Job 36

Elihudi sirya gawal dangna tep, pepu upu

1Elihudi, aupu ton dukdongopra pepu.

2Nedi upu ton cap tapakra pepkusena cadi, sun ton moupra gekepkunerume. Weikanun ton men penkusene. Ada Allah er kure keca tep upu yambulanun ton lap pepkukena cadi, kandi aupu moupra gekepmemdi, moupra tenepkamrume. 3Nedi pepkusen upuda, ila kael kemna deiyo keca tep, karenai di dopra sun damai yana pepkusene. Allahdi ne tep ketekepra deipneua deiyo ngeboda, mali kuna pio gum di, pio dumsisi kupra kuredi, teleppu kurure. 4Neda, kan damai tekra upu pepkene ngeboda, tali upu men pertamnune. Neda ila kael kemna deiyo kecada, ‘Nong neitamainge ake’ tenen, weika di konum kael kepsa tep, mok upu pio men pepkukene.

5Tek sisi nun yuma kaele. Allah erda, ila puto weik ngebo kurure. Erdi tuai mutu ban-ban yuma neitamai kunge nesala yumada, sun tep bicau teneserure. Allahda, er ila puto weik kurenge cap, pio ila di kael keamudi, nong neitamainge yuma konum tenerur nge capda, weik kurure. 6Tonda, sun mali kun kecapu pio talepmengedi, malipu kunge nesalada, ‘Pio gam tupa kunkameng’ tenen, men melipra kalengrure. ‘Sunda dadeptenge’ tenen, kaukeptaprepa, adipapu denunge. Dinino, sun dumsisi kupra, teleppu kunge nesala yuma tep nengeda, yuk nengdi ikin keca dopra, sun deiki deipmengopda, erdi telep upu bokeipredi, atelep kunung nesala tep melimrure. Sundi dopropmateng keca yumada, karerure.

7Teka, Allahdi, “Angeda kunkamrume, angeda pio men kunkamrume,” pepra deipseu upu, talepmengedi, dumsisi teleppu kunge nesala tep nengeda, pio men tamrure. Anesala yuma tep, moupra diredi, kalengrure. Amutu-amutu neitamai yumada, ila nimi deiyo neng, sun Raja-Raja neng bungnungai, er sida takhta, Allahdi sun dumsisi kunge nesala dopra, ‘Anengda Raja neng damai deipnyopda, apio kunkamenge,’ tenepredi, deipre pangeda, yuk nesala epmengedi, aneng tep pio gispal donkamenge.

8Dinino, yuk nesalada, mali kupmengepa, deiyo nengdi aneng tomopmengedi, rantai tapu di ateng koupra, wenemna ati pumbon dongombanungada, er pe mali kwamya menenga tep dongomengepa, kange mun kange doupra kunkamre. 9Ukunkameng taruda, Allahdi, sun aneng tep upepra lap perure. “Sunda mali weik kupruma deiki di, sun wenemna tep akati dongopsei dinin, tek sisi ngeda, sundi mali kuprum ngeda ake, ake,” perure. Tonda, “Sundi ne upu yaniramnerum ngeda ake, ake,” pepra lap penkamemere. Tonda, “Sunda balila kuprumudi, salnong-nong kamna deiki di mali kupruma cadi, sun menenga tep, akati konum dongopsei. Atep ange moupra tenepkurume!” pepra wenemkamre.

10Tonda, Allahdi, ‘Amali kunge nesalada, ne upu moupra gekenkamneng’ tenen, sun amul pakra deipredi, sun tep aupu ton perure. Ada, Allahdi sun tep, “Telep kuna ngeda ake. Mali kuna ngeda ake,” perure. Atep, sun mali kurumnge yumada, taprumudi, ka tamupra telep kun bisipu bankamrume,” pepra lap perure.

11Allahdi upeprepa, anengdi er pere upu moupra gekepmengopda, sun malinge tapmengedi, Allah er amutara kupmengedi, er tep melipra pel donunge. Ukupra teleppu kunge pangeda, amenda taru sun tupa gam kunkameng taru yumada, tali kange deipra kunkamenge. Tonda, sundi pel donkamenge nge yumada, nong weik kupbarepa, teleppu kunkamenge. Sunda, telep kange doupra kunkamenge. 12Dinino, anengpu dinin, Allahdi pere upu tapmengedi, moupra men gekepmengopda, Allahdi go kareprepa, yu nengdi yana, yu weik parang ya di, anesala poptapmengepa, adipapu depkamenge. Ataru dipapu depmengopda sunda bicaue. Ada, sun ila kael keman gum dipapu, tupa walwalpu kunmange dipapu depkamenga tepa.

