Job 41

Allah Yahwehdi Ayub tep, dukdongopra wenepu upu

1Allahdi Ayub tep pepu. Kanda ila puto ngebo kuramtumtoda, mekina youn keca si di, tapu gerekdongopra, ila laut mokon pumbon dokoteptumdi, ila banep bal er si Lewiatan, akeca taleptupa, dopra poptum do? Ukuptum dingeda, abanep bal ‘Dim pepra kuptu’ tenen, er lyemuda, bana cap darapdongopra ateng koupdongoptum do? 2Ange utopu, er u pumbon tapu di gerekdongopra, gat takke keca di er bana pumbon lukraptumdi, giproptumdi, yukai dubetum do?

3Ukuptum pangeda, aLewiatan baldi, ‘Loptapneo,’ pepra moropketudi, ‘Akupnerem ngeda tapnetum do?’ pepra, boun upu deiki di pepketudi moropketu do? 4Tonda, aila mekinadi kan tep, ‘Uo naio, loptapnetum pangeda, kan pelpu pio donkamkene,’ pepra, pedina upu deiki pepketu do? 5Tonda, aila banep balda, peirameng ma utopu, tapu gerekra deiptumdi, ‘Ne ner nyapu kange deipkamenge’ tenen, peiptum do? 6Tapu gerektum pangeda, sun bung keca kunumna nengdi, ‘Akecada nun kunuptepe,’ pepra, yan moropketenge do? Konum kunupmenge dingeda, er nong poptengedi, galepra yuk kunumna neng ton bokra kareptenge do?

7‘Ukupkamne’ tenen, besi takke weneringe di, er bol deiki luktumpa wektu do? Utopu besi takke di, er giso deiki doptumpa, lukra wektu do? 8Gume Lewiatan banep balda, ange yumada, men kupmanto keca cadi, men kuptume. Er bol deiki ue tenpu beptuma peda, adipapu er nong bol neitamai men wekamre. Atep, mali kange doupra dounmareanen, er yu kuprepa, popetepkamkerada, pio men lupronkamrume. Adeiyoda, er puto weika di dounkamra tep, pio apu men talepra tektume. Kange di ton cap akeca tek sisi men popetepkamrume!

9Ware nesala do yuma, abanep bal Lewiatan epmengopda, kware weik kuprepa, adipapu kumkum kuprepa, depra tuai sangkamenge. Anengdi, ‘Abalda tomopra ateng kouptepe,’ teneptenga peda, angeda, pio men kuptenge. 10Er mapmarepane bungdinada, ila yu keca cadi, ware balila neng betengedi, bukeiptenge do? Pio gum cadi, ware neng balila kuptengedi, er damai tengyatengedi, upu pepra bisbisa kaptenge do? Gume akeca damaida, nimidi men tektenge.

11Im amutara kure keca yuma kankan cap, tuai mutu neitamai kure keca yuma kankan capda, ware nengdi, balila kuptengedi, aila puto keca damai tali lupra bena tektenge do? Tuai mutu neitamai yuk gam kure keca pe, nimi peda, akeca damai bena tektengopda, Lewiatandi, sun tep adipapu men poptapkamre do? Angeda pio men kuptenge.

12Ange tep nengeda, laut mokon pumbon ila banep bal, er si Lewiatanda, er nong cap, er buru cap, er ila puto kurenge cap tep, tali lupra lap pepkusene. Er kure keca lap pena tep nengeda, tali dim peptapnapu men kupkune. Angeda lap pepkusene. 13Wareto ngebodi, balila kuptudi, ila banep bal er si Lewiatan, er nong bol bura tara ngeda koptaptu do? Gume, er nong bol deikinge pe, nong neitamainge peda, bol pio gat weik kurura cadi, nimidi akeca men koptaptenge.

14Tonda, wareto ngebo, er balila kuptudi, aila banep bal, er sipyal damai bena, tapu di koupdongoptenge do? Gume, er sipyal akyopda, daneitamaida, ila yu si denge pio weik kurura cadi, nimidi ange epmengopda, ila kware kuprepa, er sipyal men koupdongopmanto kupkamenge. 15Lewiatan er bali deiki tarada, pio gat bol ton akurure. Jen talena nengdi, ‘Nun nong lelipkamep’ tenen, gat pala keca er si perisai talerameng keca urasin utopu, er bali tara nong bolda, pio gat weik kurure. Tonda, er bali tara nong bolda, pio gat gel utopu kurure. Jen talena nengdi, sun perisai dopra, dua baris kepmengedi, lelepra deriramengtopu, abal er nong bol deiki takke kecada, agat keca utopu kurure. 16Abutene baris kwamu takke kecada, butene nepra tengna ngepu kwamu ngeda, pio meneng damaipu kwamupa, kumanya puto di pung pepmana peda, abutene baris nepra tengamenge nge neitamaida, pio ton men beutue.

17Atakke keca, baris butene ngeda, atarange cap, ortarange cap, daneitamaida, pio palepra damaipu kupu. Ange bari butene ukuamu ngeda, abutene baris yuma tep nengeda, nimi yuk nengdi, yuk-yuk kupra men dopra deipmanto kurure. Angeda pio men kuptenge. 18Aila banep bal er si Lewiatan, er u pumbon bisi di, isinda puto di pung pepre pangeda, er dirinda, melang perure. Er asuru dimnyo bolda, yapi bi kurura cadi, er asuru konum lapyopda, bereng tamne keteng yakan tara di im neitamai yapi bi laramretopu kurure.

