Job 38

Allah er si Yahwehdi Ayub tep, pepu upu

1Ayubdi, “Uo, ne kange mun kupnere ngeda, ware keca deiyo tep do?” pepra asipetepudi, mali pepu pangeda, Allah Yahwehdi Ayub ila kange mun kuramunge tep, ila mungna kunmaudi, pirinmaua kan-kan di upepu. 2Ayub neda, Allah moupra tenepnedi, kael kemna keca yuma ila deiyo ngebo kununa cadi, kanda wareto ngebodi, ‘Warya tep do?’ pepra asipetepneremdi, kurpetepnetum do? Nedi, kan tep lape pedikenepapu, ‘Erda walwal di perura,’ pepra, balila di pepnetum do? Kanda tek sisi walwal ngebo cadi, kael men keamemdipu, tali nong kemna gum upupu penereme.

3Atep nengeda, mambul upu pepkukena tep, ketenepkurume. Ukutaruda, kan nimi dingeda, ne cap, kan cap, upu pena deiki di, nun kupetepdankamaneme. Atep nengeda, nedi kan Ayub tep, asipkamaken upuda, adipapu pepkunerume.

4Ayub kanda, tuai mutu ban-ban yuma cap, tu amutara yangne gel cap yuma, ketekemdinmasi taruda, kan pe asuru di dinmamum do? Ataruda, kan dan mutu kuramum do? Ada, mutu ketekepkosa tep, mutu yangne gel gonga kepra deipsaida, konum kael keamemnyopda, lape pepkunerume. 5Ware ngebodi, ‘Tuai mutu ketekepkun’ tenen, tuai mutu ila go weik kapu ngeda, tapu deiki di kunupetepudi, ketekepra deipu do? Kan ton kael kepmum do? Tonda, mutu ban-ban yumada, tapu deiki deiprap kunupeteamu ngeboda, kan kael keamum do? Kandi ange kael keamemnyopda, angebo er si lap pepneo.

6Ange utopu mutu-mutu yuma ketekeiamu ngebodi, ‘Mutu-mutu yuma dimpepra telep kupkamre’ tenen, wareto keca deiki di baripra deiamu do? Tonda, ware ngebodi mutu yangne gel ketekepupa, mutu yuma telep kupra buku do? 7Tonda, akeca ketekepu taruda, ipna berekou taruda, kuru yuma dirum ngeda, pumun taru mut pepipa, im deiki tara kunung neng, malaikat yuma, kange deipidi ila upu penmaiyada, kan ton alelim gekepmumdi, emum do? Kandi ange konum kael keamemnyopda, angeda lap pepneo.

8Ila laut mokon numnuma neitamai di, me pukra embaramupa, ‘Dana-dana tara emberur’ tenen, ware ngebodi mokon numnuma neitamai ipdongomudi, ‘Mokon deipkamrum ngeda aca pua, yukai ton men embankamrume,’ pepra deipka deiyo ngeboda, ware ngebodi pepu do? Ame mokon tu amutara di, pakra embaramu taruda, kandi angebo epra kael keamemnyopda pepneo. 9Angeda, ne Allahdi amokon er singina tep nengeda, dua di kepdongopsi. Tonda, er amokon lelimdongona tep nengeda, kunungna di singipdongopsi.

10Ange utopu, nedi, ‘Laut mokon mutu ban-ban yuma men deipkamre’ tenen, ketenepra deipsidi, tu pelepdongopsi ngeda, kan eamum do? Ukupmantoda, ati dona deiyo nengdi, akati buplan cap, gat ayumnya cap, dela cap yuma tep, ‘Ukupra dopkamepe,’ teneramengtopu, nedi laut mokon yuma tep, nedi, ‘Ukupra deipkamne,’ teneramsitopu ketekepra deipsi. 11Tonda nedi alaut mokon tep, ‘Kanda nedi ketekepra deipkesaipu deipkamrume. Bisipra yuk-yuk mutu yuma embamemdi, men singidongonkamrume. Kanda ne upu ton men bisinkamrume. Tonda, me kait bungamrenge peda, puto di tali men welenkamrume. Tenpuaipu kunkamrume,’ pepra deiamsi taruda, kan ton gekeamum do? Agum dingeda, ataruda dantoi kuramum do? Kandi ange konum kael keamemnyopda, angeda lap pepneo.

