Job 31

Ayubdi ton cap tamupra, “Neda mali ton men kupsi,” pepu upu

1 Neda tek sisi pedina upu konum ne pedi pepdasi. Ada, kaber nerapu asuru epnedi, ‘Anerda kikiman maptenemnye,’ tenenada, pio tupa men tenenkamne, pepdasi. 2 Apepmanada, mesum tep men pepne. Ada, Allahdi nun nimi mali kunup keca tep men wenepkamser do? Tonda, Allahda, akeca-keca talepra, Ila Puto Weik Deiyo Ngebo kuredi, nun tuai nesala kupetopu, menenga keca men karenkamser do? Telep kupmepyopda, telep ngepu karenkamsere. Dinin, mali kupmepyopda, mali ngepu karenkamsere.

3 Atep nengeda, tek sisi mali kecapu kunung nengda, Allahdi wenemna cap, mali kuna deiyo keca cap kareprepa, sun aneng damai yankamre. Yaryopda, sun kunge keca yala-yala yumada, malipu kudinkamre. Ada sun mali-mali kecapu kungatopu, menenga di kunkamre. 4 Ne kaele, ne kunun keca cap, tenenun keca cap, embanunai cap yumada, tek sisi Allah dipapu dineredi kael kemnerure.

5 – 6 Ukupmantoda, nimidi bung keca tep, ‘Ikin do, kanam do?’ tenen, timbangan telepnge deiki deipmengedi, dirpeteramengtopu, Allahdi, ne kune keca tep, tek sisi moupra dipetenerure. Ukupnerya deiki di, ne mali men kunun ngeda, kael kemkamnere. Erda kael kemna deiyo ngebo kurure. Atep nengeda, tek sisi ne men iniptene. Yuma taru yuma, ne mawa di mok upu pene taruda, Allah konum gekeneredi, kael kemnerure. Tonda, ne kayapu neng tep, ‘Sun keca doproptene’ tenen, mok upu pepne pangeda, er konum gekeneredi, kael kemnerure.

7 Tonda, nedi dumsisi bisi konum taptenedi, lerekra yuk mali bisi dombaramtenyopda, Allahdi wenepnerepa, yuk nengdi, “Tek sisi mali kupka dia,” pepnetenge. Ange utopu, ne asuru epnya deiki di, ne dipru gipropnerepa, mali bisi embanyopda, Allahdi wenepnerepa, yuk nengdi epnetenge. Tonda, ne buru di mali kupnyopda, Allahdi wenepnerepa, apeda yuk nengdi epnetenge. 8 Mali kuramtenyopda, yuk nengdi ne yal bolongamtene kecada, du dakra jeptenge ja. Tonda, mali kuramtenyopda, ne kouamtene keca yumada, talipu kwenepra taptenge ja.

9 Tonda mali men kuramsi dinin, ukupmanto ngeda, nedi yuk kanam nerapu epnedi, ne dipru gipropnerepa, ‘Kikiman maptenemnye,’ teneptenyopda, Allahdi wenepnetue. Tonda, ne kayapu yuk neng sun domenge nerapu tep, dipru gipropnerepa, sun ati buplan pangkoten tara, inipra tengbetenedi dororamtene teptoda, Allahdi wenepnetue. 10 Ada, ukuramtenyopda, Allahdi wenepnetupa, ne doamsi ner yuk ngebodi doproptupa, er gandum taiktudi, roti deiyo keca tepung keteneipmemetue. Tonda mali kuramtenyopda, Allahdi wenepnetupa, ne doamsi ner, yuk nengdi napdaro betenga peda, telepe pua.

11 Arup di pepyanmanu upu, mali kun keca yumada, yuk nerapu tep ne dipru gipropnetupa, mali kuramtenyopda, tek sisi ali daktene. Tonda adeiki di, Allah cap, tuai mutu deiyo neng capdi, wenepra popnetengedi, ikin keca ne nong deiki deipnetenge. 12 Aupu pepmanada, mesum tep men pepne. Ada, nimidi, ‘Uo, yuk nerapu cap maptepe,’ tenen, putana cap, yuk nerapu upula dorona capda, tek sisi pio mali keca kurura tepa. Ukupmantoda, ila uku bu akeca-keca jeredi, gawal dangamretopu, amali putana deiyo keca di, akeca-keca yuma mali kudiserure.

