Job 28

“Ila kael kemna deiyo kecada, nimidi men epra kael keptenge,” pepu upu

1 Ayubdi aupu tamupra pepu.

Nun yuma konum kael kepmupu. Kunumna weik keca er si perakda, akeca tu pumbon kurepa, ‘Dopropkup’ tenen, palinai akurure. Tonda, kunumna weik keca er si emasda, tu pumbon di konum palipmengedi, ‘Emas cap, mali tu cap tapakra kure ngeda, ‘Mali keca gum kupra deipkamep’ tenen, emas dopra uku dongonungai tep, nimidi ketenepra derinunge. 2 Gat keca er sida besi, ange peda, nimidi tu neitamai palipra doronunge. Tonda, yuk yala gat keca, er sida tembaga peda, tu pumbon dinin, gat gel neitamai di palipmengedi doronung dinin, adeiyo keca dopropmengedi, ‘Pio telep kweipkamep’ tenen, uku dongopmengepa, gel mereng-mereng pepya deiki di, tali gelda, jeproprepa, tembaga pio telepngepu tupa akapyopda, ange ton ketenepra doronunge.

3 Ukununga cadi, ‘Kunumna weik keca emas do, perak do, tonda gat keca deiyo ngeda, dan cei kurur do?’ tenen, sun tu palina ila kael nengdi, ila tu pumbon wekmengedi, pio kunukdongopka neitamaida, wekrapmengedi, ortara, atara yuma weica upmenga di dirterenunge. Ukupmengedi, tu amu neitamai wekrapmengedi, akapu keca yuma dirterenunge. Aceida, kunukdongopka neitamai di, nimi wekrapmengedi, kunumna weik gel tep enunge.

4 Anengdi, pio karenai, nimi pe ton kuna gumai, tonda nimidi yanipra embana pio gumaida, sun tu palina deiyo nengdi, aceipu sun pel donunge. Amutu-amutu tali embanung nesalada, sun tu pumbon neitamai pel donge nesala men dinunga cadi, pio men tenenunge. Teka, sun tu palina pel dona deiyo nengda, lelim-lelim pena keca pio gumai, dim bulung pepkai wekra, ‘Saka popserur’ tenen, tapu di, sun nong gerekdongopmengedi, sunda apel donunge.

5 Tuai mutu ban-ban yumada, tu deiki di jen keca bolongrepa, nimidi akeca kipra jenunge. Dinino, sun tuai mutu amu tarada, tu cap, gel cap yuma palipra, tali-tali kepra tamnunge. Ukupmengepa, tu neitamai kapu keca yumada, yawarapra tapmengepa, talipu kurure. 6 Tu amu neitamai kapu gel, er nong neitamaida, kunumna pio weik gel, er sida Lazurit, epmengedi, doronunge. Tonda, yuk gel neitamaida, konum taikmengedi, tu sikke buktamengaida, kunumna weik keca, er sida emas, pio telepnge ton epmengedi, doronunge.

7 Sun tu pumbon palina deiyo nengdi pel donungaida, tu amutara neitamai kurura cadi, im neitamai lakra embaramre ma, er sida Muldamnye mada, amutu ton pio men dirura cadi, men kael keptue. Tonda, Bep ma peda, amutu deiki tarapu embarura cadi, tu amutara neitamaida, er asuru di pio men diredi, men kael kemrure. 8 Ange utopu, bura tara gam kuramre keca ila yu pus, er si Singa pus cap, tonda yuk tuai gam kure keca ila yu keca yuk-yuknge peda, amutu neitamai embarami bisida, dimbulung pepka cadi, akeca yumada, ton men yanipra embanunge.

9 Dinino, sun tu palina deiyo nengdi, ila gat gel bukamngai palinunge. Tonda, ila mutu buma peda, ‘Kunumna weik gel, er amu tara kurur do?’ tenen, amutu deiyo yumada, tu palipmengedi, gamurtamnunge. 10 Nimidi amutu amu tara neitamai palipra, ila gel bukamnga neitamai ton, nimi bisi embena tep, palipra deipmengedi yaipmengopda, agel nong neitamaida, kunumna weik gat keca yala-yala yumada, sun asuru di epmengedi, palipra doronununge.

