Job 24

Ayubdi dukdongopra pepu upu

1 Allahda, akeca-keca talepra, Ila Puto Weik Deiyo Ngebo kuredi, sun mali kunge nesala tep, upu bokeipredi, pio mali kunung neng tep, pio wenepra popkamre taruda, ware keca deiyo tep, erdi, “Atumida ake, ataruda ake,” pepra men lap peserur do? Angetopu, Allahdi, peserur upu, moupra talengedi, dumsisipu telep kunge nesala ban-ban yuma peda, Allahdi, pio mali neng tep, upu bokeipredi, aneng tep wenepra popkamre taruda, ‘Atumi ake’ tenen, men kael keptenge. Sundi ataru men dinungada, warya tep do?

2 Mali kunge nesaladi, yuk neng wa pena tep tu wilimdonaida, peten kepra deiamenge nge, gisikra yukai deipmengedi, atu ton cap arapra upula doropmengopda, sun tuda go weik kemdonunge. Tonda anesala dipu, sundi yuk neng domba bisam peinai yuma bena, arapra upula doropmengedi, atu neitamaida, sun pe talenung domba bisam dopra deipmengedi, peinunge.

3 Er nai yapu konum depmengedi, tapmenge lyan ngebo, er pe talerur keledai bisam tep, sun mali kuna nengdi upula dopropmengedi, gipra dubanunge. Tonda, amali neng dipapu, solu ner tep, “Kanda nun tep, “Co bo karepnetume,” pepra, moropsemumpa, karepmupu ngeda, ka tamupra kapul men karepmaserema tep, amoropmasemum keca enkamserem taruda, nundi karepkepu keca yo pununa tep, nundi kan sapi bisam bisampu dopra, nun ati damaipu deipkamepe,” pepra, dalupra dopropmengedi, derirbanunge. Ange ukunungada, pio malipu kununge.

4 Sun amali kunge neng dipapu sun tali kankan nesala tep, ‘Nun embanmap bisida, sundi ton abisida men betume. Sunda gopropso!” pepra, upu sengdongonunge. Ato keca weika di tupa kununga cadi, sun kankan kunge nengda, ‘Sun yu nengdi, ila ikin keca nun nong deiki deipsenung’ tenen, sun pe mutu neitamaipu tapra, yukai dabena, inipra kununge. 5 Atep, sun tali kankan nesalada, ukupmanto, bura tara kure keledai bisam, er jena tep, ‘Ne jeptene kecada, dan cei kurur do?’ tenen, putaprepa, katawai mutu neitamai erbaramretopu kununge. Ange utopu, sun tali kankan nesaladi, ‘Uo, nun nyapu sun jen keca erbenkamep’ tenen, putaprepa, me pio gum, ila pala katawai mutupu bengedi, dana-dana tara dipetepmengedi, tali paramre keca epmengopda, akeca dopra tamupra yana karepmengepa, sun nyapudi jenunge.

6 Akankan nengda, sun kange mun tep kungedi, sun pe wa tuda men talenunga tep, yuk neng sun wa penaipu bena, awa tu deiyo ngebodi, kidoredi tapmare kecada, sun anengdi akecapu kipra banunge. Tonda, sun tali kankan nengdi, sun mali-mali kunung neng, sundi talenung anggur tapu du wa, peamengai wekmengedi, anggur deiyo ngebodi dangdoredi, tamrur duda, dakrapmengedi bupra menengnunge. Sun wa tu cap, jen keca capda, pio gum tepa.

7 Sun tali kankan nengda, lukunda taru bupu kepra man keca, er sida selimut, pio gum tep, lukunda neitamai yuma, bupu kepra men maptenge. Bul kupmarepapu manunge. Tonda, telep bupu opkal ton men talenunga cadi, nong banangapu kununge. 8 Atali kankan nengda, mutu dam mutu kunmangepa, ila mo cepredi, sun nong deiki mo poprepa, bul weik kurure. Ukuprepa, aneng sun ati pio gum cadi, bul weik kupmengopda, ‘Yambulanun ton bupu kupsetu’ tenen, putaprepa, bura tara gel deikipu manunge. Tonda, kange mun kuprepa, gel imir pumbonpu wengbanunge.

