Job 37

Elihudi Ayub tep, upu ton dukdongopra pepu

1 Arup taru konum pepmasen ngeda, ila mungna pung peprepa, lelim weik pepyopda, ange tep, kange di ton cap tenepnyopda, ne kware weik kupneredi, ne dipru moropsemnerure. 2 Uo, sun yumada, Allahdi perur upuda, sun ton moupra gekepso! Allahdi ila upu deiki pepsere taruda, ukupmanto ngeda, ila kulman lelim weik peramretopu kurure. Alelimda, Allah er sipyal pum bon di gutuka yakarura cadi, erdi pere upu moupra gekepkurume. 3 Im alau tara yumada, itarapu kurur dinin, akecada amutara, tuai mutu ban-ban yuma neitamaida, Allah erdi perenglang peramre ngeda dopra, deiprepa, lelim weik gekenupe. Allah erdi kulman ponange pe, perenglang penange peda dopra deiprepa, poredi alelim cap, aperenglang penange capda, mutu sirik im sirik tarada, pepra dangbarure.

4 Allah erdi perenglang pena ngeda, dopra deipserepa, er ila lelim pere upu deiki di pepyopda, ila lelim peprepa, nun yuma gekenupe. Ada, Allahdi er upu pepre taruda, kulman poprepa ila lelim perurnge utopu lelimda gekenupe. Ataruda, ‘Perenglang pena ngeda, yambula di karepkamne,’ pio men tenerure. Weika di karerure. 5 Allah er ila upu deiki di pepre pangeda, nun nimidi pio men kupmantonge ton kurure. Tonda, nun nimidi pio men kael kepmantonge cap, ‘Nong neitamai ngeda ake’ tenen, men tenepmantonge cap, pel dorure.

6 Allah erdi, ‘Ataruda ukupkamne,’ teneretopu, er upu deiki dipapu, “Mul duduya cap, es mo, er sida salju capda, tuai mutu deiki neitamai sako!” peprepa, akeca adipapu sangrure. Ange utopu, Allah er dipapu, “Ila mo cepkurume,” pepre pangeda, adipapu ila mo cemrure. 7 Allahdi mul duduya cap, es mo, er sida salju cap, ton ila cemamre mo cap karepyopda, nun nimi dipapu tenepra pel dope ngeda, tamnupe. Allah erdi akeca kareserya deiki di, nun pel dopmanto goda, gum kupra deriserepa, nunda tali dim peprappu bungnupe. Ukupseryopda, nun tuai nesaladi, ‘Uo, tek sisi nun damaida, Allah erdi mambul pel tupa doserure,’ tenenupe. Allahdi, ‘Ukupnyopda, sundi, ne tep moupra tenepkameng’ tenen, kuserure.

8 Tonda, Allahdi ato keca karesere taruda, sun bura tara gam kunung keca yala-yala yumada, tu pum bon do, gel imir pumbon do, sundi ati domengaipu wekra marbanunge. 9 Iknapi dam tara di, ila mungna gupra tengyakarure. Tonda, utamna dapu tara mutu neitamai di, pio bul kuna kumanyada, doupra deiprepa, yakaredi pung perure. 10 Allah er isin di, ila me mokon deipkai cap, embaramre me cap, ame yumada, pio bul weik kuprepa, gat espu dadorure. Me dinin, gatapredi, teilapredi, pio gat kemdorure.

11 Allah erdi dua neitamaida, mo getepra derirure. Tonda, dua kankan neitamai di perenglang pepredi diripra embarure. 12 Allah erdi peprepa, dua bum cap, mo cap, er cap, kumanya cap, perenglang penange capda, mutu ban-ban yuma topdoura embarure. Ada, tuai mutu neitamai yuma, nimi tuai nesala kunge mutu neitamai yumada, Allahdi karerur keca yuma topdoua embanapu kurure.

13 Ton taruda, tu namen kuna tep, Allahdi mo karerure. Ton taruda, mali kunung nesala sun wenemna tep ila mo kareprepa cemrure. Ton taruda, Allah erdi tuai mutu kunung nesala sun kael kemna tep, akeca kareserure. Ada, ‘Nedi tuai nesala tep, pio ila di bicau tenenuna cadi, pedina upu deiki di, ‘Ukupra pio telep kudinkamsene,’ pepra, peipsisi ngeda, ‘Kange di ton cap tenepmengedi, kael kepkameng’ tenen, akeca yuma, nun damai kurepa, dinupe.

14 Ukutaruda, ne kabo Ayub, kanda dim pepkurume. Teka, Ayubo, kanda ne pepkuken upuda, moupra gekenkunerume. Nimidi men kupmanto kecada, Allah erdi pio kunupsekpen pel dorur ngeda, kange di ton cap moupra tenepetepmemdi, nong neitamai ngeda, moupra kael kepkurume. 15 Ayub kan konum kael kemrum do, gum do? Allahdi, “Ukupkurume,” peprepa, im neitamai ila dua neitamai di, mo getepra derirurnge cap, tonda, dua neitamai di perenglang penange perepa, dirin weik kurenge capda, kan konum kael kemrum do?