13Ware nesala do yuma, sun kange dipru neitamai di, ‘Allahda nun songe, erdi pesere upu pio men talenkamepe,’ tenepmengedi, yu kange tenenangepu putarepa kununge. Sun wenemna cap, kael kemna cap tep, Allahdi go kareprepa, deiyo nengdi anesala tomopra ateng koudongonung dinin, ataru neitamaida, sundi angeda pio moupra men tenenunge. Sun kange dipru neitamaida, yu tenena cap, mali kunange cap tepapu kange derinunge. Atep nengeda, yu nengdi, aneng tomopmengedi, tapke koupdongopmenge taruda, sundi Allah tep, ‘Nun naio, kandi melipra lyepropseo,’ pepra men moronunge. 14Ukununga tep, sun mali kun kecapu tupa talepra mali weik kunung nengda, tupa kaber nengto kunge keteng tamun neitamaida, denunge. Ada, ali weik dangmengedi, adipapu denunge.

15Dinino, Allah er kangeda, ‘Gume, sun ikin weik kunge nesalada, sun kange dipru telep kudina tep nengeda, ikin keca dopra sun deiki deipnyopda, kange mun kange doupra kunkameng taruda, ikin kununga deiki di, ‘E, nun mali kunup ngeda ake. Telep kuna ngeda, ake,’ tenepmengedi, kael kemkamenge. Kael kepmengedi, ne upu gekepnengopda, nedi sun tep lyepropkamne,’ tenerure. Ikin keca karerya deiki di, sun amul pangdirure.

16Atep, kan mali kuramumpane, kange mun kange doupra, ikin weik kuramum dinin, Allahdi kange lon upu peipkeua deiki di, ka tamupra telepai deipkeue. Ukupmantoda, pio telep mutu, pala weik kurepa, ikin gumai kuramretopu, telepai deipkeudi, jen keca yala-yala yuma kareamkeupa, kan jen keca derinaida, weika di dekperamekupa, akeca yuma talepra jeramume. 17Dinino, ne kangeda, Allahdi ukupra kan tep telep kudiramkeu dinin, kanda pio balila weik kuramuma cadi, Allahdi sun mali kunge nesala tep, upu bokeipredi, ikin weik wenemna keca sun nong deiki dokotemrurada, ukutaru kan deikipu konum yana kunmakere. Kandi tek sisi mali kuramumnge tep, ukutaruda Allahdi walito wenemkerure, tenepne.

18Ikin weik kunmaker dinin, moupra tenenkamrume. Ada, kanda, ‘Ikin weik kunmanerpa, Allah tep yu weik tenepmane,’ tenepmemdi, amenda taru Allah tep nalepra autunapu kupmemdi, er tep mali upu pepmem’ tenen, moupra tenepmemdi, kalengdanapu kunkamrume. Tonda, ‘Uo, co bo weik dopropnedi, isomka ngebo kuptene’ tenen, co bo putana weik kupkeryopda, amenda taruda malipu kuprum’ tenen, kanda pio kalengdanapu kunkamrume. Angetopu, ‘Uo, bul co bo weika di inipra karepnetengpa, isomka ngebo kuptenyopda, Allah tapkamne,’ tenena deiki di, mali kun bisipu bena kuprum’ tenen, kanda moupra tenenkamrume. Atep kanda, ‘Mali kunange yumada, talepnedi, mali kupnun’ tenen, moupra tenepmemdi, kalengdankamrume.

19Ato mali kun keca kupmumya deiki di, ikin weik ton tapakra kupkeryopda, ila upu di ngolokmemdi, engepra, ‘Uo naio melipneo,’ pepra moroptuma peda, Allahdi men melipkamkere. Tonda, ange utopu, kan pe nong puto deiki cap, kandi taleamum bonga weik keca cap deiki dipapu, kandi kan pe tep, men melipra lyepdatume. 20Tonda, kandi, ‘Uo, lukunda menmena yakarurtopu, dena menmena yatuopda, konum depnyopda, Allahdi ton cap ikin ning dopra, ne nong deiki tupa men deipnetue’ tenen, dena putanapu men kunkamrume. Ange utopu, ‘Uo, Allahdi ton cap men wenepnetu’ tenen, lukunda neitamaida, nimi weika di deramengtopu, ne peda adipapu deptenyopda, Allahdi men epnetue,’ tenena pio gume. Tek sisi ngeda, tenpu lukunda neitamaida, ton taruda, tenpu yala nesala yuma peda, adipapu depmengepa, gum kupropnunge. Kanda, ‘Ikin kunerura tep, lukunda neitamaida, adipapu dadeptene,’ tenena pio gume pepkene.