11 Tonda tu amutara neitamaida, me pukra yakareyai peda, ‘Wareto keca akapmar do?’ tenen, wekmengedi enunge, ukupmengedi tu pumbon pio iniamre keca, kunumna weik keca yala-yala yumada, katauai keprepa, sun asuru epra kael kemnunge. Akeca peda dopropmengedi, dirinai deriyakanunge.

12 Dinino, ila kael kemna deiyo kecada, dan mutu di epra kael keptepe do? Tonda, ware mutu neitamai epeteptepedi, ‘Telep kuna ngeda, deiyo ake, ake’ tenen, kael kemna keca, nong pio neitamai ngeda, yuk nengdi peterepsetengepa, kael keptepe do? 13 Ila kael kemna deiyo keca, nong neitamainge kururaida, tuai nesaladi, ‘Amutu betepe dingeda, adeiyo keca epra kael kepkamepe,’ men tenepmanto kununge. Tek sisi ne kangeda, ‘Nimi kunup mutu ban-ban yuma neitamaida, adeiyo keca men kurure,’ tenepne.

14 Tuai mutu tu amutara me embaredi, mokon deipkai cap, tuai mutu deiki dinin, ila laut mokon deipkai yuma capdi pesenunge. “Ila kael kemna deiyo kecada, nun damai men kupu,” pesenunge.

15 Tonda, ne kangeda, ange utopu, ila kael kemna deiyo kecada, emas telepnge deiki di, nimida men dekdatenge, tonda co bo deiki di men kunuptenge. Tonda, kunumna pio weik keca, er sida, emas cap, perak cap weika di bulupra deipmepedi, ‘Er ikinda ware kupra kurur do?’ tenen, timbangan deiki deipmepedi, ange kael keptepedi, kareptepya peda, ange yuma deiki di men kunuptepe.

16 Ange utopu, mutu si Ofir mutu, kunumna weik keca er si emas, pio-pio telepnge kururai betepedi, sun emas doproptepya peda, ange di ila kael kemna deiyo kecada, men kunuptepe. Tonda, kunumna weik mirin gel, er sida, permata krisopras cap, urasin telep gel, im kalum utopunge, er sida permata lazurit cap, akaptupa, karepeteptepya peda, ange deiki di, ila kael kemna deiyo kecada, men kunuptepe.

17 Emas cap, urasin pio lengna keca, melang-melang peramrenge cap deiki di, kunupeteptenga peda, ila kael kemna deiyo kecada, men kunuptenge. Tonda, kunumna weik gel cap, emas cap kareptepya peda, ange deiki di, ila kael kemna deiyo kecada, men kunuptepe. Angeda, tek sisi men kupmanto.

18 Tonda, ange utopu, kunumna weik keca, yuk yala ngeda, sun si merjan cap, kristal cap, akeca di nimi tep kunumnung dinin, angeda si men sipepkupe. Tonda kunumna weik keca, laut mokon pumbon di doronung keca, er sida, mutiara peda, kunumna weik kurur dinin, ange-ange yuma deiki di, ila kael kemna deiyo kecada, men kunuptepe. Akeca kunumenga utopu, men kurure.

19 Tonda, mutu si Etiopia mutu neitamai di, urasin pio telep poron gel, er sida topas, tonda Krisolit ngeda, kunumna weik kurur dinin, ange cap, tonda pio telep emas cap deiki di, men kunuptepe. Nimi kange tenenup kecada, topas gel cap, emas telepnge cap, kunumenge ngeda yambul pua, dinin, ila kael kemna deiyo kecada, er kunumnada men nukmanto cadi, angeda utopu gume. Akecada, pio men kunuptepe.