16 Allah er ila kael deiki di nimi men kupmantonge cap, kunupsek pen pel dorur nge cap, tonda, ‘Ila duada ukupra embankamre’ tenen, ketenepra derirurnge cap, dua bum topdoa embanmaryanen, gum kure ngeda, kandi ton ange yuma konum kael kepmum do? Gume, Allah erdi ila kael kemna deiyonge yumada, pio telep kupra kael keamnga cadi, tenpu keca peda, walwal men kurure. Ange yumada, kan Ayubda tek sisi moupra men kael kepmume.

17 Gume, kanda tali tuai mutu ngebo kuruma cadi, iknapi dam tara di yakare kumanya di, ila keteng bupuda atuai mutu duyarepa, bupu weik kupre pangeda, kandi, ‘Uo, keteng bupu weik kupnere,’ pepra, ngolongmemdi, nong me weik pangkerepa, mali perume. 18 Tonda, Allah erdi duada, taplakra deipdanen beudi, welepupa, im neitamai cap, im alau tara cap, urasin gat utopu kupra deiprepa, dinup ngeda, kandi ton utopu kupra deiptum do? Ukupmantoda, im alau tara kure dua yumada, pio gat keca, er sida logam cap, tonda nimi urasin dina tep keca, er sida kaca muka cap, ange utopu kupra deiprepa, dinup ngeda, kandi ton utopu kupra deiptum do? Gume ange yumada, kan walwal cadi men kuptume.

19 Allahdi nun tep wenepseredi, upu bokeipkamser taruda, er damai pena tep upuda, kandi nun tep, “Aupu tamupra pepmemnyopda, gekepkamserure,” pepra, peterepsetum do? Nundi ‘Ataruda wareto upu peptepepa, gekepsetu do?’ tenen, pio men kael kepmupu. Ange yumada, nundi men kael keptepe tep, ange men lap peptepe. Ne kangeda, kan peda, ange yuma pio men teneptume. 20 Nedi Allah er damai bena balila kuptenedi, er tep, “Naio ukutaruda, ne dipapu upu pepkukena cadi, gekepneo!” pepra bena moroptene do? Gume. Tonda, wareto ngebodi, Allah tep, “Naio, kandi adipapu ne tep popnememdi, sikke buktapneo!” pepra moroptu do? Ange peda pio gume. Nun nimi tuai nesala yumadi, ‘Ange peptene’ tenen, pio men putaramseue. Ange peda men kupmanto keca pepkene.

21 Uda, ange ton tenepetepkurume. Im neitamai dua gepmaryada, kumanya yaredi, mo puru yumada, gepra duberepa, im neitamai pio dirin kurure. Ukupre taruda, im dirine weik kuprepa, ne asuru adipapu tupa keteng tupa dinepa, kupmeteng-kupmeteng pepnerepa, tupa-tupa eptene do, gum do? 22 Dirine urasin pio telep ngeda, udapu tara di belepra yakarepa, kunumna weik keca emas urasin pio pororurtopu kurepa, ‘Uo, angeda urasin pio telep kurure,’ tenepra penupe. Tonda, Allah er damai dana-dana tara yumada, er ila dirin weik cap, er ila puto weik kurenge cap, er pio telep kurenge capda, nun men tenepra lap peptepe. Kange lopserya tep, nundi, ‘Uo’ tenenapu kunupe.

23 Tek sisa nun nai bo Allahda, akeca-keca yuma talepra, deiki tara erepra, Ila Puto Weik Deiyo Ngebo kurure. Nun tuai mutu nesaladi, ‘Uo, Allah er ila puto ngebo kururai bena eptene’ tenen, pio epeteptepya peda, Allah er damaida, nundi men benmanto kuserure. Allah erda pio dumsisi telepepu kurure. Erda ila puto weik ngebo kuredi, nimi tuai nesala tep upu bokeipserur dinin, tali upu pertamna gum dinin, pio dumsisi kupra upu peserure. Allah erdi nun tuai mutu kunup nesala tep, deiyo men kwapmarenge tep, ton ikin kecada, nun deiki ton pio men deriserure. Dumsisi kuna ngeda, pio men tamrure.

24 Atep nengeda, ware nesala do yumada, ‘Uo, Allahda pio mambul weik ngebo kurure’ tenen, kware kuserepa, Allah er tepapu gispal donupe. Dinino, ware ngebo do yuma, er dipru erepdaredi, balila kupra, erdi, ‘Neda ila kael ngebo kunune’ tenen, er pe kange di, tenedarur ngebo tep nengeda, Allah erdi angebo tep, ‘Gume, angeboda, tek sisi ila kael ngebo gume,’ teneredi, kaukemtamnapu kurure. Angebo er tep tupa men tenememerure.

Aupu yumada, Elihudi Ayub tep pepu.