Joe 1 | XteSC | STEP | Allah er si Yahwehdi, Petuel er mi Yoel tep, yan peipu upuda ake.

Joel 1

Israel Nesala, sun koun keca yuma sul podi jepropupa, mali kange doupi upu

1 Allah er si Yahwehdi, Petuel er mi Yoel tep, yan peipu upuda ake. 2 Uo, Yehuda tara nimi deiyo talepra kurumu wisi-wisi neng yumada, sun moupra gekepso. Tonda, Yehuda yala kurumu nesala yumada, ange moupra gekepso. Ada, sun kurumu taru neitamai yumada, akunmarpa dinmaruma utopu keca ton kuserur do? Ange utopu, sun co puna neng kurami taruda, akunmar keca utopunge ton kuramupa dirami do? Gume, ataru kunmar kecada, pumun taru di ton, ukunmanpa men diramitopu, sun ukutaru peda men dirume.

3 Atep nengeda, akunmarpa dinmarum kecada, sun nyapu gekenmangai, bena lap pepra nungkamrume. Upepra nukmumpa, ‘Sundi deipmengepa, dadeipdanen bankameng nyapu, gekenkameng’ tenen, nungdinkamenge. Ukupmengepa, sundi dordeipkameng nyapu yuma tep, peipdanen bankamenge.

4 Upepkopda, sul po dengeda pio men nukmanto. Weik yaidi, Israel nesala sun wa pepra kourami keca yala-yala yuma, yana sektapipa, koulopu. Menmena yanmai sul podi, koun keca yuma sektapmaidi, ton tapi ngeda, amenda taru yai sul podi yan jepra gawal dakropi. Tonda, ange konum kupkopda, amenda taru yai sul poda, gung pio weika di yakai taruda, im yuma leliproipa, im katuai men epmanto kupu. Asul po yai taruda, sun Israel nesala kourami keca yumada, jepra gawal dakropi.

Tonda, ange konum kupkopda, amenda taru yai sul poda, gung pio weika di, depdanen yakaramidi, Israel nesala kourami keca, yambulanun tupa kuamu dinin, ange yuma jepra gawal dakropi. 5 Uo, sun kange yawaramamre yu mepu jepra kumumdi, mana utopu kurumu nesalada, bukroso. Tonda, anggur me yungepu jerum nengda, engepra kunkurume. Ada, sun ukupu anggur me, sun sipyal damai di konum dalupropmasera tep, engenkamrume.

6 Ada ne mawa nesala, Israel yala nesala kunge mutu poryakanmang nengda, nimi gung pio weik, men nukmanto nengdi poryakanmange. Ukupmantoda, bura tara kuramre keca, er sida singa pus, er si yu weik kuramretopu, Israel mutu poryakanmang nengda, yu weik kununge. Ukupmantoda, ner singa pus, er lyom si belepra tengamretopu kupra, anesaladi Israel nesala tep, yu kange doupra poryakanmange.

7 Sunda tali men yange. Nun anggur tapuda, ‘Sekra kweneptapkamep’ tenen, yanmasenge. Tonda, ara coda, ‘Du mouprur’ tenen, yanmasenge. Ada, ‘Kwepra gawal daktapmepepa, du men moupkamre’ tenen, yanmasenge. Ange yuma konum jepropmenge pangeda, gonga yopu belelepkusere. Ukupra co bol yuma kopra jepropmangdi, co yo dempu tapmangpa, gelal sepropmardi, kuruptapmare.

8 Atep nengeda, sun Israel nesala yumadi, ‘Uo,’ tenepra engenkurume. Ukupmantoda, kaber ner tenpu, er mun peramre ngebo deprepa, ‘Uo, warya tep deipre do?’ tenen, mali kange doupredi engeramretopu kunkurume. 9 Tonda, sul podi akeca-keca yuma konum jeproprepa, jagung du utopu keca, er sida gandum cap, anggur tapu du purupmengepa, deriramre anggur me yuma cap, Allah Yahweh ^{▼▼Yahweh – Allah er si, tek sisi ngeda, ‘Yahweh’ kurure. Allahdi Musa tep, aupu katuai di lap pepu (Keluaran 3:14). Ibrani upu deiki di ahuruf ‘YHWH’ angepu sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH, angepu sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra ne tep gispal donkamnerume,” pepu. Ibrani nesaladi huruf YHWH sengnung dinin, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua. Tonda lap pena upu nomor 49 dirume.} er karena tep, er si eremna ati derirbaramepnge yumada, konum gum kupmare. Ukupmarpa, Allah Yahweh, er upu pen ati pio talepra tupa-tupa pel donung neng imam-imamda, ‘Uo, nun nai bo Allah tep, men kareptepe’ tenen, mali pepra engenapu kunmange.

10 Ukutaru wa pepra kouami wai dam yumada, konum mali kupra gum kupmare. Atep tu peda, mali kange doupra engenapu kurure. Ada tali tep gume, jagung du utopu keca gandum cap, anggur tapu du cap yumada, konum koulupredi, gum kupra deipkure. Tonda nintong telep peredi, telel weik kure co, er si Zaitun co peda, konum gum kupre pepu. 11 Atep, uo sun wa pepra yal keca koumum nesala yuma cap, anggur tapu talerum nesala yuma capda, mali kange doupmumdi ngolokra engepso. Tonda, wa pena kael kemumdi, perum neng yuma peda engepso. Ada sun kouamrum keca gandum cap, jelai cap, du mourepa kirumnge yumada, mali kupmardi, konum gum kupbanmara tep, engenkurume.

