Job 7

Ayubdi, “Uo, tuai mutu neitamai gam kunup taruda, ikin weik kunupe,” pepra, engepu upu

1 Ayubdi pepu upuda ake.

Nimidi, sun kange dipapu, ‘Angeda kuptepe’ tenen, pio pe deipra kunup kecada, men kupmanto kupmaserepapu kunupe. Nun tuai mutu neitamai gam kunada ikin weike. Ukupmantoda, pio ikin pel doramre nengdi, ikin pelpu dongepa, kange mun kange doupra kuramengtopu, nun tuai nesala yuma peda, ikin pel dopmepepa, ‘Co bo dorona tumida, menmena keptue,’ teneramengtopu kunupe. 2 Co bo deiki di kunupra deiamengepa, ikin pelpu tali doramenge nengdi, puto boun kupmengepa, ‘Uo, idona taru yatuopda, apel taptepedi, tamupra atipu betepe’ tenen, ila di putaramengtopu kunupe. Tonda, ikin pel donge nengdi, sun deiyo neng tep, ‘Nun pel konum dopmapa tep, nun co bo bokra derirameng nengdi, nun co bo karepsetengepa, telep kuptepe. ‘Nun pel donmap ngeda, karepkuseng ja!’ teneramengtopu kunupe.

3 Ange utopu ne peda kunune. Ada, Allah er kange dipapu, ikin keca karepmanere. Ada, awar-awar yuma, ne gam kunun taruda, deiyo ton gum dipapu talipu kunune. ‘Ange-ange yuma men kuptene tep, ware kupkamne do?’ tenenapu kununge. Tonda ange utopu, alukunda-alukunda yuma, kange mun pu jenerepa, neda kange mun kange doupra, ‘Uo ware kuptene do?’ engenapu kunune. Ange yumada, Allahdi karepneua tepa. 4 Atep, neda lukunda neitamai, ‘Mapkun’ tenen, benedi mapnya peda, ‘Uo, alukunda konum kupyopda, dan keteng yarepa, kange di buktene do?’ tenenapu kunune. Dinino, lukunda neitamaida, mapapna bukapna kemnapu kunune. Lukunda neitamai dinin, ue weik kuprepa, tali kange doupra pio men mapmanto kununa tep, ‘Uo, menmena berektue,’ tenenapu kunune.

5 Ne nong bol deiki yumada, bental cap, kwali cap weik kunerure. Tonda ne yapi yumada telepropnerur dinin, kange di ton cap ne bol deikida, toro susu weik jenerya deiki di yapun embanerure. 6 Ne gam kune taruda, ‘Opkal wina nengdi, opkal win keca deipra, menmena widongorameng utopu, menmena dipapu depkamne ja,’ tenenune. ‘Ukunkamne, ukunkamne,’ tenena cap, ‘Uo, ukuptenyopda, teleppu kutene,’ tenena cap, pio gum di, ‘Tali kunun ngeda, adipapu sirya gawal daknetue,’ tenenapu kunedi, mali kange doupra engenapu kunune.

7 Ange ton tupa tenenapu kunune. Ne gam kunkamne goda, yambulanun pua. Ukupmantoda, tenpu taru dipu isin kepnyopda akonuma. Ayambul go taru neitamaida, telep kuptenedi, kange doupra kuna ngeda, ton men kapnetua cadi, konum wangapneue. Ukupra kunmanyanen, depnyopda, konum gum kupkamane. 8 Sundi, atarupuda ne tepapu konum dinerum dinin, ue yambulanun ton konum kuprepa, sundi pio apu men dinkamnerume. Atarupu tupa dinmanerum taruda, dato-dato di depkamana tep, sundi ne tep epetepkamanerem dinin, konum gum kupkamana cadi, men epkamanerume.

9 Ukupmantoda, dua bum ila di topdoua embaryanen, adipapu gum kuramretopu, nimi peda menmena dipapu denupe. Ange utopu, konum depre ngeboda, tu palipra peipmengepa, konum deami nesala kununga, amutu sida Sheol mutu, amutu damai di konum beryopda, ka tamupra gam kun nesala damai men yatue. 10 Adepmengepa konum tu palipmenge nesalada, sun men di kurami ati damai men tamupra yanmanto kununge. Tonda, sundi kurami mutu cap, pel doramyai cap, sun damai kurami nesala cap damaida, tamupra pio men yankamenge. Ada men kupmanto tepa. 11 Ange tep nengeda, neda men dim pepra kunkamne! Ne pu jenerepa, ikin weik kununa cadi, ne tenenun ngeda, men dim petamkamne. Ne kange dipru neitamai cap, ne sambala neitamai cap pio kange mun kange doupra kunedi, ikin tenenun ngeda, upu deiki dipapu tali lupra lap penkamne.

