Job 5

Elifasdi Ayub tep, pepu upu

1 Elifasdi Ayub tep pepu. “Ayubo, Allah er im deiki pel don neng malaikat kan-kan, dan ngebo upuptumpa melipketu do? Upuptuma peda, men gekepketue,” pepu. 2 Upepudi aupu ton pepu. Betapra men tenepredi, walwalpu kurur ngeboda, dipru neitamaipu, yuk nengdi er tep mali kupi ngeda, tupa-tupa tenepredi tulum kupyopda, adeiki di derure. Ange utopu, betapra men tenenge nengda, yuk neng kunge keca cap, talenge keca cap tep, ‘Uo, angeda nepu doproptene’ tenen, dipru pu jerya deiki denunge.

3 Ne diramsi ngeda, tek sisi walwal ngebo gonga kepra, er pel dopbaramnganen, er kuramu keca cap, taleamu keca cap, telep kupra weik kupbaramkapudi, dato-dato di er kuramu keca cap, taleamu keca cap, er ati kurami neng capda, wipdongopudi, mali kupka deiki di, yuma gum kupropu. Ato nengda, ue tenpu taru ukupmanung dinin, amenda dingeda, ikin kecapu doropmengedi, denunge.

4 Atep nengeda, ato ngebo depyopda, er nyapuda telepai men kununge. Ukupra deiki, yuk nengdi er nyapu tep men melimnunge. Tonda, er nyapu upu bongdina ati dubenge taruda, yuk nengdi ton, men melipra upu bongdinunga cadi, wenemna ati neitamaipu bungnunge. Sunda, pio ila ikin kecapu dopra kununge.

5 Walwal ngebo depyopda, er wa peamrea, tali kankan kunge nesaladi, nong keca tali lupra kipmengedi yan jenunge. Tonda, roti ketkemna deiyo keca, gandum kouamreyai peda, tali pan keca di papra inipdongoprepa, jen putare nengdi kipra jenunge. Angebo isomka kuramudi, taleamu keca yuma tep, yuk nengdi, ‘Akeca nun taleptepe’ tenen, pio putarepa doronunge.

6 Apepmaken upuda, mesum tep men pepkene. Kange mun kusere kecada, deiyo men kwapmarepapu, men yakaserure. Ukupmanto ngeda, ikin kusere kecada, tuai di belepra men yakarure. Tonda, but deiki di men belepra yakarure. Deiyoda, walwal ngebo mali kurya deiki di, ikin keca er nong deiki yakarure. 7 Ukupmantoda, ila uku jenmaredi, uku puto deiki di seng-senga weleramretopu, ikin keca yumada, yukai di ton men belepra yakarure. Kange mun kecada, nimi tuai neng damaida, men tamserure. Nun nin yape deipsenge taru di gonga kepra, gam kunup taru neitamai yumada, ikin keca nun damai yakaserepa doronupe. Nun pe nimi deiki dipapu mali kupmepepa, kange mun kecada, nun pe nong deikipu yakaserure.

8 Atep nengeda, Ayub kan ikin keca dopropmumtopu, ne Elifas peda ikin keca dopramtenyopda, tek sisi Allah er si Yahweh tep, ‘Ne ware keca kupsipa, ne kange mun keca deipnemum do? Kandi melipra lyepnetum do?’ pepra asipeteamtene. Ne putapnetu kecada, tek sisi er damai lap peamtene. 9 Ada, Allahdi tenepra pel dorur ngeda, nun nimidi tenepra men pel doptepe. Tonda, men betapra kael keptepe. Allahdi teneprepa, kunupsek pere ngeda, pio weik men nukmanto kurure. 10 Allah dipapu, ‘Mo ceptu,’ teneprepa, mo cepredi, nimi wa penupai cap, tuai cap sakredi, Allah dipapu me dingrure. Allahdi teneretopu, bura mutu ban-ban yumadi, me pakra embarure.

11 Allahdi ukurura cadi, nimi dipru boun kunge neng, amutara utopu kunge nesalada, eremdirure. Sun ikin keca dopropmengepa, kange mun kurur neng tep, tamupra men popmantoai, telepaipu deipredi, pingping kemdirure. 12 Ukurur dinin, dina di mok upu penung nengdi, ‘Ukunkamepe,’ tenenung ngeda, upu sekredi, gum kupra derirure. Ukuprepa, ‘Ange ukupkamepe,’ teneramenge ngeda, sukrepa kange mun di tamnunge. Sun teneramenge ngeda, nong men kurure.

13 Tonda, ila kael keamenge dinin, mawa di mok upu penung nengda, sundi, ‘Ukupkamepe,’ tenepmenge taruda, adipapu Allahda, sun mawa di tenenung ngeda, kael kemredi, dororure. Adeiki, sun ila kael neng dinin, mawa di mali tenepmange nge yumada, Allahdi gum kupra derirure. 14 Allahdi amali neng tep karerepa, komuni dinin, kunungna keca karerure. Ada, Allahdi sun wenemna tep kunungna karerepa, men epmanto kununge. Mali neng kununga cadi, keteng dukduk dinin, kunukrepa komdoramengtopu kununge.

15 Sun mali kunge neng tep ukurur dinin, kankan kunge nesala cap, ila kange mun kurepapu, bouna di dimpepra amutara dakunung nesala cap tep, ila kael nengdi, yu kuprepa, sun kankan kunge neng deiki, mali upu pedinung neng cap, puto nengdi, ‘Sun tali kankan kunge nesala lupra poptepe’ tenen, yu nengdi tomopra ateng koupmengedi, wenemna ati derinung neng cap yumada, Allahdi lyemdorure. 16 Ukurya deiki di, sun kankan kunge nesalada, sun go tupa akaprepa, ‘Allah dipu lyepkamser’ tenen, dinapu kunkamenge. Dinino, mok upu penung neng cap, yuk nesala tep mali kemdinung nengpuda, upu ton pio men pepmanto kunkamenge.