9 Ton tara pio mali kuna nengdi, sun nai cap, sun nin cap, pio men kuramre lyan nyapuda, dalupra dopronunge. Ada, yuk nerapudi, awein nyapu tep, moum teyung tupa karepmenge taruda, puto di anyapu doronunge. Tonda, akeca-keca men talenung neng, tali kankan nengdi co bo putaprepa, amali neng damai bena, “Keana taru tep karepsetume,” pepra moropmengepa, karepmengopda, doronunge.

Dinin, amenda taru, sun kankan nesala, aco bo tamupra men karepmanto kupmengopda, sun mali kuna nengdi, sun metek nyapuda, dalupra doronunge. Ada, sun keca dopropmengopda, akankan neng di deipmenge melo mida, akeca yo pununa tep, dalupra doronunge. 10 Bung keca talena gum, tali kankan nesalada, sun opkal gum tep, tali nong banangapu embanunge. Tonda, sunda jena putanmarepapu, jen jepne gum, sun adipapu yuk ila nengdi talenung gandum wa pen dam bengedi, gandum dupu bena dakmengedi, gandum du taingmengaipu dubanung dinin, adu peda, sunda men jeptenge.

11 Angetopu, akankan nengdi Saitun co du dakra taikmengedi, asaitun co du neitamai di minyak Saitun kekemnunge. Tonda anggur du dakra yanipmengedi, anggur me ketkemnung dinino, sun apel donge kankan nesalada, anggur du me putanmarepapu, ame peda, sunda men jeptenge. 12 Ila ati arum dopra kunung mutu neitamai peda, sun tali kankan nesalada, ikin pio weik kununge. Nimidi popmangepa, ila susu jeramre neng cap, nimi depmanto kunmange neng capdi, “Uo, nun nai Allah, kwetepra deipsetumdi, melipra lyepsetume!” pepra, mali pepra ngolokra engenmangedi moronunge. Amutu kunge nesala yumadi alelim gekenunge. Dinino, ne kangeda, sun anengdi engenmangepapu, Allahdi sun moronung ngeda, kaukeptamredi, men gekerure. Tonda, erdi sun tep ka tamupra telep kupra men derirure.

13 Tonda, sun pio mali kecapu talepra kunge nesala yumada, ‘Dirineda, nun songe,’ tenepmengedi, lukunda taru neitamaipu kange deipra, tali lupra embangedi, pio mali-mali kunangepu kununge. Anesalada, keteng komuni taruda, yuk neng embanung bisi deiki men embanunge. Ton ngeda, sundi, ‘Dirine kupre taruda, nun song,’ tenenunga cadi, dirin kwamre bisida, yuk nengdi kael kemnung dinin, amali nengda abisi men kael kemnunga cadi, abisi deiki men embanunge. 14 Ukununga cadi, ukupmanto ngeda, nimi pona ngeboda, mapmaryanen, kapul men berekmare taru di menmena bungrure. Bukyopda, adipapu sun tali kankan neng cap, akeca-keca gum tep, pio putaramre neng cap, tali lupra porbarure. Tonda, kapul men berekmare taru di, menmena bukrapredi, upula dona neng kurameng utopu, yuk neng keca upula doronunge.

15 Ange utopu ton, yuk nimi konum domi nerapu dinin, upula nyangrur ngeboda, ‘Uo, menmena iptupa, lukunda neitamai di, yuk neng, nimi konum dopi nerapuda, upula nyaktene’ tenen, moupra dirure. Tonda, angebo erda, ‘Yuk nengdi ne urasin epnengedi kael kepnenung’ tenen, er urasin deikida, galun keca di kepra lelimdongorurdi, embarure. 16 Sun pio mali kun keca talepra kunge neng cap, upula dona neng capda, lukunda neitamai dipapu, yuk nesala ati buplan daktapra wekmengedi, ‘Sun telep bung keca dan cei inipra deipi do?’ tenen, moupra dirpetenunge. Keteng komuni taruda, ‘Dirin cadi, epra kael kepsenung’ tenen, inimdononunge.

17 Ukununga deiyoda, ake. Anengda, pio lukunda neitamaida, pio mali kunangepu kuptenga cadi, ataru tep kange deipra kungedi, ‘Lukunda taruda, ipna taru utopu kuserure. Lukunda taruda, kunungrura cadi, ange tep nun kange pio loserure,’ tenenunge. Yuk nesalada, ‘Uo, lukunda neitamaida, wareto ikin keca nun damai yankamser do?’ tenen, kwar-kwara di kunung dinin, amali kunge nesalada, lukunda neitamai kuramre kange mun keca yuma tep nengeda, sun konum kael keamya cadi, sundi akeca tep, kange deipra kununge.

