Job 17

Ayubdi er ikin kururnge tep, dukdongopra pepu upu

1 Ayubdi er kayapu neng weneri neng tep pepu.

Nedi kange neitamai di tenenun ngeda, pepkusene. Ne kangeda, ne depkamne taruda, konum damai kupnere. Ada, ne isin karepneunge duluknedi, dangdona taruda, konum damai kupmanere. Ukutaru yambul tupa akwapner ngeda kunkamne dinin, ne depnepa peipkamnengaida, konum keteneipmanenge. 2 Tonda, ne dana-dana tara yumada, sun yuk nengdi ne tep mali upu weik penenunge. Ada, “Erda mali kurur ngebo cadi, walito ikin weik kurure,” pepra, nalemnengedi, autunenunge. Sundi ne tep, ‘Ukurur ngebo,’ pepra, luludinenung ngeda, ‘Ware upu ton tapakra penkamneng do?’ tenen, konum nedi epra, moupra gekenune. 3 Uo ne nai Allah, ware ngebodi ne melimna tep, ne damai yana telep upu pepkamre do? Ne kayapu neng kan-kan neitamaida, ne tep melimna upu pepmanto nengda, pio men kununge. Atep, naio, kan dipapu ne tep, “Tek perura, dumsisipu kurure,’ tenepnetumdi, peptumtoda, ne kange deiptene. Uo, ne melimna tep upu yuma tep nengeda, ware ngebo deiki di telep upu pepra deipnetu do? Ne kangeda, ne kayapu neitamai di tenpunge peda men kurure.

4 Naio, ne kangeda, kandi ne kayapu neng, sun kange tenenange yumada, walwal utopu kepdongopmempa, ukutaru moupra men tenenkamenge. Ukununga cadi, ataruda sundi ne tep, ‘Mali kurur ngebo,’ pepra, luludinkamnenung dinin, siryada, men bisbisa kapkamnenge.

5 Ware neng do yuma, sun kabo sisa tep dinin, yuk neng damai bena, ‘Ne kap tep, mok upu peptenedi, bul kemna co bo karepnetumpa, doproptenedi weik kupnetu’ tenen, upepra mororur ngeboda, amenda taru erdi deiamre nyapuda, ikin weik kunkamenge. Ukupmantoda, ton ila kael nengdi, penung ngeda ake. “Ato ngebo er pe deiamre nyapuda, sun nai bo mali weik kuramunge tep, amenda taru anyapuda ikin weik kunkamenge,” penunge.

6 Ukutaruda, nimi yumadi yuk neng gekengai bena, ne tep, mali upu penenunge. Sundi, “Moupra tenepkurume, gum dingeda, Ayub pio kange mun kange doupra kuramretopu kupkerura tepa,” pepra, nalemnengedi, autunenunge. Aupu utopu penenunge. Tonda, sun anesala yumada, ne damai yangedi, ne aso deiki ul tulupra derinenunge. 7 Ukunenunga tep, ne kange mun kunerepa, ikin kange doupra kunedi, engenuna deiki di, ne asuruda pupneue. Tonda, ne nong bol yumada, bol malipu doupsa tep, ne nongda kuki utopu kunerure.

8 Sun dumsisipu teleppu kunung nengdi, ne ikin kunerurnge epnengopda, ‘Uo, erda mali men kuramu dinino, angeda warya tep do?’ tenen, kwar kuprepa, lukdangedi lolomnapu kunenunge. Tonda, sun mali kuna gum, tek sisi dumsisipu kunung nengdi, ne tep tenepnengedi, sun malipu kunge nesala, Allah tep, ‘Nun dabale,’ tenenge neng tep, mali kange doupra deremnapu kununge. 9 Mali nengdi mali kunangepu kununga peda, ware neng do yuma, tek sisi dumsisi kupra teleppu kunge nesalada, telep banung bisi men tamnunge. Pio pe deipra, tupa teleppu kununge. Angetopu, ware ngebo do yuma, er mali men kurur ngeboda, er puto cap, nong cap, kange tenenange capda, ton cap tapakra puto kupbankamre ja! 10 Dinino sun yumada, ne damai yanmarumdi, wenemna upu weik penmanerum nengda, sun kan-kan neitamaida, nedi dipetepsetene dinin, ne kaele, ila kael ngebo, tenpu ngebo peda ton, pio men epsetene. Sunda walwal nengpu kuruma tepa.

11 Ne gam tupa kukamne taru yumada, konum gum kupropnen yakanerure. Tonda, nedi, ‘Ukupkamne,’ tenemsinge yumada, tapyakanapu kununa cadi, ange yumada tek sisi nong men kupkamre. Tonda, ne kange dipru neitamai di, ‘Uo, angeda ukupkamne, ukupkamne’ tenen, pio putapneupa, adipapu tupa tenenun nge yumada, gum kupra wangamdonapu kurure. 12 Dinino ne kayapu weneri neng, sun yumadi ne tep upenenunge, “Lukunda men kunkurume. Kununga neitamaipu men kurume. Ataruda, keteng komuni utopu konum kukerure. Tonda, dirinda, konum kan damai yanmanto kurure,” penenunge. Upenung dinin, ne kaele. ‘Ne damaida, tupa pio kunuknapu kupkamre’ tenen, ne kange neitamai di konum kael kepsi.

13 Nedi ataru teneptene ngeda, ake. Ada, nedi, ‘Kunungna damaipu depnedi, konum deami neng kunungai, er sida Sheol mutu dabena pio kunkamne ja,’ teneptene. Tonda, ‘Konum depnyopda, kunungna taru bena kunkamne mutu neitamaida, acapu bena kunungnaipu pio kunkamne,’ teneptene. 14 Ange utopu, ne nong depnepa, bena peipkamnengai tep, si peptene ngeda, “Ne nai bo utopu, amutu kunerure,” peptene. Tonda, ne nong peipnengepa, ne nong yuma jepkamneng kwali yuma tep, si peptene ngeda,”Nanin utopu, tonda ne ka nerapu utopu kurume,” peptene. 15 Dinino, apepmasen upu yuma, tek sisi konum tenepnedi peptenyopda, nedi, ‘Angeda ukupkamne ja,’ tenen, ila di putapner ngeda, dan cei kurur do? Aupu konum pepnyopda, neda pio kange deipra, pingpinga di, ‘Ukupkamne,’ tenemsidi, putaramneu ngeda, ware ngebodi akeca yuma dinkamre do? Gume, men kupmanto pepne. 16 Ukupmanto, neda konum depnyopda, sun men di konum deami neng wengbanung kunungai konum kwererbenyopda, akonuma tenepne. Ne gam tupa kune taruda, ‘Nedi ukunkamne ja,’ tenepra putapnerepa, tenenun kange yumada, pio ton men doupkamne. Konum deami nesala banungai, er sida Sheol mutu neitamaida, konum bena kunyopda, akonuma, ‘Ne tenemsi keca yuma cap, ne capda, pio gum kupkamre,’ tenenune.

Ayubdi aupu yuma pepupa, er kayapu neng weneri gekepi.