Job 34

Elihu erdi, Ayub cap, er kayapu neng butene neng tep, pepu upu

1– 2Elihudi aweneri neng tep pepu.

Sunda ila kael kemna deiki di moupra teneprumudi, konum kael keamrum neng kurume. Tonda, sunda akeca-keca yuma deiyonge konum tenepruma cadi, nedi sun tep pepkusen upu yumada moupra gekepkurume. 3Angeda tali tep men pepsene. Sun kaele, nimidi jen keca konum dopra jepmengedi, ‘Ajen kecada telep jen keca’ tenen, jepetepmenga deiki di kael kemnunge. Ange utopu, nimi ila di kael kemna upu deiki di pepmengopda, moupra gekepmepedi, ‘E, ange pepmangada, tek sisi upupu pepmange,’ tenenupe. 4Ange tep nengeda, nun tonpa di lepsisikra tenepmepedi, ‘Mali ngeda ace. Dumsisi telep ngeda ace’ tenen, kael keptepe.

5Arupda, nun kap Ayubdi pepseu. Erdi, “Neda mali kun keca ton pio men kunune. Dinino, Allahdi ne tep, dumsisi kupra upu men bongdinerure. Ne deikida, dumsisi telep kunange ton men karenerure,” pepmau. 6Tonda, Ayubdi, “Neda mali kun keca ton pio men kuramsi,” pepra lap pepsi dinin, sun di ne tep, “Gume, angeboda mali kure dipapu, ‘Neda mali men kunune,’ perura cadi, erda mok upu pena ngebo kurure,’ tenenerume. Allahdi, “Angeda kunkamrume, angeda pio men kunkamrume,” pepra, deiamseu upuda, pio men yanirtamnune. Dinino, Allahdi ila kange mun keca ne nong deiki wenepra deipneu ngeda, ataru ne deikida ila susu jenerepa, ne kange mun kunerure,” pepu.

7Ayubdi, ato upu pepseua cadi, erda tupa-tupa Allah er deiki mali upu pepra derirur ngebo kurure. Ukupmantoda, yuk nengdi, jena telep me gwepra, tali lupra jerameng utopu, Ayubdi, Allah tep, menina upu peredi, nalemrure. Ayubdi aupu perur ngeda, sun ton dirum do? Erdi balila kupra, mali upu perurtopu, yuk neng ton utopu men penunge. 8Tonda, Ayubda, ‘Mali kunung neng cap tonpa bulupra wektene’ tenen, putaprepa kurure. Tonda, ‘Mali kunung nengda, ne cap tonpa kutenedi, sun kunge kecada, ne peda kunkamane,’ tenerure.

9Angeda tali men pepsene. Nun kaele, Ayub erdi aupu ton peipseupa, gekepmupu. Erda, “Nimidi pio pe deipra, ‘Allah er tenerurtopu kuptene,’ tenerur ngeboda, tali tepapu ukuptene tenerura. Allah tep kange deiptepya peda, angeda nong men kupkamre keca pua,” peipseu. Nun kabo Ayubdi aupu konum peipseupa, gekepmupu. 10Atep, sun ila kael kemrum nengda, ne Elihudi pepkusen upuda, moupra gekepneso! Allahda, akeca-keca yuma talepra, deiki tara erepra, Ila Puto Weik Deiyo Ngebo kura cadi, mali keca ton kurur do? Gume ada men kuptue. Teka Allahdi mali kunange, tenpunge peda pio men talepra kurure.

11Ange gum dinin, Allahdi, nimi mali kupmengopda, amali kupmengetopu kunumna tep nengeda, anesala tep wenemrure. Angetopu, nimi mali kupre ngeboda, amali kupretopu, Allahdi wenemna keca peda kareprepa, amali kuna ngebodi dororure. 12Pio tek sisi upupu pepsene. Allahda, akeca-keca yuma talepra, deiki tara erepra, Ila Puto Weik Deiyo Ngebo kurura cadi, mali keca ton pio men kurure. Gume ada men kuptue. Teka Allahdi mali kunange, tenpunge peda, pio men talepra kurura cadi, nun mali kunange tep, nimi upu bongdina taru peda, Allahdi tali upu pio men pertamrure. Dumsisi kupra upu bongdiserure. 13Allah er ila puto kuredi, tuai mutu ban-ban yuma talerura deiyo ngeda, ware ngebodi Allah tep karepu do? Ware ngebodi Allah tep, “Atuai mutu yumada, kandi talepkureme,” pepra deiyo karepu do? Gume, ange yumada Allah ja!

