Job 16

Ayubdi Elipas cap, er kayapu neng butene cap tep, tamupra pepu upu

1– 2Ayubdi Elias tep, tamupra pepu.

“Sundi pio tali-tali upu, ne tep tupa penerumnge yumada, men di konum gekenune. Ada, Elifas kandi apepmanerem utopu upuda, sun weneri yumadi penerum ngeda, men di konum gekeramsi. Ange tep nengeda, sundi ne tep, kange telep kudina upu cap, dipru kwadina upu capda, pio men penerume. Sunda kange mali kudina upupu penerume.”

3“Sundi ne tep tali minina upu penerum ngeda, dan taru di tapkamrum do? Ukupmantoda, kumanya puto di pung peramretopu, tali upu weika di tupa penerume. Tonda, sundi ware kunange deiyo tep, tenepmemdi, ne damai yana, tamna gum di, tupa pepra derinerum do? 4Tek sisinge sunda, ne ikin kunetopu kuramtumto teptoda, ne peda sun tep, sundi penemumnya upu pepsetene. Tonda, neda sun utopu kuramtene teptoda, ne peda sun tep, wenemna upu pemumnya utopu pepsetene. Tonda, nedi ‘Walito ikin kunmange’ tenen, tek sisi ne giso gadung-gadung peptenedi, nedi wenemna upu weika di sun damai pepra deipsetenye.”

5“Dinino, sunda ne ikin kunetopu kuramtum teptoda, ne upu pena deiki di sun dipru kange yumada, telep kupra puto kepra deipsetenye. Tonda, bicau tenepsetenedi, ne upu pena deiki di, sun tep, dipru kwadipsetenya deiki di, ping-ping kepra deipsetenepa, sun kange mun ngeda, gum kuptue. 6Dinino, ukutaruda, ne upu peptenya peda, adeiki di, ne ikin kunerur ngeda, pio men gum kunerure. Tonda, ne upu pena gum di, dim peprapu kutenya peda, utopu ne ikin kunerur ngeda, pio men gum kunerure. Ne upu pena pe, upu pena gum peda, nong ton men kupnetue. Tupa ikinpu kunerure.”

7“Dinino ataruda, Allah erdi ne deiki ikin keca weika di konum deipneupa, ne nongda pio boun kupneupa, pio men kupmanto kunune. Angepu gum dinin, Allahdi ne nyapsilip yumada, konum popra gum kupra deipneue. 8Tonda, Allah erdi ne tep wenepra ila ikin keca karepneua deiki di, ukupmantoda ateng koupdongopneudi, ikin keca weik, ne deiki konum deipneue. Ukupneua deiki di, ataru ne nong yumada, bol mali doupsidi, ne nong bol yuma pio mali kupra, konum gelal sepneu. Ne nong bol mali kwamneupa, ne yo yumada, katuaipu kunerura cadi, yuk nesala yumadi ange konum epra kael kepnei dingeda, ‘E, tek sisi Ayubda mali kuramnga tep, bol malipu dounmar adano,’ tenenenunge.

9Ukupmantoda, bura tara kuramre yu pusdi, yuk gam keca popredi, ‘Jepkun’ tenen, si kerepra, akeca nong bol deiki si torepa, dila doredi gwelememerur utopu, Allah er yu di ne tep ila ikin keca derinerure. Tonda, Allahdi ne tep, ‘Angebo popkun’ tenen, ne tep yu di erepra dinerure.” 10“Pio ikin weik kununa cadi, yuk nesala yumada epnengedi, ‘Uo, er ikin kurur ngeda, ila mambule’ tenen, lukdangedi, ne tep malya daepra, sun sipyal bon weika di paktapra autunengedi, mali upu pio weika di penenunge. Tonda, sundi ne tep, ‘Erda mali weik kuramnga cadi, walito kange mun kange dounmare,’ tenenengedi, nimi weik bulupmengedi, ne dana-dana tara ongopgenepnengedi, sun buru getepra ponengedi, ne katum dana-dana tara yumada, bongopra tamnenunge.”

11“Ukupra mali upu pepra, ponenunga cadi, ne kangeda, Allah erdi ne dopra, sun pio mali kunung neng deikipu dopra konum deipneue. Tonda, Allahdi ne dopra, pio balila deipra mali kunung neng, sun damai dokotepneudi tapneue.

