Job 27

Ayubdi dukdongopra pepu upu

1– 2Ayubdi kange di ton cap, dukdongopra pepu upuda ake.

“Gam kuna deiyo ngebo Allahda, tek sisi pio gam tupa kurure. Ange utopu, neda tek sisi mok upu pio men penkamne. Dinino, Allah er si deiki di pepne. Allahda, ila di erepra, akeca-keca yuma taleredi, Ila Puto Weik Deiyo Ngebo kurur dinin, ne kangeda, Allah erdi ne deikida dumsisi telep kunange ton men karenerura cadi, ne kange dipru neitamaida, pu jenerepa, ikin weik kunerure. 3– 4Ne tek sisi pepne. Allah er Sambaladi ne isin karepneua deiki di, gam tupa kunune. Ne nong gam tupa kunkamne taru yumada, ne sipyal deiki di mok upu ton men penkamne. Tonda, ne lyemu deiki di kip upu ton men penkamne.

5Ange tep nengeda, sun weneri nengdi ne tep pepmanerum upu tep, “Sunda tek sisi upu pepmanerume,” men pepsetene. Neda, akuramnyanen, amenda taru depkamne taru peda, “Neda men mali kupsi,” tupa penkamne. Angetopu, deiyo men kwapmarepapu, “Neda mali kupsi,” pio men penkamne. Dumsisingepu tenepnedi, penkamne ja. 6Ne gam tupa kunkamne taru neitamai yumada, “Allahdi, ‘Angeda kunkamrume, angeda pio men kunkamrume,’ pepra deipseu upuda, moupra taleamsidi, mali kuna ngeda, men kuramsi,” pepra tupa lap penapu kunkamne. Angeda, men tapkamne. Tonda, ne pe kange dipru neitamai peda, ‘Kanda mali kuramume,’ pepra, men wenemnerure. Ne kangeda, neda pio tupa lengnapu kunune.

7‘Telep ngeda ake,’ tenepne. Ada, Allah erdi ne tep yu tenenerur ngeboda, “Kanda mali kurume,” pepra wenepkamemere. Tonda, Allahdi ne tep bisbisa kamnerur ngebo tep, “Kanda dumsisi men kurume,” pepra wenepkamemere. Ato nengda, Allahdi, “Angeda kunkamrume, angeda pio men kunkamrume,’ pepra deipseu upuda, pio men talenunga cadi, malipu kununga tep, Allahdi aneng wenepkamre ja!

8Tonda, sun mali kun kecapu talepra kunge nesalada, Allahdi anesala tep wenepredi, yawa poptapyopda, akonuma. Atep, sundi “Uo, ‘Ange ton kuptepe’ tenen, putapsere,” pepra tupa teneptengedi, men penkamenge. Adipapu depkamenga cadi, sundi ange pio men kuptenge. 9Sun aneng damai ikin keca weik yarepa doropmengedi, kange mun kuprepa, engenung taruda, Allahdi gekepkamemer do? Gume, ada pio men kupmanto pepsene.

10Tek sisi sunda, ‘Allah nun songe. Erdi peserur upu pio men gekenkamepe,’ tenenge nesalada, sundi Allah tep, akeca-keca talepra, Ila Puto Weik Deiyo Ngebo kure ngebo tep, tek sisi kange derinkameng do? Gume er tep kange men derinunge. Tonda, sun anengdi, ‘Allah tep, kange deipmepedi, tupa moronkamep do? Gum do?’ tenenunge.

11Nedi sun tep, Allah er ila puto kurur nge cap, mali kunge nesala tep, ila di wenemrur nge capda, nedi lap pepra peterepkusene. Allahda, ila di erepra kuredi, akeca-keca yuma talepra, Ila Puto Weik Deiyo Ngebodi, ‘Ukupkamne,’ tenerur ngeda, nedi sun tep lap pepkusene. 12Dinino, tek sisi ngeda, sun weneri neng yumadi, Allah kure keca konum diruma cadi, sun peda konum kael keprume. Atep, ware keca deiyo tep sundi tali-tali upu pertamnerum do? Sundi nong men kupkamre upu deiki dipapu pepra, ne tep wenemnerum do?

Allahdi sun pio mali-mali kunge nesala wenepkamrenge tep, Ayubdi lap pepu upu

13Uda, Ayubdi aupu ton dukdongoprapepu. Allahda, ila di erepra, deiki tara kuredi, akeca-keca yuma talepra, Ila Puto Weik kurya Deiyo Ngebodi, sun balila deipra, mali-malipu kunung nesala tep, wenemkamre ngeda adano. Tonda, sun puto nengdi, sun amutara tali kankan nesala deiki, ikin keca weik derinung neng tep nengeda, Allahdi sun tep wenepredi, menenga keca karenkamre ngeda, pepkusene.

