Job 40

Allah er si Yahwehdi Ayub tep, ton cap asipetepu upu

1 Allah er si Yahwehdi Ayub tep pepu. 2 “Ayubo, apepkuken upuda, gekepneo. Neda, akeca-keca yuma talepra deiki tara kunedi, Ila Puto Weik Deiyo Ngebo kununa tep, kanda nimi sisa dinin, ‘Allahda mali kupmare’ tenen, balila deipra, ne damai wenepra asipetepnetum do? Atep nengeda, kanda ne damai yamempa, nedi asipetepkuken ngeda, kandi, ‘Nongeda ake,’ pepkunereme,” Allahdi pepu.

3 Upepupa, Ayubdi Allah Yahweh ^{▼▼Yahweh – Allah er si, tek sisi ngeda, Yahweh kurure. Ibrani upu penge nesaladi, ‘Allah er si sisada, katuai men peptepe’ tenen, kware kununga cadi, sundi huruf YHWH angepu sengnunge. Dinino, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} tep, tamupra pepu. 4 “Uo, naio, neda sun walwal nengdi perameng upu utopu pepmane. Tek sisi neda mali kunun ngebo cadi, arup pepmaken upuda, men pepmaketene dinina. Atep nengeda, ‘Ton cap mali upu pepnun’ tenen, ne sipyalpu kepdongopra kunkamne. 5 Ue tenpu taru upu pepmanu dinin, kandi asipmanerem ngeda, tamupra men lape pepketene. Tonda, ue butene taru di pepmanu dinin, ton cap dukdongopra men pepkukene,” Ayubdi pepu.

6 Upepu pangeda, Allah Yahwehdi, kulman ponmaudi, ila mungna pirinmaua kan-kan di, Ayub tep pepu.

7 Kanda, wisi neng ila kael di kuramengtopu, kan kange wisina deiki di ketenepra tekmemdi, ne asipkuken upu yuma moupra gekepmemdi, tamupra pepkunerume. 8 Nedi nesala yuma tep, upu bongdinun upuda, kandi deiyo ton akupmara tep, yaniptapkunerum do? Adeiki kan pe tep, ‘Yuk nengdi ne tep, erda tek sisi ngebo, tenepnetenge,’ tenepmaremdi, ne pene upuda yaniptapmarem do? Tonda kandi, ‘Allahdi mali kupra deipmanere,’ pepkamnerum do? 9 Ayubo kanda, ne ila puto ngebo kunya utopu ngebo kurum do? Tonda, ne upu pepnepa, ila kulman poramretopu, kan upuda angetopu ila puto di peptum do?

10 Kanda, ila puto ngebo kuramtumtoda, kan nong deiki kamo telep kwirya keca cap, dirin nge cap, kweipdatume. Tonda, kanda ila puto ngebo kuramtumtoda, pio telep kweipdatumpa, nimi yumadi kan si ereipketenge. Tonda, kan kun keca cap, talen keca cap, pio telep kweipdatumpa, nimi yumadi kan si ereipketenge. Dinino, kanda nimi sisi cadi, ange yuma men kuptume. 11 Kanda Ayubo, ne ila puto ngebo kunya utopu ngebo kuramtumtoda, kan yu kukere ngeda, kandi yu tenemem neng, sun deiki deipkurume. Ada, kange dipru eremna neng, sun deiki deipkurume. Ukupmemnya deiki di, sun tenenung ngeda tapra, amutarapu kunkamenge.

12 Ange utopu, sun kange dipru eremna neng yuma epmemdi, anengda, kandi amutara keiptum do? Tonda, kandi atekmaremai dipu, nimi pio mali kuna neng kunmatengaipu kandi popra gawal dakaiptum do? 13 Ukuptum dingeda, adipapu amali neng yuma popra, tu pumbon dongopra peiptum do? Ukuptuma deiki, sun aneng yuma nimi deramenge neng kungaipu dopra deiptum do? 14 Apepmaken keca yuma ukuptumtoda, ne Allahdi kan Ayub tep, kan sipu ereipketene. Ada, kan pe dumsisi buru deiki di lyepdatumpa, nedi kan sipu ereipketene.

15 Nedi kan tep ketekepra deipkesitopu, yuk gam kure keca, ^{▼▼gam kure keca – Akeca pepu ngeda, ‘Tek sisi angepu’ tenen, men kael keptepe. Yambul walwalpu kuserur dinin, ukupmanto ngeda, ila embaramre me, er sida Nil me damai kuramre ila galemna di neramre gam keca, er sida, ‘Kuda Nil’ penunge.} er nong ila galemna ngeda, ketekepra deipsipa, ila me damai dinin, bura tara kurure. Er nongda, ila weiknge dinin, sapi bisamdi tali paramre manmaneng jeramretopu, akecapu jeredi kurure. Akecada, epmemdi, moupra tenipetepkurume.

16 Akecada, ila puto weik keca kurure. Er amnyo tara cap, er mundu tara capda, ila puto weik kurure. ‘Ange, erdi popserur’ tenen, moupra tenememdi, kalengkamrume. 17 Pio gat co, er sida aras co, gat weik kuramretopu, agam kure kecadi, er lyom amuda, puto di dumsisi kupra bepengrure. Er kail tu neitamaida, tu cap, melmel capda, ila puto weik kurure.

18 Akeca er yan neitamai kure yo cap, er yan yuma cap, buru yuma capda, gat weik keca, er si tembaga utopunge kurure. Tonda, agat weik keca, er sida, besi beton utopu kurure. 19 Ne Allahdi, nong weik gam kure keca yuk-yuknge ton, denge pio weika di ketekepra deiamsi dinin, yuknge yumada, yambul puto kunung dinin, angeda ila puto cap, yu cap kurure. Atep, ne Allahdi, akeca yuma ketekepra deipsi deiyo ngebo, ne dipapu agalemna weik gam kure kecada poptene. Yuk neng yumadi, ange men poptenge.

20 Tali bura tara gam kuramre keca, yuknge yala-yala yumada, mutu buma bukuaida, sun esu-esu pepra kunungaida, manmaneng telep kupra paramra cadi, aila galemna gam kecada, mutu buma amutara bena, manmaneng jerure. 21 Tonda, akecada, kange deipra ila mokon wekredi dim peprappu marure. Ada, mokon deiki bongorur kait keca, er sida teratai kwamnga neitamai di wekra marure. Tonda, embaramre me pirman, tali gwei parurai ton bena wekredi inimrure. Tonda bentalai ton wekredi marure.

22 Agam kure kecada, embaramre me damai dinin, co teru weik paramre co iriamu tara, wekra marure. Ada, ‘Keteng deiprepa, ne nong bol bupu weika di jepnerur’ tenen, pala co teru tengamre co, er sida gandarusa co teru kwangyaipu wekra marure. 23 Anong galemna weik kecada, me wekrepa, meda ila di optudi, er nong damai yatua peda, kware men kurure. Ukupmantoda, Yordan me ila di optudi, embanmatuanen, akeca er sipyal pumbon wektua peda, kware pio men tenerure. Erdi, ‘Gume ame optua peda, ame neitamaida, tali tektene,’ tenerura tepa.

24 Anong galemna weik kure gam keca cap, puto pio weik cap gam kure keca, er sida Kuda Nil, ware ngebo balila keptudi, akeca er giso taleptudi, er sipyal pumbonda, tapu dongoptudi, atapu gipra akeca dubetu do? Gume, angeda pio men kupmanto keca tepa.