Job 33

“Allah erdi nun nimi damai tep, er upu pepra deriserurada, akeca-keca deiki di pediserure,” pepu upu

1Elihudi Ayub tep, aupu ton pepu.

Tali-tali upu men peptapkuken dinino, ukutaru nedi Ayub kan tep apepkuken upu yumada, gekepmemdi beta moupra tenepkurume. 2Kanda moupra gekepkunerume. Nedi, ‘Ayub er damai upu pepkamemene,’ tenepsidi, konum ketenepsi upupu, ne pe sipyal deiki di pepkukene. 3Ne kange dipru neitamai di tenenun ngeda, pio dumsisingepu pepkukene. Ne sipyal deiki di pepkuken upu yumada, tali pertamna upu gume. Tek sisi ne kael kepsi ngeda, pio mambul upu pepkukene. 4Neda, Allah er Lek Sambaladi konum ketekepra deipneue. Tonda, ukupneupa, ila di erepra, akeca-keca yuma talepra, ila puto weik kurya deiyo ngebo Allahda, akeca-keca yuma talepra, deiki tara erepra, Ila Puto Weik Deiyo Ngebo kuredi, er dipapu, er ila puto isin di, ne nong neitamai isin dongopneua deiki di, gam kunune.

5Ange tep nengeda, ne pepkuken upu kan gekepmemdi, tenepmemnyopda, ‘E, ange tep upu ton tamupra peptene,’ tenepmem dingeda, adipapu aupu pepkunerume. Tonda, ne upu pepnepa gekepmemdi, ‘Angeda gume, tek sisi ngeda ake, ake peptene,’ tenepmemnyopda, ne pepkuken upu sengdana tep pepkumem upuda, ketenepkurume.

6Tek sisi Allah er kangeda, kan cap, ne capda, nun yuk-yuk gume. ‘Sunda utoto pua,’ teneserure. Allah er dipapu kerah tu dopra ne ketekepra deipneutopu, kan peda kerah tu dopra ketekepra deipkeue. 7Kan cap, ne capda, tali tuai nengpu kunuma cadi, kandi ne tep, ‘Uo, ware ikin upu pepkuner do?’ tenen, kwar kuna gume. Ne pepkuken upuda, kan ikin kemdina tep upu men pepkukena tep, kwar dangna gume. 8Dinino, arup taruda kandi penmamum upu yumada, ne konum gekepmakene. Tonda, kandi tenepra penmarem upu yumada, ne konum moupra gekepmakenue. 9Kandi aupu pepmamume. “Gume, neda Allah erdi pepra deipseu upu men yanirtamnune. Neda, dumsisi teleppu kunune,” pepra, lap penmamumpa konum gekenmasi. “Sundi dipetepnetuma peda, neda lerekra mali kun keca ton men kununa cadi, mali kun kecada ton men epkamnerume. Neda teleppu kunune,” pepra, lap pepmamumpa, konum gekenmasi.

10Tonda, kandi, “Neda pio dumsisipu kunun dinin, Allah erdi ne tep, ‘Wareto kuptenya deiki di angebo Ayub er tep wenepnedi, mali kupra deiptene do?’ tenenerure. Allahdi ne tep nengeda, ‘Erda, ne yanirtamna ngebo kurure,’ teneneredi, konum kael keipneue,” pepmamume. 11Tonda, “Allah erdi, ‘Ayub tep berur’ tenen, gat co dopra, bon potokra, ne yanda akeca pumbon konum dongopneue. Ukupneudi, ne yuk tara yanipra embenmantoai yumada, ‘Angebo mali kupkamar do, telep kupkamar do?’ tenen, kalengnapu kunerure,” pepmamume. 12Uo, Ayub kandi akange tenepra upu perum ngeda, walwal di tali upu perume! Allah erda nun nimi utopu ngebo men kurure. Erda ila puto cap, eremna cap ngebo kurura cadi, nun tuai nesala yumada, er amutarapu kunupe.

13Atep nengeda, ware keca deiyo tep kandi Allah tep, ‘Ne tenene kange cap, penun upu cap yumada, Allah erdi tamupra men pepnetue’ tenen, Allah er pekere upu yumada, yanirtamna utopu perum do? 14Gume, ne kael kepsi ngeda, ake. Allah erdi nun tuai mutu kunup nesala damai upu pepra deriserurada, er sipyal deiki dipu men perure. Tonda, erdi pel dorur keca yala-yala yuma deiki di peserure. Ukupra peserur dinin, nimi tenpu peda, Allah erdi pediserur upuda, ton ngeda gekena cap, dina cap kunup dinin, ‘Deiyo neitamai ngeda, ake,’ tenepra men moupra kael kemnupe.

15Ukupmantonge pepkukene. Nun nimida, lukunda mapra u dakmape taruda, Allah erdi ken deiki cap, ken lur-lur deiki capdi, nun damai yana, upu pepra deriserure. 16Ato taruda, Allah erdi, ‘Ne pepne upu sun nimidi gekepkuneng’ tenen, nun amol pakra deipseredi, “Ukunmarumada yapso! Gum dingeda, nedi popra gawal dakamsene,” pepra, nun damai wenemna upu perepa gekepmepedi kumkum dangnupe. 17Allah erdi ato upu peserura deiyoda ake. Ada, ‘Aupu pepnepa gekepmengedi, sun mali kunung ngeda taptenge’ tenen, peserure. Tonda, sun dipru erepra salnong-nong kamnung ngeda, taptengedi, ka tamupra teleppu kutenge’ tenen, ken deiki di ato upu peserure.

