Job 42

Allahdi Ayub tep upu peipupa, Ayub gekepudi, ‘Teka ne mali upu peramsi,’ tenen, mali kange doupudi, pepu upu

1 Allahdi aupu pepka tep, Ayubdi Allah Yahweh tep tamupra pepu. 2 Ayubdi pepu. “Ne kaele Allah kanda, nimidi men kupmanto keca cap, akeca-keca capda, kan teneramumnge yumada kurume. Atep, kandi, ‘Angeda kupkamne,’ teneamum ngeda, ton men tamrume. Tek sisi angepu kurume. Tonda nimidi, kan teneamum keca yuma, bisbisa kapketengedi, gum men kupra deipketenge.”

3 “Allah kandi ne tep, asipetepmanemum ngeda ake, ‘Ware balila ngebodi, ne pene upu tep, bisbisa kapetepnetu do? Tonda, ware ngebodi moupra men tenepeteptu dipapu, ‘Allah warya tep kupu do?’ pepra, wenemna upu utopu upu, tali peptapnetu do?’ Upepra asipetepmanemume. Ukuda, ne kael kepmane. Ne arup taru pepmakunu upuda, moupra tenena gum dipapu pepmanue.

Apepmanu ngeda, ila mambulnge cadi, ne cap, yuk neng cap peda, pio men kael kepmantonge pepmanue. Atep, ne tek sisi, betapra tenena gum dipapu, walwal di pepmakunu.” 4 “Kandi upepmanereme. ‘Nedi pepkuken upuda, moupra gekepkunerume. Gekepmemdi, tamupra nonge lap pepkunerume,’ pepmanemume. Upepnemum dinin, men kupmanto kupmane.

5 Tonda, pumun taru, nimi dipapu kan upu lap peramneipa, neda gekeramsi. Dinin, ukutaruda, neda Allah kan damai tekra dinmanpa, kan pel dorumnge cap, upu perumnge cap tep, lap pepmanerempa gekepra kael kepmane. Ukutaru, aupu yuma pepnerempa, betapra gekepnedi kael kepne. 6 Ange tep nengeda, aupu pepmanemumpa, gekepmana deiki di, ‘Ne peramsi upuda, tek sisi mali upu peramsi,’ tenepne. Utenepmana tep, ‘Ware keca deiyo tep peramsi do?’ tenen, mambul kange doupra, ali dakmana cadi, arup mali pepmanu ngeda, tapnedi sikke dopra, ne giso deiki deipmandi, but deiki bukmane. Ada, pio walwal di penmanupa, ukuda kael kepmana cadi, ne malinge tapnedi, mambul kange doupra abukmane.” Ayubdi Allah tep pepu.

Allahdi Ayub er kayapu neng tep, wenepu upu

7 Uda, Allah er si Yahwehdi, Ayub tep konum pepu dingeda, Allah Yahwehdi tamupra, Teman mutu ngebo, er si Elifas tep upepu.

“Nedi kan cap, kan kayapu neng butene cap, sun yuma tep, yu tenepsene. Ada, sundi ne damai pepnerum upuda, telep upu ton men pepnerume. Ne kunetopu gum dinin, ne tep mok upu pepmanerume. Ne pel don ngebo Ayubdi, tek sisi upu pemneu upu utopu, sun peda utopu upu men pepmanerume.

8 Ukupruma tep nengeda, jem sapi bisam yoneitam bari cap, jem domba bisam yoneitam bari cap doupra, ne amutara pel don ngebo Ayub damai debenkurume. Sun mali kupmarumnge tep nengeda, adipapu poptapsetene dinin, sun yo pununa tep, asapi bisam cap, domba bisam cap debemum dingeda, ne karena tep, akeca uku dongopkurume. Ukupmum pangeda, Ayubdi sun weneri neng tep, ne moropnere pangeda, nedi sun men popkamsen dinin, sun mali kuprumnge tep, guk kupra deipnedi kaukepkamsene. Sundi ne damai mali upu peamnerume dinin, ne pel don ngebo Ayubpuda, telep upu ne damai peamneu,” Allahdi pepu.

