Job 22

Elifasdi tamupra, ton cap Ayub tep, pepu upu

1– 2Uda, Teman mutu ngebo, er sida Elifasdi ton cap tamupra Ayub tep pepu.

Kanda moupra tenepetepo! Nun tuai mutu kunup nesala yumada, Allah tep meliptepe do? Nun pe puto dipu pel doptepe keca deiki di, Allah tep tek sisi meliptepe do? Tonda, nun tuai nesala kan-kan di, ila deiyo keca, weika di konum kael keamu ngebo peda, erda tek sisi Allah tep meliptu do? Ne kangeda, gume. Ware keca do yuma, Allah erda, tenpu keca peda pio men putarura tepa. 3Ware kupra, kan dumsisi kupra, pio telep kuramtuma peda, Allah pio erepra, akeca-keca yuma talepra, ila puto ngebo kurura cadi, kandi er tep, telep kupra deipmemetum do? Tonda, erdi kan tep, kange deipketu do? Tonda kan kumem keca yala-yala yuma, dumsisipu kuramtumpa, yuk nesala yumadi kan tep, “Tek sisi erda, pio dumsisi ngebo kurure,” pepra, gispal doramketenga peda, ange deikida, Allahdi kange deipkamker do? Ne kangeda pio gume.

4Gume, kandi moupra tenepetepkurume. Allahdi, “Ange kunkamrume, angeda pio men kunkamrume,” pepra deipseu upu, pio moupra talepmemdi, dumsisipu kuramtuma peda, ange deikida, Allahdi ange epra kan tep kange deipkamker do? Tonda, kandi dumsisipu kumemnya tep, Allahdi, kan damai ikin keca dopra deipkeredi, wenemkerur do? Ne kangeda, ange peda gume. 5Tek sisi ngeda, ake. Kanda mali kun keca weik konum kurume. Kandi mali-mali kumemnge cap, mali pel domemnge cap, men nukmanto kurura cadi, ange tep nengeda, Allahdi kan tep, wenemkerure. Ne kangeda, ange yuma tep nengeda, ukutaru ikin weik kurume.

6Ada, menop taru dordi dipdongopra, kupyakaramrumanen, ataru peda, kandi kan kayapu sisa cap, kan yala neng sisa cap, yuk neng cap tep, uperamrume. “Kanda putapkera cadi, ne co boda keana taru tep karepsene. Dinino, ‘Sundi ne co bo tamupra men karenkamnerum’ tenen, sun talerum telep keca, opkal do, yuk kunumna weik keca do, ange dopra, karepnemumpa, nedi ange yuma talenmanyanen, amenda taru, sundi ne pe co bo tamupra karepnerumnyopda, sundi karenkamnerum kunumna weik kecada, tamupra karepkamsen ja!” peramume. Uperamuma deiki di, kan tara neng, sun nong deikida, ila ikin keca deriramume. Tonda, anengdi, ukuramipanen, kan co bo men tamupra karepmanto kupkei pangeda, kandi sun aneng opkal cap, yuk bung keca cap, adipapu upula dalupra dororamume. Ukuramuma deiki di, pio mali kuramrume. 7Me putaramu nengda, kandi me men kareramumpa men jerami. Tonda, jen putaramu neng, kandi sun jen keca tep asipterepra, jen men kareramume.

8Kanda ila puto di talepra pel doramum taruda, yuk tali dakurami neng, sun wa pena tu yuma tep, kandi, “Atuda ne karepneso,” pepra, pe deipnepa, sundi kareramkei. Kan cap, kan utopu neng capda, dipru erepdana salnong-nong kapra amutu tu weika di dalupra dororamrumdi, teleppu kuramrume. Ataruda yuk neng yumadi kan tepapu gispal doramkei. 9Tonda, solu nerapudi, kan damai yana, “Uo, melipseo,” pepra mororamkei dinin, sun yuma tep nengeda, sun putana kecada, kandi men melipra kareramume. Tonda, sun nai yapu konum deiamidi, tami lyan nyapuda, kandi sun nong deiki ikin keca dopra deriramume.

10Amali-mali kunange weika di kuramuma tep nengeda, ukutaru kan kumemya dana-dana yumada, ‘Angebo poptepe’ tenen, yuk nengdi, nimi pona tep keca er sida youna, weik ketenepra, kan emban bisi yumada, ‘Pena di youpkamre’ tenen, weika di ketenepra, deiya kalengkununge. Adeiki di kan damaida, ila kange mun kecada, kan damai dato-dato di yakerepa, kan kange dipru neitamai yumada, kwar weik kukerure. 11Kan damaida, kunungna weik konum yanmara tep, konum damai kupkerepa, kange di ton cap dirineda, telep kupra men epkamarume. Tonda, ila me di opra, kan damai konum yakeredi, me dopmanto kupkamkere.

