Job 8

Bildaddi Ayub tep, pepu upu

1 – 2 Suah mutu ngebo, er sida Bildad, erdi, Ayub tep pepu. “Ware kuprap taru yuma, kanda aupu tupa penkamrum do? Kan penmarum upuda, kumanya puto pung peprepa embaredi longamre utopu upupu perume. Apenmarum upuda, tali pertamruma tepa. 3 Allahda, nimi wenemna tep, tali-tali kupra mok upu deiki di bokeipseredi, wenemserur do? Tonda, akeca-keca yuma talepra, pio Ila Puto Weik Deiyo Ngebodi, pio dumsisipu kurur ngebo kurura cadi, er Allahdi nimi wenemserur taruda, pio gwalin bisi embaredi, wenemserur do? Gume, angeda men kupmanto. Deiyoda, erda mali kuna keca ton pio men kurur ngebo cadi, pio dumsisipu kurure.

4 Ange utopu, ukupmanto, kan nyapu yumada, pio mali kun kecapu talepra kuramidi, Allah er damai mali kurami teptoda, Allahdi sun wenemna tep konum poptu. Nun kangeda, sundi mali kuraminge tep, Allahdi sun tep, konum wenepudi popke. 5 Ange utopu, ‘Kan pe tep utopu kupkerur’ tenen, kan mali kupmum ngeda, tapmemdi, dumsisi telep kangepu doupra kumemdi, ‘Allah er damai tamupra kunkamne’ tenen, er tep moropmemnyopda, Allahdi ^{▼▼Allah – Allah er pe si, tek sisi ngeda, ‘Yahweh’ kurure (Keluaran 3:14). Ibrani upu deiki di, asi er deiyoda, ‘Ne pio akunune,’ kurure. Dinino, akayat neitamaida, ‘Adonai Yahweh’ pepra seki. Aupu ‘Adonai’ deiyoda, ada ‘Akeca-keca yuma taleredi, ila puto weik ngebo kurura cadi, er teneretopu kurure’ tenen, seki. Atep nengeda, sun kael kemna tep, aupu deiyongepu katuai di sekmepu. Indonesia upu Allah upu buku neitamaida, ‘TUHAN Mahatinggi’ pepra sengunge. Ton tam ara, ‘Allah yang Mahakuasa’ pepra, sengnunge. Ange peda telep dinin, aupu tek sisi deiyo akapu ngeda, sun kael kemna tep, nundi konum katuai di sekmepu.} ka tamupra telep kweipkamkere. Tonda, akeca-keca yuma talepra, Ila Puto Weik kurur Deiyo Ngebo tep, ‘Bicau tenepneredi, kaukepneredi melipra lyepkamnere’ tenen, morokamrume. Ukupmemnyopda, Allahdi kan tep, kaukepketudi, lyepropketue.

6 Teka, kan dipru yumada, dumsisi teleppu kumemdi, tonda mali keca tenpunge peda men kupmemdi, men tenememnyopda, kan nai bo Allahdi pio menmena dipapu melipra lyepropkamkere. Ada, ‘Menop taru pio telep kupra kuramumpanen, ange yuma gum kupra deipkeu dinin, Allahdi kange di tamupra telep kweipketupa, teleppu kunkamruma’ tenen, pepne. Kan menenga karen keca utopu ngeda, karepkamkere. Ukupkere pangeda, kan kikiman kunkamrum nesala yumadi, kan tep, kange di tamupra gispal donkamkenge tenepne.

7 Menop taruda, kanda bung keca yambulanunpu taleramum dinin, Allahdi meliamkeupanen, amendada ila isomka ngebo kuramume. Adininda, ange yuma gum kupkeu dinino, amenda dorkunkamre taruda, ange yuma kange di ton cap karepkerepa, ka di ton cap, kanda pio ila isomka ngebo kunkamreme.

8 Kandi nun apu yapu neng, pumun taru ila kael neng kuraminge ton tenepetepkurume. Tonda, nun apu yapu neng, sun co puna nengdi kuraminge ton, nukmemdi tenepra kael kepkurume. 9 Deiyoda ake. Ada, nun ataru gam kunup nesala yumada, nun nai yapudi, ukupu tarupu deipseipa, kunmape. Tonda, nunda tuai mutu kunkamep taruda, kuki ue tenpu taru di beleapyanen, adipapu kange di dim peramra utopu kunupe. Ada, nun gam kunada, go pio weika di men kunkamepe. Ange tep nengeda, akeca-keca weika di, men betapra kael kemnupe.

10 Atep nengeda, moupra tenepkurume. Sun pumun taru kurami neng, nun apu yapudi ila kael keami nengdi perami upu yumada, moupra tenepetepmemdi, ukutaru kan peda kael kepkurume. Ada, sun anesaladi konum kael keamya deiki di, kan tep peterepkamkenga cadi, aupu deiki di, adipapu moupra kael kepkamrume. 11 Ukupmantonge ton pepkukene. Ada mokon neitamaipu bongopra tengrur keca cap, parur keca capda, mesa utopunge tep, kan kaele. Akeca yala yumada, me balal pirmanpu, tonda mokon cap, bentalai cap, daneitamaipu parure. Tonda, mokon deiamyaipu, tali pangrur keca, er sida gwei cap, tonda pina cappu tengrure. Gume, me men kwapmaraida, akeca tek sisik men bongopra tengrure.