12Amenyan kunmasi taruda, ne pio telep deiki di, tali dim pepra kuramsidi, pio teleppu kuramsi dinino, ne tenena gum, mankau kange doupra kunmasipapu, Allah erdi ne tep, dato-dato di yana poryaneu. Ukupmantoda, Allah er buru di ne kum damai, puto di talepdongopra, tu deiki siptapneupa, ne nong cap, yo capda coptapneue. Ukupmanto ton, Allah erdi ne dopra katuai deipneudi, sun jen talen neng tep, ‘Sun mar dona kael kemna tep, angebo er nong deiki dopetepkurume,’ pepmanto kupneu. 13Allahdi ne tep, bicau tenena pio gum di, er yu deiki di, pio ikin keca ne deiki deipneue. Ukupmanto ngeda, Allahdi go kareprepa, pio yu nengdi, sun mar di ne deiki dopneidi marapneipa, ne deiplyuda, katuai belepneudi, ange cap, ne yapi capda, tu deiki sakneue. Ukupneua peda, Allahdi ange epu dinin, ne tep bicau pio men tenepneue.”

14“Tonda, ukupmantoda, Allahdi ne damai tupa-tupa poryakanerepa, susu dilapu kunerure. Ada, mar podana ila kael nengdi, pio tupa-tupa pe deipra, poryakarameng utopu, Allahdi kange di ton cap, ne damai yana, pio tupa-tupa ikin weik keca ne deiki derinerure. 15Allahdi ne yana, pio poryakanapu kunerya tep nengeda, nedi, ‘Uo’ tenen, pio mali kange doupnedi, ‘Yuk nengdi, ne ikin kunerurnge kael kepkamneng’ tenen, petenkemna tep, mali opkal er si karung goni opkal wipra keneknedi, sikke but deikipu bura tara bungnune. Neda puto bounpu konum kunune. 16Neda pio engenapu kunepa, ne asoda yapi bi kweingnerure. Tonda, ne asuru bambolda, sukupra nenapu kunerure.”

17“Ange yumada, ikin pio weik ukunerur dinino, nedi pio balila deipra, yuk neng tep, puto di men ponune. Tonda, mali kun keca ton, pio men kunune. Ange gum dinin, ne dipru amutara kepra kunedi, mali kunange inimna gum dipapu, telep upu deiki di, Allah tepapu, katuai di moronune.

18Uo, ne menmena di depkamna tep, atuai mutu neitamaida, ne yapi embenkamnernge tep nengeda, inimtamna gume. ‘Ne ikin weik kunerurnge cap, depkamna capda, katuai kuptupa, nimi yumadi kael keptenge’ tenen, putapnere. Neda, kange mun kange doupra, ‘Ikin weik kununa cadi, Allaho yana melipra lyepneo,’ pepra, ngolongnedi morokenun ngeda, kandi dim pertamnada, pio gume. ‘Ange yumada moupra gekepnetum’ tenena tep, morokenune.”

19“Ne kangeda ake. Ataru peda, ne upu penepa, gekepra kael kemnerur deiyo ngeboda, im deiki tara akurure. Atep erdi ne tep epra kael kepneredi, ne melimna tep nengeda, ‘Ayub erda pio mali men kurure,’ pepra, katuai di lap penkamre.”

20“Ataruda, ne kayapu neng sisadi, ne tep, ‘Gume er Ayubda tek sisi mali weik kuramnga tep, Allahdi wenemrure. Angeda walito ikin weik kurure’ tenen, yap-yap pepra autunengedi, nalemnenunge. Ukunengepa, ne aso erepra deipnedi, Allah tep, ‘Melipneo’, pepra, engena deiki di, ne asi me weik sangnerurdi, Allah tep pio moronune. 21Ukupmantoda, nimi tenpu ngebo ton, er kabo tep, kwa dipdana, upu sisikra wilimderiramengtopu kupra, ‘Allahdi ne tep, upu melipra sisikamnetue’ tenen, putanerure. Ange utopu, im deiki ngebodi, ne melimna tep, ataru dipapu Allah er damaipu bena, ne mali men kuramsinge lap peptupa, ‘Allah er dipapu ne tep, telep upu bokra deipnetudi, kange di ton cap telep kweipnetue’ tenen, putapnere.”

22“Angeda tali tep men pepne. Deiyoda ake. Ne kangeda, tupa gam kunkamna tep keteng tamun go yumada, go pio weika di ton cap men kupmanera cadi, apio men kunkamane. Keteng tamun yambulanun ton gam kunmanyanen, amenda taru neitamaida, adipapu depnyopda, bendopkamane. Ukupne dingeda, kange di ton cap tamupra, atuai mutu neitamai pio men yankamne.”

Ayubdi aupu yumada, er kayapu neng, sun weneri neng tep pepu.