Job 9

Ayubdi Bildad tep, tamupra pepu upu

1 – 2 Dinino, Ayubdi Bildad tep tamupra pepu upuda ake.

Teka ne kaele. Ada, kandi ukutaru penmanerem upuda, tek sisingepu pepmaume. Walwalapmaremdi men pepmareme. Dinino, nun nai bo Allahda, pio dumsisipu kurura cadi, pio lengnapu kurure. Atep nengeda, tuai mutu neitamai kunge nesala kankan di, wareto ngebo bena, Allah er damai tektudi, ‘Neda, pio dumsisipu kunune,’ teneptu do? Gume, nun tuai nesala yumada mali kun nengpu kunupa tep, ange men kuptepe.

3 Ukupmantoda, nimidi, ‘Allahdi ne tep asipetepnetu dinin, nedi tamupra lap pepnyopda, upu ton men pepnetue,’ teneptenge do? Pio gume. Allahda teneptudi, angebo tep, denge pio weik, asimpetenada, seribu (1.000) deiki di asiptuopda, angebodi ka tamupra asimna upu tenpunge utopu tamupra lap peptu dinin, ila weik tara ngeda, pio men lap pepmanto kuptue. 4 Allah er kange dipru neitamai yumada, pio ila kael ngebo kurure. Tonda, erda pio ila puto ngebo kurura cadi, nimidi Allah tep, balila deipmengedi, ‘Erdi penerur keca dakwapye’ tenen, Allah tep bisbisa men kaptenge. Nimidi, ‘Allah tep bisbisa kaptepe’ tenen, piripeteptenga peda, pio men kuptenge.

5 Allah er dipapu mutu buma buku mutu ton dopra, yukai deipmarepa, nimidi ton pio men kael kepkamenge. Tonda, Allah er yu kupre taruda, ila mutu-mutu yuma dopra, tamoptudi, sikke bukra taptue. Ange peda, nimi tuai nesaladi men dingedi, men kael kemnunge. 6 Tonda sun ton tenepetepso! Ware ngebodi, ‘Ila bungamu mutuda, mutu longna loktue,’ teneprepa, amutu-amutu yumada longrur do? Tonda, tuai mutu kunupa pio amutara, ila ayumnya co utopu kupra deipupa, adim pepra kupunge yuma peda, ware ngebodi, ‘Akeca long-long pepkure,’ tenepre taruda, adipapu long-long perur do? Ange yumada Allah er dia!

7 Tonda, ware ngebodi ipna berengtamne taru tep, “Ketengda tekra yakana gume,” peptupa, keteng men yakarur do? Tonda ware ngebodi, er dipapu lukunda neitamai ingamre kuru yuma tep, “Ingna gume,” peptupa, lukunda neitamai peda, pio men ingrur do?

8 Tonda, im alau tara cap, im alau tara neitamai kurur keca cap peda, ware ngebodi er pe ila puto buru deiki di ketenepra deipupa, akeca yuma akapu do? Tonda, wareto ngebo, er dipapu tuai tara neitamai dinin, ila laut mokon ketenepra deiptupa, me kaitda, welepnen, kwerepnen keptupa, angebodi, ange yuma yaniptupa, dim peptu do? Ange yumada Allah ja! 9 Ware ngebo dipapu, ‘Im alau neitamai dinin, ingamre kuru gang-gangda, ‘Dapu tara (arah utara) ingkamre’ tenen, kuru gung sida, ‘Biduk’ cap, tonda im neitamai tara ketekepra deipu kuru gang sida, ‘Belantik’ cap, ketekeipra deiptu do? Ange utopu, im neitamai dinin, iknapi dam tara, kuru gung, er sida, ‘Kartika cap,’ pepra, si dopudi ketekepra deipu ngeboda, ware ngebodi do? Ange yumada Allah ja!

10 Ange ton tenepetepso! Ware ngebo dipapu nimi men kupmanto keca, ila mambul pel dorur do? Tonda, ila puto weik keca, kunupsek pen pel doprepa, nimi yuma lukdanapu kunung ngeda, ware ngebodi amambul pel dorur do? Ange yumada, nun tuai nimidi men kael keptepe. Tonda, ware ngebodi nimi men kupmantonge ketenepra deiprepa, nun tuai nesaladi, pio men nukra kael keptepe do? Ange yumada, Allah er ja!

