Job 21

Ayubdi tamupra Zopar tep, pepu upu

1– 2Ayubdi Zopar tep pepu.

Ne pepkuken upu moupra gekepkunerume. Ada, ne kange telep kupra derina tep nengeda angepu moropsene. 3Nedi sun tep moropsen ngeda, sundi ne tep penerum upu tep nengeda, nedi sun tep tamupra pepkusene. Aupu pepsenepa, moupra gekepkunerume. Upepsenepanen, sundi ne apepne upu konum gekepmum dingeda, ka tamupra sundi ne tep, “Dyo, mali upu tupa penmasere,” pepra nalemnemumdi, autuna peda telepe pua! 4Neda, nimidi ne damai kunung neng tep, mali pepra, upu men penune. Tek sisi ngeda, Allahdi ne damai ikin keca kareneredi, kunerurnge tep, aupu penune cadi, nedi, ‘Uo, warya tep, ne ikin kunerur ngeda, adipapu men gum kupra derinerur do?’ tenen, mali kange dopra engenmanada, walito penune. Atep ataru di ne pesenun upuda, dim pepra geketamnapu kunkurume.

5Sundi ne kupneua urasinpu epnerumudi, upu pena gum di, ‘Uo, bicaue, angeboda tek sisi pio ikin weik kurure’ tenepmumdi, ‘Tali upu pepnup’ tenen, sun buru di sun sipyal kinipdongopmumdi, lolomnapu kunkunerume! 6Ne nong neitamai cap, ne ikin weik konum kunerurnge yuma tep, tenepetepnyopda, ne peda kwar kunerepa, ‘Uo, kange mun kange keca ne damai konum yanmanernge yumada, ware deiyo keca tep do?’ tenepnedi, ne nong yuma moropsemneredi, lukdana kwar dangnune. 7Tonda, ange tenenune. ‘Uo, Allahdi ware keca deiyo tep, sun pio mali-malipu kunung nengda, gam kuna tep go ton cap tapakra tupa karerepa, wisi derinung do? Tonda ware keca deiyo tep, sun mali kuna neng, ila puto neng kepbangedi, sun bung kecada weik karerepa, isomka neng kunung do?

8Sun mali kunapu kunge nengda, pio gam tupa kuramengnganen, sun nyapudi deipmenge nyapu yumada, sun damai nepmengepa, sun asuru di dinunge. Anyapudi derirameng nyapu peda, sun damai kungepa dinunge. 9Amalipu kunge nesalada, sun pe ati-ati dopra kununga neitamai yumada, telep dipapu tali dim pepra kungedi, kange derinunge. Tonda, Allahdi sun wenemna tep, sun damaida ila ikin keca sun deiki ton dopra deiprepa, men doronunge. Tupa teleppu kununge.

10Tonda, sundi talepra peinung gam keca yala yumada, ukupmanto sun jem sapi bisamdi telep dipapu mi deipdanen bangedi, nyapu weik kupbarure. Tonda, sun peinung ner sapi bisamdi, sun mi derin taru peda, ikin men kurure. Sundi peinung ner sapi bisam yumadi, telep kuprappu nyapu weik derinunge. Lyun sapi bisam mi derina pio gume. 11Sun mali kunung nengdi derinung nyapu yumada, kange deipmengedi, esu penapu kununge. Ukupmantoda, domba bisam er mi kange telep kuprepa, gemeredi, ila pala banai neitamaipu, im kurungamre utopu, sun mali kunung neng, sun nyapu peda, kange deipmengedi, tali lupra ati bura tara di esu penunge. 12Anyapu yumadi kange deipmengedi, mut pena keca tep bung-bung pena, sun sida rebana cap, kecapi cap, tonda seruling cap yumada, sundi dopra kange lon mut pengedi, karye pongedi gemenapu kununge. Sunda kange deipra esu-esu penunge.

13Sun mali-malipu kunge nesalada, atumi-atumi yumada, sundi kange deipra kungedi, bung keca yala-yala yuma talengedi, isomka kupmengedi, angepu kupbanunga deiki di, sun kuna tumi peda, gawal dakropnenbarure. Ukupbaramenganen, sunda kange deipra, telep kuna dipapu depra banunge. Sun gam tupa kunge taru neitamai yumada kwar men dangnunge. 14Tonda, ukunge dipapu, sundi Allah tep, “Nun damai di tapra, yukai benkurume! Nun gam kunkamep taru neitamai yumada, Allah kandi nun tep, ‘Ange kunkamrume, angeda pio men kunkamrume,’ pepra deipsene upu gekepra, moupra kael keprumudi, telep kupra kunkamrum’ tenen, peipsemum upuda, talepra men kunkamepe. Nunda kan tep pio song, tenenupe,” pepmengedi, Allah tep yanitamnapu kununge.