14– 15Allah erdi nun nimi neitamai dongopseupa, gam kuserur sambala cap, isin dongopseupa, isin eremserur nge cap tamupra doropsetuopda, nun gam kunup keca yala-yala yumada, adipapu deptepe. Nunda erdi ketekepra deipseua tep, tamupra tu but utopu dankamsere. 16Atep Ayubo, kandi, ‘Neda ila kael ngebo kunune,’ tenepdarum ngebo cadi, ne pepkuken upu moupra gekenkunerume. Tonda, kan amol pakeipmemdi, moupra gekenkurume. 17Allah erda akeca-keca deiki tara erepra kuredi, akeca yala-yala yuma talepra ila puto weik ngebo kurura cadi, pio dumsisi kupra kuredi telepepu kurure. Atep, angebodi, dumsisi kupra upu men bongdinkamser do? Dumsisi telep kunange tep, ‘Ne songe,’ teneptuopda, tuai mutu nesala yuma talepra deiyo ngebo kuptu do? Gume, angeda men kupmanto. Ayub kandi Allah tep, “Erda mali kurure,” pepra yu kunkamrem do?

18Allah er dipapu nimi deiyo kepra kunung neng, sun Raja-Raja neng cap, sun amutara dinin, yuk nimi deiyo-deiyo neng cap, sun mali kupmengopda, Allahdi sun tep, katuai di, “Sun mali kunmarum ngeda ace. Sundi telep kunmarum ngeda ace,” pepra lepsisikra wenepredi upu bongdirure. 19Allah erdi, “Uo, ada Raja ngebo, tonda ada isomka ngebo cadi, sun tara kepnedi tali kankan neng mali kunung ngepu lepsisikra upu bokeipkamne,’ pio men teneserure. Ada Allah er pe dipapu nun yuma ketekeipseua tep, nun yumada er amutarapu kunupe.

20Ange ton men tenepmarum do? Ware nesala do yuma, sun kankan neitamaida, ton tara nengda sun mapmanga lukunda taru neitamaida, dato-dato dipapu denunge. Allah er ila puto kurur ngebodi nimi deiyo kepra talenung neng peda, wenepra popre pangeda, sun peda denapu kununge. Tali nimidi men ponunge. Angeda Allah er dia! 21Ukupra nimi tep wenepra porurada, tali tep gume. Allah erdi nun nimi kupedi dan tara embanup bisi yumada, ‘Telep kunung do? Malipu kunung do?’ tenen, diseredi moupra kalengserure. Nun kurameptopu, wenepra menenga keca kareserure.

22Nun mali kunup nengda kunungna neitamai bena iniptepya peda, Allah erdi epra kael kemserure. 23Allahdi nun nimi tep yana wenepkamser taruda, atumi neitamaipu yanedi, wenepra upu bokeipsenedi, wenepkamsene,’ men pepra deriserure. Er tenere tarupu, dato-dato dipapu yana wenepra popsetue. 24Allahdi nimi deiyo kepra talerur ngebo, er ila puto deiki di er mutu yuma talerur dinin, Allahdi angebo er kurur keca moupra dipetepredi kael kemrure. Dinin, nimidi, “Uo, ‘Angebo mali kuramu do, gum do?’ tenen, dipetepmepedi, upu bokeipkamepe,” peramengtopu, Allahdi ange men kurure. Allahdi tenepre taru dipapu animi deiyo ngeboda, tapredi yuk ngebo punupra nimi deiyo kepra derirure.

25Ada, sun aneng kuramenge keca yumada, Allah er kaele. Atep nengeda, erdi tenepre tarupu, lukunda neitamai dipapu men talepra kuramre ngebo yawa poptapredi, ukupu ngebo punupra eremdirure. 26Sun anengda, mali kununga tep, Allah erdi sunda adipapu popra wenemrure. Nesala yuma dinmangai dipapu, Allahdi sun mali kunge neng tep wenepra porure.

27Ukurura deiyoda, ake. Ada, sun adeiyo-deiyo nengda, ‘Allah erdi, “Ange kunkamrume, angeda pio men kunkamrume. Telep kuna ngeda, ake,” pepra, deiamseunge yumada, anengdi konum yanirtamamya tep, porure. Teka, Allahdi perur upu, moupra men talengedi, ‘Angeda tali upu pua, dakwapye,’ tenenge nesalada, Allahdi wenepra porure.