11 Allahda, ne Ayub urasin damai yaneupanen, nedi er nong cap, urasin capda pio men epsi. Ange utopu, erda, ne damai yanapredi, ortara embaramrepanen, nedi er men epra kael kepsi. 12 Tonda, nun nimi tuai nesaladi talenup keca do, tali dakuamre keca do, Allahdi, ‘Ne doropkune,’ tenepyopda, nundi Allah tep, “Angeda dorona gume,” pepra, upu sektepe do? Pio men upu sektepe. Tonda, nun nimidi balila deipra, Allah tep, “Kanda ware keca deiyo tep, apel donmarem do? Kandi akunmaremada, dan do?” pepra, men asipeteptepe.

13 Allah er yu pio weik kuptu pangeda, men dim pepra kunkamre. Erdi, ‘Ne yu deiki di ukupkamne,’ teneretopu angepu kurure. Tonda, ila di kwar kuserur keca, er sida Rahab, ^{▼▼Rahab – Aupu deiyo neitamai ngeda, nun yuma yambul walwale. Ton ila kael nengdi, ‘Ada laut mokon pumbon ila bal, er sida ‘Naga’ tep seki. Ton nengdi, ‘Ada Mesir mutu jen talen neng cap, sun melimna neng cap tep seki,’ tenenunge.} er tep puto melimna neng yuma peda, Allah er pepre upu, sun yumadi gekepra, er amutarapu kununge.

14 Ange yumada, Allahdi puto pio weika di konum ukurura cadi, Allahdi ne tep asipetepneryopda, nedi upu ton tamupra men peptene. Tonda, nedi, ‘Upu pio telepnge moupra tenepnedi, pepkamne,’ teneptenya peda, tek sisi Allah tep, nedi men tamupra peptene. 15 Ange utopu, nedi mali kun keca men kuamtenya peda, neda ila kael kemna cap, puto cap, gum ngebo kununa cadi, nedi Allah tep, upu tamupra men peptene. Erdi ne tep, “Kanda mali kupmaruma tep, wenepkukene,” pepneryopda, nedi tamupra, “Naio, kan kange dipapu, ne tep bicau tenepnememdi, kaukepnetum do?” pepra, moronapu kunkamne. Ada, Allah erda, ne upu bongdina deiyo ngebo kurure.

16 Ukupmantoda, nedi Allah tep, “Nimi upu bongdina deiyo neng damai yankurume. Yamemnyopda, sundi ne cap, kan cap tep, nun upu gekepsengopda, upu bokeipkamsenge,” pepra, moroptenya peda, tek sisi Allahdi ne upu men gekepnetue. Neda tali tuai mutu ngebo kununa cadi, ato upu peptenya peda, im deiki kure Deiyo Ngebo, Allahdi, ne upu men gekepkamnere.

17 Deiyoda ake. Allahdi ne deiki ikin keca deipra popkamner ngeda, ukupmantonge pepkune. Ada, ila kumanya puto pung peprepa, yaredi kuramretopu kupneredi, mungna puto di popkamnere. Ukupkamner ngeda, ne puda ila kange mun pu jenkamnerada, ton cap pio weika di tapakra jenkamnere. Ada, dinopadi, nong ton men kwaprepapu, talipu wenepnerya deiki di, ila pu jenkamnere. 18 Allahdi ikin keca weikanun ton karepneryopda, ne tep ton goda yambula di ton men karepnerepa, ne isin men eremnune. Tonda, Allah dipapu ne dipru neitamai di tenenange peda, mali kupra deipneupa, mali kange doupnedi, dipru pu weik jenerure.

