Job 23

Ayubdi, ‘Ne tenenun ngeda, Allah damai pepkune’ tenen, pepu upu

1 – 2 Eliasdi Ayub tep upepupa, Ayubdi tamupra, er kayapu neng weneri tep pepu. “Dinino, ataruda, ne ikin weik kupnerepa, ne kange neitamai di, ‘Uo, Allahdi ukupnetue,’ tenenun ngeda, Allah er gekenai pepkune. Ne ikin kunerepa kange mun kange doupra, engepra ngolongnun dinin, ukupnerya peda, Allahdi ikin keca weik dopra ne nong deiki tupa derinerure. 3 Uo, ‘Allah er kururaida dan do?’ tenen, ne kael keamtenetoda, ne kange deipnetue. Tonda, ne adipapu er kururai kael keptenedi, er damai betenepa antapteneme. Utenena deiki di, er tep ila di putanerure.

4 Tonpa antaptenemedi, ne kunun keca cap, ne tenenun keca cap yumada, Allah er damai bena lap peptene. Neda er damai betenedi, ne pe sipyal deiki di, “Naio, neda mali men kunune,” pepra, upu weik peptenya deiki di, Allah tep antapra lap peptene. 5 Ange yuma lap peptenyopda, Allah er pedi ne tep tamupra pepnetu upupu, moupra gekeptenedi, ‘E, upepra pepnere’ tenen, gekepra kael keptene. Allahdi ne damai wareto upu tamupra pepnetu upuda, ‘E, aupu nong neitamaida ake’ tenen, ne gekepnedi, ‘Deiyo ngeda apepmare’ tenen, kael keptene.

6 Warya tep, Allah er ila puto di ne tep, “Kanda mali kurum ngeda ake, ake,” pepra, wenemna upupu pepkamner do? Angeda gume! Ne kangeda, ‘Allahdi bicau tenepnetudi, tek sisi ne peptene upu yumada, Allah erdi moupra gekepnetue,’ tenepne. 7 Neda, mali kun keca ton talepra men kunun cadi, Allah er damaida, ne tenepne upu lap peptenepa gekepnetue. Ukupra apeptenya deiki di, ne deikida, ikin keca ton kange di, men yanetupa, ton cap pio tep men doropkamne. Ne upu bongdina deiyo ngebo Allahdi, ne tep, telep kupra upu bokeipnetupa, ‘Akonuma,’ teneptene. Atep nengeda, amenda taruda, yuk deiyo nengdi, kange di ton cap, upuda pio-pio men bokeipnetenge.

8 – 9 Nedi, ‘Allah erda, dan cei kurur do?’ tenen, erbetene dinin, er tep keteng yakan tara pe, keteng dangban tara pe, utara pe, itara pe erbenkamne dinin, men epmemetene. Ne urasin tarupu dipeteptene dinin, atara men kurepa, men dinune. Angetopu, ne amnyo tara dipeteptene dinin, atara men kurepa, men dinune. Dinino, atara-atara yuma peda, Allahda aceipu men kurure. Atep nengeda, nedi Allah akunmatua peda, nedi er tep, men eptene. 10 Dinino, Allah erda, ne embanun bisi yuma cap, tonda ne yanipra banunai yuma capda, Allah er konum kael kemrure. Allahdi ne tep, ‘Telep kunkamre do, malipu kunkamre do? Tonda, ‘Angebo er dipru neitamaida, wareto kurur do’ tenen, dipetenerure. Konum dipetepneryopda, pio telep, dumsisipu kunkamne. Ukupmantoda, nimidi kunumna weik keca er si emas, mali keca paleamrepa, akeca dopra uku dongopmengepa, uku di amali keca yuma konum jepra gawal dakyopda, emas pio telep ngepu ketenemdiramengtopu, ne tep Allahdi dipetepneryopda, malinge ton men kapmanera cadi, tupa men dinkamre.

11 Neda Allahdi perur upu pio tep moupra talepnedi, tupa kunune. Allah erdi, “Abisipu benkamrume,” pepra deipseu bisida, nedi tapra yuk gwalin bisi men banune. 12 Angetopu, Allah erdi, “Angeda kunkamrume, angeda pio men kunkamrume,” pepra deipseu upuda nedi aupu moupra talepsidi tupa dombanapu kunune. Ne pe kange dipapu, ‘Ange kuptene,’ tenepne ngepu men kunune. Tonda, Allahdi peipseu upu moupra tenepnedi, ne kange dipru neitamaipu dongonune. ‘Aupuda, pio mambule,’ tenenune. 13 Allahdi, ‘Ukupkamne,’ tenere kecada, pio men tamrur ngebo kurura cadi, angepu tek sisi kurure. Wareto ngebodi, er upu peptua deiki di, Allah tep ton, men bisbisa kaptue. Nimidi sun upu peramtenga peda, adeiki di Allah er kange yuk men tenenkamre. Allah erdi ‘Ange kupkamne,’ teneramre ngeda, men tamrure. Erdi ateneramretopu kurure.

14 Ange utopu ton, Allahdi ne tep, ‘Angebo tep ange kupkamne. Nedi melipnepa, angebodi ukunkamre’ tenen, konum keteneipneu ngeda, tek sisi angepu erdi ne deiki kunerure. Angepu gum dinin, Allah erdi ne deiki kuna tep, ‘Ange kuptene, ange kupkamne,’ tenerur ngeda pio weik akurure. 15 Ange tep nengeda, Allah tep, ‘Erda pio puto weik cap, mambul weik cap ngebo kurure,’ tenepne dingeda, yo moropsepnerepa, pio kwar dangnune. Er kure keca yuma tep, moupra tenepetepnedi, ne kwar pio weik kunerure.

16 Allah erda pio erepra, akeca-keca talepra, Ila Puto Weik Deiyo Ngebo kurura tep, ange moupra tenepnedi, ne kange dipru neitamaida, kware weik kunerure. Neda Allah tepapu tenepnyopda, ne giso biri-biri penerepa, ne dipruda puto bounpu kunerure. 17 Kware weik kunerura cadi, neda kunukmeteng pepkai bena iniptenetoda, tupa kware men dangkamne. Teka, pio kunungnai wektenepa, ne urasin yuma singipdongopnetuopda, nedi Allah tupa men dinkamna tep, tupa kwar men dangkamne.

Aupuda, Ayubdi er kayapu neng weneri tep pepu.