Job 26

Ayubdi tamupra, Bildad tep, pepu upu

1 – 2 Ayubdi tamupra Bildad tep pepu, “Kandi ne kange pio boun kupneunge cap, ne nong puto men kupneu ngebo tep, kandi dipru kwadipra konum melimnemume do? Gume, kandi penerum upuda, kange derina upu gume. Ne buruda, pio puto gum kupneu dinin, kandi ne tep men melimnemume. 3 Tonda, tenepetepkurume. Kandi ne tep, upu weika di konum pepmaneruma deiki di, ila kael kemna deiyo upu di melimnerum do, gum do? Kandi ne tep, ‘Erda pio walwal ngebo kurure,’ tenenerum dinino, kael upu deiki di kapul men melipmanerume. Kandi ne tep, ‘E, telep kuna ngeda, ake. Ukupra kupmemnyopda, telep kupkamker ja,’ pepra, peteremna telep upu weika di kapul men pepnemume.

4 Atep nengeda asipetepkene. Ware kael ngebodi, kan tep, ‘Upepkurume, upepkurume,’ pepra, pepetepkeupa, adeikida kandi ne tep konum pepmanerem do? Tonda, wareto ngebodi, er kange tenenange neitamai di, ‘Kanda aupu pepmemdi, angebo peterepkurume,’ pepkeua tep, er upu dopra pepmanerem do? Ayubdi Bildad tep, pepu.

Bildaddi, Allah er ila puto weik kururnge tep, lap pepu upu

5 Ayubdi upepupa, Bildaddi tamupra, Ayup tep aupu pepu. Konum deami nesala wengbanung mutu kunge nimi sambala yumadi, Allah tep tenepmengedi, kwar dangmengedi, yo moropsemengedi, berber penunge. Tonda, tuai mutu iriamu tara deiamu ila mokon cap, amokon pumbon kunung keca yuma capda, Allah tep tenepmengedi, lungdangedi, ila kwar dangnunge. 6 Konum deami nesala wengbanung mutu, er sida Sheol mutu neitamai kunge nesala cap, amutu neitamai kurur keca yuma capda, Allahdi tupa dirure. Tonda, konum deami nesala sun sambala kunungai, er sida Abadon ^{▼▼Abadon mutu – Pumun taruda, sun Ibrani upu perami nesalada, konum deami nesala, sun sambala wengbarameng mutu si tep, sun upu deiki di si butene perami. Ton taruda ‘Sheol’ mutu perami. Ton taruda, ‘Abadon mutu’ perami. Dinino, amutuda tenpua.} mutu, akunungaida, Allah erdi ange yuma jenek kupra dirure. Ware mutu do yumada, Allah er damaida, men lelipdongopmanto kurura cadi, erdi dinapu kurure.

7 Akeca-keca kapul men kwamu taruda, deiki tara ila goda, gang-gang weik kupudi, go kupupa, Allah er dipapu, itara imda, ketekeipudi, itarapu bepekra deiamupa, tupa akurure. Ange utopu, pumun taru aila go kupkai neitamaida, tenpu keca peda men kwamu dinin, aneitamaida, Allahdi tuai mutu ban-ban yuma ketekeipudi, aceipu deipupa, tupa akurure. 8 Allahdi im neitamai dinin, mirin dua neitamaida, mo weika di ketenepra derirur dinin, amo ikin di aduada men bapra sakmanto kurure. Allahdi tenerur tarupu, mo cemrure. 9 Allahda, akeca-keca yuma talena deiyo ngebo kurura cadi, er ila dirin weik kurur bungna keca, er sida takhta, angeda, ^{▼▼takhta – Ayat 9 neitamaida, Ibrani upu seki ngeda, ikin kurura cadi, sundi seki ngeda, ‘Tahkta’ pepra seki do? ‘Ware’ pepra seki do? Nun yambul walwale dinin, ton tara ila kael keami nengdi, “Takhta’ pepra seki’ peramya cadi, angepu sekmupu.} ‘Nimi do, malaikat do, epnenung’ tenen, er bungrurai takhtada, dua weika di adeipupa, adua amnyo tarada, er takhta deiki bungrure. Aketekepra deiamu dua di er bungrurai lelimdongomrure.

10 Tonda, ila laut mokon deipka deikida, Allah erdi wilimna keca konum ketenepra deipu. Ada, kunungnai di dirine dopropudi, wilipra kunungna yuk, dirin yuk kepra bokeipu. Petenkemna tep, akeca butene neitamai wilimdonai tep, bokra deipu. 11 Allah er ila puto di, im alau tara go ketenepra deipunge dim pena tep, baripra deipu ayumnya ketenepra deipu ngeda, Allah damai yaredi, wenemna upu peptuopda, akayumnya co yumada, ila kwar tep, long-long perure.

12 Pumun taru di, ila laut mokon yumada, puto weik kuramnga cadi, welepna, kwerepna kuramu dinin, Allah er ila puto di aila laut mokon yuma deipkaida, ‘Dim pepra acapu deiptu,’ tenepu. Tonda, Allah er ila kael kemrura deiki di, aputo weik keca, laut mokon neitamai kurur yu bal, er sida Rahab peda, popra gum kupra deipu. 13 Angetopu, im alau tara neitamai kwamu dua yumada, im neitamai kwamu keca yuma lelimdongomu dinin, Allah er isin di pung pepka deiki di, adua yuma gepropudi, im yopu dandopu akurure. Tonda, Allah er ila puto buru di, ila laut mokon pumbon kuramu yu bal, er sida, Naga peda talepra popudi gum kupra deipu.

14 Dinino, ange-ange yuma lap pepmaken ngeda, ila puto akurur dinino, ‘Allah er puto di pel dorur ngeda, akonuma,’ tenena gume. Ange yumada, yambul tarangepu pepmane. Nun nimidi Allah er kure ngeda, yambulpu kael kemnupe. Ukupmantoda, Allahdi kurur kecada, nimidi nun amul pumbonda, mur-murumna upupu pedisenung nge utopu kurure. Nundi dinup ngeda, Allah er ila puto kururnge kael kemna tep peten kemdirure. Weik tara ngeda, men lap pepmanto. Allah erda, pio ila puto di kurur ngeda, nundi men kael keptepe.