Job 18

Nimi si Bildaddi Ayub tep, pepu upu

1 – 2 Uda, Suah mutu ngebo, er si Bildaddi tamupra Ayub tep pepu.

Ayubo, ware kuprap taru ton, kandi, ‘Ware upu ton tapakra peptene do?’ tenen, tupa penapu kunkamrume do? Dan taru di kan upuda pepra, gawal dakamrem do? Ataruda, menmena kanda, ‘Tek sisi ngeda, dan do?’ tenen, pio moupra tenepetepkurume. Tonda, dim peprapu kumemdi, nun pepkukep upuda, kandi moupra gekepkuserume.

3 Kandi nun tep, lup neng teneserum do? ‘Sunda pio walwal nengpu kununge,’ teneserum do? Tonda, kandi nun tep, ‘Sunda tali sapi bisam bura tarada gam kuramre keca utopu, walwal nengpu kununge,’ teneserum do? 4 Kan yu kupkerepa, wenemna kange tenemem ngeda, kan pe deikipu yakerepa, ikin keca dororumpa, pu jekerure. Kanda wareto keca teneruma tep, ukurum do? Kandi, ‘Nedi yu deiki di mali upu pepnyopda, tuai mutu neitamai yumada, long-long pepkamre,’ tenerumdi peserum do? Tonda, kandi kumemnge tep, amutu neitamai yuma, ila mutu dup cap, mutu bungna gel cap yumada, gopra yakai betu do? Gume, angeda men kupmanto.

5 Kandi arup taru, ange-ange weika di penmarum dinin, tek sisi ngeda, ake. Ada, mali kunung nengda, menmena dipapu depkameng ja! Ukupmantoda, nimidi weica upuna buda, tek sisi menmena taproptengetopu, mali kecapu kunge nesala peda, menmena dipapu depropkamenge. Tonda, weica konum tapropmengepa mali kupyopda, uku bu ton cap sektereptenga peda, uku ton cap bu men jenkamrure. Ange utopu, sun mali kunge nesala konum depmengopda, kange di ton cap, gam pio men kunkamenge. 6 Sun ati pumbon neitamai di, dirine kunkamre ngeda, taproprepa, adirinda, ton cap men kunkamre. Upna upra ati pumbon dela deiki derinung ngeda, ton cap men deipmengepa, adirinda, gum kupkamre. 7 Sun mali kunge nesaladi, balila deipra, ‘Ukunkamepe,’ tenengedi, puto di bisi deiki di telep kupra embanunge. Dinin, amenda taruda, sun puto bounpu kupmengopda, yan giso dungamretopu kupra, sika dipu bankamenge. Anengda, inipmengedi, ‘Mali kupkamep ngeda, ake-ake,’ tenen, upu talenung nge yumada, ka tamupra sun pe nong deiki yaryopda, yawa poprepa, gum kupkamenge. Pio amutarapu kunkamenge.

8 Ukupmantoda, tenpu ngebo, embankamre nge deikida, mangkau kange dopmarepapu, pena pumbon, er sida jaring, akeca neitamai wekamre. Ukuprepa, angebo er yanda ajaring di gwareptapredi youpkamre. Angetopu, ‘Abisipu benkamepe,’ tenepmengedi, bisi bandenkap, mangkau kange dopmarepapu, yu nengdi, ‘Nimi popkup’ tenen, ila tu pumbon paliraminge pumbon sangkamenge. 9 Ukuprepa, aneng sun gum-gumda apena pumbon neitamai dongoprepa youpkamre. Ukuprepa ateng kouptapkamre. Sunda, men benmanto kupkamenge. Ange yumada, sun mali kununga dia! 10 Tonda, yu nengdi, ‘Sun youna tep pena tapuda, sun yanipra benkameng’ tenen, tuai inipra konum deipye. Atep, aneng sunda atapu pumbon neitamai benkameng bisiaida, pena konum pepra deipi.

11 Atep nengeda, sun mali kunangepu talepra kunung neng, sun dana-dana tara yumada, kwar kun kecapu kurepa, sun kange neitamai kwar dangrure. Tonda, anengdi, ‘Nun embenkup,’ tenepmengedi embanungai yumada, kwar kecapu kurura cadi, embangepa, sun amnyo tara, kwar keca di meneng damai dombarure. 12 Pumun taru, sun anengda, sun gam kunada, ila puto di kurami dinin, ukutaruda, puto bouna dipapu kununge. Aneng embanungai, dan mutu do yumada, ikin kecapu yarepa, sun tep popmanto kurure. Puto di men embangedi, yan giso dukmengopda, kange mun keca di, aneng yawa popyopda, gum kupkamenge. 13 Tonda, aneng sun bol yumada, ila kange mun pu jereya deiki di jedorure. Ange utopu, aneng sun nong cap, sun buru cap, sun yan cap yumada, lyuredi yapunpu embarure.