12Ange ton moupra tenepetepkurume! Allah erda im deiki tara kurure. Tonda, im neitamai dinin, yambulanun amutara ingmenge kuru yuma tep, Allah erda, im deiki alau tara bukra kuredi, men dirur do? Gume, erda, im deiki tara pio erepra ikurure.

13– 14Ange tep nengeda, warya tep, kandi tali kecapu tenerum do? Ada, ‘Allah er kururaida, pio alau tara dipu kurura cadi, dua di lelipdongoprepa, nun tuai mutu kunup nesaladi kunup keca cap, nun damai kuserur keca cap yumada, Allah erda men diserure,’ tenerume. Tonda, Allah erda dua dutara kepra, pio alau tara kurepa, dua di kemdongorepa, kunungrura cadi, ange yuma amutarada, nun tuai mutu nesala kunup kecada, men diserure. Ange tep nengeda, ‘Allahdi nun tep, upu bokra deipseredi, men wenepkamsere,’ tenerume. Tonda, ‘Allah erda im alau tara dike, tuai tara duke, daneitamaida, im sirik, mutu sirik wilimdona gangga ngaipu embarure,’ tenerume.

15Warya tep, kanda, menop taru kurami neng, kan co puna nengdi, mali kuramitopu, sundi wepra embarami bisipu, kan peda, ‘Abisipu putakerepa, tupa apu embankamne,’ tenememdi, pumun bisipu barum do? 16Sun anesalada, sun dena taru kapul men kupmarepapu, Allahdi anesalada puto di gipra, dopropupa, gum kupu. Ukupmantoda, nimidi ati domenge dinin, dato-dato di ila mo cepredi, me opyakaredi, ati cap, akati ayumnya co cap yumada, doupra dubaramretopu, Allahdi anesala yumada, menmena di konum gum kupra deipke.

17Sun anengdi, “Gume, Allahda akeca-keca talepra, Ila Puto Weik Deiyo Ngebo kurur dinin, erdi ware kupsetu do? Allah erdi nun damaida, ware ikin keca ton dopra deipkamsera guma,’ tenerami. Tonda, “Allah kanda nun damai tapra yukai gopra embankamrume,” pepra, Allah tep balila kuramidi, yanirtamami. 18Sun aneng yumada, ukupra tenerami dinin, Allah er dipapu ange kaukemnapu kuramudi, bung keca yala-yala yuma kareamupa, isomka kurami. Dinino, ne kangeda, sun mali kecapu talepra kunung nengdi tenenung kange yumada, ne Elifasdi tek sisi moupra men kael kepnedi, pio men kunkamne. Sun tenenung keca yumada, ‘Ne pio songe,’ tenenune.

19Allahdi sun mali kunge nesala tep wenemre taruda, sun dumsisi teleppu kunung nengdi epmengedi, kange deipra, si pio weika di letamnapu kungedi, kange pingpinga di kununge. Tonda, Allahdi, sun mali kunge neng tep wenepre pangeda, sun mali kun keca talepra pio men kunge nesala epmengedi, kange deipra, nalemengedi, sun mali kunung neng tep autununge. 20Autunung dingeda, sun teleppu kunge nesaladi, upepnunge. “Gume, sun mali kunung nengda, balila kuprapidi, nun tep, “Bisbisa kapra, amutarapu deipkamsepe,” pepra, yanitamamsei dinin, ukutaruda, sundi talepra kurami keca yumada, Allahdi konum yawa popra tapu. Dinino, ton tara ngeda, men yawa popra tapu. Tonda, men yawa popra tapudi, gawal men dakudi, tupa akwapunge yumada, Allahdi uku dokotepupa, uku di sun keca yuma jepropudi, tupa gawal tapunge yuma peda, uku di jepra gawal dakropu.

21Ange yuma tep nengeda, ne Eliasdi kan Ayub tep pepkene. Ukutaru kanda, Allah teneredi peserur upu yumada, ‘Angeda pio tek sisipu kurure’ tenen, teka tenepmemdi, er damaipu tamupra yankurume. Ukupmemnya deiki di, kanda telep dipapu kange deipra, tali dim peprappu kunkamrume. Tek sisi kandi ange kupmemnyopda, Allahdi karepkerepa, kanda telep kunangepu weika di doronkamrume. 22Tonda, Allahdi, “Ange kunkamrume, angeda pio men kunkamrume,” pepra, derikerur upu yumada, moupra gekepmemdi, ange yumada, kan dipru neitamaipu dopropmemdi, moupra deipkurume.