14Mali kunge nengdi, sun nyapu deiamengepanen, denge weik kuptenga peda, sun neng yapuda, mar podanai di popmengepa dedonkamenge. Tonda, sun nyapu denge weika di deiptenga peda, anesala sun jen kecada, tupa-tupa sungtalenkamra cadi, jen pio putanapu kunkamre. Sun jen keca yumada, gum kudonkamre. 15Amali kunge nengdi deiamenge nyapu, ton ngeda yuk yu nengdi men popmengepa, tupa gam kunkameng nyapuda, amenda taru ila kange mun sangdana pu jerya deiki di, aneng peda depropkamenge. Ange deiki di konum depmengopda, sundi domenganen, tapkameng solu nerapudi, sun nenge yapu, ukupu depmange neng tep, ‘Uo, bicaue’ tenen, mali kange doupra men engenkamenge.

16Tonda, sun mali-malipu kunge nengdi, pio kunumna weik keca, er sida perak, tu buta men nukmanto, pio weika di kuramretopu, sundi perak ton kunupmengedi, mawa derina tep, deriramengepa, weikanun ton welepkamre. Tonda, nimidi, kerah tu palipmengedi, weika di taplakra deriramengtopu, sun telep opkal peda, weika di kunupmengedi, taplakra deriramengepa, weikanun ton welepkamre.

17Dinino, sundi kunumna weik keca perak cap, opkal cap, pio weika di mawa deiamengada, sun dipapu men doronkamenge. Tek sisi ngeda, ake. Sundi derirameng telep opkalda, dumsisi kupra, teleppu kunge nengdi, aopkal dopra kenengkamenge. Tonda, amali kunge nengdi, perak weika di derirameng ngeda, yuk ngebo dipapu doronkamre. Erda mali kuna pio gum dipapu, pio dipru amu kepra bouna di, dumsisi kurur ngebo, erdi doprapredi, erngepu kupkamre.

18Malipu kunge nesalada, sundi dopra kunung atida, gwalema ati domya pun deipredi, lyupra sangamretopu, kupkamemere. Tonda, sundi donung ati yumada, menmena dipapu, lyupyopda, gum kupkamre ja! Ukupmantoda, nimidi, sun wa penai kalengna tep, keana dodina ati dopra deipmengepanen, menmena di pun deipra lyupyopda, gum kuramretopu, sun ati peda, utopu kupkamre.

19Ange tep nengeda, sun mali kun kecapu talepra, mali-malipu kunge isomka nesalada, u dungmarepa, kange douna gum di, tali manapu kunkamenge. Dinino, sun anengda, mapmenganen, bukronge taruda, sun talepra kunge isomka keca yumada, konum gum kupropkamre. Ukuprepa, ton cap tamupra ange yuma men talepra kunkamenge. Mapmanganen, berekyopda, ipna taru bukrongedi, diramengepa, akeca yuma konum dim pepkamra tepa.

20Ila ikin keca dato-dato di sun damai yakaramrepa, kware pio weik kunkamenge. Ukupmantoda, me opyakaramretopu kupra yakaredi, aneng yumada, dopra dubenkamre. Lukunda neitamaida, ila kumanya dato-dato di pung pepra yaredi, kolupu co bo sisa tali kupra dubaramretopu, sun mali kunge isomka nengda, adipapu utopu doupra benkamemere. 21Ange utopu, nun mutu neitamai kuramretopu, keteng yakan tara di, ila puto kumanya yaredi, sun ati bo neitamai kunmangepapu, aneng adipapu tomopdaro karenai dubenkamre. Ukuprepa, sunda dim pepkamenge.

22Allahdi sun aneng tep, tupa bicau men tenerura cadi, erdi ila puto kumanya karepyopda, akumanya ila puto di pung peprepa, anengda tomopra donongbenkamre. Sun anengdi, ‘Uo, ila puto kumanya di popserur’ tenen, sun anengda, ‘Adipapu yukai sepdara bendopkup’ tenen, kware weik kuprepa, yuk keca tenena gum dipapu, sun lyemdana tep, sepdara yuk karenai bendopkamenge.

23Aneng saka dourbengopda, ukupmantoda, aila mungna di, er kange deipra, er buru tang bongopredi, aneng tep, nalepra auturure. Aisomka neng peda, dan tara embenkungai yumada, aputo kumanyadi pung pepkamra deiki di, “Sunda, pio mali kuramrum nengpu kurume,” pepra, yap-yap pepkamre.