Job 15

Ayubdi pepu upu tep, nimi si Elifasdi, tamupra pepu upu

1 – 2 – 3 Uda, Teman mutu tara kuramu ngebo, er sida Elifasdi, Ayub tep tamupra pepu upuda ake.

Ayub kanda ila kael keami nengdi perameng upu utopu upu men perume. Ila kael nengdi, tali-tali upu pio men penung dinin, kandi peserum upuda pio nong gum upu, tali-talipu peserume. Ila kael nengdi, sun pe, ‘Mali kupnun’ tenen upu sengdana tep penung upuda, nong tek sisi kemrure. Tonda deiyo akurure. Dinino, kandi ange utopu men perume. Ukupmantoda, kumanya puto di tali pung peprepa, gum kupbaramretopu perume. Tonda, nun mutu neitamai dinin, keteng yakan tara di, pio bupu kumanya pung peprepa, akeca-keca yuma gelal semredi, gum kupbaramretopu, nong men kupkamre upupu peserume.

4 Ila kael keami nengdi, nong gum upu men penung dinin, kandi tali pertamrum upuda, yuk nengdi aupu teka tenen gekepkengopda, nimi tenpu ngebo peda ton, Allah tep pio kware men tenepkamenge. Tonda, Allahdi nun nimi tep, upu pepserepa, ‘Uo, angeda mambul cadi, deiyo dan do?’ tenen, moupra tenenapu kuramnup dinin, kandi peserem upu deiki di, moupra tenena ngeda, upu sengserume. Angeda mali pua.

5 Ayub kan mali kumemnya deiki di, kandi tali-tali upupu perume. Tonda, ‘Yuk neng tep, mali kudinkamep’ tenen, mawa di penge nengdi mok upu peramengtopu, kan peda ukutaru peserume. Ange tep nengeda, kandi autopu upu pememnya deiki di, mali kurum keca tep, singirtamrume. 6 Dinino, kan pe sipyal deiki di tali upu peruma cadi, kan pe dipapu, kan tepapu mali kudidarume. Ayub kanda, kan pedi kumem nge tep nengeda, nedi, “Kanda ukupra mali kurume,” pepra, tali upu deiki di men lulupra deipketene. Ange gum dinin, kan pe dipapu pememdi tamupdamem upu deiki di, “Malipu kunune,” pepra, upu bongdidarume. Kan pe yuk pemem upu di, mali kumem ngeda, konum katuai kupkere.

7 Ayub, kandi, ‘Neda ila mambul ngebo kunune,’ tenepdarum do? Ada, kandi, ‘Tuai mutu ban-ban neitamai yumada, yuk nesala kapul men deiami taru di, neda menmena konum deiamnei ngebo tenerum do? Tonda, ‘Allahdi atuai buku mutu-mutu buma yuma kapul men ketekeiamu taru di, neda menmena ketekeiamneua cadi, neda ila mambul ngebo kunune,’ tenedarum do?

8 Ayub kanda, im deiki di Allah cap, malaikat yuma cap, wekmaidi, ‘Ange-ange yumada, ukupkamepe, ukupkamepe,’ pepra, upu talepmai taruda, kan ton gekememdi, upu talerum do? Tonda, Ayub kandi, ‘Tuai mutu akunung neng kan-kan neitamai di, ila kael kemna ngeboda, ne tenpua,’ tenedarum do? 9 Ayub kandi akeca-keca yala-yala yuma kael kepmum kecada, nun peda ton, men kael kepmupu do? Tonda, kandi akeca-keca yuma tenepra kael kepmumdi, ‘Nong neitamai deiyo ngeda, ake,’ tenerum ngeda, nun peda tenepra men kael kepmupu do? Gume, ange yumada, nun peda konum kael kepmupu. 10 Ne kangeda, akael keamupu kecada, nun kunupa kan-kanda, konum men di nepra, wisi deiamidi, kul putong pamu neng ton akuramidi kael keami. Nun pe, sun peda utotopu tenenupe. Tonda Ayub, kan kapul taruda, kan nai bo sisapu men kuramu taru, sun akonum kuramidi kael keami. Atep, nun tenenuptopu, nun tara nengda, weik akunup dinin, kandi tenepmem ngeda, kan tenpua.

