepa, kukuya yanyan peramreyane, keteng kopre taru dimperamre utopu, nun tuai nesalada, ange utopu kunupe. Ukupmanto ngeda, keteng deiprepa, kuki katuai kurepane, menmena di dimperamre utopu kunupe.

3Ne nai Allah ato nesala tep, moupra diserem do? Neda nimi sisi kununa cadi, ne nai Allah kandi ware keca deiyo tep, ‘Angebo tep wenepra upu bokeipkamne’ tenen, kan upu bongdinai dopra dubenetum do? Tonda, ware keca deiyo tep, kandi neto ngebo dopra, nimi upu bongdina damai dubena dipetepnetum do? 4Nimi mali kunung nengdi, telep kun keca ton kuptenge do? Angeda, tenpu ngebo peda ton men kuptenge. Mali kun keca neitamaida, ware ngebodi, telep lek keca doproptu do? Angeda men kupmanto.

5Ne nai Allah, kan dipapu nimi gam kunkameng taru pe, war pe ketenepra deriserume. Ange utopu tonda, ‘Tuai nesalada gam kunkameng taru ukupra kunkameng,’ teneramumtopu kununge. Ton men bisirure. 6Ukupmanto ngeda, sun isomka nengdi, yuk tali neng dopropmengedi, ikin pel dipmengepa, anengdi ikin pel donmanganen, siryada co bo doronunge. Atali pel don nengda, sun deiyo nengdi konum tenepi taru, pel donge taru neitamaida, ‘Dapel donkamenge’ tenen, apel don neng tep, moupra men dinunge. Pel dimna deiyo nengdi, sun amutara pel don neng tep, kaukemnapu kununge. Ange utopu, ne nai Allah, kandi ne tep, ‘Dakunkamre’ tenen, kaukeamnetum ja. ‘Ne damai kurpeten keca karena gum di, kaukeptapnemempa, tali kange doupra kunmanyane, amenda taru dadeptene’ tenen, moropkene naio.

7Tonda, ukupmanto ngeda, co kwemenga, gonga deiki di gapu bongopredi, teru kwangrure. Teru kwakredi, weike kurure. Dinino, nimi puda depmepyopda, akonum denupe. Kange di ton cap tamupra gam men kutepe. 8– 9Co kwepmengopda, yaten tu pumbon benamre ngeda, gelal serure. Tonda aco gongada, tu pumbon gelal sepkamre. Dinin, tuai benamre yaten, me bepre pangeda, kange di tamupra gapu pangrure. Ukupredi, ukupunge bongoramre utopu kupra bongorure.

10Dinino, nimi puda, depmepepa peipmengopda, ton cap tamupra men gam bungnunge. Tonda, nimi konum depmengopda, sun isin tupa men eremnunge. Ataru sun sambalada, dan mutu banung do? Nun men dinupe, tali dimpepra kununge. 11Ukupmantoda, keteng deipredi, laut mokon deiki donokrepa, bupu piripredi, er puto weleramretopu, nimida depmengopda, kange di tamupra gam men buktenge. Adipapu gum kununge. Ange utopu, ila dou mapredi, yambul me embaramya yuma, cedoramretopu, nimi depmepyopda, tu penupe. 12Nun nimi denupada, utopu kunupe. Ada depmepyopda, kange di tamupra gam men buktepe. Im tupa kapkamre taruda, konum depmenge nesala tep, yuk nengdi tamupra ton cap men dinkamenge. Im neitamai kure keca yuma gum kupyopda, deamenge nesala tamupra gam bukameng dinin, ange kapul men kupre taruda, pio mapra dimpenapu kunkamenge.

13Ange tep nengeda, nai kandi ne doupra, nimi depmengepa, tu paliramenge nesala, baramengai inipra deipnememnyopda, kan yu tenenememnye gum kupkerepa, kange di tamupra tenenkamnerume. Ukupra kan dipapu kalekra diramnemempane, kan yu gum kupkerepa, kandi tenepnemum taru konum kupre pangeda, kange di ton cap, ne tep tenenkamnerume. 14Naio, ne walwale. Nimi konum depmenge dingeda, sun tamupra gam buktenge do? Kandi tamupra gam bukeipkamserem do? Gam bukeipsetum teptoda, ange kael keptene dingeda, ne tupa-tupa ikin kunere taru neitamaida, ‘Amenda depnyopda, Allah tenepnere taru, kange di ton cap tamupra gam bukeipkamner’ tenen, pio tenenapu kutene.

15Atep, kandi ne upupnemem pangeda, ‘Ne akunune,’ pepkamne ja. Angeda, neda kan pedi ketekepra deiamnemuma cadi, kandi bicau tenepnememdi, ‘Erda ne cap tonpa kunkamneme’ tenen, putapkamker taruda, ne tep upupnemempa, tamupra gam bukra yatene. 16Ukupnememdi, ne embankamnai yumada, kandi kalekra melimkamnerume. Dinino, kandi ne mali kunenge tep nengeda, kaukepnememdi lyepropkamnerume. Ne mali kune keca yumada, nukmemdi, tupa men tenenkamnerume.

17Ange gum dinin, pumun taru mali kupyakaramsinge cap, ukutaru mali kune keca cap peda, kandi akeca kaukepra lyepropnememdi, amali keca yukai donokamreme. Ukupmanto ngeda, nimidi mali keca karong pumbon dongopmengedi, tu palipra singidongoramengtopu, ne mali kun keca tep nengeda, kaukepnememdi lyepropkamnetum ja.

18Tuai nesala yumadi, ‘Uo, ange kuptepe,’ tenen, pio kange deipra dinapu kunge keca yumada, kandi ange yuma, gum kupra derirserume. Ukupmantoda, ila mo cepredi, teno pakra baramretopu, tonda, mutu lokredi, gel lukra sangamrepa, amutu metek kupbaramretopu, tuai nesaladi, ‘Uo, ange kuptepe,’ tenenge ngeda, kandi gum kupra derirserume.

19Ange utopu, me tupa-tupa embaredi, gele paupra sangamyane, yambul kudiramrenge cap, ila mo cepre taru me oupredi, tu yuma dopra badoramre utopunge cap, nimidi, ‘Uo, ange kuptepe,’ tenenge ngeda, kandi gum kupra derirserume. 20Angeda, kandi nimi tep nun puto cap, nonge cap, pio gum kupra deipsemempa, kange di tamupra men gam buktenge. Tonda, nimi depkupe taru, nun urasin yuk kupra deipsememdi, ‘Sunda beso,’ pepsemempa, bankamepe.

21Nimi konum depmenge nengda, sun nyapu nepmengepa, nimidi si eremna neng kupmenga peda, men kaele keptenge. Ange utopu, sun nyapu tep, amutara pel don neng keiptengepa, yuk neng eptengedi, sun nai yapu deamtenge neng tep, men yan lap peptenge. ‘Nun nyapuda, amenda taru ila neng kunkameng do? Tali kankan kunge nesalapu kunkameng do?’ tenen, depmepyopda, ange yuma men kael keptepe.

22Nimi ton depkunge taruda, sun pe nong deiki ikin keca doropmengenge tepapu tenenunge. Tonda, sun pe ikin keca dopropmenge nge tepapu, tupa tenepmengedi, yuk neng tep, ton men tenenunge.