Job 30

Ayubdi pepu upu

1Dinino ukutaruda amutu kunge kaber nengdi ne tep nalepra autunenunge. Men taruda, nedi sun nai yapu tep, dipetepsidi, ‘Gume, sunda pio mali neng kununga cadi, sunda ne domba bisam pein damaida, kam cap tonpa men kutenge,’ teneramsi. 2Sun nai yapu yumada, sun puto konum gum kupka tep, nedi, ‘Sunda puto gum neng cadi, ware kupra anengdi melipnetenge do? Gume, sun buruda men di puto ton men kuramya tep, sunda dakwapye,’ teneramsidi, anengda tamamsi.

3Anengda, sun jen putaramupa, pio kange mun deikipu kuramya cadi, nimi pio men kuramidi, dim bulung pemupa, katawai mutupu kuramidi, sun jen keca pulpula yumada, kolupra gelal sepramupa, yambul yatenpu dopra jerami. 4Sun aputo gum nengda, mutu katawai, wala mutu paramu kecapu kwenepra, akeca cap, aparamu keca bo cappu jerami. Tonda akeca kolupu yaten peda, jerami, tonda, ‘Bul kupserur’ tenen, ange bulupra uku dongoramidi, auku damaipu bungami.

5Sun aneng utopu neng yumada, ‘Yuk telep neng cap, tonpa kuna gum’ tenen, enepra donongami. Ukupmantoda, telep kunge nengdi, upula don neng tep, sun mutu neitamai di enepra yukai donongamengtopu kurami. 6Sun ato kunge nengda, Allahdi, ‘Sun kunaida, gel imir pumbonpu kunkamenge,’ tenerure. Tonda sun anesala atida, mutu dikramya pumbonpu, sun ati kepra kunkamenge. 7Sun kurami mutuda, bura tara mutu neitamai kuramidi, tali gam kuramre kecadi, mali pepra ngolongameng utopu kurami. Sunda, mutu katuai walai tengamre keca kan-kanpu buluamidi, gung kepra, bura mutu neitamaipu dakurami.

8Sun anengda, nimi ton, ‘Akununge,’ tenen, si kael kemna gum neng kurami. Tonda sun anengda, mambul neng gum cadi, amutu nesala yumadi, sun tep, ‘Uo, sunda tali neng pua,’ teneramidi, sun aneng kurami mutu di capra, donokidi, eneprami.

9Dinino, ataruda, sun ukurami nengdi, ne damai yangedi, ne tep nalepra autunenunge. Sundi ne tep nengeda, nalepra malya daemnengedi, autunenunge. 10Ukutaruda, nedi sun tep dine taruda, sundi ne tep yu tenenengedi, ‘Erda malito ngebo cadi, mali kurure,’ tenenenunge. Utenenengedi, ne epnenge taruda, tali lupra ne aso deiki ul tuludinenunge. 11Deiyoda, Allah erdi ne tep puto gum kupra deipneupa, pio boun kupneu. Ukupneupa sun anengdi, ne damai tali lupra poryakanenunge. Sundi, ‘Angebo tep ukupkupe,’ tenenge kecapu, tali lupra kunenunge.

12Ne dumsisi tara peda, sun mali kuna nengda, gung weik tengyangedi, poryakanenunge. Sun amali nengdi, ne popnengepa saka dourbanai peda, ‘Angebo yawa popmepepa, aca dourbenkamare,’ tenepmangedi, pepmangaipu, saka dourbanune. 13‘Sun anengdi ne tep poptapnenung’ tenen, ‘Benkamne,’ tenepsi bisi peda, abanmane bisi yana dinmangadi, sekdongopra popmanto kunenunge. Sun anengdi ne damai yana warekdongopra popkunenge taruda, yuk nengdi ton men upu sengnenunge.

14Sun anengda, me opra yakaramretopu kupra yangedi, ne kalengna tep lyom gel beilya wiamsi ngeda yana daktapnei. Ukupmengedi, sun aneng yuma abisi wekra yangedi, sundi ne nong deiki yana yanipra daramdongonkenenge taruda, pingping kange doupra, yana kunenunge. 15Ila ikin ngedi, ne deiki yana, darapdongopneue. Ne kuramsipa, si eremamnei ngeda, kumanya yaredi, mo puru saka manmaneng deiki kupmarya, doupra baramretopu kunenunge. Tonda, ne telep kange douamsi ngeda, dua bum topdoua yakaryanen, adipapu dim peramretopu kupra, gum kupropneu.

