Job 19

Ayubdi er kayapu weneri neng tep, pepu upu

1Ayubdi er kayapu weneri neng tep pepu. 2Ware kupra taru yumadi, sundi kange mun upu tupa ne koripu penkamnerum do? Tonda, ware kupra taru yumadi, ne dipru mali kudina upu penkamnerum do? Sundi pepneruma deiki di, ikin weik kunerure. 3Sunda, ue dangol di utara neitamai di, ‘Kan ikin kupkere ngeda, deiyo kan tepa,’ pepra, ne damai wenemna upu konum pepnerume. Sundi ne damai mali upu penerum ngeda, sun ali men kuserur do?

4Neda tek sisi mali men kupsi dinin, ukupmantoda, ne mali kupmatenyopda, ne pe deikipu mali kupra deipdatene. Ne mali kupne pangeda, sun ikin keca men dororume. Ne ikin keca doronunada, sundi ware kuptuma deiki di, gum kupra deipnetum do? Gume cadi, ne wenemna gume. 5Atep nengeda, sundi tenedamumyada, ‘Nunda telep neng kunupe,’ tenerumudi, ‘Erda mali ngebo,’ tenen, penerum do? Upemumnya deiki di, dipru kange eremrume. Adeiki, kange mun keca ne damai yakare ngeda, sun dingeda, ‘Er mali kupka deiki di ikin kurure,’ tenenerume.

6Ange utopu tenenemumnya tep nengeda, gekeneso. Allahdi ne damai ikin keca konum deipneu ngeda, ada er pena youramretopu kupneu. Ukupneua tep, Allah dipu, ne tep, ‘Mali kupu,’ tenepneudi, ikin keca ne nong deiki deipneue. Deiyo ngeboda, er tenpua.

7Ukupneua tep, tek sisi ne kika deipra moronepane, Allahdi ton yana men makupneu. Ada upepra moronune. ‘Neda dumsisi pel don ngebo kununa cadi, ikin keca yanmanerada, ne mali kupsa deiki di gume. Mali men kupsipapu, ne nong deiki ikin keca deipneuada, Allah er ja.’ Nedi, “Yan melipneo,” pepra moronepane, pio ton men gekenerure. Dumsisi upu pepra men bongdineredi, telep men kudinerure. 8Allah dipapu ne ban bisi yuma, buplan dekdongopneu. Ukupneupa, ne wekra benmanto bisi peda pio lelip dongopneupa, pio kunuknapu kupka cadi, ‘Ware kupkamne do?’ tenen, betapra men teneptene.

9Ukupneu taruda, ne douramsi keca cap, taleramsi keca yuma capda, Allahdi dopropneua tep, yuk nengdi ne gispal doramnei ngeda, konum tapnei. Allahdi ukupneua deiki, ne si peda mali kupra deipneue. Atep ukutaruda, yuk neng yumadi ne tep, ‘Erda mambul ngebo,’ men tenenenunge. 10Akupneu ngeda, bisi dana-dana yumadi, ne koripu yaupa, pio ila ikin keca karepneua deiki di, pio kange mun kunerure. Ukupmantoda, ati urumenge taru, ati dela dana-dana tara yuma urumtamameng utopu, tenpu taru dipapu telep kuramneunge yuma konum dopropneupa, gum kupneu. Tonda, nimidi kouramep keca talepra kwenepropmepepa, koluramretopu, ‘Ne ukuptene,’ teneramsinge yumada, konum gum kupra deipneue.

11Allah Yahweh er yuda, ne damai deipneupa, uku bu jeramre utopu kunerure. Ada erdi ne tep nengeda, ‘Angebo ne tara ngebo gume. Erda ne podan neng utopu kurure’ tenen, mali kupra deipneue. 12Allahdi ila wenemna keca karenerur ngeda, men bisbisa kapmanto cadi, ukupmantoda, er nyapu jen neng weik doproiptupa, ne ban bisi yan kepda pepra, kaleknetenge ja. Tonda, ne ati kunai peda, utopu ongopdongopnetenge ja. Ada, ‘Er yukai men benkur’ tenen, kupnei.

13Tonda, Allahdi ikin keca, ne deiki deipneua deiki di, ne weit yapu cap, ne du yapu cap tep nengeda, Allahdi yuk neng utopu kupra deipneue. Ada, ne weit yapu cap, ne du yapu cap, ne kayapu neng yuk neng yuma capda, sun yumadi tapneipa, ne pe yuk nimi bo ngebo utopu kunune. 14Tonda, ne yala nesala peda, ne tapra yuk karenai bendopnei. Ne kayapu neng peda, sundi ne tep tapneidi, ne tep ton men tenimnengedi, lupronei.

