Job 39

Allahdi Ayub tep, wenepra pepu upu

1 Tonda, mutu deiki kurur kambing bisam mi deipkamarya tep, mi deiyo donmare taru cap, rusa bisam mi deiyo donmare taru capda, kandi konum epra kael kemrum do? 2 Kambing mumun douamreane, ‘Ataruda mi deipkamre’ tenen, kandi er deipkamre war nukra kael kemrum do? Tonda, mutu deiki kurur kambing cap, rusa cap, mi deipkurenge tumida, kael kemrum do?

3 Sun akeca mi derinkunge taruda, amnyo gu gwiniktetek pepdongopra mi derinunge. Konum deipmenge pangeda, mi deiyo men jerure. 4 Mi konum deiamrepa, amutu dipapu nepbaramengedi, puto kupyopda, sun nin damai di tapra, yuk mutu banunge. Ukupmenge dingeda, sun nin damai ton, tamupra men yakanunge. 5 Ware ngebodi bura keledai bisamda, ketekepra deipupa, bura mutu kurur do? Tonda, nimidi, sun peinung keca tep, ‘Tali lupra bura kunkameng’ tenen, gam keca gerengdongon tapu loptapmengepa, talipu embaramengtopu, ware ngebodi bura tara kurur keledai bisam ketekepra deiamupa, bura tara tali dakunung do?

6 Angeda, ne Allah dia. Ne dipapu sun akeca kunkamengai tep, go weik mutu nimi men kunungai ketenepra karepsipa, katuai mutu neitamaipu kununge. Tonda, ban katuai mutu dinin, garam uwa weik kure mutu, sun mankamengai tep keteneipsi. 7 Abura keledai bisamda, nimi lelim peramenge ngeda, pio men gekenunge. Tonda, kuda bisamdi gipra dubare keca deiki bukra embarur ngebodi, upu pere ngeda, bura tara kunung keledai bisamda, pio men gekenunge. Akeledai bisamda, bura tara kurura cadi, ati neitamai kunmainge yumada men tenerure.

8 Tonda mutu-mutu yuma, mutmuta er jena tep epembanmareanen, er jen mutmuta embeknge kuramyaipu, epredi yakarure. Er dipapu teneretopu, tali lupra embarure. Ayub, kanda akeca ketekepra deiamnga deiyo ngebo kael keamemnyopda, lap pepkunerume. 9 Tonda bura kurur sapi bisamdi, kan upu gekepra domyaketudi, kan pel yana melipra dodinkamker do? Tonda, kan pein bisam jen keca derimem ati pumbon, yana damai maketu do? Ukupketu pangeda, er jena karetum do? 10 Kandi bura sapi bisam kum damai, co deipra tapke gerekdongopmemnyopda, tu palin co deipra, deiyo deiki koupdongopmem taruda, sapi baredi gidorepa, tu palipbankamker do? Ukuptudi, kan wa matap dumsisikra palipbeketu do? Kandi asapi bisam tep, ‘Ne wa pen dam ban bisi sapra telep kupra deipneo,’ peptumpa, capra telep kweipketu do?

11 Atep kan dingeda, asapi bisam tep, ‘Erda puto kurur keca cadi, ne ikin pel yuma dopkamnere,’ tenerum do? Ange teka tenepmemdi, ‘Erdi ne puto boun kunerura cadi, melipra ne mambul pel dopkamnere,’ tenerum do? 12 Er asapi bisam tep kandi tenememyada, ‘Ne wa pen dam beredi, gandum nong kipra duyakankamnere,’ tenerum do? Tonda, ‘Gandum sekra, asapi deiki deipmempa, duyana deipkerepa, gege pepra lapkameng’ tenen, duyakankamnere,’ tenerum do? Ayub, kanda akeca kael keamemnyopda, lap pepkunerume.

13 Tonda, ipi ma kange deipra, berbupredi potong erepra kurure. Amadi giso deiki ereiyadi, kange deipra gemerure. Dinino, er polda, bum pua. Seng-seng pena ma, er pol potong lyom ngeda, ila telep kurura cadi, er amada lang-lang peredi embarure. Ipi mada, im neitamai men benmanto kurure. 14 Ipi madi, er du tali me wenenga deiki adeiptamredi dakuramrepane, me wenenga bupu dipapu, er duda bupu piridirure.

