Job 4

Ayub cap, er kabo Elifas cap, menmena upu taleprei upu

1 Ayubdi, upepupa, mutu si Teman mutu ngebo, Elifasdi tamupra pepu. 2 “Ayub kanda aupu pepmaremnge tep, ware ngebo tali dimpepra kutu do? Ne peda pio dimpepra men kutene. Ne upu pekene pangeda, bouna di gekepnetum do? Tulum kange doupkunerem do?” pepu.

3 Ayubo kanda, pumun taru kuramumnge lumdonongna gume. Kange di ton cap pel doramumnge tenipetepkurume. Nimi yuk neng weik gekeramyai peteremamume. Tonda, puto boun kuramu neng weike, kandi puto kemdiramume. 4 Kan peramum upu deiki di, nimi puto boun kupipa, men kupmanto kurami dinin, kandi betapra pingping keipnepa, aneng teleppu kurami. Tonda, puto pio boun kupupa, men benmanto kurami neng tep, kan upu peramuma deiki di, puto kemdiramumpa, puto di kurami.

5 Dinino ukutaruda, kan pe peramum ngebo dipru kange mun kudin keca, kan damai yarepa dudup pepreme. Tonda, ikin keca kan damai yarepa, ‘Ware keca deiyo tep kupner do? Ukuda ware kuptene do?’ tenen, tenimtonapu kunmareme. 6 Ange tep nengeda, kanda Allah tep tupa teka tenenmarem do? Tonda dumsisi tupa kunmarem do? Ange yuma tupa kuramuma cadi, warya tep tenimtona kupmakerpa, puto di teka men tenepmarem do? Allahdi dumsisi kunge nesala tep, ‘Tek sisi kalekra melimkamre’ tenen, teka men tenerem do? Allah tep teka tenepra dumsisi kuramumngepu, talepra kumemnyopda, adeikipu kan kange deipra kutum dinin, angepu men kunkamrem do?

7 Adipapu kan tenepkurume. Dan mutu ton, nimi mali kun keca pio men kupmare ngebo wenepra ponung do? Autopu, dan mutu neitamaida, Allahdi dumsisi kuramenge nesala ton, wenepra porur do? 8 Nedi diramsidi, kael keamsada, nimidi mali yal keca bolokmengepa, malingepu bongorure. Ange utopu, ne kael kemnunada, mali keca pel donung neng cap, mali upu perur ngebo cap, sun yuma menengada, ikin keca doronunge. 9 Sun mali kupmenge neng tep nengeda, Allah er tulum kupyopda, si puto pung peprepa, adipapu popra gawal dangrure. Allahdi amali neng tep, yu weik kupyopda, gam men kununge. Adipapu poprepa denunge.

10 Pus utopu keca, er si singa ila yunge di, yu kupre taruda, ila upu peramretopu, anengda ila upu di mali penung dinin, Allahdi sun tep upu sengdorure. Ila singa pus, er si weik kuptua peda, er si coptapyopda, gam keca men popra jeptue. Ange utopu, mali kunge neng, puto weik kuptenga peda, Allahdi aneng tep wenemrure. 11 Tonda, bura tara pus utopu keca, er si singa tep, Allahdi er jen keca men karepmare pangeda, jen putaprepa depyopda, er nyapu yumada, tali yuk-yuk dabanunge. Elifasdi pepu.

12 Upepudi aupu ton pepu. Tenpu taru, nimi deramenge neng sambala, ne damai yaudi, inipra ne amol pumbon pepneu. Upu mur-mur penmaupa gekepsi. Aupu inipra pepneupa, amol di gekepsi. 13 Pio lukunda neitamai, nimi yumadi pio marameng taru, ne damai yaudi pepneupa gekepsidi, mambul kange doupra mapmasi. Ukupmasa deiki di, lukunda mali ken mapsi. 14 Ukupsidi, kwar kupneupa, dupdup pepsidi, buma bol teleng pepneupa, berber pepsi. Kwar kupneupa, ne nong yuma moropsepsi. 15 Ukupsi tarupu, terep-terep peramre kumanya utopu, asambala yaudi, ne aso deiki yan bepneupa, ne nong bol yuma terepneu.

16 Ataru ne damai nimi utopu kupra tekmaupa, urasinda didanmanemu dinin, erda betapra men kael kepsi. Men kael kepsi dinin, upu penmauada mur-mur penmaupa gekepsi. 17 Akeca di pepneu upuda ake.

Allah er mali kuna pio gum dipapu, pio lek ngebo kururtopu, tuai nesala peda er kurya utopu kuptenge do? Gume men kuptenge. Allahdi tuai nesala ketekepra deiamseua deiyo ngebo, pio lek kurya utopu, tuai neng utopu kuptenge do? Gume, angeda men kupmanto.

18 Utopu, Allah er pel don neng, sun im deiki kunung neng malaikat peda, yambula di mali kupmanto kununga cadi, Allahdi er malaikat yuma tep, ‘Dumsisipu kunkamenge,’ men tenerure. Ange utopu, Allah er im deiki di yana, kai upu peremban neng, malaikatdi mali kupmengopda, Allahdi sun tep, ‘Mali kupmarumada ake,’ pepra wenemrure. Sun tuai mutu kungedi pel donung neng peda, yambul ton mali kununga cadi, Allahdi sun tep, ‘Dumsisipu kununge,’ men tenerure.

19 Im deiki kunge malaikat, meteka dipu mali kupmanto kunung dinin, tuai mutu kunup nesalada, wanau pio mali kunupe. Ada, nun mali kunupada, meteka di gume, weika di mali kunupe. Ukupmepyopda, Allahdi nun tep wenemserure. Nunda nimi kerah tu di dopra, tu deiki ati donup nesalada, puto bounpu kunup neng cadi, mali weik kunupe. Ukupmantoda, ngun-ngunya buru di kaptapmengepa, sik gum deramenge utopu kunupa cadi, tek sisi mali kunupe.

20 Nimi tuai nengda, puto bounpu kunupa cadi, menmena denupe. Nimida, ipna tarupu gam kunung dinin, keteng komunida, yuma depra yamununge. Depmengopda, kange di ton cap deamenge neng men dinupe. Ton nengda depmengopda, yuk nengdi aneng tep, tupa tenena gum di, lumdongonunge. 21 Ukupmantoda, nimidi opkal bol dodin ati deipra, ke taru tep dakungepane, ‘Benkup,’ tenepmenge taru di, opkal ati gerengna tapu loptapmengedi, adipapu tali lupra banunge. Ange utopu, nimi tuai neng menmena denunge. Nimida, ila kael kemna keca, nong neitamai ngeda, kapul men kael kepmenge taru, betapra men tenepmenge taru dipapu denunge.

Elifasdi Ayub tep pepu.