12 Tonda, anggur tapu du mouramre tapu yuma cap, wa pen damai tengrenge co yumada, konum kolupropre. Ada co si, ara co cap, delima co cap, kurma co cap, tonda co si apel co du cap yuma, koludonmarpa nesala yuma kange deipra men kunmangdi, mali pepra engenapu kunmange. Allahdi peipupa, nabi Yoeldi seku.

“Sun mali kun keca tapmumdi, Allah tep moronkamrume,” pepu upu

13 Nabi Yoeldi pepu. Uo, Allah Yahweh er si eremna ati pumbon neitamai talepra kumumdi, Allah gispal dona tep, gam keca popra, uku dongorumu imam-imam neng yumadi, mali kange doupra engenkamrume. Sun Allah si eremna ati neitamai kenekra pel dorum opkal yuma kwiriptaprumudi, mali opkal di giso getepdongopra, mali perumudi engenkurume. Ada lukunda neitamai yuma, ngolokra mali perumudi engenkurume. Deiyoda, sul podi sun wa koun keca yuma jepra gawal dangmanga cadi, Allah karena tep keca, gandum cap, anggur me cap, men kareryakankamenga tep, mali pepra engenkurume.

14 Ange tep nengeda, sun Israel nesala yuma tep peprumupa, jen jena gum di, si tepra kungedi, ‘Tek sisi atumida ila mambul tumi’ tenen, nimi weik bupra yangedi, upu talenkamenge. Ataruda, amutu nimi deiyo neng cap, wisi-wisi neng cap, tonda Yehuda yala nesala cap yuma tep, upuprumupa, sun yumadi Allah er si eremna atipu bupra yangedi, Allah Yahweh er tepapu, ‘Uo, nun nai bo Allah Yahweh, kandi melipseo,’ pepra moronkamenge. 15 Tek sisi sun yumada bicaue. Allah Yahweh, erda akeca-keca yuma talepra, pio deiki tara kuredi, pio Ila Puto Deiyo Ngebo ^{▼▼Allah – Acada, Ibrani upu deiki di, Allah er pe si tep, ‘Yahweh’ pepra seki. Allahdi Musa tep, “Ne si ‘Yahweh’ kael keprumudi, asipu erepra, ne tep gispal donkamnerume,” pepu (Keluaran 3:14). Tonda, akayat neitmaida, ‘Allah Shadday’ pepra seki. Aupu ‘Shadday’ deiyoda, sundi, ‘Allahda akeca-keca yuma talepra, pio deiki tara kuredi, pio Ila Puto Deiyo Ngebo kurure,’ tenena tep, aupu ‘Shadday’ pepra seki. Sun Ketengban nesala kael kemna tep, angeda konum jenek kupra sekmepu.} kuredi nesala yuma, sun mali kun keca kunumna tep, wenepkamre tumi konum damai kupre. Ada Allah akeca-keca yuma cap, im deiki jen talen malaikat cap talepra, ila puto kure ngebodi, ikin keca deipserepa, kange mun kupkamsere.

16 Angeda katuai konum kupmasere. Nun asuru di dinup jen keca yumada, konum gum kupbanmasere. Ukupmara deiki di, nun nai bo Allah er si eremna ati boda, sundi kange deipra pel men donunge. Mali kange doupra engenapu kununge. 17 Tonda, wa pepra yal keca kouptenga peda, gelal tu deiki cadi, yuma koludonapu kunkamre. Tonda gandum derin ati peda, moupra men deiptepe. Gandum yuma konum gum kupmara tep, adeiki di jen keca derin ati cap, bung keca derin ati capda, tali gopu kunkamre. Ukupmara tep, nun pio kange mun kupsere.

18 Tonda, kambing bisam cap, sapi bisam cap, sun jen keca mutmuta yumada, konum kolupredi gelal sepropmare. Ukupmarpa mutmuta batu ton men jenmangdi, puto boun kupmarpa, ila di ngolokra mali penmange. Ange utopu, domba bisam peda, sun jen keca gum kupmara cadi, ngolokra mali penmange.

19 Atep nengeda, ne nai Allah Yahweh, ‘Kan dipu melipsetume’ tenen, moropkene. Ada mutmuta paramre mutu yumada, konum gelal sepra kolupropre. Tonda, amutu paramre co yumada, konum kolupropmare. Ukupmara deiki di, imna ipmengepa, uku jenmar puto di epmare mutmuta yuma, kolupra sangamretopu konum kupmasere. 20 Tonda ukupmara tep, tali bura tara kunung gam keca yumadi, Allah kan tep, ‘Melipseo,’ pepra moronmakenge. Ada, sun agam kunung keca di jenung me yumada, konum cepra gum kupmarpa, sun koukna yuma gelal sepropmara tep, penmange. Nabi Yoeldi, Allah tep upepra moropu.