Job 20

Zopardi Ayub tep, pepu upu

1– 2Uda, Naama mutu ngebo, er si Zopar, erdi Ayub tep pepu.

Uo, Ayub kandi pesemem upu tep, ‘Nedi mali kange donmana cadi, kan tep tamupra asipeptenye,’ tenekenune. Atep nedi kan tep, menmena tamupra pepkukena tep, moupra gekepneo! 3Ada tek sisi kandi pesemem upu deiki yumada, ne kangeda ne damai mali upu pepra derineruma di, yanineruma cadi, ‘Uo warya tep do?’ tenen, mali kange deipnedi, derepkene. Dinino, nedi apemem upu, kange di tamupra, kan damai pena tep nengeda, ne kange tenenange neitamai di, ‘Deiyoda ake,’ tenen konum kael kepmana tep, nedi kan tep tamupra pepketene.

4Dinino, pumun taruda, Allahdi nimi tuai nesala ketekepra amutu neitamai deiamu taru di dipra, aneitam taru yumada, kael neng yumadi konum kael keami ngeda, kan Ayub ton kapul men kael kepmum do? 5Ne kangeda kandi kapul men kael kepmuma cadi, ange lap pepkukene. Ada ake. Tali dakunge nesaladi, sun pio malipu kunge nesala tep epmengedi, ‘Uo sunda telepe’ tenen, sun tep pingping kange doupra kunung ngeda, tek sisi keana taru tepapu kurure. Tonda, nimidi Allah tep, ‘Allahda nun songe, erdi peserur upuda, yaninapu kunkamepe,’ tenengedi, mali-malipu kunge nesalada, sun kange deipra kunge taruda, go yambulanunpu, ue tenpu tarupu kurure. Ukupmantoda, nimidi asuru kuplam peramenga utopu kurure. Anesalada, gum kupkamenga tep pepkene.

6Anesalada, ‘Nunda ila neng kunupe’ tenen, sun kangeda, dipru eremnada, pio weik cadi, sun kangeda im alau tara bepmanto kurure. Salnong-nong kepra kununga cadi, yuk nengdi, ‘Nimi deiyo neng kupkameng’ tenen, anesala erepmengedi, gispal weika di donunge. Ukununga deiki di, sun anengda, sun deiyo kepra kunungada, dua damai utopu kurure. 7Ukunung dinino, tek sisi anengda, Allahdi pio-pio tep gum kupra deipkamre. Ada, sun pedi, ‘Akecada pio mali keca cadi, bura tarapu dokotepmengepa, lyupredi, menmena gum kuramretopu, agemenge nesala peda, menmena gum kupkamenge. Atuai mutu neitamai kungedi, pio mali kununga cadi, mutu ban-ban yuma di pio dim pepkamenge. Ukupmengepa, sun tep konum kael keamenge neng, sundi upepra asimpetenkamenge. “Uo, sun aila nengda dan mutu bei do?” pepra asimpetenkamenge.

8Ukupmantoda, sun amali weik kunge nengda, ken mapmepedi akeca-keca dinup dinin, bukmepyopda, arup dinmape keca adipapu gum kuprepa, lumdongoramep utopu, sun peda utopu kupkamenge. Ken mapmapepa, lukunda neitamaida katuai kupmarepa epmapyanen, adipapu gum kuramretopu kupkamenge. 9Yuk nengdi, amali kunge nesala dirami dinin, gum kupmengopda, yuk neng yumadi, sun ton asuru di ton cap pio men epkamenge. Sun anesala kuramiyaida, pio tep ton cap men kunkamenga cadi, atara nengdi anesala ton cap men dinkamenge. 10Pumun taruda, sun mali kecapu kurami nengda, sundi akeca-keca peda, talepra kuna gum neng, tali kankan nesaladi talepra kurami keca yumada, amali nengdi upula dopromi. Sundi adopromi keca yumada, taleramipanen, amenda taruda, sundi derirami nyapudi akeca yuma punupmengedi, tali kankan nesala tep, tamupra karenkamenge. 11Anengda, sun kaber tupa kurami taruda, nong telep kupra nepra, ila puto neng kurami. Tonda, urasin telep neng kurami. Dinino, tupa gampu men kunkamenga tep, konum depmengopda, sun nong yumada, kange di tamupra, sikke but utopu kupkamre.