15 Dinino, er duda tali aderitamrure. Amada er kange douna gum keca cadi, er du luproredi, ‘Nimidi embanmanka yanipnunge,’ men tenerure. Tonda, ‘Yuk gam keca tali bura kunung keca di, tali lupra embanmanka yanipnunge,’ men tenerure. 16 Er amadi mi konum deipyopda, ‘Ada ne mi’ tenen, moupra men kalengrure. Er nyapu derirur dinin, er nyapu tep, ‘Ne damai kuna gume,’ pepra, lembise perure. Amadi, ‘Ne mi deipkosi taruda, kange mun deiki di deiamsi,’ men tenerure. Er mi depyopda, ‘Dakwapreye,’ tenerure.

17 Ukurya deiyoda, ne Allahdi er tep moupra tenepnedi, kange douna deiyo keca men karepsa tep, kange douna gum di kurure. Kange dounange men karepsa tep, walwalpu kurure. 18 Kange douna gum cadi, tali tuai embarur ma kurur dinino, ama kange deipredi, er tara me ereiya gemeredi, tuai bisi sepdara embaryopda, kuda bisam bali deiki bukra, embanmare ngebo tep, amadi salto kupredi banapra barure. Ange yumada, ne dipapu ketekepra deipsi, kandi gume. Allahdi Ayub tep pepu.

19 Tonda, Ayub kandi kuda bisamda puto karerum do? Tonda kuda, er kum damai lyom potong yaleng-yaleng peramre potongda, kandi ketenem dirum do? 20 Kandi kuda bisam tep puto karepmempa, sul po im kurungamretopu kurur do? Tonda, kandi kuda bisam tep, puto karepmempa, er sipyal pumbon di ila upu peprepa, nimi yuma kwar kurur do? 21 Utopu akuda bisam er puto tep, ila kange deipredi, yan tu deiki yan berbumrure. Ukupredi kwar dangna gum dipapu, mar podanmangai puto di sepdara barure.

22 Tonda, akuda bisamda, pio mar podanmanga neitamai barya peda, ‘Popkuneng do?’ tenen, dipru pu men jerure. Ukupre taruda, mar podanmanga cadi, ‘Ya di doupra popnenunga tep, tamupra benkune,’ men tenerure. Lupra banapu kurure. 23 Akuda bisam podanmangai banmare taruda, er deiki bukmare ngebo kikipmare parang ya, lelim penmarya cap, tonda lyom besi takke melang peramrenge cap tep nengeda, kware men kurure. Tali lupra barure.

24 Tonda, pio tulum tenepredi yu kuprepa, menmena sepdara barure. Tonda, er podan nesaladi bung-bung pena, er si terompet lelim pepyakanmange nge tep, gekepredi er dimpepra men inimdongorure. Sepdaro banapu kurure.

25 Kuda bisam dakuramrepane, bung-bung pena terompet pengepa, lelim gekepre dingeda, sipyal pumbon di us perure. Er upu ila di perure. Tonda, nimi podanmange neng, sun damai kapul bare taruda, karen mutu kunmatenga peda, sun kemne nintong, menmena er u pumbon wekrepa, gekerure. Tonda karenai di mar podana deiyo nengdi popyakanmange lelimda, akuda menmena gekerure.

26 Tonda kandi seng-seng pena mada, ‘Ukupra langkamre,’ teneamumtopu langrur do? Ukupredi iknapi tara lakra embare ngeda, kandi teneamumtopu kurur do? 27 Tonda kandi pepmempa, nyep-nyepnye ma ^{▼▼nyep-nyepnye ma – Ama sida nyep-nyepnye penge mada, mutu dam tarapu kuredi, er duda gel imiramnge nimi men embenmantoipu derirure.} lakra embanmaredi, dinmaryane, nimi men embenmantoi mutu epre dingeda, er ati dopra, er du acapu derirur do?

28 Ama du derinaida, ila di bukamre mutu amngai gel deiki deipredi acapu irirure. Aceida, nimidi bena men doproptepe. Kange munaipu du derirure. 29 Er ati dopra, du deiamreyane konum walup bukre pangeda, ama walup er lyana karena tep, er nin karenai di kalekmaredi dinmarepane, er jen embarepa epre dingeda, adipapu yana popredi er mi karerbarure.

30 Tonda er nyapu yumada, yapi kecapu jenunge. Cadi, dan cei do, potamna keca akapmarepa epre dingeda, acapu doryakarure. Tonda, erdi yapi keca popra, sesekra tapmarepa dinupe.