12Tonda, kan nin deipkeu taru di dipra, ayakaramu taru neitamai yumada, kandi, “Ukupkurume,” pepra deiamumpa, berengamu do? Berengna tep, kandi, ‘Bereko,’ pemempa, berengrur do? Tonda berekoreya tep, tulek bisi yanada kandi, “Aca yankamrume,” peramuma deiki di, yan kuramudi tupa yarur do? 13Kandi, ‘Mali kun nengdi, mali-mali kunge keca yuma yapkung’ tenen, kandi peramumpa, adipapu berengamupa, tuai mutu yuma dirine weik kuramudi, mali kun keca yuma gum kuamu do? Tonda, nimidi ason deiki, ‘Buta cap, mali keca cap, palepmarenge gum kupkur’ tenen, doupra gege peramengtopu, kandi peiamumpa, tuai mutu dan-dana yuma, mali keca gum kupu do?

14Ukupmantoda, nimidi kerah tu dopra, ‘Sun tenepmangetopu kupkamre’ tenen, telemdiramengepane, yuk neng epmengedi, ‘E, sun betapmang keca adano,’ tenepra nema di dinmangedi, kael kemnunge. Ange utopu, berengna taru keteng dirineda, berekre taru di, tulek bisi yare pangeda, tuai mutu ban-ban yuma urasin katuai kurure. Tonda, nimidi, opkal dirinai deipmengepa, aopkal er kamo yuma jenek kuprepa diramengtopu, tuai mutuda, nema di berek banmarepa, tuai mutu urasin jenek dinunge. Atep, kandi, ‘Bereko,’ pemempa, berekredi tuai mutu urasin jenek kemrur do?

15Sun mali kunung nengda, ‘Nun mali kunup ngeda, kunungnaipu kupepa, yuk neng ton men dinkamsenge’ tenen, lukunda tarupu mali-mali weik kununge. Dinino, berekyopda, keteng doupredi dirin kuprepa, sun kunungai cap, sun puto di buru erepra nimi popkunge nge cap, sun mali kunge keca yuma cap, katuai kuprepa, ‘Yuk nengdi epsenung’ tenen, sun mali kun keca yamdongonunge. Atep, kandi peipmuma deiki di berengrepa, mali kun nengdi, sun kunmange keca yamdongonung do, gum do? Atep, kandi ange kael keamemnyopda, lap pepneo.

16Uda kanda, laut mokon deipua numnuma neitamai ton, kwerepra embandanaramumdi diramum do? Tonda, ila laut mokon adeipuai neitamai ton, kwerepra embandanaramumdi diramum do? 17Tonda, nimi depmengedi wengbange buplan bisida, epmum do? Ange utopu, sun anesala depra kunungna bisi buplan wengbanungaida, kandi epra kael keamum do? 18Mutu ban-ban yuma goda, ware kupra kapu do? Kandi tuai mutu ban-ban yuma, tapu di kunupetepra kael keamum do? Ayub kan kael keamemnyopda, lap pepneo.

19Tonda keteng dirineda, dan tara di yakarur do? Kandi ange epra kael keamum do? Ange utopu, kunungna deiyo kururaida, dan mutu kurur do? 20Atep dirine cap, kunungna cap, kurerungaida, konum kael keamumnyopda, sun butene dopra, sun deiyo kurerungai tamupra deribetum do? Sun abutene keca kurerungai ban bisida, kan konum kael keamum do?

21Kandi tek sisi ange yumada kael keamum do? Akeca-keca yuma ketekepra derinmasi taruda, kan ton konum deiamkei do? Tuai mutu cap, akeca-keca yuma cap, ketekemdinmasi taru di, dipdongopra ukutaru yuma akupyakaramum ngebo kurem do? Ukupra gam kuna deiyo ngebo kurem do? Ayub kanda, akeca yuma konum kael keamemnyopda, lap pepneo. 22Bul li taru neitamai, ila mo cemredi terep-terep peramrenge, er si salju peramenge ngeda, akeca er derinaida, kan konum kael keamum do? Tonda, ‘Mo duduya sangkamre’ tenen, ketenepra derinunaida, kan eamumdi kael keamum do? 23Akeca salju cap, mo duduya cap abuteneda, ne dipapu ila podana taruda, ‘Ne mawa nesala, sun poryange neng, akeca sun nong deiki ikin keca deipnepa, kange mun kupkamre’ tenen, ketenepra derinune. Tonda, nimi mali kupmenge taru peda, sun wenemna tep, abutene keca dokotemnepa sangrure. Akeca butene derinunaida, kan ton kael keamemnyopda, pepneo.