15Tonda, sun mali kunangepu talepra kunge nesaladi, Allah tep penunge. Sundi, “Ton nesaladi kan tep, ‘Allah erda, akeca-keca talepra, Ila Puto Weik Deiyo Ngebo kurure,’ pepra, kan sipu eremnunge. Dinino, nundi, ange tenenupe. ‘Allah kandi peipsemum upu, yuk nengdi angepu talepra kunungada, deiyo ton gume,’ tenenupe. Tonda, kanda Allah tep, ‘Uo naio melipserume,’ pepra moronupada, nong pio men kupkamra cadi, deiyo ton pio men kurure,’ tenenupe.” Amali nesaladi ukupra Allah tep penunge.

16Sun mali kunge nesaladi, ukupra tenedanunge. ‘Gume, nun pe kange puto deiki dipapu, ‘Ukupkamne ja,’ tenenupnge yumada, atenenuptopu kupmepepa, nong kemserure. Nun pe puto deiki dipapu telep kupra kunupe,’ tenedanunge. Sun mali kunge nesaladi angepu tenedanung dinino, ne Ayubda, sun atenenung nge yumada, tenpunge peda, pio men tenenune. Tek sisi ngeda, ne dingeda, ‘Sun pio mali-malipu kunge nesalada, sun kange dipru neitamai tenenge keca cap, ‘Ukupkamepe,’ tenenge keca capda, ange yumada, ne pio songe. Neda utenepra embanedi kunune.

17Tonda ne Ayubdi ange ton asipetepsene. Sunda moupra tenepetepso! Sun mali kunangepu talepra kunung nengda, sun adipapu menmena denung do? Gum do? Gume, ne kangeda, sun anesala kan-kan weik tara ngeda, keteng tamun weika di tupa gampu kuramenganen, wisi konum deipmengopda, denunge. Tonda, anesala kan-kan weik tara ngeda, ikin keca ton, ateppu sun deiki yarepa, doronung do? Gume do? Ne kangeda, ikin keca weika di men doronunge. Tenpu-tenpu pua. Tonda, Allahdi sun tep ton, ateppu, yu kuprepa, sun tep deremrurdi, kange mun keca sun deiki weika di derirur do? Tenpu-tenpu tarupu sun tep deremrur do? Ne kangeda, weika di sun tep men deremrure. 18Gume, kelkela keca utopu, tonda sikke but utopu kurepa, ila mungna cap, puto kumanya cap yaredi, pung pepra, akanam keca doupra barur utopu kunung do, gum do? Ne kangeda, Allahdi sun anesala tep, weik taru ton, wenemredi, gum kupra men derirure.

19Sundi upenerume. “Allahdi sun nai bo mali kuramrepa, wenemna keca mawa deriramredi, amenda taruda, er nyapu deiki ikin keca deipra wenemrure,” penerume. Dinino, nedi tamupra sun tep pepsene. Ne kangeda, Allahdi sun mali kunung neng tep nengeda, Allahdi sun pedi kunge mali kunange tep, wenemrure. Ada sun mali kunung nengda, sun pedi, ‘Nunda mali kupmapa tep, Allahdi wenemserure,’ tenepmengedi, ‘Kael kepkameng’ tenen, Allahdi sun pe deiki ikin keca dopra derirepa doronunge. 20Tek sisi telep ngeda, sun mali kunung nengda, amali keca menengada, sun pe deikipu wenemna keca yarepa doronunge. Ange yaryopda, sun pe asuru di epmengedi, ange deiki di tek sisi, ‘Nunda mali kunmapa tep, Allahdi wenemserure’ tenen, kael kepkamenge. Tonda, Allahda, pio deiki tara erepra, akeca-keca talepra, Ila Puto Weik Deiyo Ngebo kuredi, er ila yu dopra, sun deiki deiprepa, dopropmenga deiki di kael kemkamenge.

21Angeda tali tep men pepsene. Deiyoda ake. Sun pio mali kunung neng, sun konum depmenge taruda, sun nyapsilip yuma tapmenge nge tep, kange di ton cap pio men tenenunge. ‘Nun nyapsilipda, sun kunada teleppu kunung do, mali kunung do?’ tenen pio men kalengnunge. 22Sun ton moupra tenepso! Allahdi im deiki tara neitamai gam kunung malaikat yuma tep, sundi kunge keca yuma dipetepredi, “Sunda mali kupmarum ngeda, ake-ake,” pepra, wenepredi upu bongdirur deiyo ngebo kurure. Atep, nun nimi sisa, tali tuai mutu nengdi, Allah tep, “Ukupkurume. Telep kuna ngeda ake. Mali kuna ngeda ake,” pepra, er tep petereptepe do? Gume, angeda pio men kupmanto keca pepsene.