18 Mali kun kecapu talepra kunge nengda, me ila di opyakaredi, kanam keca menmena, me di doupra baramretopu, aneng cap, sun keca cap doupra barure. Tonda, sun anengdi talenung tu tep nengeda, Allahdi sun wenemna tep, atu mali pepra widongorure. Ukurura tep, anggur tapu wa pen dam pel dona nesalada, anengdi talenung anggur wa damai pio men banunga cadi, gum kupredi, dim bulung pepnapu kurure.

19 Ukupmantoda, mul duduya mo, er sida salju deiamre dinin, akuramyanen, dou mapredi keteng deiprepa, keteng bupu weik kupyopda, adipapu asalju cap, amutu me cap yumada, gum kudaramretopu, sun mali kun kecapu talepra kunge nesalada, konum depmengopda, tu pum bon dongopmengopda, adipapu dim pepkamenge. Konum deami neng wengnung mutu, er sida Sheol mutu wekmengedi, dim pepkamenge. 20 Aneng deiami nerapu peda, aneng tep, ton cap pio men tenenkamenge. Adipapu lupronkamenge. Aneng depmengopda, sun nongda, kwali dipapu jepropkamenge. Yuk nesalada, amali neng, sun si ton cap, si sipengepa, pio men gekenkamenge. Ukupmantoda, co tekamyanen, ikin tep sesa kwenepra, tuai dourbena maramretopu, sun aneng peda, utopu kupkamenge.

21 Ange yuma ukupkamenga deiyoda, anengdi solu nerapu sun deiki ikin keca deriramenga tepa. Tonda, sun nyapu derina gum nerapu peda, sun deiki ikin keca deipra, mali kudiramenga tep, amenda taru sun peda, pio bicau tenena gum cadi, gum kupkamenge. 22 Sun ila puto nengda, ‘Nun gam kuna taruda, go weik tupa akapkamser’ tenenung dinino, Allah er ila puto di akeca-keca yuma talepra kurura cadi, er tenemu taru konum kupyopda, aila puto neng yuma popra gum kudirure. Allahdi, ‘Anengda konuma,’ tenepre taru, er pe buru erepyopda, sun mali kecapu kunge nengda, adipapu depkamenge. ^{▼▼depkamenge – Ibrani upu deiki seki ayatda, ikin weik kurura cadi, akayat deiyo ngeda, yambul walwalto kunupe. Dinino, ton tara ila kael nengdi, ‘Deiyo ake’ tenen, lap pepitopu, angepu sekmupu.}

23 Aneng sundi, ‘Nun tupa telep kupra kunkamep’ tenena deiyo kecada, Allahdi keana taru tep karememerur dinino, erdi, ‘Amali kunge nengda, ware kupkameng do? Telep ngepu kupkameng do, mali ngepu kupkameng do?’ tenen, aneng yuma tep, tupa-tupa kalekra dinapu kurure. 24 Aneng sunda, keana taru tepapu telep kupra kunung dinino dortaruda, ton cap tupa gam men kunkamenge. Konum depmengopda, pio-pio tep dim pepkamenge. Ukupmantoda, mutmuta keana taru tep, mutmuta belepra tekapyanen, nunumdoramretopu, sun aneng peda, utopu kupkamenge. Tonda ukupmanto, gandum du mourur dinin, er yateng sekropmengopda, er yo cap, nong cap, du cap yumada, nunupropredi, gelal sedorure. Ange utopu, sun aneng peda, Allahdi konum tenemutopu, dortaruda sun yuma menmena gum kupkamenge.

25 Nedi arup taru, ‘Akururnge yumada ukupra kupkamre,’ pepmasen upu yumada, sundi, ‘Angeda tek sisi men kupkamtue. Angebodi pepmaser ngeda, tali upupu pepmasere,’ tenepmum dingeda, ware ngebodi, ‘Ange yumada, men kuptu keca,’ pepra, nong neitamainge yumada, erdi lap pepsetupa, er tenerur ngeda, teka teneptepe do? Ne kangeda, angeda men pepmanto. Arup taru di pepmanunge yumada, tek sisi nong kupkamre ja, pepsene.

Aupu yumada, Ayub cap, Zopar capdi peprei.