Akeca kunge nengda, Allahdi weneprepa, uku jen banpu bena kunkamenge. Atep nengeda, amali kuna menenga di, nimi talepra kunge keca cap, dounung keca yuma capda, gum kupra derirure. Ada, ila ukudi jepra gawal dangdoramrenge utopunge tep pepne. ^{▼▼Aupuda, Ibrani upu deiki seki ngeda, ila ikin weike. Atep, kael neng peda, ‘Aupu deiyoda, ange do, ange do?’ tenen, tupa kange wang-wang peserure. Ton kael nengdi, aupu er deiyoda ake penungada, aca. ‘Tonda, mali kuramtenyopda, ne kouramsi keca yumada talipu kwenepra uku dongoptenge.’}

13 Tonda ne amutara pel melipra don neng cap, ne amutara pel don nerapu cap, sun yumadi ne tep, “Kandi nun damai mali kupmasereme,” pepnetengepane, ange gekepra men dumsisiktenyopda, ada teka ne mali kuptene. 14 Ange kuamtenyopda, Allahdi ne tep, upu bokeipkamner taruda, ware peptene do? Tonda, Allahdi ne tep, “Kanda kan amutara pel melimna nesala tep, mali kupmum ngeda, dumsisikmum do, gum do?” pepra asipetepneryopda, ware upu tamupra peptene do?

15 Gume, ne pel dona tep melimna nesala pe, ne peda, nun nai Allah er dipapu ketekepra deipseue. Tonda, ne pe, sun peda, nun nin yapu mumun pumbon di ketenepra deipseu ngeboda, Allah er pua. Allah er kangeda, ‘Tuai nesala yumada, mambule,’ teneserura cadi, ne amutara pel dona tep melimna nesala tep, teleppu kunkamne.

16 Tonda, kankan kunge nesala, sun putaramu keca tep, men makuramtenyopda, tek sisi mali kuramtene. Autopu, solu nerapu sun kange mun kuramu keca tep, bicau tenepra men meliamtenyopda, ange peda mali kuramtene. Ukuptenyopda, Allahdi wenepra popnetue. 17 Tonda wein nyapu, sun jen keca putaramu taru peda, ne jen keca akamnetupapu, epra kael keptenedi, kaukeamtenyopda, ange tep Allahdi wenepra popnetue.

18 Angeda, men kuramsi. Ange gum dinin, anyapuda sun yambul taru di, sun nai yapu sisa deiamenge nengdi kalekra melimamengtopu, ne peda melipra jen kareramsi. Ange utopu, nanin deiamneu taru di dipra, ne gam kuramsi taru neitamai yumada, solu nerapu tep melimamsi. Dinino, ange yuma men kuramtenedi, men melimamtenyopda, ange tep Allahdi wenepra popnetue.

19 Ange utopu, tali kankan kunge nesala, sun opkal gum tep, nong bananga kuramtengedi, bul kuramtupa depmanto kuramtenge nge, epra kael keptenedi, tamamtene teptoda, ange tep Allahdi wenepra popnetue. Tonda, opkal pio men kunupmanto neng, kankan kunge neng epra kael keptenedi, tamamtenyopda, ange tep Allahdi wenepra popnetue. 20 Ada, sun nong bananga kuramtenge nesala tep, ne eptenedi bicau men kupnetupa, ne domba bisam popraptenedi, er nong potong doproptenedi, bupu opkal wipra, angebo tep men deiamtenyopda, sun anesaladi ne tep ila kange men deriramnetenge. Ato nesala men melimamtenyopda, ange tep, Allahdi wenepra popnetue. Dinino, ato nesala yuma melimamsi.