11 Allahdi nun deiki melimserepa, gekepmepedi, kan tep lap pepmepepa, kan damai ping-ping kupra derikerur ngeda, kanda ware keca deiyo tep, men dororum do? Allah er si deiki di kareserepa, dipru amutara kepra kupedi, nundi upu bouna di kan tep lap pekenup upuda, warya tep men dororum do? 12 Dinino, ware keca deiyo tep, ‘Deiyo dan do?’ tenena gum di, kanda moupra tenena gum di, adipapu yu kukerepa deremserum do? Kandi yu tenememya tep, asuru yapi bi kukeryada, warya tep do? 13 Ukupra tenemem dingeda, kan kange dipru neitamai di Allah tep yu kupkerepa, derememdi, er tep kandi mali upu perum do? Kan pe sipyal di pio mali upu pepra, Allah tep, bisbisa kapra, erdi perur upu yumada, yanidongonapu kurume. Ange yumada, warya tep do?

14 Kanda moupra tenepkurume. Kandi, ‘Neda, mali pio men kupsi. Dumsisi kuna ngebo kunune,’ tenepdarum dinino, angeda men kupmanto. Gume, nun tuai kunup nesala tenpu ngebo peda, mali men kunung do? Tonda Allah er damai yana, er si eremna tep nengeda, tali nengdi deiamsei nesala kunup nesaladi, er damai tali lupra yatepe do? Angetopu, tuai nerapudi deiamsei neng kunupa cadi, Allahdi, “Ange kunkamrume, angeda pio men kunkamrume,” pepra deiamseu upuda, mali kuna pio gum di, dumsisipu dombanup do? Gume, nundi men kuptepe. Atep, nun yumadi, “Nunda telep neng kunupe,” men pepmanto.

15 Ne kangeda ake. Ada, Allahdi amutara dinin, im deiki er pel dona neng, sun malaikat tep, ‘Sun yumada, pio dumsisipu, telep pelpu donunga,’ teka men tenerure. Tonda, im deiki kure keca yuma tep nengeda, Allahdi, ‘Ange yumada, tek sisi pio telep lengnapu kurura cadi, ne damai yakana telepe,’ men tenerure. 16 Malaikat peda, pio lengnapu men kununga tep, tek sisi nun nimi sisada, Allah erdi diserurada, ‘Sunda pio dumsisi telep nengpu kununge,’ men teneserure. Tonda, men kunupe. Mali kuna nengpu kunupe. Deiyoda, nun nimida, mali kuna nesala kunupe. Tonda, nun nimi mali kunup ngeda, ukupmantoda, tali me gwepra jerameptopu, mali kuna keca cap, tenena capda, adipapu tali lupra kunupe. Kan peda utopu kuruma tep pepkene.

17 Ange tep nengeda, Ayub kanda moupra gekenkunerume. Gekenemempa, ne Elifasdi kan kumempa, konum kael kepkesi kecada, nukra deipkukene. Nedi ange yuma lap pepra benbenepkenepa, kanda adipapu moupra gekenkunerume. 18 Ada ne dipapu men tenepsi. Ange gum dinin, nun co puna nengdi, ila kael keami neng, nun tep pepra deiamseipa, sun anengdi, ne nai yapu sisa cap, ne Elifas cap, damai pepra deipneipa, gekepsi upuda, kan Ayub damai tep pepkukene. Tonda nun co puna nengdi aupu men inimami. Nun co puna nengdi deiamipa, dukdongopra nun apu yapu ton dadeiamipa, deipdanen yakarami nesala yuma cap, nun ataru kunup neng cap tep lap pepra peiamsei ngeda, kan tep lap pepra deipkukene.

19 Menop taruda, Allahdi amutu dopra nun apu yapu tep karepka cadi, sundi amutu talerami. Amutu neitamaida, yuk nimi bo neng ton yana, sun cap kikiman pio men kuramya tep, sun nimi bo nengdi mali kurami ngeda, nun apu yapudi epra men kael keami. Atep, sun nimi bo neng, Allah teka men tenerami nengdi, nun apu yapu tep, mok upu pepnedi, Allah damai di, nun apu yapu neng doupra, yuk bisi lerekra men dubaramya tep, Allah men yanitamami.