16Ukutaruda, ne dena damai konum kupneu. Kange mun keca ne deiki konum yaneupa, ne kange dipru neitamaida, men kupmanto kunune. Ila ikin keca konum doropsi ngeda, pio men gum kupmanto kupneu. 17Lukunda taru neitamai yumada, ne yoda pio pu weik jenerure. Ne nong luknerepa, pu jenerur ngeda, men gum kupmanto kunerure. Pio men dim pepkamnere.

18Allah er buru gala di ne gekrum dam kwamneu opkal sirik, yana gweleptalepneu. Ukupneupa, ne opkal keamsi ngeda, ne kum damai opkal bolda, ne nong deikipu pakupdongopra palepneu. 19Allah er puto di ne dopra, dopneupa, bental pum bon weksi. Neda tali bam keca dopra donongameng utopu kupneue! Tu buta cap, uku sikke buta cap tamameng utopu, konum kupneue!

20Uo, ne nai Allah kan tep, “Melipneo,” pepra morokenun dinin, kandi ne morokenun ngeda, tamupra men upu penerume. Tonda, nedi kan tep, ‘Morokun’ tenen, kan damai tekne taruda, kandi moupra men gekenerume. 21Allah kandi ne tep tupa men bicau tenenerume. Kan ila di yu kupkerepa, kan buru puto di ne deiki ila ikin kecapu derinerume. 22Ukupmanto ngeda, kandi kumanya tep kaukeptapnemempa, ne damai yaredi doupra banerure. Ila di pung peramre mungna yakaramretopu kupra, yamemdi ne doupra, ortara mutu tapbenman kunerume.

23Ne kaele. Kandi ne dopra dena neng kunungai dubenkamnerema tepa. Gam kunung nesala yuma depmengepa, kandi bupra derirbarumaipu, ne peda dubenkamnereme. 24Dinino, mali kun keca ton men kurur ngebo saka baredi, kange mun kuprepa, Allah kan tep, “Melipneo,” pepra morokerur ngeboda, kandi ware keca tep bicau tenepra men gekepra melimrum do? 25Tonda ne kuramsinge tepapu tenepneo. Neda kange mun kuprepa, engerur ngebo cap, tonpa bukra men engenemnya tep do? Tonda, nedi akeca yala-yala yuma gum kuprepa kange mun kange doupra kurur ngebo tep, bicau kupnerepa, men melimnya tep do?

26Ukupra telep kuramsi dinino, neda, ‘Kange telep kupkamnere, tonda ne deikida dirin kecapu kunkamnere,’ tenemsi. Dinino, ne damaida, kange mun keca cap, kunungna keca cappu yakanerure. 27Ne kange dipru neitamai tenepnedi, ne dipruda, yawa ponerue. Uo, ware keca tep ne deikida atumi-atumi yuma, ikin kecapu yanerepa doronun do? Utenepnedi, pio kange mun kunerure. 28Neda, dirine ton kuna gumai, pio kunukuaipu bena, yana kemtonune. Ukunedi, neda nesala weik wekmangai teknedi, “Ne ton melipneso!” pepra, moronune.

29‘Melipnetenge’ tenen, ne weika di bicau kupneredi, dipru popnerepa, ne upu engepra penuna lelimda, bura tara kuredi, yu kure gam kecadi mali penmaredi, ngolongamretopu kunune. Tonda lyei madi mali pepra ngolongamretopu, pepnedi, mali penune. 30Ne nong bol deikida, keteng bupu pu weik jenerura deiki di, ne nong bolda miripneu. Ukupneudi, ne nong yumada, talena pu jepneua deiki di, uku jepredi bol koramra utopu kupneu. 31Tonda, ne menop taruda, bung-bung pena, er sida kecapi, pepnengepu lelim gekepnedi, kange telep kuramneu. Dinino, ukutaruda, ne melipmanto ngeda, ton gum tep, mali kange doupra engenapu kunune.

Ayubdi aupu yuma pepu.