12 Ange utopu, amokon do, ame do, abentalai do, konum kolupra gelal sepre pangeda, mokon damai parur keca peda, adipapu kolure. Tonda, yukai bongorur kecada, me ceproprepa, mekin damai tengrur keca yumada, menmena nunundorure. Nimidi, ‘Akecada dopropkamane’ tenen, men yatupra tapmangepapu, menmena nunumdorure. Mokonai cap, bentalai cap gelal sepyopda, yuk tali daparamre kecada tupa gam kunkamre dinin, mokon damai paramre keca, mesa cap, pina cap, gwei cap yumada, menmena kolure. 13 Ange ukurura utopu, Allah er tep lumdonongonung neng cap, tonda men teka tenenung neng cap, Allah er upu men dombanung neng cap, sunda akeca menmena nunumdoramretopu kunkamenge. Allahdi, “Ange kunkamrume, angeda pio men kunkamrume,” pepra deipseu upu, yanitamnapu kunge nesalada, gam kunyopda, ‘Ukunkamne, ange-ange ton kuptene’ tenen, putarepa, tenenung keca yumada, Allahdi anesala wenepra popyopda, adipapu ange yuma gum kupkamre. Sun konum depmengopda, sun tenena kange ton men doununge. Akange yumada, konum wangartamnunge.

14 Sun anengda, ‘Allah erda dakwapye. Er upu pio men gekenkamepe,’ tenenung nesala yumada, menmena dipapu gum kupkamenge. Sundi, ‘Ange-ange kupkamepe,’ teneraminge cap, sundi, ‘Akeca teppu teka tenenupe,’ tenepmengedi, sun kange atali keca deiki derinung keca yuma cap, adipapu gum kupkamre ja. Ukupmantoda, gwalema ati doramre tapu, pio boun tapu cap, tonda gwalemadi doramre ati capda, menmena gum kuramretopu, sun anesala peda, gum kupkamenge. Ada, anesaladi, tali-tali keca tep, teka tenepmengedi, ‘Ada nun daramna keca akurure’ tenen, akeca deikipu barimbanung dinin, akecada menmena dipapu, gum kupbaramre. 15 Gwalemnadi dorur atida, pio boun kecapu kurura cadi, ware ngebo do yuma, akati deiki barimbaryopda, adipapu dangrure. Tonda, gwalemnadi derirur tapu talepyopda, adipapu dakredi, gum kupbarure. Ange utopu, Allah tep, teka men tenepmengedi, yanitamnapu kunge nesala yumada, sun talengedi, adeikipu kange barimbanung tali-tali keca yumada, pio tupa men kurure. Aneng cap, sundi teka tenepra barimnung keca yuma capda, gum kupkamre ja!

16 Ukupmanto upu ton pepkukene. Ada, Allah tep teka tenena gum di, pio mali weik kurur ngeboda, wa pepra kwaneng koupmengepa, keteng adeiki donokrepa, telep kupra bongopredi, er buruda, wa peamengai yuma cap, gel deiaminge yuma cap, akeca yuma deiki beleka embaramretopu kurure. 17 Akwaneng yatenda, gel bukamya amutara wengbarure. Tonda atu cap, agel cap deikida, ayaten embaredi, tupa parure. 18 Dinino, nimidi kwaneng wa pepra kouamenganen, er dimdam yuma talepra kwenepropmengepa, gum kuprepa, amenda taruda, ayaten pio men dinuptopu, Allah tep teka tenena gum ngebo tep, Allahdi, “Kanda, ne pio walwale,” pepra, wenepra popredi, pio tapkamre. Angeboda, pio gum kuprepa, kange di ton cap pio men dinkamepe. Ukuprepa, angeboda amutu neitamaida, tupa men kunkamre. 19 Teka, sun mali kecapu talepra kunung nesalada, keana taru tep kange deipra kunmangepane, menmena gum kupbaramenge. Amenda tarada, yuk utopu mali kuna nesala ton yangedi, amali kun nesala kuramitopu kupra, amenda taru yankameng neng peda, yana yo punupra, malipu kunkamenge.

20 Ange tep nengeda, kan Ayubda, moupra tenepetepkurume. Tek sisi, pio dumsisipu kuramre ngeboda, Allahdi angebo tep men tamrure. Tonda, pio mali kupra derirur ngebo tep nengeda, Allahdi er buru talepredi, pio men melimkamre.

21 Uda, amenda taruda, Allahdi kan tep, ka di ton cap melipkeredi, tamupra telep kupra deipkerepa, kanda ka di tamupra, kange deipmemdi si lepkamreme. Tonda, Allahdi kan tep, melipkeryopda, kandi telep kupra deipkerenge tep, kange deipmemdi, kan sipyal deiki pining upu penkamrume. Kange deipmemdi, ila upu deiki di, “Naio, kanda pio teleppu kurume,” pepra penkamrume. 22 Tonda, ataru neitamaida, kan tep yu tenekenung nengda, ange epmengedi, ‘Uo’ tenen, ali weik dangkamenge. Tonda, Allahdi sun mali weik kunge nesala, sun ati dakra tapkamre. Dakra tapyopda, anesala ton cap, amutu neitamaida, pio men kunkamenge.

Aupu yumada, Bildaddi Ayub tep pepu.