Elifasdi, sun mali kunge nesala tep, pepu upu

20 Angeda ne konum kael keamsi. Sun mali kun kecapu talepra kunge nesalada, ila kange mun kecapu dopra, yuk neng deiki derinunge. Dinino, sun gam kunge taru yumada, ‘Uo, amenda taru ware kupkamser do?’ tenen, tenimtonapu kungedi, kware weik kununge. Sundi, yuk neng tep, bicau tenena pio gum di, sun nong deiki telep keca ton men derinunge. Ato nesalada, sun gam kunung taruda, ‘Uo, ware kuptene do?’ tenen, kange bongtonapu kununge. 21 Mali kecapu kunge nesalada, sun kange dipru neitamaida, pio ila kware weik kurur lelim weik perepa, sun amul deiki di gekepmenge dingeda, ila kwar dangnunge. Sun ato kunge nesalada, ‘Uda, isomka konum kunmapa cadi, tali dim pepra mankau kunmapa’ tenen, kunmange taru dipapu, sun pona tep neng yangedi, yana popra sikke buktapkamenge.

22 Sun amali kunge nesalada, ‘Uo, nun kunungna neitamai di kunupa cadi, nun tep lyepra dopropkamser ngeboda, pio men yankamre. Acapu pio kunkampepe’ tenen, pio tenengedi kware kununge. Tonda, Allahdi, ‘Sun mali kunge nesala, sun menenga tep nengeda, yu nengdi yana popkameng’ tenen, ‘Go karepnepa, tek sisi aneng tep poryakankamenge,’ teneserure, tenenunge. Tonda, ‘Uo, Allahdi nun tep, ange konum ketenepra deipseua cadi, tek sisi ukupkamsere,’ tenengedi, kange mun kununge.

23 Tonda, sun amali kunge nesalada, ‘Uo, nun depkamep taruda ware taru do?’ tenenunge. Tonda, ‘Uo, yu nengdi parang ya di popsengepa, depmepyopda, tali bura im alau tara lakra embaramre madi konum ketenepra diserura cadi, popsenge pangeda, nun gemnada, amadi jepkamser’ tenen, kware weik kununge. Konum ketenepra dinunge. Teka amali kunge nesalada, ‘Uo, tek sisi pio kunungna taru kupkamsere. Ada, ila kange mun keca nun deiki yana kupseryopda, ikin weik kunkamep ja!’ tenenapu kununge. 24 Ange tep nengeda, ukupmantoda, ila nimi deiyo ngebo, er cap, er jen talena neng cap, puto weik kungedi, yuk mutu nesala tep, ‘Anesalada, popra gawal dakamep’ tenen, ketenepmengedi, yuk mutu neng damai yanopda, amutu nengdi, pio kange mun kange doupra lukdana kware weik kungetopu, sun mali-malipu kunge nesala peda, utopu tenenunge. Ada, ‘Uo, tek sisi amenda taruda, ila kange mun keca nun deiki yankamser ja!’ tenen, ila kware weik kununge.

25 – 26 Uda, ange yumada, tali tep gume. Deiyoda ake. Sun mali kecapu talepra kunge nesaladi, Allahdi, ‘Ange kunkamrume, angeda pio men kunkamrume,’ pepra, deipseu upuda, yanitamnapu kungedi, ‘Allahda nun dabale,’ tenenunga cadi, Allahdi anesala tep ila di wenepkamre.

Anesalada, sun kware tenena gum, balila kungedi, Allah Yahwehda, akeca-keca talepra, Ila Puto Weik Deiyo Ngebo kurura tep, ‘Bisbisa kamepedi, er tapra, nun yukpu kunkamepe’ tenen, Allah yaninapu kununge. Ukupmantoda, jen talena ngebodi, er nong lelimna keca, er sida perisai, pio gatnge talepnedi, ne pona tep neng, puto weik kuptenga peda, nedi anesala adipapu poptaptene,’ tenerurtopu, pio walwalpu kununge.