19 Uda, tenepetepso! Nundi, ‘Ware ngebo ila puto weik kurur do? Allah do, Ayub do?’ tenen, piripetepkamep do? Gume, angeda nun konum kaele. Allahda ila puto weik ngebo kurure. Neda, pio puto bounpu kunune. Tonda, nundi, “Nimi upu bongdina tep, bulupkupe. Ada, ‘Ware ngebodi pio telep, dumsisipu kuramu do? Allahdi do? Nimidi do?’ Ange peda, nun konum kaele. Allah er tenpu, pio telep dumsisi kuna deiyo ngebo kurura cadi, nundi balila kange doupra, er tep kong peptepedi, ‘Kanda yarume. Ange-ange yumada, warya tep kupmum do?’ pepra, pio men asipeteptepe! Ange peda pio men kuptepe.

20 Ne pe kange dipapu, ne tep, ‘Gume, neda mali kuna gum di, teleppu kunune,’ teneramtene dinin, ne pe sipyal deiki di, penkamne upu deiki di, ne mali kunange katuai kuprepa, Allahdi ne tep, “Kanda, tek sisi mali kuna ngebo kurume,” pepra pepnetue. Tonda, ange utopu, ne pe kange dipapu, ‘Gume, yuk nengdi ne tep, “Er mali kupu ngeda, ake-ake,” pepra, pio men pepnetenge,’ teneptene dinino, upeptenya peda, Allahda, akeca-keca dirur ngebo cadi, er dipapu, “Kan mali kurum ngeda, acei-acei,” pepra lap peptupa, ne mali kuramsi ngeda, katuai kuptue.

21 Ne pe kange deiki di, ‘Neda mali men kunune,’ tenenun dinino, tek sisi ngeda, ne kange dipru neitamai kunerurnge yumada, ne walwale. Nedi konum kuramsinge peda, tupa men tenenune. Atep nengeda, nedi ne pe tepapu, men kael kepdatene. Ne gam kune taruda, ne dabale cadi, ‘Neda gam tupa men kunkamne,’ tenenune. 22 Ne kangeda, telep dumsisipu kunung neng pe, mali-mali kunung neng peda, utopu kununge. Ada, sirya taruda, sun yumada utotopu kunkamenge. Ada, Allahdi, ‘Sun telep kunung neng pe, mali kunung neng yuma peda, wenepnepa, dadepkamenge,’ konum tenepseu cadi, sirya taruda denapu kupkamepe.

23 Nimi ton, mali men kuramre ngeboda, er men tenepre taru dinin, er pio kael kemna gum, dato-dato di, ila kange mun keca er damai yarya deiki di depyopda, Allahdi, sun mali kun keca men kurami neng tep, ‘Dakwapye, dadeptenge’ tenen, kaukemredi, sun ikin kunge keca tep, erdi autunapu kuserure.

24 Ne kange tenenunada, ake. Atuai mutu neitamaida, Allahdi ange yuma dopra, mali kuna neng, sun deiki konum deipu. Ukupu dingeda, sun nimi upu bongdina deiyo neng yuma tep, “Angeda, mali kupmarume. Angeda, pio telep kupmarume,” pepra, upu bongdina neng yuma, sun deikida, asuru pun kecapu karepupa, nimi mali kupmange keca tep, “Sun mali kupmarum ngeda, ace,” pepra, telep men kudisenunge. Ange yumada, Allahdi ange yuma men kupyopda, ware ngebodi ange yuma kuptu do? Gume, ange yumada, Allah ja!

25 Ne Ayub, ne gam tupa kunkamne taruda, sika gum di, pio menmena kupbaramrepanen, konum gawal dangdonapu kurure. Ukupmantoda, menmena di sepdaro baramre ngebo utopu kurure. Ange utopu, ne gam kunun taru yumada, telepnge ton ne damai ton men yakanerure. Ne gam kuna taru goda, konum menmena di gawal dangbanerure. 26 Ne gam tupa kunun tumi-tumi yumada, sika gum di, pio menmena gawal dangdorure. Ukupmantoda, pio kanam keca, pina utopu keca di, ila mokon deiki baramre keca, er sida perau, ketenepra mokon deiki deipmengepa, akecada, me puto di menmena sepra baramre. Ange utopu ton, ne gam tupa kune taru peda, utopu kunerure. Menmena di sepra gum kupbarure. Tonda Muldamnye ma do, Seng-seng pena ma do, er jen keca epredi, pio menmena lakra yaredi, kwerepra poramretopu, ne gam kunada, menmena di gum kupbarure.