14 Sundi, ‘Gume nun cap, nun nyapsilip cap, nun pe ati pumbon neitamai dim pepra kuramtepe teptoda, pio teleppu kunkamepe, tenen, kange deipra kurami. Dinino, ukutaruda dena deiyonge di sun yuma akati di, bura tarato gipra derirure. Ukupre dingeda er adipapu anesala giprapredi, doupra dena deiyo ngebo damaipu dubarure. Angebo tep nengeda, pio ila kwar kununge. Ada, sun menmena depkamenga tep, kwar weik dangnunge, pepne.

15 Men taruda, sun mali kunung neng yuma, sun telep dipapu, tali dim pepra, sun dodina tenda ati neitamaipu kurami dinin, ukutaruda, akati-akati neitamaida, sun talerami keca yuma cap, aneng pe cap, konum gum kupke. Atep, tali nengpu yangedi, adodin ati dopra wektenge. Dinin, aneng sun ati pumbon, sun kange mun pu jerurnge gum kuna derina tep nengeda, lyun tong perur keca, er si Belerang, ange dopra, sun men taru kurami tenda ati pumbon deipmengedi, uku sekmengepa, uku bu di belereng jepyopda, apu deiyo keca gum kupkamre. ‘Ukupkamre’ tenen, apel donkamenge.

16 Sun mali kunangepu talepra kunung nengda, sun apu yapu konum deiami. Sun ton depmengopda, nyapu ton pio men derinkamenge. Atep, ukupmantoda, ila co tekamtua peda, tu pumbon neitamai er yaten embendaua yumada, kolupropyopda, aco kolupkamre. Tonda, aco teru dana-dana tara embendau nge yumada, adipapu kolupredi, pokra sakamra cadi, metek co ton men bolongkamre. Angetopu sun aneng yumada, pio gum kupkamenge.

17 Konum depmenge pangeda, tuai mutu ban-ban yuma neitamaida, yuk nesaladi sun tep kange di ton cap, pio men tenenkamemenge. Sun cap, sun si capda, amenda taru kunkameng nesaladi men kael kepkamemenge. Amutu-amutu yuma, ila ati arum neitamai embanung bisi deiki, nimi embankameng dinin, sun menop taru mali kurami nesala tep, tupa pio men tenenkamenge. Lumdongonapu kunkamemenge. 18 Sunda men taruda, tuai mutu neitamai dirinai kurami dinin, Allahdi anesala dirinai di dopkoteprepa, kunungnaipu bena kunkamenge. Ada, Allahdi, amali kunge nesalada, gam tupa kunung neng kunung mutu ban-ban yuma damai di, dopkoteprepa, pio karenaipu bena kunkamenge. Ada, konum depmengopda, pio kunungnaipu bena kunkamenge.

19 Allahdi, sundi deiami nengdi, deipmengepa deipdanen bankameng nesala yumada, konum gum kupra deipredi gawal dangkamre. Atep, sun anesala ati dopra kuramyaida, amenda taru yuma neitamai, tenpu ngebo peda, tupa ton taprepa, pio men kunkamenge. Ukupyopda, sun kurami mutu neitamai yumada, anesala pio gum kupkamenga tepa.

20 Allahdi sun mali kunangepu talepra kunung neng tep, konum gum kupra deipyopda, yuk-yuk mutu nesala, keteng dangban tara kunung nesaladi, er akuprenge pepmengepa gekepmengedi, sun yumada, kwar weik kupkamre. Tonda, ange utopu, keteng yakan tara kunung nesala sun yumada, ange epmengedi kael kepmengopda, ‘Uo’ tenen, kwar pio kuprepa, yo moropsepmengedi, lukdana berber pepkamenge. 21 Ange yumada, tali men pepkene. Tek sisi, sun mali kun kecapu talepra kunge nesaladi, Allah tep, ‘Nun song’ tenen, teka pio men tenenung nesala yumada, sun kuramyai yumada, pio gum kupra deipkamre ja! Ange utopu, ware nesala do yuma, Allah pio men kael kemenge nesalada, arup konum lap pepmakentopu, sun ton pio gum kupra deipkamre ja!

Aupu yumada, Bildaddi, Ayub tep wenepra pepu.