12– 13Ange tep nengeda, sunda pio bicaue. Men taruda, sundi, ‘E mali kunangepu kupkupe’ tenen, tali lupra malipu kuraminge tep, kange deipra kurami. Ukupmantoda, sun anengda, tau peramre keca sun sipyal pumbon dongoptengepa, kange deipra jeramidi, sun si me jerkoterami. Tonda, ‘Yuk nengdi, akeca jenmapada, epsenung’ tenen, sun lyemu amutara deiamdi, tupa akwamupa, ‘Pio angepu jeramtepe teptoda, pio telepe,’ tenerami. Sunda, ‘Gume, atau peramre kecada, men taptepe. Jenapu kunkamepe,’ teneramitopu, mali kuraminge peda, pio men tamami.

14Ukupra kurami dinino, ajen keca konum jepkotepmengepa, mundu pumbon neitamai konum wekyopda, er urasinda pio yuk kemrure. Ada yu kecapu kuredi, su perura cadi, dena kecapu kemdorure. Ukupmantoda, yu baldi si topserepa, adipapu denuptopu, sun mali kuraminge deiki di, sun pedi sun tep, popdarami. 15Ukupmantoda, nimidi, konum lyuramu jen keca mangkau di jepmengopda, amenda taru adipapu, akecapu duktamamengtopu, sun amali kunangepu kurami nengdi, yuk nengdi talerami bung keca upula dopra, mawa di derirami ngeda, amenda taruda tamupra deiptapkamenge. Ada, Allahdi aneng deiki ikin keca konum deipyopda, anengdi upula dopromi keca, ka tamupra deiptapkamenge. 16Pio mali kun kecapu talepra kunge nesalada, yuk kankan nengdi talerami keca upula dopromi taruda, ‘Angeda pio telepe cadi, kange deriserure,’ tenenung dinin, tek sisi ngeda, amenda taru, sun mali weik kuramya deiki di, ikin keca yakarepa doronunge. Akeca di sun anengda, yu baldi nimi si topredi, er yu ulda, kipdongoprepa, deramengtopu kupkamenge. Sun mali-malipu kuramya deiki di, depkameng ja!

17Amenda taruda, Allahdi amutu nesala tep pio telep kudinkamre. Ukuprepa, akeca-keca yala-yala yuma dopropmengedi, pio teleppu kunkamenge. Ukupmantoda, kunumna weik keca, zaitun co du taikmengepa, er minyak mokon me cap, sapi bisam moum teyung cap, mong me er si madu cap, weika di yamupra kareptupa, ila me embaramretopu kuptua peda, amali kurameng nesaladi, akumumya weik keca yumada, pio men epkamenge. Allahdi anesala gum kupra deipkamra tepa.

18Ange tep nengeda, sun anengdi talerameng keca yala-yala yuma cap, ‘Isomka kunkamep’ tenen, pel doramidi mawa derirami keca yala-yala yuma capda, adipapu tamupra karepkamenge. Sundi upula dopromi keca yumada, kange deipra men talenkameng dinin, Allahdi sun tep wenemrepa, sundi akeca yuma ka tamupra karenkamenge.

19Sunda pio ikin weik kunkamenga deiyoda ake. Ada, sun amalipu kurami nengdi, tali kankan neng yuma tep, popra tapidi, sikke buktamami. Akankan nesaladi domi ati-ati yumada, sun amali kurami nengdi, akati yuma upula dopromi. Sunda akati-akati men domi dinin, ‘Nunpu akati yuma taleptepe’ tenen, yuk nesaladi domi ati yuma upula dopromi.