27 Nedi peptene ngeda, ake. Ada, ‘Ne ikin kunerurnge yumada, ne men tenenkamne.’ Tonda, ‘Ne ikin kunerenge tep, mali kange doupra, si lemna gum di, urasin malipu kupmana ngeda, tapkamne. Ukupnyopda, ne mali kange men dounkamne. Kange pio deipnedi, si lepra aupu turtamnapu kunkamne. Tonda, kange mun keca ne damai yakanerepa, konum doronun nge yuma peda, lumdongonapu kunkamne. 28 Ukupra peptene dinin, ukupnyopda ne kware weik kunerure. Deiyoda ake. Ne kaele, Allah kandi ne Ayub tep, ne kunun keca yuma dineruma cadi, kandi, “Erda mali kurur ngebo,” pepra, ‘Ila di wenepra popkamnerempa, kange mun kunkamne’ tenen, kwar kunerure. Atep, arup pepmanu upu men penkamne.

29 Ware keca tep, ne pe dipapu, “Neda telep ngebo kunune,” pepra, tali peipdatene do? Ange peptenya peda, ne kaele, amenda taruda, Allah erdi ne tep, “Kan mali kurum ngeda acei-acei,” pepra katuai dipapu lap pepnetudi, wenepra popkamnere. Atep nengeda, ware keca deiyo tep, pio pe deipra tupa-tupa ikin pel donun do? Tonda, warya tep, kange mun kange doupra, tupa ikinpu kunun do? Nedi pel donunada, tek sisi nong men kupkamra tep pepne.

30 – 31 Tonda, ukupmantonge ton pepkune. Ne mali kunun nge daemna tep, pio kurun lengna keca dopra, ange di ne nong yuma me gektenya peda, ange deiki di ne mali kunange yuma men daepnetue. Tonda ne buru me kuna tep, ila puto sabun di me kuptenya peda, ange deiki di, ne mali kun kecada men gum kupnetue. Dinino, Allah erdi ne dopra, pio tong peramre mali keca weik kwamtu tu pumbon dongopkamnere. Ukupnetupa, ne opkalda, dereng kupnerepa, ali kupkamnere. ‘Ange yuma kupnerur’ tenen, kware weik kunerure.

32 Allahda, ne nimi sisa ngebo, tali tuai mutu neitamai kunun ngebo utopu men kurure. Erda, tali tuai mutu ngebo kutuopda, ne cap, er cap, nimi upu bongdina neng damai kikiman betenemedi, nedi tamupra er tep upu ton tapakra peptene. Dinino, er Allahda, tuai mutu ngebo gum tep, angeda pio men peptenye.

33 Tonda, nun butene tep nengeda, ‘Ware ngebodi mali kupmarum do?’ tenen, upu bongdina deiyo ngebo, nun damai yaredi, ‘Ne amutarapu kurerume’ petenkemna tep, nun giso deiki er buru men deipkamsere. Ada, “Angeboda konum mali kupu dinin, angeboda gume, teleppu kurure,” pepra, upu bongdina tep, pio men pepsetue. Ato ngebodi, nun butene tep, men lepsikra deipsetue. Upu bongdina ila deiyo ngeboda, Allah pua!

34 Ne dipapu tenepmanada ake. Allah erdi ne wenemna tep, popkamner balena dopra, yukai deiptaptuopda, nedi er tep pio kware weik men kupnetue. Tonda, nedi er tep, ‘Ila kware kupkamnere,’ tenenun ngeda, gum kuptue.

35 Erdi ange kupnetuopda, nedi Allah er tep, kwar tenena gum di, er damaipu yana upu katuai dipu lap peptene. Ange putapmanera deiyoda, ake. Ada, yuk neng cap, ne kayapu neng capdi, ne tep, ‘Angeboda, pio mali weik kupka tep, Allahda ila di wenemrure,’ tenenenunge. Sun yuk nengdi ukupra tenenenung dinin, ne kaele. ‘Ange tenenenung ngeda, ne pio men kupsi. Neda, mali weik kuna ngebo men kununa tepa.

Aupu yumada Ayubdi, Bildad tep pepu.