18Tonda, Allahdi teneserurada ake. Ada, Allah erdi, ‘Gume amali kunge nesala tep, kaukeptapnepa, sunda malipu kuramenganen, konum depmengopda, tu palipra dongopkamenge. Ange utopu, malipu dakuramenganen, konum depmengopda, ila di embaramre me goupra ortarada, konum deami neng kunungaipu bena kunkamenge,’ teneserure. Atep, Allahdi, ‘Mali kunmangepapu, depnung’ tenen, Allah erdi nun tuai nesala tep, ken deiki di upu peserya deiki, melipra lyemdoserure.

19Tonda, Allah erdi, ‘Sun aneng mali kunga deiki di depnung’ tenen, wenemna tep nengeda, kange mun pu jena deiyo keca kareprepa, sun nong neitamai yarepa doropmengedi, ila pu weik jerure. Sun nong pumbon cap, sun nong neitamai yo cap, pu weik jerya deiki di, ‘Uo’ tenen, mali penunge. 20Ila pu jerur ngeboda, jena telepnge peda ton, ‘Ajen keca dopra jeptene,’ tenen, putana pio gum tep, akeca pio men dopra jerure. Pio tau peramre jen peda, angebo ajen keca epredi, adipapu dukmantopu kurure.

21Apu jere ngebo, er nong bol urasinda men di teleppu kuramu dinin, apu jere taruda, pio bol ekropredi, bol malipu dourure. Ukupredi nong galemna gum kupropredi, er nong yo yumada, apu men jeamu taruda, er yoda men epmanto kuramu dinin, ataruda jenekpu kurure. 22Ukupyopda, angeboda depmenge neng peirbaramengai konum benmanto kurure. Nimi depmengepa peirbarameng neng, sun sambala bena kunungai bana tep nengeda, konum damai benmanto kurure.

23Ukupra ikin weik kurur dinin, Allah er im deiki pel don neng malaikatda, pio weik men nukmanto dinin, seribu malaikat kankan neitamai di, tenpungepu yatudi, angebo tep meliptue. Amalaikatdi, angebo er gam kuramu taru pel doramupa, “Erdi meliamu ngeda, teleppu kurure. Mali kunange tenpu peda, men kuramu,” pepra, angebo deiki pepyopda, apu jere ngeboda, ka tamupra teleppu kunkamre.

24Amalaikatdi, er angebo tep, bicau kuprepa, erdi upepkamemere, “Allah, kandi angeboda, kaukepo. Er angeboda, nimi depmengedi, wengbanunga damai bana gume. Er angeboda, ‘Sun derami neng damai men betu’ tenen, er gam kuna kunumna tep karepmanto kecada aca,” pepra, pepkamemere. Akeca karepredi, angebo er yoda punupdongopkamre. 25Amalaikatdi, ange ton peptue. “Angebo er nong bolda tamupra telep kupredi, poto kupra deiprepa, kaber neng bol utopu kupkamre,’ tenen, moropkene,” pepkamre.

26Upepyopda, angebo er pedi Allah tep, “Naio, melipra lyepneo!” pepra, moropyopda, Allahdi angebo tep, bicau tenepredi, ‘Telepe, angeboda, ne damai yakana telepe,” konum pepyopda, adipapu melimemerure. Ukupre pangeda, er angebodi Allah er tepapu kange deipredi, Allah damai konum yaryopda, Allah tep gispal donkamre. Ukuryopda, Allahdi angebo er dumsisipu kuramunge tep, menenga keca karepredi, angebo tamupra telep kweiprepa, men di telep kuramutopu, kange di tamupra, teleppu kunkamre.

27Allahdi angebo konum ka tamupra telep kweipyopda, nesala yuma wekra gekenmangyai dipapu, er angebodi upenkamre. “Nedi telep ngeda, mali kudiramsidi, mali ngeda, ‘Ange telepe,’ pepra, tali upu peramsidi, pio mali kuramsi. Dinino, Allah erdi ne tep men wenepra poptamneue. Bicau tenepneudi, ne mali kuramsinge yumada, kaukepnapu kupneue,” pepra, lap penkamre. 28Tonda, angebodi, “Neda deramenge nesala kunungai benmanto kuamsipane, Allah erdi ne tep, ‘Angebo konum derami neng kunungaida, bana gume,” pepra lyepropneue. Ukupneupa, ukutaru neda gam tupa kunkamne. Tonda, dirineda tupa dinapu kunkamne,” penkamre.

29Uda, ange lap pepmakena yumada, moupra kael kemkamrume. Allah er dipapu pio ton cap tupa-tupa tamupra, nun nimi damaida konum kuserure. 30Ukurura deiyoda ake. Ada, Allah erdi nun tuai nesala tep, apel doserya deiki di, deramenge neng damai benmanto kupepanen, amenda taru lyemdoserure. Ukuseredi, nun kunada, pio telep kupra deipserepa, kange deipra telepepu kunupe. Gam tupa kupedi, dirine akurepa, adirinda dinkamepe.

31Atep nengeda, Ayubo, kan amulda beta pakra deipmemdi, ataru nedi kan tep penkuken upuda, dim pepmemdi, moupra gekepkurume. 32Dinino, nedi aupu yuma konum pepnepa gekepmemdi, kandi ton, ‘Tamupra pepkune,’ tenepmemnyopda, pepkurume. Kandi tek sisi upu pepmemnyopda, nedi kan pepmem upu gekepkenedi, ‘Aupuda tek sisi pepre’ tenen, kael kepkenedi, Allah er damaida lap pepkamakene.

33Dinino, kandi, pepmanto upu ton gum dingeda, nedi pepkuken upupu dim pepra gekenkunerume. Ne kael kemna ngepu kan damai pekenepa, gekepra kael kepkurume.”

Elihudi, Ayub tep aupu yuma pepu.