21 Nimi upu bongdina taruda, ‘Neda ila ngebo cadi, ne upu tek sisi gekepkamnenge’ tenen, wein nyapu mali men kuramtengepapu, ‘Ne upu pepkun’ tenen, buru ereptenedi, mawa di, ‘Sun mali kupmange,’ peramtenyopda, tek sisi ange tep, Allahdi wenepra popnetue. 22 Atep nengeda, ange kuramtenyopda, ne tepnyo yo dungdongonai di, seksaknetua pepeda, telep pua. Tonda, ne tepnyo yo copnetua peda, telepe pua.

23 Dinino, arup apepman nge yumada, ‘Allah ila di wenepra popnerur’ tenen, kware kuramneupa, pio men kuramsi. Tonda, Allahda pio telep, Ila Eremna Ngebo kurura tep, amali kun keca yuma men kuramsi. Tonda, ataru peda men kunune.

24 Kunumna weik keca emas tep, ‘Akeca dipapu melimkamnere,’ teneramtenyopda, Allahdi wenepnetue. Tonda, kunumna weik keca emas pio kamo telepnge tep, ‘Akeca dipapu moupra kalengkamnere,’ teneramtenyopda, Allahdi wenepra popnetue. 25 Tonda, ne pel dopra dopbaramsa deiki di, kunupra taleramsi keca cap, ne kunumna weik keca taleramsinge cap tep nengeda, ‘Neda ila isomka ngebo’ tenen, kange deridaramtenyopda, Allahdi wenepra popnetue.

26 Ange utopu, nedi keteng cap, war cap deipredi, dirine weik kuredi embaramrenge cap tep, eptenedi, ‘Uo, angeda, ila mambule cadi, angepu si eremamtenedi, karen keca kareptene,’ teneramtene teptoda, Allahdi wenepra popnetue. 27 Tonda, ne kange neitamai dipapu, inipra teneptenedi war cap, keteng cap, si eremna tep, ‘Karen keca kareptene’ tenen, ila di putaramnetu teptoda, Allahdi wenepra popnetue.

28 Arup di pepyanmanu upu, mali kun keca yuma kuramtenyopda, adeiki Allahdi wenepra popnetue. Angeda mesum tep men pepne. Deiyoda, amali kun keca kuramtenyopda, upu bongdina ngebo Allah im deiki kure ngebodi, “Ukunkamrume,” peamneu upu taptenedi men kuramtenyopda, wenepra popnetue. Ada, Allah tep tamna utopu kuna tep pepne.

29 Tonda, ne podan neng, sun ikin keca dopropmenge pangeda, nedi sun tep, ‘Walito kupmenge,’ teneramtenyopda, Allahdi wenepra popnetue. Tonda sun damai ikin keca yatupa, ‘Ada walito kupmare’ tenen, kange deriramtenyopda, Allahdi wenepra popnetue. 30 Tonda ne podan neng tep, ‘Allahdi anesala tep wipdongoptudi, poptupa, sun dadeptenge’ tenen, Allah men mororamsi. Aupu utopunge ton, peramsidi, mali men kuramsi.

31 Sun pumun dadi melipra, ne ati pel doramnei nesalada, nati derinun jen kecada, sun dopra tali lupra jenunga cadi, sun ton jen men putaramu. Dinin, ne pel melimna neng do, yuk nimi bo neng do, jen putaramu taruda, ne jen keca akamnetupapu, epra kael keptenedi kaukemamtenyopda, ange tep Allahdi wenepra popnetue. Dinino, ange peda, men kuramsi. 32 Ange gum dinin, nimi bo neng ne damai yan pangeda, ‘Sunda bura tarapu mapso,’ men peramsi. Ataru-ataru yumada, nati buplan paktapnepa, tali lupra wekmengedi, ne ati jen jepra manunge. Dinino, apepman upu tep, ne pel dona melimna nengdi, ‘Erda ange men kuserure,’ peramnetengopda, Allahdi wenepra popnetue.

