Job 6

Ayub er kayapu nengdi pepi upu gekepudi, dipru ikin kupka tep, pepu upu

1 Ayubdi tamupra aupu deiki di pepu. 2 “Uo, ne pio ikin kunerurnge tep, ‘Ware kuprap akapmar do, kael kepkamne’ tenen, timbangan deiki deiptenyopda, eptenedi kael keptene. Angetopu, ne kange mun kunerur kecada, nuktereptenyopda, er ila ikin ngeda kael keptenedi lap peptene. 3 Ne ikin kunerur keca dopra, timbangan deiki deiptenyopda, katuai kuptue. Ada eptenyopda, laut mokon pirmanai kapu mekin gel wenenga, er sida pasir, men nukmanto kuretopu, ataru ne ikin kunerur ngeda utopu, men nukmanto kurure. Pasir ngeda, yambulpu kurur dinin, ne kange ikin kunerur ngeda, ila kange mun kunerura cadi, ange er ikinda men nukmanto kurure. Atep nengeda, nedi, ‘Telep ngeda, ato upuda, men peptene,’ tenena gum di, tali lupra penmanu upuda, mali kupra pepmanue. Atep, sunda lolomna gume.

4 “Neda ikin weik kunerure,” pepra, mali pepra ngolokmanuada, tali tep gume. Deiyoda, ada, pio deiki tara erepra, akeca-keca yuma talepra, Ila Puto Deiyo Ngebo kurur Allahda, ^{▼▼Allah – Ibrani upu deiki di, ‘Allah Shaddai’ pepra seki. ‘Shaddai’ pepra seki ngeda, aupu deiyo ngeda, sun kael kemna tep, katuai di sekmupu.} ukupmantoda, yu kupupa, er marda ne nong deiki dopneupa bekeipneu. Ukupneu mar er yuda, ne nong cap, ne sambala capda, pio neitamai wekneu. Ukupmantoda, nimi pon me, er si racun, karepsengopda, ‘Uo, adipapu depkunup’ tenen, kware weik kuseretopu, Allahdi ila kange mun keca, karepseryopda, tek sisi kwar weik kuserure. Erdi ne poryaneua tep nengeda, ukupmanto jen talena neng weik yangedi, poryakarameng utopu kupra, poryaneua tep, ila kwar kupnere.

5 Sun ton tenipetepso! Keledai bisamda, betei ukupu nenmaredi, pio telep kupra bongonmarenge dopra, karepmengepa jepyopda, boururdi kange deipra kurur do? Mali kange doupra kurur do? Ange utopu, sapi bisam peda, er jena tep, betei weika di sekmengedi, duyana karepmengepa, jeprepa konum boupyopda, asapi bisamdi, mali perur do? Kange deipra dim peprappu kurur do?

Ange utopu ton, sundi telep upu pepnetumdi, ne dipru kwa dipmanetum teptoda, nedi ikin kange doupra, ‘Uo’ tenen, mali men peptene.

6 Ange utopu ton, matang kuptu jen kecada, ua er si garam men tapakra deipmengopda, ware ngebodi ajen keca putaptupa, weika di jeptudi, kange deiptu do? Tonda ange utopu, ware ngebodi, ayam ma kurun du ngepu jeptupa, tau peptu do? Gume, ange ton men kupmanto.

Ange utopu ton, sundi pepmanerum upu gekepmanu dinin, aupu yumada, ne dipru men melipneua cadi, ne dipru men kwa dipneruma tep, tupa mali pepra engenmane. 7 Ukupmantoda, tau penange gum dinin, pio mali jenada, ne putana gum tep, pio men jeptene. Nedi ajen keca utopunge jeptenyopda, duknapu kuptene. Ange utopu ton, sundi penmanerum upuda, gekepnedi, kange mun kange doupra kunune. Aupuda pio men melimnerura cadi, tupa men gekepsetene.

8 Uo, nedi Allah tep moronun ngeda, karepnetuopda, ne kange deiptene. Warya tep Allahdi ne moronun ngeda, men gekepneredi, men karepmanto kunerur do? Tonda nedi er tep, ila upu deiki di penedi moronun dinin, warya tep pio moupra gekenerurdi, men karenerur do? Atep, ne kangeda, nedi Allah tep moronun ngeda, adipapu karepnetuopda, ne kange deiptene.

9 Ada, Allahdi ne ikin weik kunerurnge yuma moupra keal keamnetu teptoda, erdi adipapu popra sikke buktamnetue! Tonda Allah erdi ne tep, ‘Angeboda, popkune,’ tenemnetudi, adipapu poptapnetuopda, ne kange deiptene! Angeda pio putanerure. 10 Allahda, mali kuna pio gum ngebo cadi, erda pio Lengnapu Kurur Ngebodi, “Ange-ange yumada talepra kunkamrume, angeda pio men kunkamrume,” pepra, deipneu upuda, nedi konum moupra tupa-tupa dinedi, talepra kunune. Atep, ikin kunerurnge yuma tep nengeda, nedi ataru tenenunada, ‘Allahdi dapopnetue’ tenen, kange derinune. Tonda, ‘Allahdi wenepra popneryopda, ila kange mun pu jepnetupa, ikin pio weik kupnetua peda, telepe pua,’ tenenune. Deiyoda, Allahdi peipneu upu yuma men tapsdi dinin, tupa moupra talenun dinin, ikin keca weik ne nong deiki derinerura tepa.

