Job 35

Nimi tuai nesala ikin kunge taruda, Allahdi dirura tep, pepu upu

1 – 2 Elihudi Ayub tep aupu ton dukdongopra pepu.

Ayubo, kandi, “Neda Allah er dina damai di ne mali men kuramsitopu, tupa mali men kunune,” pepmaremada, pio tek sisi upu di pepmarum do? Wang-wang pena deiki di pepmarem do? 3 Tonda, kandi asipetepra pepmaseremada ake. “Uo, ne mali kuna gum dinin, Allahdi ne tep wenepneudi, ila ikin keca weik ne nong deiki konum derinerure. Atep, neda Allah er damai mali konum kupmatene teptoda, tek sisi wenepkamnera cadi, uktaruda nedi mali men kupmatenya peda, mali konum kupmatenya peda, ware telep keca doropkamtenya tep do? Gume, konum wenemnerura cadi, angeda utoto pua,” pepra pepmasereme. Dinino, kandi aupu pemem ngeda, kan kange wang-wang pekerya deiki di pepmareme.

4 Ayub kandi aupu konum pememnge tep, upu nong yumada nedi tamupra kan damai lap pepkukene. Tonda nedi kan kayapu neng, sun weneri neng damai ton, aupu lap pepkusene.

5 Ayubo kanda moupra tenepetepo! Kandi im alau tara kure keca yumada, kan urasin erepra dipetepkurume. Im neitamaida, dua yuma deiki tara, pio im neitam tara ikurure. Dinino, kanda amutara tuai mutu deikipu kurume. 6 Kanda, tek sisi mali kuptuma peda, Allah er tep, ikin deiptum do? Ange utopu, kandi mali kun keca weika di ton cap tapakra mali-mali kuptuma peda, akumemnya deiki di, Allah er nong deiki ikin keca deiptumpa, kange mun kange doupra kunkamre do? Gume angeda men kupmanto. 7 Tonda, kandi pio telep dumsisi pelpu doptuma deiki di, Allah er tep men melipmemetume. Telep kunangepu kutuma peda, adeiki di kanda wareto keca dopra Allah tep kareptum do? Kan telep kuna deiki di, Allah tep wareto keca kareptumpa, kange deiptu do? Tek sisi, ukuptuma peda, Allah erdi, ‘Uo, angeboda, pio dumsisi kunmarya deiki di, telep keca karepmanerdi, konum melipneue,’ tenepkamker do? Gume, ange peda men kupmanto.

8 Ange gum dinin, tek sisi ngeda, kan mali kumemnya deiki di, yuk tuai mutu kunge nesala tep mali kudirume. Kan utopu neng dinin, yuk nesala sun damai yumada, malipu kupra deiptuma. Ange utopu ton, kandi, pio dumsisi kupra, telep keca kutuma deiki di, kan utopu neng dinin, yuk tuai nesala sun damai yumada, malipu kupra deiptuma. Kandi kumem keca deiki di, Allah tep mali men kweiptume. Tonda Allah tep, telep men kweiptume.

9 Tuai mutu kunge nesalada, yuk yu nengdi ila ikin keca sun deiki deringepa doronung nengda, sun yumadi ‘Uo’ tenen, mali pepra ngolongmengedi, ‘Melipseo,’ pepra, sun kayapu neng tep moronunge. Ada yuk yu nengda, sun ila puto deiki di, yuk tali kankan dakunge nesala tep, ikin keca dopra sun deiki deipmengepa, mali kange doupmengopda, sun kayapu neng tep, ‘Uo, sunda nun damai yana melipseso!’ pepra moronunge. 10 Dinino, tuai mutu ban-ban yuma neitamai kunge nesalada, kange mun kange doupra kunung taruda, sundi, “Uo, nun nai bo Allah, nun nong ketekemdina deiyo ngebo kurume. Lukunda taru neitamaida, ikin kupserepa, kan dipapu nun damai yana melimseruma cadi, ukutaru peda, yana melipseo!” pepra, men moronunge.

11 Sundi ton, “Uo, Allah kanda, tuai mutu neitamai tali gam kunung keca yala-yala yuma cap, im neitamai lakra embanung ma capda, kange douna gum kecapu karerum dinin, nun nimi tep nengeda, ila kael kemna deiyo keca konum kareserume. Nunda ikin kunmapa cadi, kan dipapu yana melipseo!” pepra, Allah tep men moronunge. 12 Tuai mutu neitamaida, ikin kange doupra kunung neng, sundi Allah tep, “Melipserume,” pepra ngolongmengedi, Allah tep moroptenga peda, Allahdi sun moronung ngeda, pio men gekerure. Dim pepra dirtamnapu kurure. Ukurya deiyoda, ake. Ada, sun anengda, dipru eremna cap, salnong-nong kamna cap, tonda mali kuna cap kununga deiki di, sun moronung ngeda, Allahdi tali dim pepra gekertamnapu kurure.

13 Sun anengda, upu puto di ngolokra, Allah tep moronunga peda, tali tepapu moronunge. Deiyoda ake. Ada, Allahda, akeca-keca yuma talepra, deiki tara erepra, Ila Puto Weik Deiyo Ngebdi, sun tep epra tamrure. Tonda gekepra tamrure. Ada, sundi pio mali kun kecapu talepra kununga tepa.

14 Ange tep nengeda, Ayub kandi balila deipra, pio tali-tali upu pememnya deiki di, “Allahda men dinune. Ne damai yana men melimnerure. Tonda, neda ikin weik kununa cadi, ‘Allahdi, dan taru ange yuma epra, ne melipra lyemna tep, ne damai yana melipkamner do?’ tenen, tupa-tupa dinapu kunune. Tonda, dan taru, Allahdi ne damai yana, dumsisi kupra upu bokeipneredi, kange di ton cap telep kudinkamner do?” pepra, malya perume.

Atep moupra tenepkurume. Sun dipru erepdangedi, salnong-nong kunge nesaladi, Allah tep morotenga peda, sun mali kunange tep men gekerure. Sunda yambul mali kununge. Dinino kandi pio mali upu peruma cadi, kanda ila mali kurume. Atep, kandi Allah tep pio tali-tali upuda, tapa-tapa perum dinin, tek sisi Allahdi pio men gekenkamkere.

15 Angepu gum dinin, ne kap Ayubo, kandi atali-tali upu ton perume. Ada, kandi, “Gume, nimi tuai nesaladi mali kun kecapu talepra, malipu kunge taruda, Allahdi ange yuma moupra men dirura cadi, anesala tep, men wenemrure. Allahdi, anesala mali kunge keca tep, kaukemtamnapu kurura cadi, sun mali kunange tep, men wenemredi, anesala tep men porure,” perume. Upememnya deiki di, Allahda tek sisi kure ngeda, moupra men tenememdi, yanirtamnapu kurume.

16 Ukuruma tep nengeda, kan Ayub tep upepkene. Kanda tupa-tupa tali upupu pertamrume. Tek sisi ngeda, Ayub kandi upu weika di perumnge yumada, moupra men tenepmem dipapu, tali upu pertamrume.

Aupu yumada, Elihudi Ayub tep pepu.