27 Amali kunge nengda, pel dona gum di, isomka kupra jen keca weik jengedi, sun urasin cap, nong capda galemna weik kununge. 28 Ukupra kungedi, sun amali kunge nesalada, ila ati arum mutu neitamai kununge. Dinino, akati arumda, men taru Allahdi amutu neng wenemna tep, konum wipdongopupa, yu neng yana, amutu nesala konum popra sikke buktamipa, walangyopu kupka cadi, telep nesala yumada, akati arum neitamai men kuptenge. Dinino, sun amali kunge nesalada, acapu tupa kununge. Allahdi tenemutopu, amenda taruda, akati-akati yumada, uruptapmengedi yawa poptapkamenge.

29 Sun anengda, bung keca weik talengedi, tupa isomka neng men kunkamenge. Sun talepra kurur bung keca yala-yala yumada, adipapu gum kupropkamre. Ukuprepa acei dila ton pio men kupkamre. Aneng cap, sun nong kuki peda, tuai mutu neitamai pio gum kupkamre. Dim pepnapu kupkamenge.

30 Tek sisa, sun amali kunge neng yuma tep nengeda, depkamenge. Depmengopda, konum deami nesala kunungaida, kunukmeteng pepkai di gopdaro pio yukai men benmanto kunkamenge. Tonda, ukupmanto, ila uku jeramredi, co cap, aco yaten capda, uku di pio jeproprepa, gum kuramretopu, aneng cap, sundi deiami nyapu cap, sun nyapsilip yuma capda, uku bu di jepra gawal dakropkamre. Ada, Allahdi sun wenemna tep, er si puto di, sun anesala yumada, gum kupra deipkamre.

31 Sun amali kunge nesalada, ‘Nunda ila isomka kupmepedi, ila deiyo-deiyo neng kunkamepe’ tenen, mok upu pena cap, inipra mali kuna cap deiki di kurami dinin, ange yumada, tek sisi nonge pio men kupkamrenge tepapu, teka tenerami. Atep nengeda, amenda taruda, sun menenga keca dopropkameng nge peda, nong pio men kupkamrengepu dopropkamenge.

32 Sun anesalada, dena taru kapul men yanmarepapu, sunda menmena adipapu depkamenge. Ukupmantoda, co teru beleka bere dinin, bo men douramretopu kupkamre. Kange di ton cap, embek men kupkamre. Angetopu, anesala peda, kange di ton cap, gam men kupkamenge. 33 Ukupmantonge ton, sun amali kunge nengda, anggur co du mouamyanen, kapul men wisipmare dipapu, kapra sangamretopu kupkamenge. Tonda, Zaitun co er kait pomyanen, du men kupmare dipapu, kapra sangamretopu kupkamenge. Sun cap, sun nyapsilip yuma capda, pio gum kupkamenge.

34 Teka, sun mali kun kecapu talepra kunung nesalada, Allah tep, ‘Nun dabale. Erdi perur upu yumada, pio men gekenkamepe,’ tenenge neng cap, tonda sun tara kepropkameng neng capda, sundi nyapu ton men deipbankamenge. Tonda, sun tara kepropkameng nengdi, nyape ton cap, pio men deipdanen benkamenge. Ukupmengopda, sun aneng konum ati dopra kuramengai yumada, uku di jepra gawal dakamre.

Deiyoda, sun anengdi sun yuk neng tep, “Bul co bo weika di karepsemumpa, nun tenenup kecapu kupkamepe,” pepra, balila deipra, mororamipa karerami co bo di domi ati yumada, uku di jepropkamre ja. Ange yumada Allah ja! 35 Ukupmantoda, nerapudi mundu doamengepanen, siryada nyape deriramengtopu, sun amali kuna nengdi, sun kange dipru neitamai di, ‘Nunda mali kunangepu kunkamepe,’ tenengedi, mali kecapu kununge. Sun kange dipru neitamaida, mali kunangepu tenenunga cadi, mali kun kecapu kununge.