11 Dinino, neda ware puto kwamnetua deiki di tupa gam kutene do? Tonda dortaruda, ware telep keca kupkamnera tep, ‘Neda ton cap gam tupa kunmanyanen, amenda taruda telep keca ne damai yaryopda, teleppu kunkamne,’ teneptene do? Gume, ne puto pio bounpu konum kupmana cadi, ‘Neda tupa gam men kutene,’ tenenune. 12 Sun ton tenipetepso! Ne nong ada, ila gel gat kuramra utopu, neda puto weik kunerur do? Tonda ne nongda, gat keca er sida tembaga, gat weik kuramretopu, ne putoda utopu kunerur do?

13 Tek sisi ngeda, ne pe nong neitamaida, ne pe dipapu men melipdatene. Tonda, men taruda, nedi, ‘Ange deiki di, nedi melipdatene,’ tenemsi keca yumada, konum gum kupneu. Angetopu, ‘Yuk nengdi yana melipnetenge,’ tenemsinge yuma peda, ne damai men yanmanto, men melipra lyepropnetue. Ataruda, ne pe putoda, konum gum kupneu. Ne melimna kecada, ne damai ton men kurure.

14 Sun ton moupra tenepso! Ware neng do yuma, sun kaypu neng ikin weik kunge taruda, adipapu bena melipkameng dinino, sun dingeda, ‘Angeboda, nundi meliptepe dinin, dakwapye. Angebo pio men melimkamepe,’ tenepmarume. Ange utopu tenenung nesalada, pio mali weik kununge. Sundi akuruma deiki di, Allahda ^{▼▼Allah – Ibrani upu deiki di, ‘Allah Shadday’ pepra seki. ‘Shadday’ pepra seki ngeda, aupu deiyonge, sun kael kemna tep, katuai di sekmupu.} pio deiki tara erepra, akeca-keca yuma talepra, Ila Puto Weik Deiyo Ngeboda, er tep tupa kware men kurume. Sunda, er upuda, yanitamna utopu kurume.

15 Dinino, uo ne kayapu nengo, ukupmanto upuda sun tep pepsene. Mo weik ceprepa, ila embaramre me opredi, dato-dato di er pirmanai kwamre keca yuma jedorurtopu, sun peda utopu kurume. Tonda, metek me peda, nun men tenenup taru dinin, dou mapredi, ceproprepa, ayambul meda men yakaramretopu kurume. Ange utopu, sunda nedi pene upuda, sundi, ‘Angeda tek penmare,’ men teneneruma cadi, men melimnerume. Ikin upupu penerume.

16 – 17 Ange utopu, sunda, mul duduya mo cepredi, me deiki douryarepa, me weika di embaramre dinin, ukuamyanen, bupu li kepyopda, adipapu mul duduya mo cap, es capda, gum kuprepa, ton cap men dinunge. Ukupredi me embaramyada, cepra gelal seproprepa, me ton cap men embarura cadi, men gwepra jeptenge. Sunda ange utopu, ne ikin weik kune taruda, men melimneruma cadi, sunda ayambul me dim peramra utopu neng kurume.

18 Keledai bisam bali deiki bukra embanung kunumna deiyo neng, ‘Me putapsera cadi, me kupmaryai bena, me gwepra jeptepe’ tenengedi, me kwamngai bena dipetemnung dinin, konum gelal cepyopda, kange di ton cap, me tep enmankap, bisi wangartamnunge. Ukupmengedi, sunda bisi neitamaipu tekdoua embaramenganen, mutu katawaipu bena, denunge.

19 Ange utopu, sun Syeba mutu kunge neng cap, Tema mutu kunge neng capdi, ‘Kunumna weik keca dopra ortara kunumbenkamep’ tenen, sun keledai bisam deiki bukra embandenkap, ‘Me dan cei di gwepra jeptepe do?’ tenen, enmankap, ‘Ameda ton jeptepe,’ tenen, kange deipra embanunge.

20 Dinino, embarammenganen, sundi, me konum cepropkai bengopda, pio ikin kange doupra kununge. Ada, sundi, ‘Tek sisi, me embaramngai damai betepetoda, ameda gwepra jenkamepe’ tenerami dinin, ame cepromrepa, meda pio men dopra jeptenga cadi, tali tepapu enunge. Ataruda, sunda, ‘Uo, warya tep do? Ukutaru ware kuptepe do?’ tenen, ikin kange doupra kungedi, kange tenimtonapu kununge.

21 Ange utopu, sunda ne kayapu nengdi, ame kuramre utopuda, sun konum kurume. Ila kange mun keca ne damai konum yaneupa, ne ikin kange doupra kunman nge yumada, sundi epnerumdi, men melimnerum dinin, adipapu kwar kupserepa, ne damai di gopra bendopnerume.

