Job 29

Ayub menop taru teleppu kuramunge cap, ikin keca dopromunge cap, yuma tep sirya upu, Allah damai pepra deipu upu

1Ayubdi aperamu upupu ton cap dukdongopra upepu.

2Uo, ‘Pumun taru ne gam kuramsitopu, ton cap ange utopu, telep kupra gam kutene’ tenen, putapnere. Ataruda, ‘Allah erdi ne tep melipra kalengamneupa, er amutara kuramsi utopu, kange di ton cap ukuptene,’ tenenune. 3Ada, neda tupa-tupa Allah er dipapu melimamneua tep, ukupmanto ngeda, pepkusene. Ataruda, Allahda weica dirin utopu kupneua cadi, ne embaramsi bisi yumada, dirin kupneua deiki di, telep bisipu embaramsi. Atep, Allah er dirin deiki dipapu. Ne emban taruda, kunungna neitamai yumada, telep kupra deipneupa, embaramsi.

4Ukuramsi taruda, atumi-atumi yuma, ne kaberpu kuramsi taru utopu kupneua cadi, tupa puto kuramsi. Teka, ataru ne opkal bol di domsi ati, keana dodin tenda ati neitamai kuramsipa, Allah cap, ne cap tonpa kuramnemu. 5Ataruda, Allah er akeca-keca yuma talepra, deiki tara erepra, Ila Puto Weik kure Deiyo Ngebodi ne tep, tupa meliamneupa, ne deiamsi nyapu yumada, ne damaipu kuramnei.

6Ne talepra peiramsi sapi bisam cap, kambing bisam capdi, moum teyung peda weika di purupra deriramsi. Tonda, nedi Saitun co du weik dakamsidi, gel pala deiki di akeca weika di purupra kidiramsi. Ukupsipa, zaitun du me mokonda, agel pala deiki di, embaramupa, gwepra kiramsi. Ukupmantoda, tali me embaramretopu, apala gel neitamai di, embanapu kuramneu.

7Ataruda, neda si weik ngebo kuramsa tep, ne mutu nesaladi, ila ati arum domidi, amutu wengbana bisi buplan tep, gat keca er sida besi, abuplan er sida, Pintu Gerbang ketenepra deipyai embenmasi taru cap, tonda, ne cap, amutu nesala cap tonpa uruna tep bungamepu taruda, sun yumadi ne tep gispal doramnei. 8Ada, amutu wisi-wisi nesala yumadi dinmaneidi, ne gispal dona tep, tekmai. Tonda, sun tupa kaber nengdi ne epnopda, ne gispal dona tep, tekmaidi, gopra yukai bena kunmai. Sun kaber neng cap, sun wisi neng capdi, ne epnopda, ne tep adipapu gispal doramnei. 9Tonda, sun ila nimi deiyo-deiyo neng peda, dinmaidi, ‘E, angebo damaida, tali upu men peptepe’ tenen, upu men perami. Tali dim pepra dinapu kuramnei.

10Tonda, sun ila mambul deiyo neng peda, ne tep dinmaneidi, kware kupupa, men upu pepmanto kurami. 11Wareto neng do yuma, ne peramsi upu yuma moupra gekepnopda, lolomamidi, moupra tenerami. Tonda, ware neng do yuma, ne pel doramsi keca yuma konum epnopda, ‘E, angeboda, telep pelpu dorure’ tenen, ne tep gispal dopra, si eremamnei.

12Ada tali tep gum dinin, deiyoda, nedi sun tali kan-kan kurami nesaladi ne tep, “Melipseo,” pepra, moropneipa, nedi sun tep adipapu melimamsa tepa. Tonda, yuk nengdi men melipmanto lyan nyapu tep, ne dipapu melimamsa tepa. 13Sun kange mun kangepu doupra ikin kurami nesaladi, ne tep gispal dopra si eremamneidi, “Allahdi angeboda, telep kudikamre!” pepra, telep upu peramnei. Tonda, nedi solu nerapu sun putan keca tep melipra kareramsipa, sunda kange lon mut ton peramidi, pingping kange doupra kurami.

14Tonda, Allahdi, “Ukunkamrume, angeda pio men kunkamrume,” pepra deiamseutopu, neda tek sisi dumsisi telep ngepu kuramsi. Malinge ton men kuramsi, tupa-tupa dumsisi kun ngepu talepra kuramsa tep, ukupmantoda, ada nimidi lyom opkal er si juba cap, tonda galuna tep, sun giso geterameng telep opkal cap dopra, sun nong deiki kenengamengtopu, neda teleppu kuramsi.