15Tonda, nati uruna yakanung nengdi, ‘Nun kap,’ men tenenenungtopu, ne amutara kungedi, ne ati pel donge nerapu yuma peda, sundi, ‘Erda nun deiyo ngebo’ tenen, tupa men tenenenunge. Ange utopu sun yumadi, ne tep pangeda, ‘Erda tali tengyakan ngebo, yuk mutu ngebo utopu kurure,’ tenenenunge. 16Ukupneipa, nedi ne amutara ne ati pel don ngebo tep, pio upu bouna di er namdona tep, upu pepra upuptenya peda, men gekenetue. Tonda ne puto di, ‘Kao, ukupkurume,’ peptenya peda, men gekenetue.

17Ila pu jenerura deiki di, ton penerepa, ne ner pe, ne tong gekepneredi, dukmanto kurure. Tonda ne kayapu, nun tenpu mumun pumbon sangne neng peda, ‘Angebo nun song’ tenen, sundi ne damai men yakanunge. 18Tonda, bisi embanmange nyapudi, ne bisi embane taruda, tong gekenengedi, nyek-nyek penenunge. Tonda, ne teknepa epmengedi, autunenunge.

19Ne kayapu sisa, nedi sun tep bicau teneramsi nengdi, ne ikin weik kupneu taru di gonga kepra, ukutaru peda, ne tep ton bicau men tenenengedi, ‘Angebo nun song’ tenen, yuk tara kepra banunge. Sundi ne tepapu yaninenunge. 20Ataruda, ne nong bol kamo ton douna gume. Yopu tapangdorbenamneu. Ukuamneu taruda, tek sisi depmanto kuamsi. Ne nong galemnada, pio gum kuamneu.

21Uo ne kayapu, Allah er yu ne deiki deipneupa, pio kange mun kange doupra kunune. Ukuamneupa, ne kayapu tep uperamsi. “Ne kayapuo. Sundi ne tep bicau tenepnerume,” pepra uperamsi. 22Tonda, ne kayapu tep upenune.

Allahdi ne damai ikin keca derineretopu, ne kayapu sun peda, ‘Erda depyopda, men tenenkamepe. Lupronkamep ja. Er tep ila di wenemkamepe’ tenen, ne damai ikin keca tapakra derinerumnyada, warya tep do? Allah tep uperamsi. “Kandi tamupra, ne deiki ikin keca deipnemum ngeda, ange konuma tenepsi dinin, ne gam kunange peda, dopropkamnerum do?” pepra asipetepsi. Atep, sunda ne kayapu neng, sun peda ange utopu tenemnerum do?

23Telep ngeda, ne pene upu yuma, ‘Yuk neng yumadi tupa tenepkamneng’ tenen, sekamtenge ja. ‘Ne pene upu gekepmengedi, buku neitamai sekra deiamtenge ja,’ tenenune. 24Ange utopu, sundi gel pala dopra betaiptengedi, besi keca dopra, agel deiki sekra deiptengepa, ne pene upu yumada, pio tep akapkamtu ja. Agum dingeda, sengna keca, er sida pensil dopra, pala gel urasin deikipu sekra deiptengepa, pio akapkamtu ja.

25Apepmaken ngeda, mesum tep gume. Im deikida, ne tep bicau teneneredi, ne mali kun keca yo pununa tep, kunupra lyepkamner ngebo Allah pio akurure. Akurura tep, sirya gawal dangna taru, ne melimna tep, er yare dingeda, tuai mutu neitamai yan tekamre. 26Ukuda, ne gam kunya neitamai di, nong depnepa, lyupnerya peda, ne kaele. Amenda taru tamupra gam buknedi, akune nong utopu nong kupne dingeda, Allah er damai dinkamne ja. Ada, ne bol deiki susu weike jeneredi, dingnerya peda, ne tamupra gam buknedi, gam tupa kune dingeda, nong tek sisinge kunedi, Allah er tepapu tek sisi dinkamne.

27Allahda, ne pe asuru dipapu epkamne ja. Gam buknedi, tek sisi nong kunyopda, tek sisi ne pe Allah dinkamne ja. ‘Angeda ukuptene’ tenen, ila di putanerepa, ange tep ne dipru pu jenerepa, tupa tenenune. 28Dinino, sun ne kayapu nengdi, ne tep, “Er mali kuramnga deiki di, tupa-tupa ikin keca er deiki yakarepa dororure,” pepra domnerume. Upenerum dinino, sun peda pio mali-mali kun kecapu tenepra kurum neng cadi, ‘Amenda taru Allahdi nun ton wenepserur’ tenen, kware kunkamtum ja.

29Ada mesum tep men pepsene. Deiyoda, Allahdi mali kunge neng yuma tep, wenepra porura tep pepsene. Nun nimidi mali kupe keca yumada, Allah dipapu epseredi, yu kupre pangeda, nun mali kuna tep wenemserure. Atep nengeda, sun tupa mali kuprumupa wenepseryopda, sun dipapu ange epmumdi kael kepkamrum ja. Allah er dipapu, nimi tuai neng yuma tep, upu bongdiseredi, wenemserure. Ange peda tek sisi kael kepkamrume.

Ayubdi er kayapu weneri neng tep pepu.