28Sun anengdi nimi deiyo kepra talenunga puto deiki di, Allahdi peserur upu yanirtamnunga tep, sun amutara tali kankan nesala tep, ikin keca weik, sun nong deiki deipmengepa, ‘Uo, uo, ange-ange kuptepe’ tenen, ikin kange doupmengedi engenung ngeda, Allah konum gekerura tep, sun deiyo neng tep wenemrure. Kange mun kange doupra engenung nengda, Allahdi gekepredi, sun damai yana loptapra lyemdorure. 29Allahdi, ‘Neda dim pepra ditamnapu kunedi, mali kunge nesala kapul men wenepkamane,’ tenepra kutuopda, ware nengdi sun animi deiyo neng tep weneptenge do? Tonda, Allahdi, ‘Nimida, ne kune keca men dinkamnenge’ tenen, er urasin iniptuopda, wareto ngebodi er urasin eptu do? Tonda, tenpu ila mutu neitamai kunge nengdi, Allah eptenge do? Agum dingeda, tenpu ngebo dipapu, Allah er urasin eptu do? Gume, ada men kupmanto.

30Allahdi, pio mali kunge neng, er tep, ‘Nun songe,’ tenenge neng dopra, nimi deiyo kemna ngebo konum wepra deiptengopda, wareto nengdi upu sektengepa, ange men kuptu do? Gume, tuai nesala yumada, puto men kuptenge. Allahdi sun tep men melipre pangeda, mali kun ngebodi sun deiki ikin keca deipra, puto di sun tep taleptu pangeda, sun pe dipapu men lyepdanmanto kuptenge. 31Ayubo, kan mali kurum ngeda, Allah damai tep, “Ne mali kupsi ngeda, konum wenepneruma cadi, neda ton cap mali men kunkamne,” pepra, pedina upu deiki di konum peipmum do?

32Tonda, kandi Allah tep, “Ne mali kunun nge akapyopda, Allah kandi, “Kan mali kupmum ngeda, ake,” pepra lap pepnemempa, kael kepnedi, nedi ton cap pio men kupkamne,” pepra, Allah er deiki pedina upu konum pepmumdi moropmum do? 33Tonda, Allahdi kan deiki pel dokerur ngeda, kandi, ‘Gume angeda telep kupra men kunerure’ tenen, tenepmemdi, er tep pepmemnyopda, ware keca tep Allahdi kan tenepra pepmem ngeda, adipapu kupkamaker do? Kan pe kange dipapu tenemem kecada, Allahdi adipapu kupkamre do? Gume angeda men kupkamre. Atep nengeda, ne Elihudi kan tep, “Ange kumkamrume,” pepra men pepketene. Ange gum dinin, kan dipapu, ‘Ange pepkune,’ tenepmemngepu wepra jenek kupra pepkamarume. Kan pe dipapu, ‘Angeda aca,’ tenepmem ngeda, adipapu jenek kupra lap pepkurume!

34Ukupra pepnetum dinin, ne kangeda, sun kange neitamai di tenepra, ila kael kemnung neng cap, tonda ila kael kemna deiki di, nong neitamainge moupra tenepmengedi kael kemnung neng yuma capda, nedi kan tep pepkuken upuda, gekepnengedi, kael kepkamenge. Kael kepmengopda, sundi upenkamenge.

35“Uo, Ayub er perur upuda, moupra men tenepre dipapu, tali-tali upupu perure. Aupu penmarada, erdi menmena, ‘Akeca nong deiyo neitamai ngeda, ake, ake,’ tenepredi, moupra men kael kepre dipapu, tali upupu pertamrure. 36Atep nengeda, sun upu bongdina deiyo nengdi, Ayub er perur upu moupra gekena cap, dirpetena cap kupmenge dingeda, sundi, ‘Gume, mali nengdi tali pertamameng upu utopu upu perure,’ tenepmemetengedi penkamenge, tenepmepe.

37Ayubda, walwal upu perure. Angepu gum dinin, tonda Allah pesere upu yanirtamnapu kurure. Akurya deiki di mali kemdidarure. Tonda, nun yuma gekenmapai di Ayubda Allah tep, mali-mali upu weika di pepra nalemrure.” Sun ila kael nengdi, kan Ayub tep utenekengedi, upu penkamkenge, pepne.

Elihud erdi Ayub tep, aupu yuma pepu.