Job 3

Ayub er mambul kange doupudi, er teneramunge tep, peipu upu

1Yoneitam bari tumi deiki di, Ayub cap, er kayapu neng capdi, upu men perami dinin, ataru konum kupupa, Ayub erdi tenpu tumi ton upu pepudi, “Uo, naninda ware keca deiyo tep deiamneu do? Men deiamnetue. Nanin deipneu tumida, pio mali tumi,” pepra mali penmaudi, er deiamu tumi wipdongopu. 2Upepudi, Ayub aupu ton dukdongopra penmau.

3“Uo, ne nai Allah, neda nanin mumun bo mamsi taru di pomnetumpa, dadeamtene ja. Tonda, nanin konum deipneu tumi lukundada, gum kuamtu ja. Tonda, nanin deipneupa, nimidi, ‘Sal mi konum deipmare,’ pepi lukundada, gum kuamtu ja. 4Adeipnei tumida, kunuknapu kuamtu ja. Ukuptuopda, kan Allahdi ne deipnei tumi tep, tenena yamtumpa, gum kuamtu ja. Tonda ne deipnei tumida, atanggalda amenda taru peda, keteng dirine ton men kuamtu ja. 5Ukuptupa, keteng dirine cap, war dirine capda, dua bum di kepdongoptupa, ne deipnei tumida, kunuknapu kuamtu ja.

6Tonda ne deipnei taruda, gum kuamtupa, doryankamre taruda, nimidi keteng tamun cap, war cap nungkamenge taru yumada, ne deipnei tanggalda, nungna yamtenge ja. Ne deipnei tumida, kunuknapu kuamtu ja. 7Alukundada, pio kunukdongopnapu kuamtue. Ukuamtupa, atanggal deiki di doryankamre taruda, nyape ton men derinkamtenge ja. Atanggal deiki, alukunda neitamaida, pingping kange doupra, upu penup ngeda, men kuramtenge ja. 8Ukuamtupa, asuru kwa neng cap, tonda laut mokon neitamai kure ila mekina, er si Lewiatan upuna neng cap, sundi ne deipnei tumi wipdongomtenge ja.

9Adeiki Ululkor kuru yan belepra tekre taru, dirine kemrur ngeda, atumi atanggal deiki di gum kuamtue. Tonda keteng asuru peda, jenek kemna gum kuamtue. Ukuamtupa, kunuknapu kuamtu ja. Ukuamtupa, doryankamre taru kunkameng nengdi, atanggal deiki, ‘Ipna taru keteng dirine yakankamre,’ teneptenge dinin, men yankamtu ja. 10Ne nai Allah, kandi nanin mumun douamnganen, deipkamneu bisi buplan men dekdongomnemume. Tonda, men inipdongomnemuma cadi, adeiki ne konum deiamneipa, ne pio ila kange mun kunerure. Ange tep nengeda, ne deipnei tumi cap, tanggal capda, gum kuamtu ja.”

11“Uo, ware keca deiyo tep, nanin deipneu taru di men deamsi do? Autopu, nanin mumun pumbon di deipkotepneu taruda, warya tep men deamsi do? Konum deamtene ja. 12Tonda, ware keca tep dopra iripneudi, moum diniamneupa moum jeamsi do? Tonda ware keca tep, nanin kail deiki deipneudi, moum diniamneupa moum jeamsi do?”

13“Adipapu nanin deipneu tumi di deamtene teptoda, dimpepra damamtene ja. Ukuamtene teptoda, akange mun keca ne deiki men yanetue. 14Tonda, pumun taru nimi deiyo neng, yala-yala yuma cap, Raja neng cap, talepra kurami taru, sun yumadi telep ati beta dopra kurami dinin, depidi akati tamipa, pun deipra sakamo. Aneng deramitopu, ne peda deamtene ja. 15Ne deamtenedi, nimi deiyo neng Raja neng, sun pio telep keca emas cap, perak cap, weika di bulupra sun ati deiamidi, kange deiprap kuramyane, tapra deiamitopu ne peda utopu kuamtene ja.”