17 Allahda, akeca-keca yuma talepra, deiki tara kuredi, Ila Puto Deiyo Ngebo, puto weik ngebo kurure. ^{▼▼Ila Puto Deiyo Ngebo seki ngeda, Ibrani upu deiki di, Allah er si ton El-Shaddai seki. Nundi, ‘Ketengban nesala asi deiyo kael kepkameng’ tenen, aupu deiyonge tep, katuaipu sekmepu.} Mali kupmepepa, Allah er si Yahwehdi, ikin keca nun nong deiki deipra wenemseryada, ‘Angeda telepe pua, tek sisi telep kupra deipmanere,’ tenenkamepe.

Deiyoda, ‘Ne nyapu telep kupra deipkamne’ tenen, wenemserura tep, erdi wenepseryopda, ‘Telep kudinmanere,’ tenenkamepe. Wenemna deiki di, nun kun keca yuma telep kupkamsera tep, ‘Uo warya tep wenepmaser do? Wenemnada, nun songe,’ tenena gume. Tek sisi pio, Allahda akeca-keca deiki tara kuredi, puto pio weik kurure. Erda Pio Eremna Ngebo kurura cadi, er tepapu kange deipmepedi dombankamepe.

18 Angeda mesum tep men pepsene. Deiyoda ake. Allahdi nun damai, ikin keca deriserur dinin, tamupra teleppu kudiserure. Ada, ‘Adeiki kupnepa, sun mali kunge kecada tapkameng’ tenen, nun wenemna tep, ikin keca kareserure. Tonda, er buru di bongopra wenemserur dinin, tamupra bicau tenen, lyemdoserure. 19 Atep, tupa-tupa ikin keca, nun damaipu ue ngantan bari kupre pangeda, lyemdoserure. Utopu, ue yoneitam bari taru kupserenge peda, lyemdoserepa gampu kunkamrume.

20 Tonda, nun jen putapsere taruda, Allahdi, ‘Ne nyapu depnung’ tenen, epra melimseredi, jen kareserepa jen jenkamepe. Ton ngeda, podange taruda, ‘Yu nengdi, ne nyapu ya di poptapnung’ tenen, makupra lyemdoserepa, ya di sekra men popsetenge. 21 Tonda, mali men kupmarumpapu, yuk nengdi, ‘Er mali kupmare,’ tenepmengedi penkamkeng dinin, Allahdi kan tep kalekra lelimdongokerepa, mali upu kan nong deiki men kunkamkere.

Mali upu pepra derikenungnge cap, mali men kupmamempapu, yap-yap pepra luludikenunge capda, kan deiki ton men kunkamkere. Tonda, ware keca do yuma, kange mun keca yarepa, gum kupra deipmanto kuserenge cap tep nengeda, Allahdi kalekra melimkerure. Atep nengeda, kware men kunkamkere. Allahdi bicau tenesere nesala yuma peda, utopu kunkamsere.

22 Allahdi bicau tenesere nesalada, kalekra melimsere pangeda, gum kupra deipmanto kusere taru cap, jen putana li yasere taru cap, mambul kange men dounkamepe. Ange gum dinin, pingping kange doupra kunkamepe. Tonda yua bisam cap, nimi pon bal cap, akeca utopu keca tep, kwar men dangkamepe. Deiyoda, Allahdi melimkamsera tepa. Kan peda utopu kunkamrume.

23 Kware men kupkamkerya deiyoda ake. Allahdi kalekra melimserya deiki di, nun wa pen damai gel weik kuamreya peda, ikin men kupkamsere. Tonda, bura tara kure yu gam keca yumadi, nun men dumkamsenge. Ada ukupmantoda, ton tara nengdi, yuk mutu neng tep, ‘Teleppu kikiman kunkamepe,’ pepra, pedina upu pedaramengtopu, kunkamepa tep pepkene.

24 Allahdi melipkeryopda, kan ati dopra kunkamremaida, telep dipapu dimpepra kunkamrume. Ataruda, kan pedi epkamrume. Tonda kan peinkamrem domba bisam pe, kan talenkamrem keca peda, tenpu pe ton men yawarapkamkere. Allahdi bicau tenesere nesala yuma peda, utopu kunkamepe.

25 Tonda, nundi deipmepepa, dadeipdanen benkameng nyapu yumada, men nukmanto kupbankamenge. Nundi deipmepepa, dadeipdanen bankameng nesalada, betei du yamuramre utopu, kupbankamenge. Pio weike kunkamenge. Ayub kan nyapu peda, utopu kupbankamenge. 26 Allahdi melimkerya deiki di, kan peda kuramemyane, pio wisi deipmemdi, nong puto tupa kunkamrem taru dipu depkamrume. Allahdi bicau tenesere nesala yuma peda, utopu kunkamepe. Ukupmantoda, wa peamengepane, pio wisiprepa kiramengetopu kupkamepe. Elifasdi Ayub tep, aupu yuma pepu.

27 Upepudi, aupu ton pepu. “Atep nengeda, Ayub apepmaken upu yumada, nun dirpeteramupka deiki di, konum kael keamepu. Aupuda, tek sisinge pepmakena cadi, ortaru kan peda betapra kael kepkurume. Angepu pio moupra gekepmemdi, angepu talepra kunkamrume. Adeiyo upu betapra tenipetepmemdi, ‘Ne gam kuna taru neitamaida, aupu deiki ware keca kael keptene do?’ tenen, moupra tenenkamrume,” Elifasdi Ayub tep pepu.