21Kanda, moupra tenepkurume! Ada, ‘Ikin weik kunerura tep, telep kuna ngeda, tapnyopda, adipapu mali kun kecapu talepra kunkamne’ tenena pio gume. Deiyoda, kan konum kael kepmatume. Allahdi ikin keca dopra, kan nong deiki karepkeupa, ikin weik kunmakera deiki di, kan kange tenenange yumada, piripetenmakere. Tonda ikin weik kunmaker taruda, mali kun keca ton talepra men kunmarume. Atep, kandi, ‘Mali kupnepa, ikin weik kunerur ngeda, gum kupnetue,’ tenena pio gume. Kanda, moupra tenepmemdi, kalengdankamrume, pepkene.

22Mali kuna gum dinin, kanda moupra tenepkurume. Allah erda, tek sisi ila puto weik kurya deiki di, pio erepra deiki tara kurure. Allahdi pio telep kupra peteremseretopu, yuk ngebodi ton, pio men kuptue. 23Wareto ngebodi, Allah tep, “Kanda ukupra-ukupra kunkamrume. Telep ngeda, ake. Abisipu bankamrume,” pepra, Allah tep petereptu do? Angetopu, wareto ngebodi, Allah tep, “Kandi mali kupmum ngeda ake,” pepra, weneptu do? Gume, nimidi men kuptenge.

24Gume, Allahdi pio telep pel dorurnge tep, nimidi kange lon mut penunge. Ange tep nengeda, kan peda, Allahdi pio telep kunupsek pen pel dorur ngeda, lumdongona gume. Ange tep, ka di ton cap tenepmemdi, yuk neng tep, tupa-tupa lap penapu kunkamrume. 25Allahdi ila mambul pel dorur ngeda, nimi ban-ban yumadi dinunge. Ukunung dinin, tuai mutu neitamai kunge nesala yumada, epra kael kemnung dinin, ‘Akurur ngeda, deiyo adano’ tenen, moupra men kael keptenge. Karenaipu kunupa cadi, tuai mutu yuma neitamai kunge nesaladi, Allah er pel dorur ngeda, karenai dipu dinupe. Er damai men betepe.

26Nun nai bo Allahda, er tek sisi ila pio puto weik cap, ila mambul cap kurure. Er gam kuramu keteng tamun yumada, nun tuai mutu kunup nesaladi, pio men nukmanto tep, men kael keptepe. Teka, Allah er kure keca yumada, nun tuai nesaladi pio men kael kepmanto kuserure. 27Allahdi pio mambul pel dorur ngeda men nukmanto dinin, ukupmantoda, tuai mutu neitamai di, me dopropredi, dua kankan deipre dingeda, er tenere taru konum yaryopda, upu peprepa, mo cemrure. 28Mo cemrur taruda, im neitamai di sangrure. Allahdi teneretopu, tuai mutu ban-ban yuma neitamai kunge nesala tep, mo karerepa, mo weika di cemrure.

29Duada, wareto puto deiki di im neitamai pio embanapu kurur do? Tonda, Allah kururai, im deiki tarada, perenglang penange perenglang peprepa, adipapu ila kulman lelim ton gekenupe. Dinino, wareto ngebodi, ange yuma kael keptudi, lape pepsetu do? Gume men kuptenge. 30Sun yumada, moupra dipetepra tenepetepkurume! Allahdi er dana-dana tara yuma perenglang penange karerepa, tuai mutu ban-ban yuma kunge nesaladi dinunge. Tonda, ila laut mokon pumbon, karu weikai dinin, pio amutara kwamre kecada, Allah er dipapu dirure. ‘Nimi tuai nengdi men epkameng’ tenen, akeca yumada, pio kunungnai kurura cadi, adeiki di inimrure.

31Allahdi ila mambul pel dorya deiki di, tuai mutu neitamai kunge nesala yala-yala yuma tep, gam kuna deiyonge kareserepa, gam kunupe. Tonda, erdi ketekepra deiamu gam keca yuma tep, yuk-yuk dinin, sun jen keca weika di karerura deiki di, gam tupa kununge. 32Allahdi perenglang pena ngeda, er pe buru di talerure. Akeca taleredi, ‘Acapu sakamre’ teneretopu, dokotemrepa, er konum tenemutopu, tek sisi atuaipu sangrure.

33Mo cemre taruda, ila kulman lelim gekepmepyopda, adeiki di, ‘E, ukutaruda ila mo cap, mungna cap, perenglang penange cap, yankamre ja,’ tenenupe. Ange utopu, nimidi peirameng gam keca, sapi bisam do, kambing bisam do, bisam sisa do, sun ton kulman lelim gekepmengopda, sun peda, ‘Ila mungna cap, mo cap, perenglang penange cap yankure’ tenen, kael kemnunge.