16“Nanin mumun pumbon di dadeamtenepa deipkotemnetu ja. Ukupnetupa, keteng dirine dina gum dipapu, tu paliamnetenge ja. Mundu pumbon lyuramre nyape, tu palipmengepa, keteng dirine men diramengtopu kuamtene ja. 17Mali kuramenge nesala depmengepa, peipmengopda, ton cap tamupra mali men kununge. Autopu, ila ikin pel doramre ngebo deprepa, bena peipmenge taruda, apel ton cap tamupra men donunge. Beipye peingbanapu kununge. Depmengepa peipmengopda, ikin keca yuma sun damai men yatue. Ne peda kuamtene ja.”

18“Tonda, mar podan taru podanmanganen, puto nengdi ton tamna neng yuma popbisipmengedi, ton neng tomopra sun mutu dubengepa, bena kungedi, sun amutara ikin pel dopra kuramenge neng peda depmengopda, beipye peingnapu kununge. Konum depmengopda, ikin pel dimamenge neng, sun upu ton cap men gekenunge.

19Nimi konum depmengopda, ila neng peda, kankan kunge neng peda, utopu kununge. Tonda, kange eremna gum di, pio amutara kunung nengda, sun deiyo neng damai tapmengedi, teleppu kununge. Sun aneng yumada, ikin men kununga tep, ne peda ukuamtene ja. Autopu, ton nesalada wenemna ati neitamai dongopmengepa, kange mun kange doupra bungnung nesala peda, tonda sun aneng tep, ‘Benung’ tenen, buplan dam kalengnung neng peda, sun yuma depmengopda, tenpuaipu kunkamenge. Ne peda kuamtene ja.”

20“Ware keca deiyo tep, nun nai bo Allah, kandi kaukepra tapsemempa, nun yuma kange mun kange doupepapu, kan dirine nun deiki derisemempa diriserur do? Tonda, ware keca tep, kange mun kange doupra kunge nesalada, gam kuna deiyo keca karesemempa, gam kunup do? Tali deptepe teptoda, telepe pua. Kange mun weik kunerura cadi, kunungnaipu dakuramtene ja.

21Kange mun weik kusere taruda, nun bunga weik kupsetua peda, ‘Ange mambule,’ pio men tenenupe. Ange tenena gum dipapu, ‘Daderamtepe ja,’ tenenupe. Nimidi kunumna weik keca tep, ‘Dan cei kurur do?’ tenen, eramengtopu, kange mun kange doupra kupe taruda, ‘Menmena dadeptepe,’ tenenupe. Atep, ware keca deiyo tep, dirine cap, gam kuna cap tupa kareserum do?

22Kange mun weik kuramsere neng depmepepa, peipsengopda, kange telep dipapu kunupe. Konum depmepyopda, kange pingpingnapu kunupe. Atep nengeda, ware keca deiyo tep, kange mun kange doupra kupe taruda, dirine cap, gam kuna cap, tupa kareserum do? Telep ngeda daderamtepe ja.”

23“Allahdi, ‘Nimi tenpu ngebo kuryai tep, telep keca er damai yarur’ tenen, lelipdongoprepa, er angeboda ila kange mun keca dorura cadi, ware keca deiyo tep, gam kuna keca karepmempa, gam tupa kurur do? Telep ngeda, daderamtu ja. 24Apepmanada, mesum tep men pepne. Deiyoda, ukupmantonge telep jen keca do, yuk telep kunange do, ne damai ton pio men yakanerura cadi, kange mun pio weik kunerure. Atep, ‘Uo, ne kange mun kunerure,’ pepra ngolongnune. Tonda, mau di me gwepmengepa dinipmarepa, dingtamamengtopu, kange mun weik kunerenge tep, ngolongnedi mali penune.

25‘Angeda ne damai yanerur’ tenen, kwar kuramneu kecapu, menmena ne damai konum yakanerure. Tonda, ‘Uo, ikin keca kupnerur’ tenen, kwar kuramneu kecapu, ne damai konum pirinerure.” 26“Neda ange kunerura deiki di, telep kupra men kunune. Kange mun kecada ton tamna gum di, pio tupa-tupa kunerura tep, dimpepra men kunune. Beipye men peiktene dinin, kange mun kange doupra kunune,” Ayubdi pepu.