24Utopu, ‘Perelang pena keca penkamre’ tenen, keteneiamsaida, kan konum epra kael keamum do? Tonda, keteng yakan tara di belepra yakare kumanyada, dan mutu di yakarur do? Ange peda, kan ton kael keamemnyopda, lap pepneo. 25Ange utopu, ware ngebodi, ‘Mo cepredi mo sakamre’ tenen, er yakan bisi ketenepra derirur do? Ware ngebodi, ‘Kulman perelang pepra popredi embankamre’ tenen, bisi yadirur do? 26Tonda, ware ngebodi kalkal tuai cap, katuai mutu cap, nimi kuna gumai yuma tep, mo dokoteprepa cemrur do? 27Ware ngebodi, tuai mutu kalkal peramre tu deiki mo kareprepa, cepredi tu yuma telep kuprepa, tuai mutu bolokra paramre keca yuma bongorur do? Ange ton kan kael keamemnyopda, pepneo.

28Tonda mo er nai bo akurur do? Utopu mo puru sakredi, pen palere ngeda, er nai boda ware ngebo do? 29Es me er nin akurur do? Es meda, dan mumun pumbon di bungredi yakarur do? Ware ngebodi deipupa, es meda telepra gat kurur do? 30Ware ngebodi perepa, ila laut mokon deiki tara bul weik kupredi, gat gil utopu kupra deiprepa, gel utopu darur do? Akurenge yumada, Ayub kan kael keamemnyopda, lap pepneo.

31Tonda, kuru er si Kartika perameng ngeda, kandi tapu dopra koupdongopmumpa, tenpuai ingrur do? Autopu, kuru si Belantik perameng ngeda, tenpuai ingrur dinin, kandi er tapu loptumpa, yukai embetu do? 32Utopu tonda, kuru ingreya yuma, ila kuru pe, yambul kuru pe yumada, keteng tamun, keteng tamun neitamai yumada, utopu embaramenge. Atep, sun ban taru konum kupyopda, kandi dopra deiptum do? Tonda, ila kuru sun si Biduk besar cap, Biduk kecil ton perameng ngeda, sun tengyakarameng ban bisi keteneiptum do?

33Tonda, kandi im deiki tara kure keca yuma tep, ‘Ange kunkamrume, angeda men kunkamrume,’ pepra deiamsi ngeda, kandi konum kael keamum do? Autopu, tuai mutu ban-ban yuma cap, nimi tuai nesala yuma cap, talepra kunkamna tep, ‘Angepu kunkamrume,’ pepra peiamsinge cap, amenda taru upepra deipkamnenge capda, kandi konum kael keamum do? Ayub kan kael keamemnyopda, lap pepneo.

34Ange utopu dua im deiki tara kapunge tep, kandi, “Mo karepneo,” peptumpa gekepketudi, mo kareketupa weika di ceptu do? 35Utopu, kandi kulman popkure taruda, perelang peramrenge tep, “Perelang pepo,” peptumpa perelang peptu do? Tonda perelang peramrengedi kan tep, “Nun deiyo ngebo, nun akunmape. Kandi teneseremtopu kunkamepe,” pepketenge do? 36Nimi dipru neitamai di, dumsisi kuna tep tenepmengedi, kael kemna cap, kuna cap deiyo kecada, ware ngebodi karerur do? Utopu, nimi kange neitamai di, ‘Deiyo ake’ tenena deiyo kecada, ware ngebodi karerur do?

37Ange utopu, ware ila kael ngebodi dua yuma nuktu do? Tonda, ware kael ngebodi me mau gwepra, im deiki tara deipunge dopra, diktaprepa tamupra mo cemre ngeda kael keamu do? 38Ukuprepa, mo cepredi tu bute yaem-yaem peramrenge cap, tu gatnge cap deiki sakrepa, tu telep kupra boun kemrur ngeda, ware ngebodi ketenepra deiamu do? Ayub kan kael keamemnyopda, lap pepneo.

39Ayub kandi, bura tara kuramre gam keca, er kamoda pus utopu keca yu weiknge, er si singa perameng ngeda, er jen tep, yuk yambul bura gam kure keca, popraptumdi dopra, yu singa pus nernge damai er jen keca kareptum do? Tonda, kandi singa pus jemnge peda, er jen putaramre taruda, jen keca weik kareptumpa bouptu do? 40Ada, sun gel imir pumbon kuramtengedi, kalekra dinmatengai, sun jen keca dopra bena kareptum do? Ange utopu, sun mutmuta cap, ila lyom betei cap, neitamai kuramtengedi, kalekmatengai sun jen dopra bena kareptum do?

41Tonda, gagak ma, sun nyapu jen putaramre taruda, ‘Allahdi karepsetue’ tenen, upu pepra mororamenge pangeda, ware ngebodi jen karerur do? Tonda, sun nyapu jene tep, epra embanmange taruda, ware ngebodi jen karerur do? Ange utopu, gagak ma sun nyapu, sundi jen tep moroketenge pangeda, kandi ware kupra sun jen melipra kareptum do? Ayub ange yuma, kan kael keamemnyopda, lap pepneo. Allahdi Ayub tep pepu.