20Tonda, sun amali kunangepu kurami nengda, sun kange neitamai di, ‘Akeca-keca yala-yala yumada, konum weika di doropmapa cadi, akonuma,’ pio men tenerami. Akeca-keca pio weik dororami dinin, sunda, ‘Gume pio weika di doproptepedi, isomka weik neng kutepe’ tenen, sun putanada, men dim pepmanto kupka cadi, pio dalupra doronapu kurami. Tenpu yala keca peda, ‘Dakwapye’ tenen, men tamami. Ange yuma dororami. 21Ukupmantoda, anengdi, ‘Jen keca jepkupe,’ tenepmengedi, jenung taruda, akeca yuma jepra gawal dangdonunge. Ange utopu, amali kuna nengdi, yuk neng keca yuma dalupra dororami pangeda, tenpu yala keca peda, tupa men kwamu. Ange yuma dopropnapu kurami. Ange tep nengeda, keana taruda, isomka neng kunung dinin, sirya taruda, Allahdi sun tep wenepkamra deiki di, sundi talerami keca yala-yala yumada, gum kupra deipkamre ja! Teleppu men kunkamenge. 22Sun tupa gam kunge taruda, keana taru tep, isomka weik kupmenga peda, sun anengdi akeca-keca yala-yala yumada, telep deiki dipapu kange deipra kupbaramenganen, sirya taruda, Allahdi kareprepa, ikin keca pio weik yarepa doropmengedi, ‘Uo’ tenen, kange mun kange doupra kunkamenge.

23Uda sun anengda, mankau kange doupra kungedi, kange deipra adeiamenge keca yala-yala yuma weika di tupa jeramenge taruda, Allah er yuda pio weik kuprepa, er aneng sun wenemna tep sun nong deiki ila ikin keca derinkamre. Ukupmantoda, ila mo cemamretopu, ikin keca pio weika di, sun nong deiki yankamre. 24Ataruda, sun anengda, ‘Uo, gat keca er si besi di ketkemnung mar si di popnserur’ tenen, kurapra sepdaro berya peda, yuk ngebo gat keca er si tembaga di ketekepra derirur mar di, er aneng maraprepa, dila dorepa, depkamenge. 25Aneng sun nong deiki mar marapmengopda, ila susu dila kurure. Pio takke lupra deiamenge mar di marapmengopda, sun nong neitamai wengrur dinin, ka di sun nong bol deiki belepkamre. Ukupyopda, sun dipru neitamaida, pio kwar dangnapu kunkamre.

26Sun amali kuna nengdi bung keca yala-yala yuma moupra deriramenge ngeda, Allahdi sikke bukra tapkamre. Allahdi akeca-keca yumada, pio gum kupra deipkamre ja! Sun pe neng cap, sun nyapsilip yuma capda, nimidi sengna gum uku di jepra gawal dakamre. 27Amali kuna nengdi, mali-mali kunge ngeda, im deiki di kuramre keca yumadi, “Sunda pio malipu,” pepra katuai kupra penkamenge. Ange utopu ton, tuai mutu neitamai kuramre keca yuma dingeda, sun aneng tep, “Sunda pio mali cadi, popra tamkamrume,” pepra katuai di penkamenge. 28Allah er yu weik kupre pangeda, er tenemu taru konum yaryopda, sun anengdi talepra kunge bung keca yala-yala yumada, adipapu puto di dopropredi, ange yuma gum kupra deipkamre ja! 29Allah erdi, ‘Sun mali kunangepu kunge nesala yumada, sun deiki ila wenemna kecapu karepnepa doronkameng’ tenen, sun tep konum ketenepra deipunge yumada adano.” Allahdi, ‘Angeda tek sisi nong kepkamre,’ konum tenepka tep, tek sisi ukupkamre.

Aupu yumada Zopardi pepu.