23Tek sisi kanda dipru amutara kepromemdi, Allah er damaipu, ka tamupra yankurume. Tonda, kan cap, kan nyapsilip cap, kan tara nesala yuma capda, mali kun keca cap, mali tenenange cap, yala-yala yumada, adipapu tapkurume. Ukupmum pangeda, Allahda akeca-keca talepra, Ila Puto Weik Deiyo Ngebo kuredi, sun tep ka tamupra teleppu kudinkamsere. Menop taru telep kuramrumtopu, ataru peda, ka di ton cap, Allahdi telep kudinkamsere.

24– 25Tonda, menop taruda, ila isomka ngebo kuramrum dinin, ukutaruda, kan dipru kange neitamai yumada, ‘Uo, angeda pio telepe,’ tenememdi kan talerum kecada, kunumna weik keca, er sida emas cap, perak capda, mawa derina gum dinin, akeca yuma tep nengeda, ‘Gume, ange yumada, tali tu buta utopua. Tonda, akunumna weik keca yumada, tali mekin kuramre gel wenenga utopu kurure,’ tenenkamrume. Akeca tepapu kange derina pio gume. Akeca yumada, konum tapmumdi, Allah er damai tamupra yamum dingeda, Allah er tepapu kange deipmumdi, er sipu eremkamrume. Allahda ila di erepra, akeca-keca talepra, Ila Puto Weik Deiyo Ngebo kurura cadi, sun kange dipru yumada, er deikipu derinkamrume.

Ukupmantoda, kandi, ‘Gume ukutaruda, ne emas cap, perak cap, utopu kunerur ngeda, Allah erda, ne emas utopua,’ tenenkamrume. Allah er sipu eremkamrume. Tonda kan perak pio telepnge wepra deriramruma utopu, Allah tepapu wepra talememdi, er sipu eremkamrume.

26Tonda, ukupmem dingeda, kandi Allah er tepapu, ila di kange deipmemdi, pio tupa-tupa pingpinga di kunkamrume. Tonda kanda, kan kange dipru neitamai yumada, teleppu kunkamruma cadi, Allahda akeca-keca talepra, Ila Puto Weik Deiyo Ngebo kurepa, er damai yamem dingeda, kwar tenena cap, ali dangna cap, pio gum di, kan urasin erepmemdi, Allah tep moronkamrume.

27Tonda ataruda, kandi Allah tep, “Naio melipra lyepneo,” pepra, moropmem pangeda, Allah er dipapu gekepra melipkamkere. Tonda kandi Allah er damaida, “Naio, kandi melipnemempa, nedi kan tep, ukupra, ukupra kunkamne. Kan tep karen kecada, ukupra karenkamkene,” pepra, pedina upu deiki konum pepra deiamum upu yumada, apeipmumtopu, tek sisi ukunkamrume. 28Kandi, ‘Ukupkamne, ukupkamne’ tenen, moupra tenepmemdi, konum katuai di pepmemnyopda, ange yuma tek sisi pio tupa-tupa nong kupbankamre. Atep, kandi pel donkamrumnge yumada, tupa nong kemnapu kunkamkere. Tonda, kan benkamrumai cap, dakunkamrumai cap yumada, Allahdi karekerepa, kan damai tupa gam kudikeredi, dirinkamkera cadi, tenimtonapu men kunkamkere.

29Nimi yumada, dipru erepra kungedi, salnong-nong kamnung neng yumada, Allahdi aneng dopra amutara kepra deipkamre. Kandi ange epmem dingeda, ‘E, sunda dipru erepra, salnong-nong kemamya tep, Allahdi aneng konum wenepu,’ tenepmemdi penkamrume. Dinino, tek sisi ngeda, dipru amutara kepra kunung nengda, ukunga deiki di, Allah er di anesala melipra lyemdorure.

30Kanda mali ton cap men kumemdi, Allah er teneredi peseretopu kumemnyopda, mali kun kecada, kan damai ton cap pio men kunkamkera tep, Allahdi kan tep, melipra lyepropkamkere. Deiyoda, mali kun keca talepra pio men kunge nesalada, Allahdi lyemdorura tep, pepkene. Atep ataru di gonga kepra, telep ngepu pio dumsisingepu pio kunkamrume, pepkene.

Aupuda, Eliasdi Ayub tep pepu.