20 Ange tep nengeda, ila kael kemna deiyo kecada, dan mutu di yakarur do? Tonda, ‘Telep kuna ngeda, deiyo ake, ake’ tenen, kael kemna keca, nong pio neitamai ngeda, dan cei di yakarur do? Nun walwale tenepne. 21 Ne kangeda, tuai mutu gam kunge nesaladi, ila kael kemna deiyo kecada, men epra kael keptepe. Tonda, im deiki embange ma yala-yala yuma peda, sun damai ton, akeca kurepa, men dinunge.

22 Konum deami nesala banungai, amutu sida, Abadon mutu ^{▼▼Abadon mutu – Abadon mutu pepra sekinge cap, tonda Maut seki ngeda, ada nimi konum depmengepa, tu palipmengopda, sun sambala amutu bena kununge,’ teneramidi, amutu si butene pepra seki. Tonda, abuku neitamai pasal 26.6 cap, 30.23 cap, 38.17 cap aupu ton akapmare.} cap, tonda Maut mutu capda, amutu neitamai kunge keca capdi, “Nun peda ila kael kemna deiyo keca kururaida, nun walwale,” penunge. Tonda, “Yuk mutu nengdi, aupu tali pertamengepa, yambulanun ton gekeramupu dinin, ‘Akeca cap, amutu capda acei-acei tenen, nun peda walwalpu kunupa cadi, men kael kemnupe. Aupu penge mutu neng peda, tali nong men kepkamrengepu gekengedi, tali pertamnunge,” penunge.

23 Dinino, ne kaele. Ila kael kemna keca deiyo kururaida, Allah erpu kael kepu. Tonda, Allah er dipapu, ‘Ila kael kemna keca kapkai bana tep bisida, acei, aca’ tenen, kael kemrure. Yuk nengda, ton pio men tenenunge. 24 Angeda, Allah erda mutu sirik, im sirik yuma moupra dirure. Im deiki tara cap, tuai mutu amutara cap, daneitamai kurur keca yuma capda, Allah er dipapu moupra diredi, kael kemrure.

25 Allahdi dua neitamai embaramre moda, ‘Er ikinda, ukupra-ukupra kupkamre,’ tenemutopu, konum ketekepra deiputopu kurure. Tonda Allah dipapu, ‘Dua neitamai kunkamre moda, ukupra-ukupra kunmaryanen, ukupra cepkamre’ tenen, ‘Ketekepra deipnepa, akunkamre,’ tenemunge peda, er dipu kael keamnga cadi, erdi tenemutopu, konum ketekeipudi deipupa akurure.

26 Allahdi, ‘Ukupra mo cepredi, tuai mutu deiki sangkamraida, ake,’ tenemutopu ketekepra deipu. Tonda, Allahdi, ‘Perelang pena cap, kulman pona cap, aceipu akunkamre,’ tenemutopu, sun bisi tep ketenepra deiputopu, tupa akurure.

27 Akeca-keca yumada, konum ketekepra deipudi, ange yuma dipetepudi, “Acapu kunkamre. Ukupra, ukupra kunkamre,” pepra deiputopu, tupa akurure. Teka, Allahdi, “Akeca yumada, ukupra kunkamre, aca kunkamre,” pepra deiputopu, tupa akurure. Ange utopu ton, Allah dipapu, ‘Ila kael kemna deiyo kecada, ukunkamre,’ tenemutopu, tupa akurure. Ange-ange yumada, yuk-yuk gopra men kupkamre.

28 Allahdi nun tuai mutu kunup nesala yuma tep upeserure. “Tek sisi, ila kael kemne deiyo kecada ake. Ada, sun nai bo Allahda, akeca-keca yuma talenedi, ne ila puto di ne pel donune. Atep, sundi ne Allah tep, ‘Uo, erda pio mambule,’ tenepnemumdi, ne tep kwar kunkamrume. Tonda, Allahdi, “Telep kuna ngeda, deiyo ake, ake’ tenen, kael kemna keca dinin, pio er nong pio neitamai ngeda, ake. Ada, wareto mali kun keca do yuma, sundi ange taprumudi, akeca damai di gopra, karenaito bemumnyopda, ila kael neng kunkamrume,” pepra deipseue.

Aupu yumada, Ayubdi er kayapu weneri neng tep pepu.