Job 32

Elihudi Ayub tep, tamupra pepu upu

1 Ayub er kayapu weneri neng, sundi upu ton cap tamupra sun kabo Ayub tep men pepi. Ada, Ayub er kange dipru neitamaida, ‘Gume, nedi tek sisi mali pio men kuramsa tep, dumsisipu kunune,’ tenepka tep, er kayapu nengdi er tep, upu ton cap men pepi.

2 Dinino, Bus yala ngebo, er si Barahkeel, erdi deiamu ngebo er sida Elihudi upu ton pepu. Barahkeelda, ada Ram yala nengdi deiamipa deipdanen yakarami nengdi, Barahkeel deipi. Barahkeeldi deipu ngeboda Elihu, erdi upu ton cap dukdongopra pepu. Elihudi upu pepka deiyoda, ake. Ayubdi, ‘Neda dumsisipu kunepane, Allahdi deiyo men kwapmaupapu ikin keca ne deiki deipneue,’ tenepudi pepu. Upepka deiki di, Allah tep si mali kupra deipmanto kupka cadi, er kabo Elihu yu kupupa, Ayub tep derepudi pepu.

3 Tonda, Elihu dipapu Ayub er kayapu weneri neng tep yu kupupa derepu. Deiyoda ake. Sun kabo Ayub tep, “Kanda malipu kuramumpa, Allahdi wenepkeue,” pepi dinin, Ayubdi mali kupu ngeda, men lap pepmanto kupi. Ayub pepu upuda, moupra gekena gum di, Ayub er deiki mali kupra deipmanto kupya tep pepu.

4 Sun aneng kan-kanda, Elihu erda kaber ngebo kuramu. Sun yuk weneri nengda, konum wisi deiami nengdi, upu penmaiya tep, Elihuda, tali dim pepra sun penmai upu gekenapu kunmau. Dinin, sun aweneri neng yuma upu konum pepropipane, er upuda amendapu upu pepu. 5 Dinino, sun aweneri neng sun upu yuma konum pepropipa, Elihu gekepkopda, ‘Gume, sundi penmai upu neitamaida, Ayub ikin weik kunmarada, ‘Deiyo ngeda ake, tenen, men lap penmange,’ tenepudi, sun aneng tep yu kupu. 6 Yu kupupa, Bus yala ngebo er sida Barakheeldi deiamu ngebo, er sida Elihudi aupu pepu.

Ne kayapu nengo. Sunda konum kaele. Neda kaber ngebopu kunun dinin, sunda konum neprumdi, wisi neng kuruma cadi, sun ila kael kemna neng kurume. Atep nengeda, ne tenenun ngeda ake. ‘Sun awisi neng damai penada pepkun do? Men pepkun do?’ tenena deiki di, nedi tenepman ngeda, sun damai kapul men pepmane. Neda, kware kupneupa, ali daksa tep, upu ton kapul men pepsisi dinin, ukutaruda nedi tenepman upu ton pepkusene. 7 Ne kange neitamai tenepsada, ‘Gume, menmena konum nepmange wisi neng, sunda ila kael kemna kecada, weik konum kael kemnunge. Atep, telep ngeda, awisi nengdi konum kael keaminge bokra, nun kaber neng tep karepsetenga pua,’ tenepsi.

8 Dinino, ukutaruda konum moupra tenepmane. Nimi tuai nesalada, keteng tamun weik kuramenga deiki di, ila kael neng men kununge. Tek sisi ngeda, nun tuai mutu nesala yuma tep, kael kemna deiyo keca kareserura ngeboda, Allah er pua. Allah erda, akeca-keca yuma talepra, Ila Puto Weik Deiyo Ngebodi kurura cadi, er Lek Sambalada, er pio puto kururnge deiki dipapu ila kael kemna deiyo keca kareserure.

9 Ne kangeda, ‘Kael kemna keca weika di kael kemenge nengda, menmena nepra wisi deipmenge nengdi kael kemnunga gume. Tonda, pio moupra kael kemenge nengda, sun menmena nepra wisi konum deiami neng, sunpu, kael kemnung guma,’ tenepne. 10 Ange tep nengeda, ne upu gekepkunerume. ‘Ne pedi tenenun ngeda, sun damai pepsetene’ tenen, moropsene. Ada ake.

11 Arup taru, ne dingeda, ‘Gume sun anengdi upu pepkungada, neda moupra gekepnedi, ila kaelnge ton gekepnedi kael kepkamana tep, ataruda, tali dim peprappu gekepkune,’ tenepmasi. Tonda, sundi, ‘Ware telep upupu peptepe do, ange do, ange do?’ tenen, tenepmarumdi, telep upu perterenmarum taru yumada, ne dim pepra gekenapu kunmasi.

