Job 2

Kain Jen Ngebodi Ayub tep, ue butene taru kurpetermunge tep upu

1 Allah er pel don neng malaikat diramidi, ‘Nun nai bo Allah damai kunkup’ tenen, bei taruda, isok-isok yuma cap, sun deiyo ngebo Kain Jen Ngebo cap peda, sun tonpa bei. 2 Sun tonpa konum bei pangeda, Allah Yahwehdi Kain Jen Ngebo tep, “Kanda, dan mutu di tengyarem do?” pepra asipu. Upepra asipupane, Kain Jen Ngebodi Yahweh tep tamupra pepu. “Neda tuai mutu ban-ban yuma embanedi, nesala ban-ban yuma kunung keca tep dipra embanune,” pepu.

3 Upepu pangeda, Allah er si Yahwehdi tamupra Kain Jen Ngebo tep pepu. “Kanda ne pel don ngebo Ayubda dirum do? Apepken ngeboda, tali tep men pepkene. Nimi ban-ban yuma kunung nengda, ne pel don ngebo Ayub dumsisi teleppu kure utopu, ton men kununge. Erda ne sipu eremneredi, mali kun keca tenpunge peda men kurure,” pepu. Ange tep nengeda, kandi er tep, ‘Er deiyo ton kuna gum dipapu, mali kweiptene’ tenen, yan pepnemumpa, ‘Angeda dakuprume,’ pepkesipa, kupmum dinin, kange mun weik kupka peda, erdi ne tep mali upu men pepneu. Dumsisipu tupa kuredi, ne sipu tupa-tupa eremnerure.

4 Upepka tep, Kain Jen Ngebodi tamupra pepu. “Ne kangeda, nimi yumadi, sun talepra dounung keca yumada, yambul mambule tenengedi, ayuma gum kuptua peda, ‘Angeda ila mambule,’ men tenenunge. Dinin, sun nimi nong gam kunada, ‘Angeda ila mambule,’ tenenunge. Nimidi, ‘Gam tupa kutepe teptoda, nun bung keca yuma gum kupserya peda, mambul gume,’ tenenunge. Kandi, ‘Ayub tupa telep kurure,’ pepmarem dinin, Ayub er talerur keca cap, er dorur keca cap yuma, gum kupra deipsi ngeda, Ayubdi, ‘Kange di tamupra karepkamner ja,’ tenepketu dinin, Ayub er nong deiki ikin keca deiptene pangeda, tek sisi kan si men ereipketue.

5 Atep ukupmantoda, Ayub er nong deiki mali kweipmem pangeda, tek sisi kan si men ereipketue. ‘Allahdi mali kupra deipnera tep, erda mali ngebo,’ pepra, kan damai mali upu pepketudi adipapu taptue,” Kain Jen Ngebodi Allah tep pepu. 6 Upepupa, Allahdi ton cap tamupra pepu. “Telepe, uteneprem dingeda, Ayub dopra kan deiki deipkenepa, kan tenepmarem utopu er nong bol deiki mali kupkurume. Dinin, Ayub er nong puda, men poptaptume. Er pona gume,” Allahdi pepu.

7 Upepu pangeda, Kain Jen Ngebodi, Allah er damai di tapra beu. Ukupu taruda, Ayub er nong deiki, kot suseda yan bulbul dipdongopra giso deiki yuma amupu. 8 Ukupupa, sikke lupra er giso deiki deipudi, ati dam bungamudi, gat me mau olokropa meteknge dopropudi, er susu gala korongdaramu. ^{▼▼gat me mau – Israel nesaladi, kerah tu dopra longdin mau betamamidi, uku dongopnepa, dapnepa konum gat kupnopda, me gwerami. Ame mau olokunge, co sereng utopunge dopra, er susu korongdaramu.}

9 Ukuramunge er ner epudi pepu. “Kan si eremem ngebo Allahdi, kan nong deiki ikin keca deipkeupapu, ‘Melipkamner,’ tenepmumdi dumsisi tupa kunkamrem do? Ne kange telep ngeda, Allah tep si erememya tapmemdi, er tep mali upu peipmemdi, adipapu kanpu deptume,” pepu. 10 Upepupa, Ayubdi tamupra pepu. “Kanda walwal nerapudi perameng utopu penmaremada, warya tep do? Kandi tenepmaremada, ‘Allahdi telepngepu karenkamsere,’ tenepmaremdi amali upu penmanerem do? Kanda, ‘Nun damaida, Allahdi telepnge karepserepa doproptepe dinin, ikin keca ton men karenkamsere,’ tenepmaremdi aupu penmarem do? Ukupserepa, ‘Allahdi ikin kun keca kareserepa men doronkamepe,’ tenepmaremdi penmarem do?” Ayubdi er ner tep pepu. Ayub er upu pena deiki di, ton Allah tep mali upu tenpunge peda men peramu.

Ayub er kayapu neng yaidi pepi upu

11 Ayubda, kot susu ila kange munge talepupa, yuk nengdi, “Ati ai buku,” pepipa, er kayapu weneri neng, sun sida, Elifas Temam mutu ngebo cap, Bildad Suyah mutu ngebo cap, tonda Zopar Nahama mutu ngebo cap, sun yuma adipapu, ‘Nun kabo ati ai bungamngai bepepa, er cap tonpa upu sisikmepedi, dipru kwa dipkamep’ tenen, upu sisikidi, ‘Teka ukupkupe,’ pepdaidi, tonpa bei.

12 Banmai taruda, karenai di bena dinmaipa, sun kabo Ayub, kot susu weik jeramnga cadi, er nong kamoda, pio yuk kamnga tep, epidi, ‘Angeboda nun kabo Ayub do, yuk ngebo do?’ tenen, wang-wang pepi. Ukupidi, sun kabo tep, ila di bicau kupupa, mambul kange doupmaiya tep, sun keami opkal kwiripra gweleptapidi, sikke but dopra, ^{▼▼sikke but Ukupi ngeda, ada sun Israel nesala pumun taru kange mun kange dourami taruda, sun mutu nesaladi ukurami.} sun giso deiki deipi. Ukupidi, ton dopra, im deiki donokidi, ila di engepi.

13 Ukurami taruda, komuni, lukunda, yoneitam bari tumi, Ayub cap tu deikipu bungami. Akurami taruda, sun kabo Ayub tep, tenpu upu peda ton men peami. Ada, ‘Nun kabo ila mambul pu jenmarpa, ikin weik kupke,’ teneramidi, tali dimpepra kurami.