19Ukupmantoda, er sipyal konum si bana akropyopda, uku bu urasin utopu keca, er dirinda yarepa dinupe. Tonda, er sipyal pumbon di, uku bu puto yuk-yuk bokra belepredi, dana-dana tara embarure. 20Er u pumbon neitamai di, ket ton welerure. Ukupmantoda, me gamne mau dopra, uku deiki deipmepyopda, agamne mau, er si belanga iriamu tarada, ket cap, uku cap, uku lyemu cap, welerepa dinupa utopu, kurure. 21Er sipyal pumbon di, ila uku bu ton yakarepa eptepe. Er si puto pung pepyopda, uku dongon co damai akapyopda, aco bena bepyopda, adipapu uku di aco yuma jedorure.

22Lewiatan er kumda, puto weik kurure. Tonda, erdi embaramre mutu neitamai kunge nesala yuma epmengedi, adipapu kware weik kununge. 23Er nong bol deiki ngeda, gang-gang pio gat weik kurure. Tonda, long-long pio men perure. 24Er nong neitamai dipruaida, pio gat weik kurure. Ukupmanto ngeda, gandum du taingna tep keca, ila pala gel pio gat kuramretopu, er dipru neitamai peda, gat weik kurure. Tonda, dipru boun ngebo pio men kurure. 25Lewiatanda, mapmaryanen, ka di bukre taruda, sun ila puto weik neng peda, ange epmengedi, kware weik kuprepa, sun nong yuma moropsemrure. Sunda kware weik kununga deiki di, ‘Uo ware kuptepe do?’ tenen, kange tenimtonapu kupmengedi, kange wang-wangpu perepa sunda kununge.

26Nimidi, ‘Akeca Lewiatanda, yu takke keca di popkup’ teneptenga peda, men kupmanto kununge. Ada, ware yu keca do yuma, parang ya cap, mar cap, tema cap, gat takke co, er si tombak capda, er nong bol deikinge pio gat weik kurura cadi, akeca-keca yuma di, men lukra poptenge.

27Ukupmantoda, nimidi besi keca di takke keca dopra deipmengedi, abanep bal popeteptenga peda, erdi, ‘Gume pio boun keca tali manmaneng utopunge di popetepmanenge,’ tenenkamre. Tonda, gat keca er si tembaga di, takke keca yuknge ton betaiptengedi, er tep popeteptenga peda, erdi, ‘Gume, konum lyupu co di popetepmanenge,’ tenenkamre. Gat takke keca yumada, er nong bol deiki men lukra poptue.

28Tonda, nimidi, ‘Lewiatan bal popkup’ tenepmengedi, yu mar dopmengedi, popetepmenga peda, asi yu mar di er bol men lukra poptue. Ange utopu, nimidi gat gel, si yu weiknge dopra, er nong deiki doptenga peda, erdi, ‘Gume, pio boun keca, manmaneng do, tali koluramre co bo do? Akeca di popmaneng do?’ tenenkamre.

29Gat co balena di er nong deiki bongoptenga peda, erdi, “Gume ange peda, pio boun keca, manmaning bulupra tapu di getepmanga di popmaneng do?” pepkamre. Tonda, nimi gung di, lyom gat co er si tombak dopropmengedi, nimi pona tep takke keca di lukra keteneipmengedi, ange di er tep popkamenga peda, erdi, ‘Gume angeda tali keca pua’ tenen, nalepra autunkamre.

30Er mundu bol deikida, gat keca kurur ngeda, mekina bol deiki takke utopu keca kurura cadi, yu weik kurure. Atep, er mundu deiki boun tu di do, bentalai di do, adeiki embaryopda, atu yuma tamortorure. 31Lewiatandi, laut mokon pumbon embaryopda, amokon me yuma longteng-longteng pepredi, tamortorure. Ukupmantoda, me gamna tep mau bupu weik konum kupyopda, ameda konum bupu popredi yarungamretopu, laut mokon me peda, utopu kurure. Tonda, ukupmanto ngeda, nimidi minyak me gwepra kuali neitamai dikdongopmengepa, bupu weik konum kupyopda, yaruk-yaruk peramretopu, laut mokon pumbon embaryopda, alaut me peda utopu, yaruk-yaruk pepra kurure.

32Tonda, Lewiatanda, laut mokon deiki embaryopda, erdi ame pumbon me gekra embarur bisi yumada, me kait kurun nge beleredi katuai welerure. Ukupmantoda, pio wisi konum deipmenge nengda, sun giso deiki di kul potong pio kurun nge tengamretopu, amokon deikida, me kait kurun ngepu welerepa, kurun kurure.

33Lewiatan erda, pio puto kuna cap, balila kuna cap, kurura cadi, yu gam kure keca yuknge yuma tep nengeda, kware pio men dangrure. Tuai mutu neitamai gam kure keca yala-yala yumada akunung dinin, Lewiatan utopunge ton, pio men kununge. Ila mambul ngeda, er tenpua kurure.

34Tonda, tuai mutu neitamaida, ila yu gam kure keca yala-yala yumada, pio weik akunung dinin, sun yumada, abanep bal er si Lewiatan epmengopda, adipapu kware weik dangnunge. Teka, wareto keca do yuma, yuk yu gam kure keca akaptuopda, Lewiatan er amutarapu kununge. Ukupmantoda, erda sun nimi deiyo ngebo Raja utopu kurure. Pio ila puto weik ngeda, er akonum kurure.