15Pio dumsisipu kupra, amutu nesala weika di melimamsi. Atep, ukupmantoda, sun asuru puamu neng tep neda sun aneng asuru dina utopu ngebo kuramsi. Tonda, yan mali kwamne nengda, neda sun yan yanipra embana utopu ngebo kuramsi. 16Tonda, sun tali kankan kurami neng tep, pio weika di melipra kalengamsa tep, neda sun nai bo utopu ngebo kuramsi. Tonda sun nimi bo neng kepra kurami nesala tep, neda wilipra sun tara ngebo utopu kuramsidi, ne tara nesala tep, ‘Animi bo neng yumada, telep kupra melimkamepe,’ pepra, upu peramsi.

17Dinino, sun puto di kika deipra kurami neng tep, nedi sun putoda amu kepra deriramsi. Tonda, sun popra tamamipa, ikin weik kurami nesalada, nedi sun tep melipra lyemdiramsi. 18Ukupra teleppu kuramsi taru neitamaida, nedi uteneramsi. Ada, ‘Gume, gam pio kuramnyanen, wisi deipkamne,’ tenemsi. Tonda ‘Neda konum wisi deipnyopda, telep dipapu ne pe ati neitamai dakunmanyanen, kange deipra dadepkamne ja,’ tenemsi.

19Ukupmantoda, neda co yaten bisi di me wengamrepa, ila lyoma di tengamretopu kuramsi. Tonda, co teruai di mo puru me wekredi, aco telep kupra bongopredi, sukup-sukup pepredi, neramretopu ngebo kuramsi. 20Ataru neitamaida, ne kuramsi mutu nesala yumadi, ne tep tupa gispal dopra si eremamnei. Tonda ne nong puto peda, men gum kwamneu.

21Tonda, mambul upu pena taruda, ne tenepsinge konum pepnyopda, ataruda sun amutu nesala yumada, moupra gekeramidi, upu pena gum, tali dim peprappu kurami. Ada, ‘Angebo ware mambul upu ton dukdonogpra pepkamser do?’ tenen, sunda upu ton pena gum dinin, ne peramsi upu yumada, sundi moupra gekerami.

22Ne upu konum pepropne taruda, sun yuk nengdi ton, upu tapakra men perami. Ne peramsi upuda, sun deikida, mo puru sangamretopu kuramu. Sunda tali kange deipra gekenapu kurami. 23Ne peramsi upu yuma cap, ne pel doramsinge yuma capda, ‘Uo, angeda pio mambule’ tenen, anesala yumadi moupra gekeramneidi, betapra diramnei. Sundi kange deipra aperamsi upuda, gekepra dodororami. Ukupmantoda, sun wa pena nengdi, sun wa pepra kouamenge keca, kait popra du moure taruda, ‘Mo ceptue,’ tenengepa, mo yakaryopda, kange derirameng utopu kurami.

24Ikin keca sun damai yakaramu taruda, sundi, ‘Uo, angeda ware keca tep kupser do? Ukutaruda, ware kuptepe do?’ tenen, dipru bulungsangamupa, men kupmanto kurami taruda, nedi anesala epnedi, sipu petamamsipa, sunda kange deriramidi, kange di ton cap puto kemdidarami. Ne aso deiki kange deipnedi yang-yang peramsipa, sun anesalada, ne epnedi, ‘E, nun naidi, kange deipsere’ tenen, ton cap tapakra pio kange derirami. 25Nedi ne mutu kurami nesala tep, weika di melimamsi. Ukupmantoda, nimi deiyo kepra taleamsidi, “Ange yumada ukupkurume-ukupkurume,” pepnepa, kurami. Nedi sun neitamaida, telep kupra melimamsa tep, ukupmantoda, nimi deiyo ngebo Rajadi, er jen talena neng talepredi, sun kankan neitamaipu kuramretopu kupra taleamsidi kuramsi.

Tonda, nimi depmangepa, sun kayapu nengdi mali pepra engeramenge taruda, tenpu ngebodi, sun damai yana, dipru kwadimna upu pepyopda, sun tep ping-ping kemdiramretopu, nedi sun amutu nesala tep ukuramsidi, taleramsi.