22 Ange yumada warya tep do? Nedi sun tep, ‘Uo, ne ikin kunerura cadi, sundi tali karen keca ton melipra karekunerume,’ pepra moropmasen do? Tonda, nedi, “Sunda isomka weik neng kuruma cadi, ne melimna tep, kunumna weik keca weika di karepnerume,” pepra, moron keca moropmasen do? Tonda, nedi sun tep, “Amenda taru, kange di ton cap telep kupnyopda, sun ton tamupra weika di karenkamsene,” pepra, “Bul kemna co bo ton karepnerume,” pepsisa tep do? Gume ange yumada, men kupsi. 23 Ange utopu ton, nedi sun tep, “Nimi ton, pio bicau tenena gum di, ne pona tep neng damai di lyepropnerume,” pepra, moropsisi do? Tonda, “Mali kuna neng, sun buru deiki di dalupra doropneiya cadi, sundi aneng tep co bo weik karepmumdi, kunupnetumpa, sundi loptapkamnenge,” pepra, nedi sun tep moropsisi do? Gume, sun kaele, ange yumada men kupsi.

24 Ange tep nengeda, ukutaru sundi ne tep, lap pepra peterepnerume. Sundi, “Kanda Ayubdi, mali kupmum ngeda, acei-acei,” pepra, lap pepkunerume! “Mali kupmarum ngeda, ake,” pepra, lap pepnemum pangeda, ne upu pena gum di, dim peprapnedi, sun pepkunerum upu gekepkusene.

25 Ne kangeda, sundi ne damai tep, pio tek sisi upu pepnemumnyopda, ne adipapu aupu gekepnyopda, kange telep kupkamnere. Dumsisi upuda, puto weik kurura tepa. Dinino, sundi tali upu deiki di wenemnapu pepnerumnyopda, nong ton men kupkamre. Sundi perum wenemna upu yumada, ware kun keca tep, wenemrum do? Ware ngebo tep, wenemrum do? Gume, tali upupu peptapnerume. 26 Sundi ne tep tenenerum ake. ‘Angebodi peserur upu yumada, ada tali upupu peserura. Eri perur upuda, tali kumanya pung peramretopu kurure,’ tenenerume. Neda, ikin kupneupa, kange mun kange doupra kununa cadi, telep kupra men pepmanto kununa cadi, nedi, ‘Uo’ tenen, penun upu yuma tep, sundi tamupra wenemna upu deiki di penerum upuda, tali tepapu perume. Ange yumada nong men kupkamre keca tepa. 27 Ne kangeda, sunda, sun lyan nyapu, sun talenung keca tep, sundi, ‘Nun dipapu akeca yuma dalupra dopropkup’ tenen, ‘Ware kupkamep do?’ tenen, petenkemna keca, er sida undi, ^{▼▼undi – Aupu deiyoda, nun ataru kunup nesala yambul walwal kunup dinin, er lap pen upuda ake. Ada, pumun taruda, sun Israel yala nesala kankan dinin, imam nengdi, yambul keca dopra adeiki di si yuk-yuk seki. Ukupidi, ‘Nun wepra deipkup keca, tonda nundi kupkup kecada, Allahdi lap pepkuser’ tenen, Allah moropidi, akeca tu deiki siptapipa, Allahdi er pel dopka deiki di, tenpu si sekinge katuai kupu pangeda, sundi, ‘E, akonuma, Allahdi ange konum wepra deipmasera cadi, angepu kupkamepe, akecapu wepkupe,’ teneramidi, akeca er si undi dopra apel dorami.} apel peprumdi, alyan nyapu keca upula dorona nenge utopu kurume. Tonda sun kabo sisa tep, ikin weik kupyopda, sundi, ‘Erda ila isomka ngebo kuramnga cadi, er taleamu keca yumada, nun dipapu dalupra doproptepe’ tenen, yuk neng cap, sun cap upu talepdarumudi, er keca copra karedanapu kun neng utopu kurume.

28 Dinino, ukutaruda, sundi ne tep pio moupra dipetepneso! Nedi sun tep ton, mok upu pesenun do, gum do? Gume, ne damai tekmarumpa, nedi sun urasin epnedi, mok upu men pepsetene! 29 Sun moupra tenipetepmumdi, men di ‘Ukunkamepe, aupu ton pepkamep,’ teneamnerumnge yumada, adipapu taprumudi, ka di tamupra ne tep moupra tenepetepso! Dumsisi men kumum ngeda, tapkurume! Ne nong deiki ikin keca dopra derina gume. Neda, mali kun keca pio men kununa tep, ange katuai kupkamre ngeda, sun ton epkamrume. Yuk neng yumadi, ‘Uo, er Ayubda mali weik kuramnga cadi, Allahdi ila ikin keca er nong deiki deipke’ tenen, pepnenung tenen, sundi penkamrum keca yumada, moupra tenenkamrume! 30 Sun ton moupra tenepetepso! Nedi sun tep, pesenun upuda, mali upu ton penun do? Tonda, ne pedi, ‘Angeda telepe, angeda pio mali kunangepu kurure,’ tenen, moupra teneptenedi, men kael keptene do?