33 Nimi yuk nengda, sun mali kupmengedi, dipru neitamai inimamengtopu, kuramtene teptoda, Allahdi wenepra popnetue. 34 Nimi mali kuramengedi, sun dipru neitamai inimamenge nge deiyoda, ake. Ada, ‘Yuk neng weik bulupmengedi, nun tep, ‘Sunda mali kun nenge,’ pepsenung’ tenen, kununge. Ange utopu, ne mali kuramsi keca, ne dipru neitamai inimtamtenyopda, Allahdi wenepnetue. Tonda, nimi yala-yala yumadi, “Erda mali kure ngebo,” ‘Pepnenung’ tenen, upu pena gum di, nati neitamaipu kuramtenedi inimamtenetoda, Allahdi wenepra popnetue.

35 Uo, ne putapnere ngeda, yuk telep ngebodi ne pene upu gekepnetuopda, ne kange deiptene. Dinino, ne upu gekepmanto ngebo men kurura cadi, ne pedi ne tepapu, ne pene upu, ‘Tek upu pepmare, tenepkamneng’ tenen, peten kemdina tep, ne si sekeipne. Amenda taruda, akeca-keca yuma talepredi, Ila Puto Weik Kure Ngebo, Ila Eremna Ngebo ^{▼▼Eremna Ngebo – Acada, Ibrani upu deiki di, Allah er si tep, ‘Allah Shadday’ pepra seki. Aupu ‘Shadday’ deiyoda, sundi, ‘Allahda akeca-keca yuma talepra, pio deiki tara kuredi, pio Ila Puto Deiyo Ngebo kurure,’ tenena tep ‘Shadday’ pepra seki. Sun Ketengban tara nesala kael kemna tep, angeda konum jenek kupra sekmepu.} Allahdi upu peipkamnetu ja. Allahdi ne tep, ‘Erda mali kurure,’ tenepnetuopda, ange yuma katuai sekra deipnetupa eptene.

36 Asurat sekra karepnetuopda, nedi dopra tepnyo deiki deipra embanepa, yuk neng yumadi dinkamnenge. Ange gum dingeda, asurat dopra, ne giso deiki deipnedi embanepa dinkamnenge. Ada, ila nimi deiyo neng, giso deiki mambul topi, er si mahkota perameng topi, galuramengtopu, asurat ne giso deiki deipnedi, kwar kuna gum dipapu, embanepa dinkamnenge. 37 Tek sisi ne kuramsi keca cap, ukutaru kune keca yuma capda, ne tep, ‘Erda mali kurure,’ penere ngebo Allah tep nengeda, nedi tamupra ne kuramsi keca yuma mumupra pepkamne. Tek sisi ne ila kange deipra, bena peptene. Ada, Raja neng sun nyapu balila di embaramengtopu kupra, er damai benedi, bena lap pepkamtene ja.

38 Tonda, ne taleamsi mutu cap, tu cap tep, telep kupra wa men peramsi dinin, awa tu tep mali kupra deiamtenepa, mali kuptupa, koun keca yala-yala yuma, telep kupra boloktudi men bongoptuopda, Allahdi wenepnetue. Allahdi wenepnetupa, ne wa penai yuma malipu kupnetue. 39 Ton dangeda, ne wa pena neng, sun akuramtengedi peamtenge wa, karena gum di, akeca yuma kipra jepramtenedi, sun aneng pel domtenge nge kunumna tep, men kareramtenedi, kaukeamtenyopda, Allahdi wenepnetue. Ange utopu, ne wa pena neng, sun aneng jen putaptupa, ikin kange douramtengepane, nedi men meliamtenepa, deptengopda, Allahdi ne tep wenepnetudi, ikin keca ne deiki deipnetue.

40 Ada, gandum wai dam bolongameng keca, bongoprepane, yuk tali paramre takke keca di, gwatepra koupdongoprepa, mali kupkamre. Tonda, koun keca, er si jelai, wai dam bolongameng keca bongoprepane, yuk tali paramre keca di, gwatepra koupdongoprepa mali kupkamre.

Dinino, amali kun keca tek sisi men kuramsa tep, ne Ayubdi aupu konum pepra deipne.