12 Uo, ne nai Allah, ware deiyo keca tep kandi kalekra dinapu kunerum do? Kandi ne tep nengeda, ‘Erda ila laut mokon kurure. Agum dingeda, erda laut mokon amu neitamai kuramre ila yu bal, er si Naga kurure,’ tenenerumdi, pio kalengnerum do? 13 Ton taruda, ikin weik kunerepa, nedi, ‘Ne beipe kunerur ngeda, mapnya deiki di gum kupkamnere. Tonda, ne ason deiki tali dim pepra maptenyopda, ikin pu jenerepa, mali pepra engenun ngeda, dim pepkamre,’ tenenune. ‘Ne ikin kange dounun ngeda, kanampu kupkamnere’ tenen, epra embanune. 14 Dinino, ne mapmanedi ken mapnya deiki di kandi ken mana deiki peipnemempa, lukunda neitamai kwar weik dangnune. Tonda, kandi karepnemempa, ne ken mapne taruda, kandi mali kange tenenangepu dopra, ne deikipu derinerumpa, kware weik kunune.

15 Ange yuma tep nengeda, neda ila di putanerur ngeda, ‘Ne gam tupa kunedi, ikin keca doronapu kunun ngeda, ne songe. Adipapu dadeptene,’ tenenune. Agum dingeda, ne tenepne ngeda, ‘Ne kum talepra copdongopnetupa adipapu dadeptene,’ tenenune. Tek sisi anong neitamai tupa gam kunmanada, ne songe. 16 Ne tupa gam kunmanada, ne pio dabale kunerure. Atep, ne tupa gam kunmanada, ne songe. Atep, kandi ne tep, ‘Angebo dakwapye,’ tenepnetumdi, tapnememnyopda, adipapu neda dadeptene,’ tenen, pio putanerure. Deiyoda, ‘Ne gam kune taruda, tenpu isine weleprepa, adipapu gum kupbaramretopu kunune,’ tenepne. Ne gam kunada nong men kupkamre kecapu kurure.

17 Tonda, ne nai Allah, ange ton asipetepkene. Ware keca deiyo tep, kandi nun tuai mutu neitamai kunup nesala tep, ‘Sunda, ila mambule,’ teneserum do? Warya tep nun kunup keca yuma tep, kandi tupa-tupa kalekra dinapu kusememdi, teneserum do? 18 Tonda, angetopu, ware keca deiyo tep tupa pio ipna taru yuma peda, kandi nun tuai nesala kunmapenge dina tep, nun damai yana pio epra kael kemserum do? Tonda, kandi, ‘Sunda telep kunkameng do, mali kunkameng do?’ tenen, ikin keca karepsememnya deiki di piripeteserum do? Ataru-ataru yumada, kandi nun tep, pio kurpetenkamserum do?

19 Uo ne naio, kandi ue tenpu tarupu, men kaukepnetumpa, talipu men kutene do? Tonda, ne tep pio tupa-tupa kalengnemem ngeda, kandi ne tep kalekra men dinemempa, ago neitamai di ne ul me jepkoteptene do? Pio kalengnapu kunkamnerum do? 20 Tonda, uo kanda ne tep Kalengna Deiyo Ngebo kuruma cadi, ne tek sisi mali kupnyopda, adeikida, nedi kan tep mali kupra derikenun do? Kan deiki mali keca derikenun do? Kanda tuai mutu neitamai kunge nesala yumada, sun kunge keca tep, dinapu kurume. Nesala ban-ban yuma diruma tep, ware keca deiyo tep, kandi ne tenpu tep, ‘Mali kupkamar do, gum do?’ tenen, moupra dinerum do? Ware keca deiyo tep, kan marda dopra, ne deiki derinerum do? Nedi ikin keca dopra, kan deiki derikenun ngeda, pio ikin kukerura cadi, ‘Angebo ne dabale,’ tenenerum do?

21 Ware deiyo tep, kandi ne mali kunun nge yuma tep nengeda, adipapu men lyepra daepropnetum do? Ne mali kunun ngeda, kandi men kau kepnetuma tep do? Ne ikin weik kunmana cadi, menmena di konum depnepa, tu palipnengopda, kandi ne tep enmanememnya peda, kandi pio men epkamanereme.

Aupu yumada, Ayubdi pepu.