12 Ne betapra dinmasenedi, konum kael kemsenune. Sundi Ayub er damai penmarumu upu deiki di, “Kan Ayubdi mali kupmum ngeda ake, ake,” pepra, tek sisi men lap pepmarume. Tonda, erdi sun tep tamupra pepmau ngeda, sundi tamupra er tep, telep upu pepra, men lap peipmarume. Ada, Ayub erdi walwal upu pepmau ngeda, ton akaptuopda, sundi, “Gume, kandi mali upu pepmaumumada ake. Atep nengeda, tek sisi ngeda ake,” pepra, men lepsisikra derimemerume. 13 Sunda moupra tenepso! Ware keca deiyo tep, sundi, “Nunda ila kael kemna ngeda, nun konum kael kepmupu,” peptuma deiki di, Ayub weneptum do? Aupu utopu perum dinin, ne kangeda, Ayub er perur upu cap, er kurur keca cap tep, nun tuai mutu kunup nesaladi men weneptepe. Tek sisi ngeda, Ayub perur upu cap, erdi kurur keca cap tep, tamupra wenepra pepmanto ngeboda, Allah erpu kurure.

14 Tonda, Ayubdi penmau upu yumada, ne tep upu men pepmaneu. Sun damaipu pepmaseu. Tonda, sundi Ayub tep konum penmarum upu utopu, ne tep ton men pepkune. 15 Ne kangeda, sun weneri nengda, konum kange tenimtonapu kurume. Sunda, ‘Uo, ware upu ton tapakra peptepe do?’ tenen, kange wang-wang kurume. Sunda wang-wang pepseupa, Ayub tep tamupra tupa men penmarume. 16 Sunda tali dim pepra teknapu kupmaruma cadi, ne peda tali teknapu kupkaman do? Upu ton men peptene do? Sundi Ayub tep, sun upu ton tamupra telep men penmaruma tep, neda upu pena gum di, tali dim pepra teknapu kupkun do?

17 Gume, neda dim pepra teknapu men kupkune. Ukutaruda, nedi kan perum upu tep, tamupra pepkukene. Ne pedi tenenun ngeda, Ayub kan damai tep pepkukene. 18 Ada, ne tenenun ngeda, pio dim pepra tup men kunkamne. Nedi kan damai pepketene upuda, weik akapmanera tep, aupu yumada, darapdongopra men kutene. Ne kange dipru neitamaida, ‘Ange yumada, adipapu katuai pepkurume,’ penerura cadi, ukutaru pepkukene.

19 Ukupmanto ngeda, ne dipru kange tenenun ngeda, men pepnedi, dim pepnapu kupnyopda, ne kange dipru neitamai dipapu bongopra sakmanto kunerure. Ada ukupmantoda, anggur ukupunge gwepra, domba bisam bol dopra wipmengedi, ange pumbon anggur mokon ^{▼▼mokon – Angeda, kambing bol koptapidi, keteng di konum kolupu pangeda, anggur me do, tali jen me do, dikdongopnedi, mawa derina tep, abol dana-dana tara bon yumada, tapke di wiramidi dekdongorami. Gambar dirume.} kipmengepa dinikredi, deipmangepanen, amenda taru anggur puto di, abisam bol bongoprepa, anggur me mokon sakmanto kuramretopu kunerure. Ada, ‘Upu weika di peptene,’ tenenuna cadi, ne dipru kange neitamai tenena deiki di, konum bongopmanto kupnere. 20 Atep nengeda, ne peda ne kange neitamai di tenene upu pepnya deiki di, ne kangeda, ka di ton tamupra telep kupkamnere. Atep, Ayub kan upu pepmumpa, ne gekepsidi, tenenun ngeda, kan damai tamupra pepkukene.

21 Ne upu kan damai pepkuken ngeda, ‘Angebo tara keapna, angebo tara kemnedi, minina upu pepkune,’ tenena upuda, pio men pepkune. Tonda, tenpu ngebo ton mali kuramu dinin, nedi angebo tep, “Kanda pio telep ngebo kurume. Kandi pepmum upuda telep upu pepmume,” pepra, er kange telep kudina tep, upu tali men peptapkune. 22 Tek sisi, nedi ato tali pertamna upu penada, men kael kepsi. Tonda, tali kange derina upu peptaptenya peda, Allahda ne ketekepra deiamneua deiyo ngebo kurura cadi, erdi ne tep adipapu wenepra poptapnetupa deptene.

Elihudi Ayub tep pepu.