23Tonda tuai mutu neitamai diramsidi kael keamsinge ton pepkusene. Ada, nimi ton, sun gam kunung taruda, pu jena gum, nong telep dipapu kungedi, akeca-keca yuma talepra, pio telep dipapu, kange deipra kuramenganen, dim pepra denunge. Anengda, kware dangna pio gum dipapu, tali kange deipra teleppu kuramenganen, kange telep deiki dipapu denunge. 24Tonda, anengda, jen keca weika di jengepa, galemna weik neng kununge. Sunda, sun nong cap, nong neitamai yo capda, teleppu kuramengedi, kaber neng kuramengtopu, sunda puto tupa doumenge dipapu denunge. 25Ton tara nengda ukunung dinino, ton tara nengda, ikin keca weik, sun damai yarepa doropmengedi kange mun deikipu kuramenganen, mali kange doumenge taru neitamaipu denunge. Autopu kunge nengda, sun gam kurami taru neitamai yumada, telep keca ton men diramya cadi, sun kange dipru neitamaida, telepnge ton doupra pio men kuramenganen denunge.

26Tuai nesalada, pio yuk-yuk kunung dinino, telep kange doupra, isomka kunung neng pe, ikin keca doropmengedi, mali kange doupra kunung neng peda, sun yumada utopu, konum depmengopda, tonpa nimi peirbanaipu doupra peirbanunge. Bena peipmengopda, kuh cap, tonda kwali cap dipapu, sun nong deiki amungedi jenunge. Angeda, sun ton moupra tenepetepso! 27Anengo, sundi ne damai yana, upu weika di penerum nengda, sundi ne tep, ‘Upeptepe, tonda ange ukuptepe’ tenen, inipra tenerum ngeda, ne konum tenepra kael kemsenune. Tonda, sundi ne tep, ‘Ukupra kuptepepa, Ayub tep mali kweiptepe,’ tenenerumnge yuma peda, ne konum tenepra kael kepsisi.

28Tonda, sundi ne tep asimterenerume. Ada, “Mali kun kecapu talepra, isomka kuramu nimi deiyo ngeboda, erdi menop taru domu telep atida, ukutara dan cei kurur do? Tonda, pio mali kurur ngebo, erdi menop taru domu atida, ukutaru dan cei kurur do?” pepra asimnerume. Sun kangeda, ‘Gume, sun malipu kunge neng yumada, mali kupmengenge menenga tep, Allahdi sun cap, sun ati cap, sun talenge keca yuma cap yumada, gum kupra deipkamre ja,’ tenerume. 29Ukupra tenerum dinino, nedi sun tep tamupra asipetepsene. Ton nengda ormutu bena, amutu yana kemengedi, akeca-keca yuma dirameng nesala ton, kapul men asipeteprum do? Agum dingeda, asipeteprum dinin, sundi lap pepsei upuda, teka men tenerum do?

30Atep, sun cap, ne cap konum kael keamupu ngeda, sun tep lap pepkusene. Ada, dan mutu do yuma, sun mali kecapu talepra kunung nengda, sun mutu neitamai ila kange mun keca yarya peda, sun aneng deiki men yarepa doronunge. Tonda, Allahdi amutu nesala tep, yu weik kuprepa, amutu nesala deiki deipredi wenemrur taruda, sun mali kunung neng yumada, sun deiki ila wenemna keca me yana kurure. Sunda tali kange deipra, teleppu kununge. 31Angepu gum dinin, amali kunge nesaladi, mali weik kupmengopda, sun mutu neitamai di, wareto ngebodi, balila deipra sun urasin damai beredi, “Sunda tek sisi pio malipu kurume! Angeda yapso!” pepra, aneng tep wenemrur do? Gume, ange men penunge. Tonda, mali kun kecapu kuramtenge neng, sun mali kunange tep, sun damaida menenga wenemna keca ton tamupra men pepra derinunge. Aneng tep, wenemna upu pena gum di, tali dim peprappu kununge.

32– 33Amenda sirya taruda, mali weik kuramre ngebo deprepa, er nong doropra, peirban kunge taruda, er kayapu neng weika di ton mepra banunge. Tonda amenda tara peda, nimi weika di ‘Er peipmangai mali kuprur’ tenen, ortara bena inipra kalengnunge. Pio bouna dipapu angebo dopra, tu palipmangai pumbon dongopmengopda, moupra dipetepmengedi, er nong deiki tu di kemdongonunga peda, ikine gume. Bouna dipapu tu palipra dongonunge.

34Ange yumada, kange di ton cap konum lap pepmasena tep, ware keca deiyo tep, sundi tali-tali pertamrum upu di tupa wenepra penerum do? Awenemna upu deiki di, sundi ne tep, ‘Er kange telep kweiptepe’ tenen, penerum do? Gume, ato upu yumada, tali upupu penerume. Tek sisi pepsene, sundi penerum upu yumada, mok upupu penerume.”

Ayubdi er kayapu weneri neng tep, aupu yuma pepu.