Job 25

Bildaddi ton cap tamupra pepu upu

1 – 2 Nimi er si Bildad, erdi ton cap tamupra Ayub tep pepu.

Allahda, ila di erepra deiki tara kuredi, akeca-keca yuma talepra, ila puto weik ngebo kurure. Atep nengeda, nun tuai mutu kunup nesala yumadi er tepapu kwar weik dangkamepe. Allah er puto weik cadi, erdi talepra kururai, im deiki tara peda, pio dim pepra telep kunange tep, ketekemdirura cadi, ange yumada teleppu kurure. 3 Allah er damai melipra kungedi, er jen talena malaikat yumada, denge pio weik, men nukmanto kununge. Ware ngebodi nuktudi, ‘Sun dengeda ukupra kununge,’ pepra lap pepsetu do? Tonda, mutu ban-ban yuma talerura tep, dan tara mutu ton, Allah er dirine men kurur do?

4 Allahda, pio ila mambul ngebo kurura tep, nun tali tuai mutu nesala akunupa yumada, Allah er damai tekmepepa, “Sunda pio tek sisi, pio telep nengpu kurume. Nedi pesenun upu yuma moupra taleprumudi dombanapu kurume,” pepsetu do? Tuai nerapudi derinung nyapu kunupa cadi, wareto ngebo, mali kuna gum dipapu, telep lengna ngebo kuptudi, Allah er damai tali lupra bena kutu do? Gume, nun yumada, mali kuna gum, pio dumsisi kupra, telep nengpu men kunupe. Nunda mali kun nengpu kunupe.

5 – 6 Allah er kangeda, ‘Nedi ketekepra deiamsi war, er dirinda, yambulpu kurure. Tonda, nedi ketekepra deiamsi kuru peda, sun dirine capda, yambul kunungnapu kurure,’ tenerure. Adirin keca yuma tepapu, Allahdi, ‘Sun dirinda, pio telep gume. Tonda akeca yumada, pio lengna keca men kurure,’ tenerura cadi, er meneng damaida, akeca men yana kuptue. Atep nengeda, nun tali tuai kunup nesalada, pio telep, lengna neng men kunupa cadi, er damai bena men kutepe. Gume, ne kangeda, ‘Tuai mutu nerapudi derinung nesala yumada, lengna neng ton men kununge. Sunda tali kudu cap, tonda kwali cap kunmange,’ teneserure, tenepne. Allah erdi diseryada, tek sisi kunange ton pio men kunupe.

Bildad erdi aupu pepu.