9 Allah er si Yahwehdi, aupu konum pepu pangeda, Teman mutu ngebo Elifas cap, Suah mutu ngebo Bildad cap, Naama mutu ngebo Zopar cap, sun yumada, Allahdi, ‘Ukupkurume,’ peputopu kupi. Ukupi pangeda, Ayubdi Allah Yahweh tep moropupa, Allah gekepudi, aweneri neng tep, sun mali upu peminge tep, kaukepudi gum kupra deipu.

Allahdi, Ayub tep, er taleamu dinin, gum kuamu keca ka di tamupra karepka tep upu

10 Ayubdi aweneri neng, Elifas cap, Bildad cap, Zopar cap, sun yuma tep Allah moropu. Konum moropu pangeda, Allahdi Ayub moropunge gekepu. Ukupudi, Ayub taleamupane, gum kuamu kecada, Allahdi Ayub tep dua kali lipat peramengtopu, utara gum kuamunge pununa tep, itara ton cap tapakra pio weika di karepudi, melimamu. Ukupua cadi, menop taruda, Ayub yambul isomka ngebo kuramu dinin, ataruda ton cap ila isomka ngebo kupu.

11 Ayubdi er kayapu neng, sun mali upu pediraminge tep, Allah konum moropu pangeda, aneng weneri tep teleppu kupra deipu. Ange konum kupkopda, ataruda Ayub er weit yapu cap, er weit nerapu cap, er kayapu neng cap, er tara nesala cap, er bungamu nesala cap, aneng yumada pumun kuramitopu, er damai bulupra yai. Yai pangeda, ila kailya kaleprapidi, er ati weka tonpa jerami.

Ataruda, er tep tupa tenenmaidi, ‘Nun kabo ikin keca dopramu ngebo’ tenen, er dipru kwa dipra kunmai. Ada tali tep gume. Allah Yahwehdi, ila pirin keca Ayub deiki deriramnga tep kunmai. Tonda, sundi er makuna tep, co bo kunumna weik keca tenpu cap, tonda er buru du dongomne keca, kunumna weik keca emas di betaminge cap, Ayub tep karepi.

12 Tonda, Ayub pumun taru Allah cap dukdongopra kuramu cadi, weika di melimamupa, yambul isomka kuramu dinin, ataru di dipdongopra dortaru yumada, ila weika di meliamupane, ila isomka ngebo kuramu. Allahdi tamupra akeca-keca yuma pununa tep kareramu. Ada, domba bisam denge weik, empat belas ribu (14.000) cap, unta bisam denge weik enam ribu (6.000) cap, tonda sapi bisam dua ribu (2.000) cap, tonda keledai bisam nernge seribu (1.000) cap, denge ukupra kareramu.

13 Ange utopu, Allahdi meliamupa, Ayub er nyapu yoneitam bari cap, tonda er ner nyapu weneri cap yuma, Allahdi karepupa punupra deriramu. 14 Menmena deipu ner mi, er sida Yemina, butene ner mi er sida, Kesia, kale ner mi, er sida Keren-Hapuk deiamu. 15 Amutu yumada, urasin telep kaber nerapu, ton dakurami dinin, Ayub er ner nyapuda, urasin pio telep nerapu kurami. Er ner nyapu urasin telep kaber nerapu, utopu nerapu ton, ataru men kurami. Ayub er ner nyapu weneri puda, urasin pio telep kaber nerapu kurami. Sun nai taleamu keca yuk-yuk bokra karepudi, anerapudi akeca yuma taleami. Tonda, sun mal neng peda, utopu kareramupa, taleamidi sun yuma kikiman kurami.

16 Ange yuma konum kupu dingeda, Ayub er gam kuramu keteng tamunda, denge weik seratus empat puluh (140) tahun deiki kuramu. Ataruda, er deamu nyapudi derirami nesaladi, dadeipdanen barami nesala yuma, amutu pio weik kupbaramipa, Ayubdi diramu. 17 Ayub konum wisi deipudi, puto gum kupu pangeda, depu.